沒有手腳的已婚作家 表面上是好爸爸 私下卻是出軌50次的極品渣男？｜原子檔案

當時佢嘅父親喺產房外得知道個仔冇四肢，情緒激動到差啲暈倒，之後佢更加一度唔敢將呢件事話畀妻子知道。而由於個仔特殊嘅健康問題，佢差唔多出世後一個月，母親先至第一次見到四肢唔健全嘅佢。不過，母親就冇傷心或者失望，佢反而同丈夫講「我嘅孩子好可愛」。

之後乙武洋匡喺父母嘅悉心愛護之下愉快咁成長，而且父母都冇將佢當做病人看待，買咗電動輪椅畀個仔活動，亦畀佢同其他四肢健全嘅小朋友返學同埋玩。而乙武洋匡性格外向好動，佢天生殘疾，但就冇阻礙佢對各種運動嘅熱情，例如游水、打波、爬山。喺呢啲過程入面，佢結識咗好多朋友。

喺家人同埋朋友嘅幫助，加上自身嘅努力下，佢更加成功考上著名嘅早稻田大學，修讀政治經濟學，之後更一躍成為一個社會名人。

《五體不滿足》

喺成為大學生之後，乙武洋匡積極參與社區活動。佢曾經喺電視節目上鼓勵大眾用積極嘅態度面對人生，希望自己能夠成為人哋嘅榜樣。除此之外，佢喺大學勤力好學，主動參與唔同類型嘅比賽，屢獲殊榮。當中佢最擅長嘅係英文演講，曾經多次喺比賽中獲得冠軍。之後佢更加開始將自己特別嘅生活體驗寫成書，喺1998年出版首本書籍《五體不滿足》。就係咁，佢除咗係一個大學生之外，更加成為咗一個新晉作家。

喺書入面，佢以輕鬆嘅肇調敘述自己從出世到大學嘅生活。佢透過呢本書籍，表達出好多積極樂觀嘅想法。例如佢曾經自述「殘障只係我身體嘅特徵」「沒有必要為身體上的特徵而苦惱」，佢又提到「身障是不便，但並非不幸」。

而事實上，除咗乙武洋匡之外，力克胡哲Nick Vujicic亦係同樣患有先天性四肢截斷症嘅另一個名人。力克胡哲生於1982年，只係比乙武洋匡細四年，係一名澳洲作家、基督教佈道家同埋男演員。佢曾經發表自傳《人生不設限》記述佢出世之後因為缺乏四肢嘅種種經歷。其中佢因為身體缺陷而飽受歧視同埋欺凌，後來佢喺家人、朋友同埋信仰支持下重新振作，仲創立咗勵志演講公司，以自身嘅經歷鼓勵咗好多殘疾人士。佢勵志嘅事蹟傳遍全球，各地嘅媒體都爭相邀請佢做演講。

同樣地，當年《五體不滿足》呢本書亦令喺日本嘅乙武洋匡一舉成為暢銷書作家，佢正面嘅思想啟發咗好多讀者。當時呢本書出版7個月已經賣出超過四百萬本，讀者年齡層廣泛，由8歲至到87歲都有佢嘅支持者，甚至喺韓國亦大受歡迎。

而兩年之後即係2000年，乙武洋匡更加獲得都民文化榮譽獎。當時佢除咗事業達到高峰，名利雙收之外，冇幾耐，佢更加事業愛情兩得意。

「我有養過狗所以沒問題！」

時間到咗2001年，年約25歲嘅乙武洋匡同年僅22歲嘅大學學妹仁美結婚。佢哋早喺四年前，即係1997年嘅公益活動認識。當時仁美已經被乙武洋匡嘅熱情深深吸引，兩個人相識之後好快就成為情侶。喺兩個人交往三年半之後，乙武洋匡意識到父親在世日子唔多，所以決定成家立室，向仁美求婚。

但係佢就擔心自己嘅殘疾會令女朋友卻步，所以佢喺求婚嘅時候就問對方「我雖然可以去廁所但係冇辦法自己擦屁股，你每次都要幫我清理咁都冇問題嗎？」佢冇諗到仁美竟然一口答應，更加回答「我有養過狗所以冇問題」

之後兩個人正式結為夫婦，而仁美個名前面亦加上咗丈夫嘅姓，改名做乙武仁美。但係由於仁美性格內向，表示唔想喺婚禮中，連續三個鐘頭都受到其他人注目，所以就要求唔好舉辦婚禮。

喺結婚之後兩個人生活得好愉快，而喺2008年，妻子更加生咗個仔。之後佢再喺2010年、2015年，先後生咗一仔一女。當時，仁美努力咁喺屋企做家庭主婦，而乙武洋匡就積極咁工作賺錢。依一家五口喺旁人嚟睇，就係一個幸福美滿嘅家庭。

