9/12《圍爐取戀》如何調教大細路男友

Charlie：咁佢體驗完一輪之後會唔會反彈㗎？即係辛苦完之後「唉呀，好攰呀！老婆都係畀返你呀。」
Maggie：哈哈，無喎，咁佢又幾乖㗎喎。佢到宜家我覺得佢湊仔仲犀利過我…
眾主持：哇！
Maggie：真係調教㗎… 叻叻：呢個高招呀！
東方昇：呢個真係調教喇！在座兩位女仔，你哋覺得大細路有啲咩（特徵）呢？可能鍾意玩玩具呀，或者一個嗜好… 可能玩figure就好鍾意嘅… 會唔會有啲咁嘅嘢呢？
專家Dickson：砌模型呀，打機呀咁樣嘅嘢…
Maggie：呃… 係呀。
東方昇：因為依個好典型就係，嗰個大細路就係所有嘢都係個小朋友嚟嘅，對所有嘢呢，佢鍾意嗰樣嘢就會好鍾意…

叻叻：好著迷。 東方昇：好著迷，好瘋狂…
東方昇：咁而身邊嘅另一半就好難受，因為好難拉住佢㗎。咁你點樣處理佢呢？
Maggie：我咪畀佢打囉！盡情咁打囉！然之後打到佢自己過嚟同我講：「你會唔會覺得唔開心？我係咁打機。」佢話佢打得好心虛咁樣。
眾人驚訝：吓。
專家Dickson：佢嗰個心虛嘅原因係咩呢，係佢喺度做緊嘢。即係譬如嗰份工作呢…
東方昇：定係唔係，我明喇，佢男朋友喺度打機，跟住佢喺度拖地喺度遮住個電視機嗰啲呀。（企起身扮拖地）
Maggie：係呀我做家務呀剩呀，之後就同佢講：「唔緊要呀你想打就打啦，即係我知道呢個係你放鬆嘅一個方法。每個人都需要放鬆，咁你就去打啦。」

東方昇：哇好好喎！但係我想問啦，你咁樣對付佢啦，其實係唔係你都睇到佢一啲性格特質，就係其實佢係心軟嘅人。
Maggie：係呀，佢係一個好單純，其實佢係一個好乖嘅細路仔嚟嘅。
東方昇：正常女仔呢，見到呢啲大細路就會嬲呀，就好似個阿媽咁呢，就即刻唔畀佢做，即刻話咁樣唔得。咁就令到個細路仔反叛，就再做得勁啲…
叻叻：係呀係呀。
東方昇：但其實你咁樣做呢，就令到反而佢就會心虛…
專家Dickson：反省同埋思考呀。 東方昇：係唔係呀？

Maggie：係呀無錯。
東方昇：係唔係都仲有啲嘢係你用力調教過㗎，係唔係關於安全感㗎？
Maggie：因為佢自己係一個好無安全感嘅人。咁一開始因為我自己比較多男仔嘅朋友，同埋都好 friend嘅。然之後咁當我同佢講話我要去同男仔嘅朋友，即係出去玩呀剩呀，咁佢就好大反應，佢就唔畀囉。佢就覺得，我出去同佢哋玩就即係背叛咗佢咁樣囉。
東方昇：哇呢個諗法都好小朋友呀真係。
叻叻：係呀。
東方昇：跟住呢？
Maggie：跟住我咪反抗囉，我有同佢理論啦，有爭取啦…

