18/11《圍爐取戀》我男友話全部女人都係雞？

東方昇： 面前唔理女朋友感受，甚至乎佢咁樣講其他人，跟住覺得興奮。

專家Dickson：就係佢女朋友就成為咗佢攻擊對象。即係我喺出面，可能我受咗一啲女性俾嘅壓力，或者喺俾女性俾嘅攻擊，咁樣我翻到去就質女朋友兩鎚咁樣。

東方昇：我覺得佢梗係唔啱啦，但係我反而覺得，佢係唔係抑壓得好大呢？

（變態言行來自抑壓？）

叻叻：係唔係成日俾女性攻擊過？

專家Dickson：細個成日俾人鬧呀？

Charlie：佢阿媽係唔係都係咁㗎呢？

阿樂：呀係呀我有覺得其實都有啲影響，即係而家諗翻轉頭呢，佢有話佢媽咪係唔讚佢嘅，但係即係又唔係話佢好慘，有個悲慘嘅童年，但係佢就一直都覺得有啲嘢係缺乏啦，令到佢其實性格都好負面啦，佢話：「都冇人讚我嘅，你又唔讚我，我阿媽又唔讚我。」，佢永遠都係塞住咗係個Loop嗰度，都係覺得自己好慘呀，同埋冇人鍾意佢呀，冇人讚佢呀，即係佢係弱者呀，所以佢就突然間好自大囉。

東方昇：其實因為都冇辦法，就係原生家庭，可能佢阿媽同佢相處中比較少讚佢，令到佢就係自卑呀。呢個我讀心理學嘅典型過分自卑，令到佢要宣洩佢嘅自尊呀。

（東方昇認為：缺少讚賞令前度自卑生自大）

東方昇：要透過噉樣講嘢攞到自己自信呀。

Terry：或者咁樣，我代入阿樂個前度嘅諗法啦，佢由佢成長咁樣諗呀，我由細到大都無俾女仔，尤其是阿媽讚過，咁去到當我有能力做到一個成人嘅時候呢，咁佢就會可能想，我唔需要你哋嘅稱讚，根本我高過你哋。佢就用呢樣嘢去解釋，點解你唔讚我囉。咁佢個內心會舒服啲，我咁樣代入咁樣諗囉。

東方昇：一個心理嘅反彈......

Terry：係呀反彈嚟㗎我覺得係。

東方昇：咁但係好彩你而家離開咗佢呀。

阿樂：係呀，係佢飛我㗎，但係最后。

東方昇：吓！

Terry：仲俾佢飛？

叻叻：點解咩原因呀？

阿樂：當時佢係有好多嘢都唔滿意，但係佢又好得意，調翻轉又會話我唔滿意啦，即係譬如佢發脾氣嗰陣，我話你唔好發脾氣啦，即係好平淡咁樣講，佢就會話你而家就係發脾氣，即係有時候點到我頭暈囉。我心諗：咦，唔係咁㗎喎件事，咁但係呢，佢又掉返轉嚟拗囉，噉我都接受嘅，我都會即係嘗試去俾空間啊。

（前度以語言技術 誤導阿樂）

阿樂：咁又可以多啲私人時間呀，唔好成日同佢講嘢呀，但係最後呢，都係好少傾偈嘅狀況之下呢，佢都係話覺得我好難頂呀，所以分咗手囉。

東方昇：因為你前男友係一個仆街，就一定係㗎喇，但係反而我會覺得對大家或者女仔有幫助就係點樣你要reject佢，或者你當見到佢有咁嘅性格，要嗱嗱臨離開佢，因為我，我聽到你講呢，有兩次你都話，咁我就接受啦，係咪因為你A0，所以你其實你都唔係好知點同個男仔相處呢？

（東方昇提問：由於阿樂A0 不懂正常的兩性相處？）

阿樂：部份係，但係得一部份我都唔知道，其實正常嘅關係呢，係點樣對方都會有退讓，咁同埋另外一樣嘢就係，佢好開頭呢，可能拍拖第一兩個月已經認定咗囉。

東方昇：認定咗你係......

阿樂：係呀，認定咗係老婆咁樣。

東方昇：反而我覺得個問題係，我覺得正常，可能就會啲女仔見到男朋友咁樣呢，咁佢就會可能會離開佢，但係有少少可能阿樂，你覺得有冇可能你將自己個地位擺得太低呢？

阿樂：嗰陣我係唔覺㗎，因為我咁樣同佢講：「你覺唔覺得我哋嘅地位唔均等呀？」，然後佢話：「唔係呀，我哋好平等呀，我最追求就係男女平等，你千祈唔好當我係嗰啲港男咁樣，會服侍你呀，會氹你呀，你氹我時我都氹你，咁樣先係平等。」即係佢同我講嘅平等，其實我就係做緊低下嗰個，但係嗰一刻我就聽咗佢講。

（事主無意間降低自身地位）

阿樂：即佢講乜我都會覺得——呀，都係嘅，佢將嗰啲道理噠出嚟咁樣。

東方昇：係呀。因為呢個男仔嘅語言技巧好好呀，用好多方法去迷惑啲女仔，我會覺得就係對大家都有用就係，女仔要幾時要醒一醒：喂唔得喎咁樣，清醒喎。

叻叻：其實你嗰刻你個感覺係難受呢，我覺得你都要醒一醒囉，即係個一刻你內心你feel到唔舒服㗎嘛，譬如你格硬嚟對我做啲嘢嘅時候，我係唔舒服，我就會出聲，呢個係好基本嘅嘢囉。

