23歲乖女假扮上學三年 兩天前的討論區留言 竟成家人消失的預言？｜原子檔案

除咗家庭和諧之外，彭彭自細亦品學兼優，就讀區內嘅Band 1 學校——保良局百周年李兆忠紀念中學。中學六年嚟，佢成績一直名列前茅，中三嘅時候更加獲得一家報館嘅助學金。而喺2013年，佢喺香港中學文憑試中考獲好成績，順利升讀香港中文大學，修讀護理學。彭彭成為大學生之後，佢嘅校園生活變得多采多姿，佢唔單止入住中大崇基學院嘅宿舍華連堂，而且更加「上莊」，即擔任宿生會幹事，協辦迎新營。另外，佢又參加咗合唱團同球類運動，喺多項比賽中獲獎，例如喺2014年崇基學院歌唱比賽中勇奪冠軍。喺同學同宿友眼中，佢係一個動靜皆宜、活躍好動，而且待人友善嘅傑出學生。佢同宿友除咗經常一齊玩，更加成日上載合照去社交網站。無論彭彭嘅家庭定校園生活，表面上睇都十分美滿，但邊個都估唔到，幸福嘅背後正醞釀住一場悲劇，而導致悲劇發生嘅，竟然係一個經常俾外人輕視嘅疾病。

〈濕疹〉
2014年暑假，彭彭正準備升讀大學二年級嘅時候，佢發現面上浮現紅斑，佢意識到困擾多年嘅濕疹原來已經再次復發。事實上，佢早喺三年前，即係讀緊中五嘅時候就開始出現呢個皮膚病。濕疹，係多種皮膚炎嘅統稱，呢個不具傳染性嘅皮膚疾病常見於患者嘅面頰、唇邊、手腕、肘彎同小腹皺褶等地方。濕疹症狀包括皮膚痕癢、乾燥、紅腫、有水疱同水疱破裂，嚴重嘅濕疹患者唔單止會飽受痕癢折磨，皮膚更加會不時滲出血水，所以呢個病唔單止會影響日常生活，更加會因為外觀問題而令患者造成心理壓力，可以話係令人身心都長期受盡煎熬。而對於濕疹成因方面，皮膚科專科醫生史泰祖就表示，如果雙親其中一方患有濕疹，遺傳比仔女嘅機會達到五成以上；假如雙方都患有濕疹，仔女有濕疹嘅機會將會更高。不過佢亦補充，仍然需要視乎父母濕疹嚴重程度，例如父母只屬輕微濕疹，比如痕癢、乾燥等，仔女有機會唔會有濕疹。而除咗遺傳因素之外，經常接觸致敏源亦都有可能引發濕疹問題，例如灰塵、花粉、寵物皮毛同皮屑，或者進食太多食物中嘅蛋白質，例如蛋、海產、奶類、牛肉等。而事實上由於唔少外人都會睇輕皮膚病所帶嚟嘅問題，所以嚴重嘅患者往往都承受住不為人知嘅痛苦，而彭彭亦唔例外。

〈扮上學三年〉
喺中五病發嘅時候，彭彭曾經向母親求助，希望能夠搵醫生治療，但係母親就指濕疹好快就會康復，所以冇帶佢求診。結果佢嘅病情唔單止冇慢慢減退，反而時常復發。對於呢件事彭彭一直耿耿於懷，認為母親令佢錯失醫治濕疹嘅時機。啱啱入讀大學嘅時候，佢嘅病情好幸運地冇惡化，所以佢渡過左一段短暫而快樂嘅大學生活。可惜好景不常，佢嘅濕疹再次復發，佢將病情講俾母親知，今次母親願意出錢俾佢睇醫生，不過由於當時佢嘅情況實在太嚴重，醫生同藥物都冇辦法改善情況。佢面上面嘅濕疹越嚟越嚴重，所以佢喺新學期開始之後已經唔敢返學校上堂同參加宿舍活動。

由於彭彭喺二年級開始就冇上堂，所以令佢嘅成績大幅退步，病情惡化加上學業進度跟唔上其他同學，兩方面都俾咗佢好大壓力，結果佢係2015年1月就決定退學，希望可以專心治理皮膚疾病。但係由於佢嘅父母對佢有好大期望，佢為免家人失望同責怪，所以唔敢將退學嘅事講出嚟。於是佢一直隱瞞父母同姐姐，每次出門都謊稱返學。但退學之後佢嘅病情依然未有好轉，加上受濕疹影響，佢一直冇辦法搵工作。