東方昇：點樣呢，點樣理論呢？因為好難理論，有時女仔，你男朋友咁樣講你你都難理論喎真係。
Maggie：溝通唔到㗎！
東方昇：因為佢真係會話：「你已經係我另一半，你仲周圍同啲男仔去街，你話朋友我真係唔信呀！」咁樣。
Maggie：我咪同佢講：「我已經同佢識咗好耐好多年，我同佢如果要有嘢晨早就有嘢啦，就而家就唔會嫁咗畀你做你老婆啦！」哈哈。
叻叻：我想講呢，我都有咁嘅經歷囉，但係我最後尾無得同嗰個人做朋友。
東方昇：係呀，所以好多女仔最尾都會屈服咗㗎。
Maggie：唔會㗎喎！如果你屈服咗第一次，就會有第二次㗎，所以我唔會屈服第一次。跟住後尾我咪帶埋佢出去見啲 friend囉，佢有睇到我同佢哋嘅互動呀各樣。然之後因為佢自己都有少量嘅女仔 friend，咁我就都有同佢講，我係咁鼓勵佢：「你可以同佢出去呀，唔緊要啦你哋去玩啦。」各樣咁樣。跟住我就會畀信心佢囉，我會畀佢知道我係對你100%信任，你可以去做你所有想做嘅嘢。

東方昇：一段關係最好嘅方法就係，你畀充足嘅自由度對方。即係我哋成日追求一啲自由嘅社會，社會上要自由，其實喺關係中都要自由㗎。你一定要畀足夠嘅自由對方，畀對方有自主權，咁佢先會尊重返你。如果唔係呢，你吓吓管住晒，好似一個極權領袖咁樣管住你另一半呢，係死硬㗎。總有一邊會唔開心㗎係。
Maggie：係呀，好大壓力最後就會爆煲。
東方昇：反而我會想問呢Maggie，咁點解你識得用呢招呢？因為多數女仔第一吓見到大細路都係會趷（走開）咗先㗎。
Maggie：因為如果倒返轉係我畀人咁對待，我都會唔開心啦。咁同埋我覺得就，最緊要係以身作則囉。
東方昇：係呀係呀，佢做到呢個。
Maggie：係呀我就好努力咁去做好自己，咁畀個榜樣佢睇。咁佢自己睇到喇，我諗佢都係見到我每一日都好努力，不論返工生活都好，咁佢見到我咁付出嘅時候佢自己就會有想改變嘅心囉。如果佢自己無嗰個想改變嘅心，咩嘢人都改變唔到佢呀。

東方昇：所以你而家就非常之幸福嘅。
Maggie：係呀好幸福呀，即係而家佢基本上係由一個大細路變成一個好有負擔嘅老公同埋daddy囉。哈哈。
Charlie：好sweet呀。 東方昇：真係正呀真係。
Maggie：經過咗七年嘅調教。
東方昇：好啦咁多謝你嘅分享啦，希望你繼續…
專家Dickson：用太極去治到你嘅另一半。
東方昇：係呀。我相信好多女仔聽完之後都要反思一下，點樣同另一半相處。同埋唔係淨係女仔，其實男仔有時都係，有時男仔都好硬淨可能仲硬淨過女仔，要諗吓其實要行遠嘅路線。
東方昇：感謝你。 專家Dickson、Charlie、叻叻：Thank you
東方昇：祝你幸福快樂 Bye bye

專家Dickson：咁其實大細路嚟講呢，咁佢的而且確有好多壞處，但某程度上嚟講呢，其實大細路又好過壞男人㗎喎。
Charlie：啱呀啱呀。 東方昇：係呀。
專家Dickson：點解咁講呢，因為大細路你可以當佢係一個BB，佢能力值未開發嘅一個人。但係壞男人係咩呢，就係佢已經知道晒所有嘢其實應該係點，而佢已經選擇咗唔好嗰面。咁所以大細路係有機會變成一個好男人，但係壞男人就無喇。所以我都係覺得揀大細路係好嘅！
東方昇：係係…
Charlie：同埋可以陪住一個細路成長，其實係好難得㗎。你睇吓Maggie而家幾開心。
東方昇：即係好似寵物小精靈養大佢咁樣。（眾人笑）
Charlie：你都可以咁講嘅。
東方昇：希望大家都識得點樣同大細路相處啦，好 Bye bye！