【#香港尋奇】香港名人墳場：香港墳場— Google Map 不會告訴你的事 EPISODE NO.17

Hello大家好，我係阿肥，歡迎嚟到Google Maps不會告訴你的事之香港尋奇。墳墓係每個人人生嘅終點，以墳場就係人生終點嘅所在地，係比眾多逝者安息嘅地方，雖然墳嘅主要用途都係同自己有關，但係嚟到墳場嘅生者往往都係比死者多，因為墳場都賦予咗俾生者一種紀念嘅作用，換句說話嚟講，墓碑其實係一種紀念碑嚟。今集我就會去到現存香港嘅早期墳場之一，帶大家睇吓呢個墳場又為我哋紀念左啲乜嘢，當中又有啲咩故事，又見證住香港邊一段歷史？事不宜遲，跟我嚟啦！

而家喺我身後面就係位於港島區跑馬地嘅香港墳場，不如就等我帶大家一齊嚟睇吓啦！

香港墳場係位於跑馬地黃泥涌道，係喺跑馬地馬場隔離嘅，呢度環境可以話係十分之清幽，四周圍都比大樹環抱。不過要數到香港墳場最為人熟悉嘅地方，除咗係以往好多電視劇嘅墳場場景都係呢度拍攝之外，香港墳場仲可以話係星光熠熠，因為喺呢度有住好多喺香港歷史上面叱咤風雲、身份顯赫嘅名人葬咗喺呢一度，所以香港墳場可以話係相當之有歷史感嘅一個地方。其實喺香港仲未有大規模填海計劃之前，成個港島都只係有極少數嘅平地，而其中一幅較為平坦嘅地方就係喺我而家身處嘅黃泥涌。不過跑馬地向來都係寸金尺，，咁點解當時嘅香港政府又會願意將咁寶貴嘅地皮發展成墳場呢？一切就要從1840年開始講起。

1840年6月，英國遠征軍抵達廣州，俗稱「鴉片戰爭」嘅第一次中英戰爭旋即開打，經過一輪交戰之後，係1841年1月初，時任大英帝國對話全權代表查理義律同欽差大臣琦善進行和談，已定〈穿鼻草約〉，而係〈穿鼻草約〉入面其中一條條款就係割讓香港島俾英國。雖然當時琦善都仲未答應，但英軍喺1月25日上午8:15就登陸香港，冇幾耐之後，英國就正式宣佈接管香港島，宣布香港為自由港，然後亦都成立臨時政府。雖然因為當時中英兩國都唔承認〈穿鼻草約〉，香港島都仲可以話係前途未卜，但臨時政府亦都依然要處理兩個刻不容緩嘅問題：

首先佢哋需要安頓由澳門搬過嚟嘅歐洲人同埋從大陸嚟香港謀生嘅華人，另外佢哋亦都要搵一個地方嚟安葬喺港島染病身亡嘅英軍，而當時政府睇中黃泥涌呢幅平地。當時英軍喺黃泥涌設立軍營，但黃泥涌當時仲係一塊沼澤地，有好多瘴氣、又多蚊蟲，唔太適合人居住，咁所以英軍撤走咗軍營之後，同時葬咗喺度嘅人亦都越來越多，所以當時嘅政府就索性將呢塊平地發展成墓地，以解決安葬英軍嘅問題，並將呢個地方嘅名改為Happy Valley，當初嘅中文譯名就係「快活谷」。Happy Valley本來嘅意思係一個俾軍人安息嘅地方，即係話Happy Valley嘅Happy其實本身係解「極樂」。去到1846年，英國人認為呢個谷地適合賽馬，所以就係呢度起咗個馬場，冇幾耐之後，香港第一個馬場就正式啟用，快活谷亦都漸漸有咗個新嘅名：就係跑馬地啦。換言之跑馬地嘅名字由來其實係同香港墳場有關，係咪估唔到呢？

早年嘅香港墳場，大多數都係安葬住英軍、傳教士以及政府官員，就例如小雲上一集提到，喺上水被老虎咬死嘅嗰位警察——葛查，亦都係埋葬左係呢度，而正因為香港墳場埋葬住唔少嘅歐洲人以及基督新教徒，所以香港墳場又名「紅毛墳場」。而喺呢度正正就有一位對香港歷史影響深遠嘅歐洲人葬咗喺度，而佢就係精通中文、閔語、廣州話、潮州話同埋客家話嘅傳教士——郭士立。

