一個香港傑出運動員 為何淪落成案中被包養的酒樓侍應？｜原子檔案

陳學殷出生於1983年，父母係知識分子，佢哋讀書嘅時候修讀藝術，後嚟父親從事設計行業，母親就成為咗美術老師，雙親都希望個女喺藝術方面有成就，所以就積極栽培佢。母親安排陳學殷學習畫畫、彈鋼琴，仲喺著名舞蹈家毛妹同王仁曼嘅舞蹈學校學習芭蕾舞，母親希望個女能文能武，樣樣皆精。除此之外，父母都會喺假日陪個女習畫。喺佢哋悉心栽培之下，加上佢本身嘅天份，佢係多方面都表現出色。除咗藝術，佢喺學業同埋體育方面都非常優秀，而且多次獲獎。佢每次獲獎，父母都會為佢影低相，留待日後回顧佢嘅風光。

完成小學課程之後，陳學殷就讀到馬鞍山嘅香港中國婦女馮堯敬紀念中學。之後，佢繼續發揮出眾嘅才能，獲選成為城市當代舞蹈團嘅一份子。而到咗1996年，13歲嘅陳學殷當時仲喺一個中一生，但係邊個都冇諗到，一宗震撼全港嘅不幸事件就突然同佢擦身而過。

八仙嶺大火
係1996年2月10日，當日係馮堯敬紀念中學嘅旅行日，49名中一生由5個教師帶領之下，嚟到咗大埔區嘅八仙嶺遠足，正當佢哋開心咁享受大自然之際，附近嘅草叢突然起火，火勢迅速蔓延，可惜不幸地，最終有2個教師同埋3個學生葬身火海，13人受傷。呢宗嚴重嘅事故被傳媒稱為八仙嶺大火，而陳學殷當日咁啱就因為身體唔舒服，冇跟隨學校到八仙嶺遠足。事後，佢嘅父母都認為個女幸運咁逃過一劫，仲表示「大難不死，必有後福」，結果個女嘅生活果然好快出現變化。

令人眼前一亮
大約喺1997年左右，陳學殷係一次蛙艇選拔賽入面獲得香港蛙艇總會選中，有機會到香港體育學院接受訓練，加入港隊，但亦代表咗佢可能冇辦法繼續向跳舞方面發展。最終佢決心成為一個蛙艇運動員，而父母亦支持佢嘅決定。就係咁，佢就開始刻苦嘅訓練，好快佢就展現出驚人嘅運動天份。

喺香港體育學院訓練1年之後，即係1998年，佢就代表香港到泰國曼谷參加亞運，當時佢係隊中最年輕嘅隊員參與女子雙人蛙艇賽，結果佢哋喺賽事入面獲得第4名。雖然未能夠攞到獎牌，但表現已經令人眼前一亮。喺第2年，佢喺一次慈善活動入邊創下咗蛙艇機嘅記錄。之後，佢因為喺港隊入邊有最傑出嘅表現，獲時任特首董建華頒發獎狀同埋獎學金。喺同年，佢又獲得香港遊樂場協會頒發傑出青少年榮譽獎，仲由曾蔭權手中接過獎狀。係2000年，佢再參與亞洲蛙艇青年錦標賽，除咗獲得銅牌，更加創下咗港隊歷年最佳嘅成績。係1年之後，佢再參與香港第三屆亞洲室內蛙艇錦標賽，最終亦獲得銅牌。

而喺2002年，當年只有中五畢業嘅陳學殷雖然喺運動員生涯中獲獎無數，但系因為佢學業成績唔理想而冇辦法升學，而且有指被感情生活影響訓練，加上為咗生計，佢只好放棄運動事業。但係機緣巧合之下，呢個決定就令佢遇上一個富商。

