LG 首創支援 Dolby Atmos及頭部追蹤功能耳機、Tesla加入 Apple Music、傳Apple 准第三方 踩入 iOS｜廣東話【Price Weekly #145 2022年12月 】

如果有幾個程式或網頁你經常都會用到，除左Snap Layout外仲可以用Snap Group功能，意思即係將相關程式預先group埋放喺同一個Snap Layout內，需要用嘅時候就可以開返個群組，大大提高工作效率﹗配合埋 ASUS Zenbook 17 Fold OLED，17.3吋可摺式觸控螢幕仲有得隨時轉換6種使用模式，喺任可情況下可以輕鬆multitasking﹗想了解更多 Windows 11 2022 更新同ASUS Zenbook 17 Fold OLED嘅詳細功能，可以睇返影片簡介嘅連結。

雖然 Tesla 無好似傳統車廠咁每隔兩、三年就轉吓款，不過一樣好識得保持新鮮感。日前廠方就推出 2022.44.25.1 更新版本，加入 Apple Music，之後用家除咗 Spotify 同 Tidal 之外，就可以有多一個串流音樂平台選擇啦！另外，仲有麻雀遊戲，不過大家唔使咁興奮住，呢個遊戲只係類似「四川省」嘅玩法，即係用麻雀去玩配對，並非大家心目中嘅四人麻雀。如果小遊戲唔啱玩，相信 Steam 應該好多人都會讚好。不過 呢個 Tesla 版 Steam，目前只係 Beta 版本，而且只係開放畀新款 Model S 、 Model X，同埋訂閱咗「頂級連線功能」嘅車主。除咗以上所講有關娛樂方面嘅更新，實用功能方面就加入查看車內鏡頭，新版寵物模式，方向燈自動關閉等。但係各位車主要留意，今次嘅更新並非全球同步，未收到更新通知嘅車主就比啲耐性等多陣啦。

華為喺 19 年推出自家研發嘅流動裝置系統HarmonyOS，經過 3 年時間，日前HarmonyOS 更發表 3.0 版本，當時華為執行長就話HarmonyOS可以做到100%中國製造，甚至同 Android、 iOS 平起平坐。不過 ，近日就有網民分享咗一條片，見到佢將手上部 HarmonyOS 手機嘅語言選項由中文轉為英文之後，原本係手機設定頁面裡面顯示為「HarmonyOS」嘅「運行的服務」，當轉咗英文之後居然係變咗 Android System，之後條片就引起無數網民熱烈討論，認為佢係披著 Harmony 的 Android。頭先講到華為嘅 HarmonyOS可以同 iOS 平起平坐，咁到底有冇可能呢？話曬一直以嚟iPhone 都可以話係封閉式管理，擁有一個完整嘅生態圈。例如用家想喺 iPhone 入面買新 App，只可以經 App Store 去 Download，用家係完全無得揀。不過，有傳 Apple 為咗滿歐盟嘅法例要求，嚟緊將會重新設計iOS平台，批准第三方 App Store 進入 iOS。對於一直封閉嘅 iOS 嚟講，可以話係一個革命性嘅變動。iPhone 用家日後有機會唔使透過 App Store 下載 app，而應用程式開發者亦都唔使再畀 Apple 抽佣。對Apple嚟講呢個改動比起要換個 Type C 插頭影響更加深遠。歐盟嘅法案將會係2024年實施，預計同 iOS 17 嘅推出時間吻合，之但係開放 App Store，對於私隱同個人保安問題會唔會有影響呢？歡迎大家留言一齊討論吓。

Apple對於 iPhone 組件的供應來源一向都係不能說的秘密，不過日前Apple CEO Tim Cook
就係 twitter 自爆佢去咗位於日本熊本市Sony 工廠參觀，仲話好多謝對方過去十年為 iPhone 生產相機嘅感光元件，Tim Cook 今次高調透露行蹤兼且點名多謝 Sony，除咗係因為雙方係呢 10 年合作無間，更有指係同出年發表嘅 iPhone 15 有關。估計 iPhone 15 將會採用 Sony 獨家開發
全新技術嘅感光元件。上月初Sony 發表全新感光元件品牌 LYTIA。有指全新嘅感光元件，可以將每個像素嘅飽和度提高一倍，令拍攝暗位效果更加出色，大幅改善過度曝光或者係曝光不足嘅情況。講到咁勁，難怪 Tim Cook 都要親自飛去當地驗貨。

講完 iPhone 又講吓 Samsung，盛傳好快會發表嘅 Galaxy S23 系列，就愈嚟愈多資料流出。今次嘅焦點就集中喺旗艦型號 S23 Ultra，有傳為咗節省成本，只有 S23 Ultra 先會內置熱管散熱器
，定位相對較低嘅 S23 Plus 同 S23 就無喇。其實呢個傳言都並非無根據，之前就已經有消息指 S23 Ultra將會採用超頻版嘅 Snapdragon 8 Gen2 處理器。日前更有人發現疑似係 S23 Ultra 嘅資料出現喺中國工信部嘅網頁上面，當中所登記嘅處理器資料係 3.36GHz + 2.8GHz + 2GHz 嘅八核芯處理器，比起 Snapdragon 8 Gen2 原本 3.2GHz 仲要快，究竟事實係點？等 S23 系列正式發表之後就會知喇。

上星期先講完 Whatsapp 有更新，今個星期又有新功能發表。首先係視像通話方面宜家最多支援 32 人，追平返目前語音通話嘅人數上限。操作亦都有新玩法，用緊視像通話個陣，長撳住其中一個人，就可以放大佢個鏡頭同埋語音畫面，作用就係方便個別set做靜音同埋私chat。係介面方面
，新版本亦都加入咗彩色波浪紋作為關閉相機標籤，同埋加入咗通話內橫額通知，方便接收新通知。而 iOS 版本仲有畫中畫功能，方便一邊傾野一邊處理其他事務。不過畫中畫功能而家仲係 Beta 版，預計出年先正式推出。

近年愈嚟愈多手機支援 Dolby Atmos，LG 新推出嘅 TONE Free T90 無線耳機唔單止有 Dolby Atmos，更加有埋 Dolby Head Tracking 頭部追蹤功能，會喺用家移動個頭𠴱陣重新校準聲音，係全球第一對無線耳機有齊呢兩種功能。單元方面 採用石墨烯振膜單體，由英國音響品牌 Meridian負責調音嘅耳機空間處理技術。對於鍾意睇戲嘅朋友就更加適合，特別要講嘅就係，雖然個差電盒都係沿用 UVnano 差電盒，不過紫外線照射嘅範圍大咗，連埋個耳塞位都射到，廠方就話可以殺到 99.9% 嘅細菌，價錢就係 1799 元。

相信好多人都等緊部 Steam deck 嚟過聖誕，外國就有一位遊戲機達人，早前 DIY 一部遊戲機 Arduboy Mini。聽落似乎好似無乜特別，不過呢部遊戲機仲細過一張卡片，仲要內置咗 300 個遊戲，呢部遊戲機採用 16Mhz 處理器同埋有 16MB 儲存空間。由於太細部嘅關係，只夠擺一個 0.96 吋熒幕，解像度亦只有 128x64 像素加上無喇叭同電池，一定要駁住電先玩到，玩起上嚟相信都幾辛苦。但係價錢就好親民，29 美元就有交易。其實呢位遊戲機達人8年前已經自製過一部 Arduboy 遊戲機，當時部機有 200 個遊戲，外形同今次部 Mini 大同小異，睇嚟佢對遊戲機個團火咁多年都無熄滅過，大家又會唔會支持吓佢呢？