呢個時候，一個本來有着大好前途嘅女仔，不幸成為雙失少女。漸漸，佢嘅心情越嚟越低落，負面情緒無法宣洩，最終一件突發嘅事件就係父親節當日被揭開。

〈突然Whatsapp通知〉
時間喺到咗彭彭退學後三年左右，2018年6月16日，父母早前就約咗親戚聽日一齊食父親節晚餐，呢排彭彭嘅姐姐就因為喺內地工作未能夠出席。但係父親就喺當日嘅夜晚忽然喺WhatsApp群組中通知親戚，指佢哋一家唔會出席飯聚，理由係「屋企有事」。親戚都對呢個回應感到奇怪，於是詢問佢爽約嘅原因，但係後來親戚多番追問下佢哋都冇回覆。

第二日係父親節當日，即係6月17日，親戚對於彭彭一家突然爽約一是有啲擔心，於是就將呢件事話俾身在內地嘅姐姐知道，姐姐同親戚又多次打俾屋企，但都冇人回應。喺呢個時候，姐姐知道親戚擁有佢哋屋企嘅鎖匙，就建議親戚先行上門尋找佢哋，到咗當日下晝三點，親戚嚟到佢哋屋企門前，發現大門被反鎖，有鎖匙都入唔到去，而且佢連番拍門都冇人回應。親戚好擔心佢哋一家嘅安危，於是決定報警求助。好快，警員同消防員趕到現場，消防員破門進入單位，但係出現喺眾人眼前嘅竟然係一個可怕嘅畫面。

〈緊閉的大門〉
消防員進入單位之後，即刻發現室內遍布血跡，而且冷氣開到好凍，然後佢哋逐間房查看，先發現父親倒臥係一間房入邊，而且身負刀傷，之後佢哋再發現母親身處另一間房，身體俾綿被捲着。跟住消防員再喺另一間房發現彭彭，由於佢當時挨喺門後面，消防員開門嘅時候唔小心將佢推倒。當時消防員發現佢已經失去生命氣息，推測同一樽連接住嘅氣體有關。另外，佢哋又喺廚房入邊發現一把約30厘米長染血嘅長刀，懷疑係本案兇器。法醫到場驗屍，推斷三人死亡時間為近24個鐘，由於屋入邊冇打鬥同搜掠痕跡，財物亦完好無缺，加上單位大門反鎖、門窗緊閉、開住冷氣，所以警方認為呢件案件唔涉及第四人。

警方初步推斷，彭彭趁父母入睡之後加害佢哋，然後再使用氣體。而根據種種嘅跡象，警方將案件列為謀殺及自殺案，由屯門警區重案組繼續調查。之後警方由彭彭嘅家庭背景、病歷等方面調查，查出佢哋並無任何家暴記錄，亦都冇人患有精神病。而且根據鄰居口供，佢哋一家關係良好，好少嗌交，兩個月之前更加一齊去日本旅行，所以警方當時亦未能夠即時知道釀成慘劇嘅原因。
不過案件好快就有進展，因為警方喺彭彭嘅房間發現一封遺書，遺書裏面指自己長期受濕疹困擾，生不如死，雖然佢冇明確寫出殺害父母嘅動機，但係警方已經初步認為佢因為受濕疹困擾情緒低落而犯案。不過當時就有一名姓黃嘅鄰居指出，彭彭平日經常着短袖衫，唔似還有濕疹問題，黃女士更加曾經稱讚佢越大越靚，而就係警方努力搜證嘅時候，竟然有網民喺討論區上發現多個關鍵線索。

〈連登帳戶〉
有網民喺連登討論區發現一個叫做「白馬嘯西風」嘅帳戶，曾經多次發文談及濕疹之苦。佢曾經係4月7號，即係案發前約兩個月，喺討論區內一個標題為〈濕疹令到我好絕望〉嘅貼文中積極回應，佢訴苦指，患有濕疹嘅人唔可以喺熱嘅地方工作，而且用類固醇治療濕疹，雖然喺短時間入邊有效，但始終無法根治。除此之外，佢認為依賴類固醇等同染上毒癮，同時呢一種藥亦都有好多副作用，例如會令皮膚變薄、出現萎縮紋同紅皮症。佢更加直言「而你咩都做唔到」、「日常社交冇晒」，佢甚至表示動作大啲都會扯開傷口，嗰幾個月係非人生活。佢更加絕望噉指出「濕疹生仔慘過窮人生仔」、「窮，你都可以靠自己努力，濕疹，sorry，係一世都要suffer冇得改變。」