郭士立生於1803年7月8日嘅普魯士， 23歲成為咗牧師，童年郭士立就去到而家印尼一帶跟一位自稱為「墨海老人」嘅英國傳教士——麥都思學習漢語。麥都思係一位好勁嘅漢學家，佢精通漢語、中國歷史同埋中國文化；而係麥都思嘅教導之下，郭士立好快就學識漢語。隨後嘅1831年，郭士立就坐船去到中國，正式開始咗佢喺中國傳教嘅生涯。當時郭士立將聖經翻譯成中文，為日後新教傳入中國作出咗好大貢獻，後來太平天國嘅聖經版本就係來自郭士立翻譯嘅舊約同埋佢修訂嘅新約作為藍本。除此以外，佢亦都為中國帶嚟科學，佢喺廣州創立嘅期刊——〈東西洋考每月統記傳〉，係中國近代最早面世嘅中文期刊，呢份期刊向當時嘅人民傳遞世界地理嘅知識，成為咗後來魏源嘅〈海國圖志〉以及徐繼畬〈瀛寰志略〉嘅重要參考對象。而喺香港開埠之後，郭士立亦都成為咗香港首任港督砵甸乍嘅中文秘書，中環嘅吉士笠街亦都係以佢來命名，可見郭士立對當時中國同埋香港嘅影響係幾咁深遠。

而除咗呢啲之外，郭士立亦都有另一啲行動亦都係對中國同埋香港影響深遠，呢個亦都係令到後世對郭士立嘅評價唔係一面倒叫好，而呢樣嘢就係同另一位影響中國同香港嘅歐洲人有關，而佢就係創辦怡和洋行嘅威廉渣甸。威廉渣甸本來係一位醫生嚟，但係佢天生就係一位商業奇才，特別擅長說服人哋，喺1832年同詹士馬地臣創立左怡和洋行嘅渣甸，就進行走私鴉片嘅貿易。當時嘅佢急需一位中文翻譯，而佢就將目光放咗喺精通各式漢語嘅郭士立身上。渣甸明白要一個傳教士去幫手賣鴉片係一件好難嘅事，但同時渣甸亦都知道郭士立要印製刊物係需要大量嘅金錢，所以佢就做咗郭士立冇辦法拒絕嘅提案：就係以為刊物提供六個月經費作為條件，換取郭士立嘅幫手，本來郭士立都想大聲斥責渣甸，但錢實在太多啦 經過一系列嘅內心掙扎之後，最終郭士立決定答應渣甸嘅請求，為渣甸提供翻譯嘅服務。不過呢個亦都不改郭士立心入面覺得自己呢個行為係錯嘅諗法，因為係後來佢所主編嘅〈東西洋考每月統記傳〉入面，就有先後兩次譴責鴉片貿易同埋鴉片所帶嚟嘅毒害。不過就係因為咁，郭士手立就成為咗一個備受後世爭議嘅歷史人物啦。

雖然香港墳場埋葬住唔少嘅歐洲人，但其實仲有好多華人都葬咗喺呢度，而基本上葬得喺度嘅華人，唔係有頭有面，就係開天闢地。而其中一位最為開天闢地嘅人物，佢就係香港第一個論政組織「輔仁文社」嘅創辦人同埋會長、革命組織「興中會」嘅首任會長，一生矢志革命但最後落得被清政府派人暗殺嘅革命先烈——楊衢雲。

楊衢雲，生於1861年12月6號嘅香港，本名飛鴻，衢雲就只係佢嘅自號。早年喺香港海關船塢學習嘅佢，因為意外斷指，而改入香港聖保羅書院接受教育，係畢業之後，佢做過聖若瑟書院嘅教師、招商局書記以及沙宣洋行嘅副經理，同時佢亦都係習武之人，性格「任俠好義」，年輕嘅時候佢就已經關心中國嘅時政，並立志想為衰亡中嘅中國尋找出路。喺1892年，楊衢雲連同佢嘅朋友謝纘泰、尤列、黃詠商等人，以「開通民智」、「盡心愛國」為宗旨，喺上環百子里成立左香港第一個論政組織兼革命組織——輔仁文社，討論中國嘅發展同改革方向。去到1895年，楊衢雲經好友尤烈嘅介紹，認識咗一位同佢志同道合嘅革命者——孫中山先生。兩人一見如故，好快楊衢雲就決定將輔仁文社同埋孫中山喺檀香山建立嘅興中會合併，而合併後嘅組織仍然係叫興中會，取其「振興中華之意」，並由楊衢雲擔任興中會嘅首任會長，而孫中山作為秘書。