但令人意想唔到嘅係，一連串不堪嘅事件就突然被曝光，令大眾大跌眼鏡。

「下半身滿足」

毫無疑問，乙武洋匡嘅事業發展一直都一帆風順。佢除咗喺1998年推出著名嘅五體不滿足之外，亦先後寫過幾本書籍，仲曾經喺電視台工作。而喺2007年3月，佢取得小學教師嘅教育許可資格，而且喺同年4月開始係小學教授社會科學與道德課程。喺校內，佢憑住正面嘅形象深得同學同埋老師嘅喜愛。不過佢嘅目標就唔係單單想成為一個小學老師，所以做咗三年老師之後佢就辭去工作，決心進軍政界。

喺2013年佢就當上咗東京都教育委員會委員，仲喺2014年發起咗志工團體，一年之後佢就卸任咗教育委員會委員一職，並入讀政策研究大學院大學，為2016年夏季嘅參議院選舉作出準備。但係就喺佢準備就緒之際，就突然被傳媒揭發多宗令人驚訝嘅醜聞。

喺2016年3月，日本一本叫做《周刊新潮》嘅雜誌指出，乙武洋匡曾經至少同5名女性發生婚外情。其中佢2015年年底，即係個女出生嘅嗰年，同一名二十幾歲嘅女性前往突尼西亞同埋巴黎旅行。喺旅行期間，佢哋唔單止畀目睹到喺外面約會嘅畫面，兩個人更加同房。

但負面嘅消息接踵而來，有電視節目工作人員透露，乙武洋匡出軌對象其實唔只係得五名女性。經記者明查暗訪之後，發現佢竟然同超過50名女性發展出不倫關係，雜誌拍到佢唔少外遇嘅相，當中大多數更加係年輕貌美嘅女大學生同埋OL。

喺醜聞傳出之後，即刻掀起咗日本大眾嘅譁然，有人驚訝作為殘疾人士嘅乙武洋匡，究竟有咩不為人知嘅魅力，竟然吸引到咁多女性接近佢。但最令大眾睇唔過眼嘅係，佢一直都以正面積極嘅好好先生形象示人，如今的形象瞬間崩壞。當時更有日本傳媒以佢嘅著作名嚟揶揄佢，發表一篇叫做《五體不滿足 下半身滿足》嘅文章。

但係面對自己丈夫排山倒海嘅不忠消息，作為妻子嘅仁美就選擇逆來順受。

秘書是「女朋友」

消息傳出之後，乙武洋匡一開始堅決否認，但係隨住佢出軌嘅證據同埋新聞越嚟越多，最終佢最好喺官方網承認報道係事實，仲發表道歉聲明「我發自內心向妻子、妻子雙親、三個孩子道歉，同時向喺工作生活中關照自己嘅所有人深表歉意」。除此之外，佢登出妻子仁美嘅自白文章，當時佢喺文中竟然道歉，仲表示「會引發咁嘅事，作為妻子嘅我都有責任」

仁美主動出面維護出軌嘅丈夫，激發咗大眾嘅輿論，有人揣測佢打算用大方包容嘅態度，希望丈夫繼續留喺身邊。跟住仁美又接受雜誌《週刊文春》嘅訪問，佢詳細咁講述15年嚟嘅婚姻生活。佢坦言結婚嘅時候自己年紀細，只係得22歲。當佢哋正式一齊生活嘅時候，先至意識到原來照顧丈夫比起想像中困難得多。佢又表示當自己生咗三個小朋友之後，每日都花盡心思照顧佢哋，令佢身心非常疲累，未有心力照顧丈夫。於是佢慢慢產生咗一個想法，就係好想從照顧丈夫嘅生活中獲得一啲解放。同時由於小朋友需要早睡早起，所以佢就叫丈夫工作超過夜晚十點就唔好返屋企，咁樣導致咗兩夫婦缺少親密生活，令丈夫需要靠其他女性滿足生理需要。仁美亦表示，乙武洋匡曾經對秘書落手，多次喺公司發生關係，甚至稱秘書係女朋友。

佢再次強調丈夫出軌自己都有責任，最終兩個人經過討論之後，決定為咗家庭努力和好。雖然兩個人都向外界表示會共同努力解決問題，但係乙武洋匡多次出軌嘅一事，已經為呢個家庭帶嚟咗冇辦法逆轉嘅局面。

「不照顧我就告你！」

醜聞被揭露之後，乙武洋匡向傳媒表示需要花時間修補家人嘅關係，所以決定唔參選。不過即便妻子仁美公開咁維護丈夫，但係佢哋嘅關係仍然未有好轉。喺2016年6月，兩個人忍受唔住輿論壓力開始分居，而喺同年9月，乙武洋匡喺網站上面宣佈同仁美離婚，結束呢段長達15年嘅婚姻。