（難受要表達 別過份遷就）

東方昇：啱。

叻叻：你如果你覺得你兩個都唔可以調到一個中間位嘅時候，你咪問下啲朋友意見囉，喂佢呢件事合唔合理呀咁樣做，如果你覺得，真係大部分人都話係唔合理嘅時候，你咪reject佢呢件事囉。

東方昇：所以阿樂，你嗰時你有冇問下你身邊嘅女仔意見呀？

阿樂：其實真係冇呀，連普通女仔朋友都唔會點樣提及囉，因為呢啲好多時候都牽涉咗，都係親密時間嘅事呢，咁其實我都好唔想呢，表露我呢面出嚟俾人。再加上，其實呢個男朋友好開頭呢，即係啱啱一齊嘅時候，佢都落曬order嘅，佢話：「你千祈唔好同你啲朋友講我地嘅嘢，我地嘅嘢係兩個人之間嘅事。」

（前度一早落藥 避免被揭穿）

阿樂：咁佢拍過一次拖，我而家懷疑呢，就係因為上一個女仔咁樣走咗去，所以佢就唔想再有身邊啲人知道啦，因為咁就呃唔到我囉。

東方昇：佢直情好似北韓咁樣呀，隔絕咗你同外面嘅人，跟住就洗腦，跟住就不斷去向你施壓，跟住就話畀你聽，你哋係最快樂㗎，你哋係最自由㗎，係咁樣呀。所以我會覺得解決嘅方法其實就係要聽多啲人地嘅愛情故事，就睇多啲《圍爐取暖》囉。

（睇多啲圍爐！ 化解愛情煩惱！）

專家Dickson：係唔係呀？

東方昇：真係呀！因為佢講呢個情況就係，可能佢又唔畀你講，根本你未拍過拖，你又唔知道真實相處係點樣。好啦咁阿樂，恭喜你啦，離開咗佢啦，最緊要係我覺得你，你唔好俾你影響咗下一段愛情，你開始要知道正常嘅關係係點樣囉。

專家Dickson：同埋唔好認為所有上網嘅人都係咁呀，起碼我唔係。

東方昇：係呀，係呀，係呀，係呀。

阿樂：好多謝你哋嘅意見，我會改善下我嘅價值觀㗎喇。

東方昇：好啦好啦。

專家Dickson：好，多謝你分享呀。

東方昇：好，拜拜~

---

東方昇：我覺得頭先個case嘅問題呢，我覺得可能係有個答法可以答到嘅，就係嗰個男仔好厭女啦，其實可能正正表達咗香港係冇呢個愛嘅教育呀。

（東方昇認為：香港缺乏愛的教育）

東方昇：因為男仔好多關於愛情嘅教育，就係睇AV或者睇論壇呀，而嗰啲喺一啲錯誤嘅諗法嚟㗎嘛，AV其實係啲人放大咗啲男仔嘅慾望，而呈現出嚟嘅一啲片嚟架嘛，其實嗰個嘢係錯誤㗎嘛，但係我哋而家咁成熟，梗係分到啦，我後生嘅時候可能我都分唔到呀，咁變咗佢哋睇呢套嘢，佢覺得男人就係咁㗎喎，甚至乎女仔睇完又覺得，呀~原來女仔要噉樣去服侍個男仔，所以個觀念錯哂，其實就係冇咗愛的教育。大家要分清，嗰個只不過係幻想嘅作品嚟㗎，你唔係覺得當係真㗎？即係我哋睇英雄片，唔通我覺得我真係識飛咩？一飛咪死囉，所以呢個要分到呀。
叻叻：你講起我好想問，Dickson有冇將幻想同現實擺埋一齊？

專家Dickson：係呀，所以就係因為我都，有時有噉嘅情況，但係個問題就係呢，你譬如你一遇到呢啲噉嘅愛情問題呢，你唔知問邊個？亦都唔知去邊度搵呢把尺啊。噉到最後會變成係點呢，咁你就會喺你嗰個朋友圈嗰度搵答案呀，咁但係個問題就係，你好多時候人係鍾意搵一啲啱聽嘅答案㗎，所以呢朋友圈入面就所有人都咁樣諗嘢，咁你就更加確實咗你自己一個錯誤嘅觀念囉。

東方昇：所以都係要睇我地.....

眾人：係呀！（笑）

Terry：我都想係咁講呀。

東方昇：睇多啲各樣方面嘅，有關愛情嘅嘢啦，你先學習到你嘅關係係應該點樣，因為又冇model answer，你要搵個適合你自己嘅係難㗎。

專家Dickson：即係簡單來說呢，就係千祈唔好太韓劇但係又不能太AV。

（Dickson金句：千萬不要太韓劇 但亦不能太AV）

東方昇：呀！啱啱拿捏喺中間。

Terry：係啦！

東方昇：但係最慘就係，而家女仔睇韓劇，男仔睇AV吖嘛。呢個就頭痛喇，所以冇辦法啦，每人搵自己嘅答案啦，摸索吓啦。好，拜拜！

眾人：拜拜~