另外，佢又曾經開貼文表示，濕疹係母親遺傳俾佢。喺中五之後就經常病發，以現今嘅醫學水平冇得醫治，只可以控制同舒緩。佢又指呢個病唔會令到佢身亡，但係就對佢日常生活造成極大困擾，例如佢想搵暑期工，就因為患有濕疹而受到諸多限制，搵唔到工作。為咗應付日常開支，佢曾經向母親借錢，母親唔願意，更加抱住「過一兩日就冇事」嘅態度對待佢，令到佢非常無助。

直到佢升讀大學二年級，母親先至俾錢佢醫病，可惜已經太遲，病情難以有效控制。最後，佢指生活好大壓力，好辛苦，唔知點算好。佢又講，呢則貼文純粹發洩，希望有人明白佢嘅處境。嗰個帳號除咗多次表達濕疹帶嚟嘅痛苦之外，更加係6月15日，即係案發前兩日，發表左一篇有關一種「氣體」嘅貼文。初時，貼文引起嘅討論並唔多，喺少數嘅回應入邊，有人認真討論呢個方法係咪可行，更加有人建議其他方法，但係就冇人關心發文者點解會有呢個諗法，或者鼓勵對方解決真正要面對嘅問題。

由於「白馬嘯西風」所講嘅方法同彭彭最後嘅下場一模一樣，加上「白馬嘯西風」又曾多次因為濕疹而訴苦，而且有網民翻查嗰個帳戶嘅留言記錄，發現佢嘅年齡、住處、學校同彭彭相同，亦都喺事發前發文指同屋企人去日本旅行。好多網民喺貼文中表示，希望「白馬嘯西風」並唔係彭彭，亦有人留低改善濕疹嘅建議，但係自從屯門三屍案被揭發之後，「白馬嘯西風」就冇再喺討論區發問或者留言，所以網民相信呢個帳號係屬於彭彭本人。同時，警方亦發現佢嘅電腦曾經瀏覽有關使用刀同埋氣體嘅網站，加上「白馬嘯西風」嘅留言亦都顯示佢對母親不滿，認為母親將濕疹傳俾佢，更加唔俾佢及早醫治，種種跡象都顯示彭彭處心積慮用刀加害父母。

〈只遺下姐姐一人〉
喺事件曝光之後，彭彭嘅姐姐由內地趕返香港，處理家人嘅身後事。姐姐返到香港之後，警方立即向佢錄取口供，佢證實自己同妹妹的確長年受濕疹困擾，佢表示一家人一向相處和洽，而妹妹性格內向同孤僻。佢指自己對妹妹嘅行為大感震驚，不過佢強調患上濕疹係非常痛苦，而且外人係無法理解嘅。姐姐落完口供之後情緒依然低落，由親友陪伴離開。喺6月19日朝早八點幾，姐姐同親友前往富山公眾殮房辦理認屍手續。過程中，佢哋神情哀傷，而且不發一言。另一方面，警方亦重返案發單位，翻查閉路電視片段同埋帶走一箱證物。最後，可能由於案件表面上已經水落石出，所以傳媒亦都冇報道事件嘅後續發展。

究竟連登會員「白馬嘯西風」係咪真係彭彭，呢個問題對於外界而言仲未有確實答案。當時對於有疑似連登會員行兇，一眾會員都紛紛表示驚訝，有人批評當時喺「白馬嘯西風」嘅貼文中，曾經有連登會員同樓主一齊討論使用一種「氣體」係咪可行嘅方法，但係就冇人發現問題嘅嚴重性，同嘗試了解對方提問嘅原因，直指好多網民都心智未成熟，以及批評連登討論區經常充滿負能量嘅現象。所以有人認為，如果「白馬嘯西風」真係彭彭嘅話，當時如果有網民嘗試留言阻止同鼓勵佢，有可能就可以挽回三條人命。

另外，香港撒瑪利亞防止自殺會總幹事曾展國認為，如果網民發現有關自尋短見嘅貼文時候，唔應該出聲「加把口」，隨意加上個人意見或評論。佢明言：「因為每個人嘅困境都唔同，有人覺得可以輕易渡過，但係有啲人唔同睇法，反而令到事主更加困惑。」所以佢認為，網民可以喺留言入面嘗試鼓勵對出對方講出苦況，令佢哋嘅負面情緒得以宣洩，同時亦都可以建議事主尋求專業人士協助。

長期病患者，除咗要面對疾病帶嚟嘅身體健康問題之外，往往仲要承受住不為人知嘅沉重心理壓力。就正如彭彭所講，嚴重嘅濕疹的確唔會威脅到佢嘅生命，但係外人就好難以理解疾病對身心嘅不停折磨。最終呢個皮膚病，令到一個本來前途一片光明嘅女仔，心智無法正常運作，甚至走向極端，實在令人非常惋惜。