當時佢喺網站上面表示「我對唔住自己妻子同埋孩子，所以我尊重佢嘅決定。仁美係一個好女人，我對唔住佢」。而喺五個月後，乙武洋匡喺富士電視台綜藝節目上面表示，妻子一直默認婚外情，更加指出離婚係為咗小朋友。

但係仁美得知道前夫呢段公開言論之後，即刻提出控訴，認為乙武洋匡違反咗「守秘義務契約」，而且言論同事實不符，提出違約金同埋精神損害賠償。之後更加有傳媒揭露咗乙武洋匡嘅黑暗面，指佢曾經對前妻精神騷擾，私下同對方講「如果唔照顧我，就用障害者虐待防止法嚟告你」

時間到咗2017年，當初率先大爆乙武洋匡醜聞嘅雜誌《周刊新潮》再次爆料，指仁美已經入稟日本東京地方法院，民事控告前夫，要求佢就多年嚟出軌行為賠償，更加起訴另外五名情婦。而當時仁美亦確認咗呢個消息，但拒絕透露更多詳情。

最終經過雙方協調之後仁美決定讓步，兩人和解。不過《周刊新潮》又指出，由於兩個人離婚之後，三個小朋友嘅家務權全部都畀曬仁美，乙武洋匡為咗同小朋友見面先至申請調停。而且亦有人質疑，佢為免被傳媒揭露更多外遇對象，先至決定同意同仁美和解。

而隨著兩個人庭外和解，大眾都以為事件會告一段落。但係男主角又再次被傳媒發現佢私下繼續風流快活。

勵志渣男

正當大眾都認為乙武洋匡今次會修心養性，為下次選舉作出準備嘅時候，就有傳媒發現佢原來已經有新戀情。有指佢同仁美分開冇幾耐，就結識咗一個比佢細二十年嘅女朋友。嗰個女朋友叫做岩澤直美，都係早稻田大學嘅學生，更加係一個外貌吸引嘅混血兒，令一眾日本男士羨慕不已。而且兩個人發展進度迅速，已經見過家長亦有打算結婚。

除咗感情生活多姿多彩之外，佢係2018年亦啟動咗一個義肢計劃，打算利用高科技義肢企番起身。佢將研究過程寫成《四肢奮迅》一書，又喺Youtube開設頻道「乙武洋匡之情熱教室」，之後佢再獲邀請到電視節目上面宣傳，當時佢嘅義肢計劃進展順利，成功靠義肢企番起身，更加能夠短暫咁行走。佢將過程拍成短片分享到網上面，引起咗網友討論。

喺呢個時候，有網民讚嘆佢由離婚到重新出發嘅不屈精神，亦有人繼續鬧佢係渣男，甚至有人嘲笑佢做勵志渣男。

雖然佢嘅事業同埋感情狀態再次引起外界關注，但係佢風光嘅生活就令前妻同埋三個孩子相當不滿。佢哋認為乙武洋匡自私嘅行為令佢哋一家人生活痛苦，但對方事後就咁逍遙快活。事實上，乙武洋匡離婚之後，佢個仔一直都唔願意見佢。而喺2019年，乙武洋匡曾經向家事法庭提出同孩子見面嘅要求，結果再次遭到自己嘅小朋友拒絕。可以見到乙武洋匡對仁美同埋三個仔女嘅傷害，恐怕難以修補。

11500級樓梯

近年，為咗重新建立正面積極嘅形象，乙武洋匡喺2020年開始經常喺twitter拍行樓梯嘅影片。喺2021年一年內，佢總共完成咗一萬一千五百級樓梯。而喺2022年3月1日，佢更加上傳一條影片，喺邊入面佢一口氣行咗六十級樓梯，好多網友都讚嘆佢嘅毅力，稱呢個行動係奇蹟成就。

不過亦有人認為佢呢啲行為，只係為咗二零二年參選議員嘅工程鋪路。果然係兩個月之後即係2022年5月19日，佢喺網上面宣佈以無黨籍身分參選第26屆日本參議院選舉，選區為東京都。當時乙武洋匡表示想消除殘疾人士、性小數群體、同埋海外血統人嘅生活困難，創造一個人人平等嘅工作環境，實現一個「不必放棄嘅社會」。佢仲話想貢獻自己嘅影響力，為生活困難嘅人解決煩惱。

呢個選舉係7月10日舉行，最終佢獲得32萬票，排名第9，未能當選。

乙武洋匡，毫無疑問係一個逆境自強嘅人。但係就抑壓唔住對異性嘅慾望，令身邊親人多次受傷。或者無論佢幾咁努力去建立良好公眾形象，相信佢瘋狂出軌不忠嘅印象，仍然會喺大眾心目中久久不散。