4/11《圍爐取戀》我條女以前有30個SP

東方昇： 高低嘅分別先

Terry：係角度唔同啫

東方昇：係呀

阿祥：係 不過佢都有表達到話其實但從來都冇對任何人 有呢個咁愛我嘅感覺

Dickson：有冇一啲佢對你好嘅細節 可以同我哋分享吓呢?

阿祥：譬如係我可能輕輕帶過一啲嘢話「我想去喎」「我想要嘅」佢就會俾我呀，咁跟住我返工，我返得遠嘅，咁但係佢有時都會過嚟接我放工、送我返屋企，跟住佢自己先返屋企。我住九龍，但佢係住喺港島區嘅，佢都會特登過嚟 接我咁樣囉。直程係佢而家係做乜嘢都會同我講。一來因為係佢想同我分享佢嘅生活啦，二來就係佢想話俾我聽佢唔係喺度搵緊其他人囉，我覺得呢啲已經係一個基本男女朋友。

東方昇：欸欸欸，唔係呀唔係㗎，你唔識感恩啦，我覺得唔係真心，我覺得佢做好多嘢其實都係，想話俾你聽佢修心養性，佢真心鍾意你呀，真係唔係基本呀。

Charlie：好少女仔會送男仔返屋企㗎

東方昇：係呀我女朋友未送過我返屋企呀，亦都冇講過我係最好呀

Dickson： 唔係嗱，我想問有冇調返轉先? 你有冇話過人最好

東方昇：都冇

Terry：咁fair啦
東方昇：唔係唔係真心反而我會睇 外人睇到其實唔係基本嘢嚟嘅 其實佢對你好好呀

Charlie：我覺得呢，某程度可能個女仔係，一邊都好擔心你會拋棄佢，所以佢盡佢嘅所能將最好嘅先俾你。

阿祥：即係其實我都睇得出佢係一個好冇安全感嘅人，可能因為佢見過嘅人太多。係囉，但都唔知邊個可以信，邊個唔可以信，即係我都想話俾佢聽，其實我係一個可以俾佢依靠嘅人囉。

東方昇：因為真心，你面對呢個問題啦，我覺得我哋俾唔到答案你呀！但係我會話俾你聽，你要識欣賞你女朋友，改變緊佢為你。

叻叻: 如果唔係嘅話呢，個女仔其實一路為你改變嘅期間，你一路抱有小小嘅懷疑呢，個女仔都會feel到，而佢會覺得有種沮喪喺入邊囉。

東方昇：所以我要你知道佢為你做咁多嘢啦，跟住我會再問你喇。咁你對佢有冇信心呢?

阿祥：我對佢其實有信心嘅，但係我會有時都怯嘅地方就係，而家呢一刻OK 但係會唔會耐咗之後，佢又會反覆咁樣呢?

東方昇：但係我覺得你呢個係冇得驚㗎喎，你冇得喺呢一刻驚，未來會發生嘅嘢㗎喎。我出街都驚無啦啦個天冧落嚟、地震，係冇得驚㗎喎。咁當然你話佢有呢個背景，但係你如果選擇相信佢，你就係要相信佢。

Terry：就係要放低呢個諗法囉冇辦法。

阿祥：係囉，相信佢係我唯一嘅選擇囉我覺得。

東方昇：Er 又唔好講到咁被逼。

叻叻：或者我企喺個女仔角度咁樣諗呀，即係你除咗相信佢之外。你都可以去試吓去了解咗佢先囉，即係你可能一聽到佢嘅過往、背景之後 你會對佢有好大嘅假設咗喺度㗎啦。你有冇可能嘗試了解吓，佢點解要咁多嘅SP又好，或者伴侶又好，啱呀，去填滿佢個心呢? 可能佢....

阿祥：佢有講過嘅
東方昇：係呢佢點講呢

阿祥：其實佢就係因為可能喺頭一段嘅感情，但就經常被情緒勒索，又或者係 逼佢做一啲佢唔鍾意做嘅嘢呀。做完之後佢就搵咗另一個男仔去出軌，跟住之後嗰個男仔，亦都周不時又對佢唔太好呀。跟住令到佢都有啲嚴重嘅情緒病，咁之後大概叫做醫返好，佢就開始吃不停去搵唔同嘅人去拍散拖，Relationship!咩都好咁樣。

Terry：咁所以佢而家佢就一個驚弓之鳥，即係佢已經經歷完好多好驚嘅嘢，然之後佢覺得你可以信任，咁所以佢其實係將佢最後嗰一份信任，就俾咗你，咁所以呢個時候其實，咁樣講你好大壓力呀，但係真嘅