銀彈攻勢
喺離開運動場之後，陳學殷首先做咗售貨員，而直到2005年，廿二歲嘅佢轉到去葵芳新都會廣場嘅美心皇宮酒樓任職知客，佢憑住美貌同埋前香港代表隊運動員呢個名氣吸引咗唔少食客留意。當中，一個富商更加對佢深感興趣，主動結識佢。呢個富商喺1939年上海出生，佢早已經成家立室，有3個女同埋1個仔，但係面對外貌可人，而且年紀相差44年嘅陳學殷，呢個富商就不斷咁主動獻殷勤，係啱啱認識只有一個月，富商就發起強勁嘅銀彈攻勢。

有一次，佢到咗酒樓將寫上表達好感嘅紙條同埋連同5萬蚊嘅支票交咗畀佢。初時，陳學殷唔敢無緣無故接受對方嘅好意，但係富商就堅持叫佢留住支票以備不時之需，之後佢再送上一張2萬蚊嘅支票，將心意寫喺紙條同埋相約睇戲，然後佢更加借故接觸陳學殷隻手。之后，富商每次到茶樓飲茶都會額外俾佢100至到幾千蚊嘅貼士，佢又會送上名牌手袋，又曾經提議協助對方經營花店。冇幾耐，富商邀請陳學殷到佢嘅公司工作，佢除咗提出8000蚊月薪之外，仲表示如果每個月陪佢茶聚一次，就可以額外獲得1萬蚊。就係咁，陳學殷接受咗佢嘅邀請，到佢嘅公司擔任文員。之後富商多次喺公司意圖強吻同埋搭住佢嘅膊頭，而直到陳學殷表明自己當佢係契爺，富商先停止毛手毛腳嘅行為。而當時，陳學殷亦認識咗一個姓林嘅男朋友，兩個人感情好好，開始同居生活。喺2006年，佢哋更加奉子成婚。富商得知道佢準備結婚之后，更加開出兩張5萬蚊嘅支票贈送俾佢。但事實上，陳學殷嘅婚後生活並唔愉快。

離婚的想法
喺陳凱欣結婚冇幾耐就生咗個仔，喺嗰個時候，佢已經辭去咗富商公司嘅工作，不過依然同富商保持聯絡。但係，陳學殷嘅丈夫喺結婚之後冇搵工作，只係靠住每個月8000蚊嘅綜援金維生，而且佢揮霍金錢，亦冇分擔過照顧個仔嘅責任，甚至佢經常使用暴力，又另結新歡夜夜笙歌，令陳學殷每日都苦不堪言，於是，陳學殷只好向一直照顧佢嘅富商訴苦。對方得知道陳學殷嘅慘況之後就再次暗中俾錢佢，協助佢解決生活嘅開支，而且兩個人更加開始書信來往。期間，富商多次提議佢離開丈夫。漸漸，佢開始萌生起離婚嘅念頭。直到2010年，佢終於忍無可忍，決心同丈夫離婚。

「我唔係雞!」
時間到咗2010年3月，陳學殷同埋富商相約喺尖沙咀金巴利道嘅「輕鬆一下」餐廳食早餐，女方表示已經對丈夫死心，打算離婚。之後，富商就表示可以幫佢請律師處理離婚手續。不過，佢就睇準機會，表示目前佢哋冇親密關係，所以冇藉口照顧佢，於是就要求更進一步發生關係。之後，兩個人就先後兩次嚟到咗百佳酒店開房。喺完事之後，富商都會俾2000蚊利是佢。而到咗4月底，富商食過翻尋味，試圖再次相約陳學殷開房。原本，佢哋一如以往先去食早餐，不過由於當日陳學殷遲到，富商就先到酒店房等佢，但當陳學殷嚟到咗酒店，一打開門就見到富商已經除哂衫，而且，對方更加要求陳學殷觸摸佢，佢覺得自己被對方侮辱，更加大叫「我唔係雞」，然後拒絕進行親熱行為。富商被拒絕之后大感無奈，然後放低咗1000蚊就離開。陳學殷自知得罪咗富商之後就即刻打電話俾佢，希望能夠修補關係，但係富商就刻意避開佢，於是學殷竟然做出一個令佢恨錯難反嘅舉動。