同年興中會就已經喺廣州策劃第一次起義，廣州乙未起義，由楊衢雲擔任總指揮。不過可惜嘅係，由於起義嘅哨息不幸被泄露，起義最後以失敗告終，多達七十幾人冑捕，而楊衢雲同孫中山喺事後亦都被清政府通緝。事後楊衢雲亦都未有立即回港，輾轉去到日本同埋其他地方鰥展興中會，宣揚革命思想。直到1900年，楊衢雲喺日本返到嚟香港參與惠州三州田起義，負責餉械嘅工作。但由於呢次起義，義軍欠缺槍械彈藥，後援不繼，所以喺同清軍僵持咗一個月之後亦都以失敗告終。今次起義失敗之後，楊衢雲謝絕咗去外國暫避嘅勸告，反而返到嚟香港開設私墊教授英文。而喺1901年1月10號，楊衢雲喺結志街52號2樓住所入面被清政府派出嘅刺客開槍刺殺，並喺第二日失救逝世，享年40歲，而呢一幕亦都喺東德森導演執導香港電影《十月圍城》重現。楊衢雲逝世之後，喺佢嘅好友謝纘泰同陳少白嘅安排下，楊衢雲嘅屍首得以安莽喺跑馬地香港墳場。不過為咗避免清政府對楊衢雲嘅屍首進行干預，所以謝纘泰只係立咗一塊無字斷柱碑，碑上面無留低名字，只係刻有編號「6348」以及刻有青天白日嘅圖案，而「6348」正正就係楊衢雲最後一次發動嘅起義—惠州起義嘅行動代碼。去到2011年，時值辛亥革命一百週年，香港政府就喺呢塊無字碑前面豎立起楊衢雲嘅生平說明牌以肯定佢對國民革命嘅貢獻。

而作為近代東亞革命基地嘅香港，喺香港生活過嘅革命志士多不勝數。而除咗楊衢雲之外，當然就唔少得喺香港留低過唔少足跡嘅革命者孫中山先生啦。孫中山早年就接受香港嘅教育，先後入讀拔萃書室、中央書院以及後來嘅香港華人西醫書院。而喺孫中山讀醫嘅期間，有一位華人對佢嘅影響可以話係極之深遠，而呢一位華人喺香港歷史上面都佔有好重要嘅位置，喺香港甚至有一個區都係以佢個名嚟命名，而佢就係首位華人專業內科醫生兼首位獲封為爵士嘅華人—何啟爵士。

何啟生於1859年3月嘅香港，佢爸爸就係香港開埠早期嘅地產大亨何福堂，出身名門望族嘅佢喺12歲嗰一年就去到英國讀書。後來佢喺蘇格蘭北部嘅阿伯丁大學習醫，並於1879年完成學位，成為第一位取得專案資格嘅華人內科醫生。完成咗醫科學位之後，何啟亦都接納咗佢貴族出身嘅未婚妻雅麗氏嘅建議，去到林肯法學院攻讀法律。喺兩年之後，何啟就成功取得大律師資格，之後何啟亦都同雅麗氏喺倫敦結婚，並且喺婚後第二年就正式回港發展。

喺何啟回港之後嘅第二年，雅麗氏就不幸死於傷寒，傷心欲絕嘅何啟決定興建一間醫院紀念佢嘅愛妻，但其實早喺雅麗氏離世之前，作為倫敦會華人自立會嘅會友，何啟就已經有意為香港醫療作出貢獻，咁啱當時喺香港倫敦傳道會嘅醫駕傳教士亦都希望喺香港成立一間西醫醫院，所以當雅麗氏逝世後，何啟就決定捕出大部分嘅身家，連同倫敦會合建一間醫院。一嚟除咗紀念佢嘅愛妻之外，二嚟亦都可以幫到香港嘅華人，令到本地貧苦嘅華人可以得到西醫診治嘅機會。何啟將醫院命名為雅麗氏紀念醫院，亦即係雅麗氏何妙齡那打素醫院嘅前身。