一封匿名信
喺2010年5月13日，富商收到一封匿名信，信中有人表示擁有佢嘅不雅影片，仲向佢勒索300萬。信中人要求佢喺5月14日嘅下午3點前，將啲錢存到一個東亞銀行嘅戶口，否則就將影片傳到報館同埋雜誌社，而且信中仲寫上「我冇好日子，你都冇等」字眼，態度強硬。雖然寄信人冇表明身份，不過富商就憑住字跡認出勒索信係出自陳學殷嘅手筆，佢嘗試聯絡對方但係對方冇回應，於是佢就決定報警。警方接報之後嘅第2日就派出一名臥底警員扮演富商嘅下屬，代表佢約見陳學殷。兩個人見面之後，警員稱富商畀唔起300萬，陳學殷就反問佢「可以畀幾多」除即，警員表明自己嘅身份，拘捕咗佢。

而喺5月15日，案件喺荃灣法院提堂，陳學殷被控一項勒索罪，佢被押至法院嘅時候面容有啲憔悴，著住樸素嘅衫同埋略施脂粉。當時，辯方指陳學殷冇案底，由於佢每日都要照顧個仔，所以希望申請保釋，但係裁判官就擔心佢潛逃同埋騷擾證人，所以就駁回保釋申請。係5個星期之後即係6月24日，案件再度提訊，當時陳學殷已經收押一個月，面容更加憔悴，佢戴上黑色粗框眼鏡，冇化妝，只係蓄住一頭馬尾出庭，係庭上面不時用紙巾抹眼淚。當時，辨方指佢為咗同富商和好先會寫勒索信，實際上冇勒索嘅意圖，只係為咗引起富商嘅注意，加上陳凱欣亦表示，佢根本就冇所謂嘅影片。辯方又指，若果喺保釋之后，佢會同父母同住，接受父母嘅監管，而且佢好掛住3歲嘅仔，唔會棄保潛逃，最終裁判官準許以現金5萬蚊同埋人事擔保外出，而案件亦押後到6個月後開審。由於提堂之後，多間傳媒大肆報導案件，引起咗外界好多猜測。而當中，最多人討論嘅就係富商嘅身份，所以大家都希望富商喺出庭嘅時候揭開佢神秘嘅身份。

X先生
時間到咗2010年11月底，係開庭前一個星期，富商突然表示佢身體欠佳同埋記憶力衰退不宜出庭，但係由於遭到陳學殷代表律師反對，加上法官亦質疑佢為咗避免身份曝光而詐病，所以經過考慮之下，富商最終決定出庭，不過由於佢喺社會有特殊地位，所以法庭準許佢喺屏風後作供，仲以X先生稱呼佢。喺12月6日，X先生終於出庭，但係由於佢戴住口罩進入法庭中，仲坐喺屏風後，所以佢嘅身份仍然未有曝光。除此之外，當日有近10名男性專登到庭聽審，而當陳學殷行經過公眾席前，旁聽人士即刻對佢作出全身打量。

係開庭之後，X先生以一口鄉音講述同陳學殷相識嘅經過，亦承認曾經寫紙條表達愛意同埋經常通電話，佢又表示曾經收到陳學殷十封情信，但係為免家人知道而全部撕爛，佢又指收到勒索信之後，曾經向陳學殷建議每個月俾萬五蚊佢，但係對方冇回應，佢先決定報警。之後，陳學殷自辨稱一直視X先生做契爺，為咗得到佢嘅照顧同埋幫助先會同佢發生關係，而當X先生疏遠佢之後，佢認為自己受騙，一怒之下先寄出勒索信，而且佢又指自己從來都冇主動向X先生攞錢。而喺勒索信事件入面，佢更加故意將銀行戶口號碼寫錯，因為佢根本就冇心敲詐對方，但係法官就質疑，如果佢冇意勒索，點解又唔亂寫一組號碼? 加上臥底探員聲稱X先生畀唔到300萬嘅時候，陳學殷就隨即反問「可以畀幾多？」可以見到佢並唔係冇心勒索。