醫院喺1887年2月就正式投入服務，成為咗全香港第一間為華人提供西醫診治服務嘅醫院，何啟亦都喺雅麗氏紀念醫院入面設立咗香港華人西醫書院，亦即係而家香港大學醫學院嘅前身，為香港培育出唔少不可多得嘅人才。其後喺1907年，當時香港總督盧吉爵士，希望成立一間本地嘅大學，何啟亦都大力支持，更提出「三院制」，亦即係將已有嘅香港華人西醫書院、香港工程學院同埋新增嘅香港文學院組合成一間大學。而喺兩年之後，由何啟帶領嘅香港大學籌備委員會就正式成立，喺1912年，全港第一間大學—香港大學亦都正式落成。何啟除咗推動香港醫療同埋學術發展之外，佢亦都參與咗當時香港唔同嘅政治民生事務。由於何啟自細喺外國長大，操一口流利嘅英文，所以佢好早就已經受到當時嘅香港政府重用，殖民政府就希望透過何啟作為佢哋古方同本地華人之間嘅橋樑。

何啟回港之後嘅第一年就已經被很任為太平紳士，喺四年之後1886年就更加成為咗公共衛生委員會嘅非官守委員，四年後嘅1890年仲成為咗第三位獲政府很任嘅定例局華人非官守議員，協助處理本地華人事務，並且向政府機構提供建議，而得到權力嘅何啟亦都冇令到本地華人失望，佢一直都為香港華人爭取權益。例如喺十九世紀末，由於城市發展，本地對石材嘅需求大增，有人喺宋王臺聖山採石作為建築材料，對宋王臺古蹟構成威脅，有見及此，九龍城居民發起保護宋王臺運動，呢個運動亦都得到何啟嘅支持，而且佢都喺1898年8月喺定例局提出動議立法保存宋王臺古跡，最終政府喺1899年正式通過《保存宋王臺條例》禁止喺宋王臺聖山採石，為本地華人成功爭取到權益。

另外，由於清末居勢動盪以及革命嘅緣故，大量嘅移民由新安湧入香港，令到住屋供不應求。當時嘅九龍半島嘅居住環境擠迫情況十分惡劣。有見及此，何啟就引用咗佢姐夫伍廷芳喺九龍灣填海開闢住宅區嘅構思，喺1914年同佢嘅親家區德牽頭組成咗「啟德營業有限公司」，喺九龍寨城對開嘅九龍灣北岸進行填海工程，計劃建造一個名為「啟德濱」嘅花園城市，但由於喺建立公司後無耐，何啟就過咗身，呢個計劃亦都受後來兩大罷工—省港大罷工同埋海員大罷工影響而失敗。「啟德濱」計劃嘅土地其後被政府用1,007,250港元買返，最後政府決定喺呢度興建機場，沿用「啟德濱」嘅名，將機場改為啟德機場。就係咁，全香港第一個機場「啟德機場」喺1925年正式啟用，而幕後功臣之一就係何啟喇。

而除咗我啱啱提到嗰三位之外，喺香港墳場入面仲埋葬住好多叱吒風雲嘅人物，就例如香港第一位住喺半山上面嘅華人，20世紀上半葉最有錢最具影響力嘅華商—何東爵士、又例如之前我喺《香港仲有無》講橢圓柱郵筒嗰一集入面提到嘅保羅‧遮打爵士、仲有香港中文大學醫學院創院院長蔡立志、東亞銀行嘅創辦人簡東浦、以及中央書院嘅創校校長，被譽為「香港公立教育之父」嘅史釗域博士亦都係葬咗喺度。佢哋都為香港作出咗好多唔同嘅貢獻，我哋要好好咁記得佢哋，因為當無人再記得佢哋嘅時候，其實先至係真正嘅死亡。當我哋仲記得佢哋嘅時候，佢哋嘅故事、佢哋嘅精神先至可以延續落去。雖死猶生，式者呢個先係真正嘅紀念嘅作用。今集Google Map不會告訴你的事 之 香港尋奇 就講到呢度，我係阿肥，我哋下集再見，拜拜。

特別加映
阿肥:「啦，呢度就係何東個墓啦，嚟度呢度梗係做返啲嘢喇。(Dem beat)所謂何東精神，就係團結......」
(一陣恥笑聲)
阿肥掩臉:「點解啊...」