最終，法官裁定佢勒索罪名成立，當時佢嘅母親亦到庭聽判刑，佢雙眼通紅。係庭上面，辯方呈上多封求情信，撰寫人包括佢嘅父親、蛙艇教練、沙田區區議員楊祥利等，佢哋都表示陳學殷品格良好，多才多藝，獲獎無數，希望法庭輕判。甚至，X先生亦為佢親自求情，佢話「陳小姐係一個好女仔，有個BB好辛苦。佢經濟唔好，無錢交學費，生活困難。佢今次勒索我係佢嘅錯誤，佢未能夠預計我會報警，因為我冇第二個選擇。如果佢有罪，希望法官畀機會佢。」喺最後，法官判刑嘅時候批評陳學殷毫無悔意，而且案情嚴重，需要判處監禁，所以判佢入獄15個月。聽到判刑之後，佢望向母親以口形講「我冇嘢」，又叮囑丈夫照顧佢嘅母親同埋個仔。同時，法官亦斥責X先生係老色鬼，大灑金錢包養被告人。

冇獎牌就冇資助
經過其後9個月嘅監禁，喺2011年9月17日，陳學殷正式出獄，當時27歲嘅佢身穿長花裙，抱住包頭，走出囚車。而包頭嘅意思亦即係指監獄內犯人嘅隨身物品，以一個袋包好保存，直到犯人出獄先至會發還。喺嗰個時候，有記者即刻上前採訪佢，佢直言「我最想嘅就係返屋企，好掛住囝囝」佢仲笑住咁講，出咗之後有五大願望，包括同個仔團聚、返屋企見父母、沖涼、飲咖啡，同埋重投社會工作。佢又指入獄期間，佢嘅丈夫經常探望佢，而且對方已經修心養性，積極工作，唔使再靠綜援過活，夫婦亦重修舊好，佢亦表示喺獄中生活規律，利用休息時間修讀英文，學習打字，為重投社會作出準備。之後佢到咗一間咖啡店一邊飲咖啡，一邊打電話俾屋企人報平安。而後來，有傳媒發現佢每逢周末都會帶個仔外出遊玩，努力咁做一個好媽媽。

隨住陳學殷出獄，事件已經告一段落。不過事實上，當時大眾除咗討論X先生嘅真實身份之外，香港運動員嘅生涯亦引起咗唔少人嘅關注。佢哋認為政府唔重視香港運動員，而且對退役運動員嘅支援同埋保障唔足夠。喺呢件案入面，學歷唔高嘅陳學殷即使付出咗青春，代表香港喺運動場上面拼搏，但係退役之後仍然要面對最現實嘅生計問題，所以有人認為政府喺發展運動方面嘅政策唔完善，間接造成今次嘅案件，因此，政府應該設長遠嘅政策栽培精英運動員，同時要確保運動員退役之後生活有保障，例如為佢就預留大學學位，或者俾佢哋成為體育教師同埋訓練員。不過時至今日，仍然有唔少運動員同埋相關嘅機構曾經公開表示政府嘅實際措施不足，只係識得跟隨熱潮，當運動員喺國際比賽上面取得好成績先至會短暫重視體育。而喺2009年東亞運動會奪冠嘅功臣 - 前港隊風象陳肇麒喺2021年更加直言，政府「有獎牌先資助，冇獎牌就冇資助」，表示政府嘅目光應該放遠一啲。

事實上，所謂老牛吃嫩草，即係長者同年輕女性交往嘅事件，不時都喺暗地裡發生，喺你情我願而且喺秘密嘅情況下進行，大多數嘅個案都唔會被曝光。但陳學殷就因為一時衝動勒索富商，迫使呢個喺社會上面有頭有面嘅X先生報警求助，除咗令呢段不倫嘅關係完全展露喺大眾面前之外，亦令佢嘅人生留低咗一個廣為人知嘅黑歷史。