東方昇：你又情緒勒索人呀

眾人: 哈哈哈

Terry：唔係唔係，即係你嗰個角色都好重要囉，即係呢個時候如果佢遇到嘅係一個包容保護佢呢，可能佢嘅人生真係會有啲唔同，佢就真係會開始相信愛情，咁但係如果再遇到你嫌棄佢，有啲懷疑嘅。可能佢又係繼續去返，以前嘅生活咁。

東方昇：或者我唔俾壓力你呀，所以我會真心問你，你介唔介意，你信唔信佢囉。如果你信嘅話呢，你就要信啦，你唔好「我信你」「但係我又」，頭先佢都有少少㗎 「我信呀不過我呢又咩咩咩」就唔好咁樣啦。因為你信佢你自己信晒佢㗎啦。

阿祥：明白

東方昇：我做嘅角色就係話俾你聽，佢為你而改變，增加你對佢嘅信任。

阿祥：嗯,，係囉，即係好似頭先你咁講。唔知佢會唔會有啲係好貪玩想鍾意嗰種危險感嘅感覺嘅生活。

Dickson：如果佢有咁嘅想法呢，佢唔會用一個好驚俾你批判，或者有啲內疚嗰個態度同你講㗎。佢可能會用一個好enjoy，或者呢樣嘢好過癮嘅態度同你講。

叻叻: 所以我就咁聽嘅時候，我覺得你女朋友反而係喺愛情入面有小小嘅焦慮
擔心冇咗你，冇咗呢一份感情，所以佢先做咁多嘢去繼續維繫啦。

東方昇：甚至乎去返你最頭講嘅嘢，你相信你哋嘅感覺。你覺得，哇所有嘢都好夾，我相信佢都係咁樣諗。所以佢先唔係當你玩玩吓，佢向你坦誠，你去返原點，你哋大家都真係覺得，大家係Soulmate 係終身伴侶，要去返嗰個位呀你要。

Charlie：所以你都要覺得你自己夠好，好到令到佢一定唔會走。俾啲信心自己咁樣。

阿祥：又或者可能我自己喺感情上面，都唔係一個好肯去講自己嘢嘅人，咁但係對住佢，我係好願意去講自己嘅一啲，埋喺心裏面嘅感受囉。

東方昇：所以我覺得阿祥其實你自己都有答案，其實你係偏向信佢嘅。但係你嗰個焦慮或者驚呢，係合理㗎，完全明白。但係我覺得你，其實對佢有信心嘅。

阿祥：嗯，又或者可能即係俾個機會佢，亦都俾個機會自己大家。

東方昇：我俾你嘅建議就係多啲Appreciate佢為你做嘅嘢。而你亦都唔好覺得佢咁樣為我做，我就係度攤住，鬆晒唔用力啦，你都要用力去愛佢、付出。

阿祥：知道

東方昇：OK呀，佢冇問題呀，咁收咗電話之後即刻，打個電話俾佢表達你對佢嘅愛意

Dickson：接佢收工啦直頭

Terry：係呀 今晚就接佢收工啦

東方昇：我都唔知幾恨有女仔送我返屋企呀，嗱我講明，你唔要佢，我搶㗎喇 咁嗰時就真正係嗰個威脅我同你講。

阿祥：知道

東方昇：著緊少少，希望你繼續行落去，好，拜拜～
(收線)
東方昇：所以我覺得呢大家真係唔應該將過去，嗰啲咩感情好豐富呀，或者性伴侶作為一個擇偶嘅條件，因為如果係一個條件嘅話，喂咁Dickson應該好搶手呀。佢未拍過拖又冇性經驗，但係又唔見得你好搶手呀。

Dickson：大家一定會以為我係會鬧佢，但係我係認同㗎。因為我曾經都有諗過 嗱如果我話俾大家聽，我有30個SP 哇，我相信大家都會覺得「咦，唔通Dickson有佢嘅過人之處?」

東方昇：有佢嘅長處

Dickson：好乜勁?

東方昇：反而係Dickson身上咪係，佢冇拍過拖、冇性經驗，反而成為咗佢溝女嘅絆腳石，大家會嫌你，條友識唔識㗎即係咁樣。所以真正其實係，唔關佢過去事囉，係你喺過去嘅經歷裏面，學唔學到嘢先，而你就算冇呢個過去，咁你係咪裝備自己，你ready去同一個人一齊先? 所以呢個先係最重要囉。

Dickson：同埋我想講，我都有機會出軌㗎係咪先?

東方昇：左手右手呀?

Dickson：唔使靜晒嘅

Terry： 背叛咗三上悠亞唔叫背叛

Dickson：嗰邊又唔使笑晒嘅

東方昇：不過如果大家真係介意嘅話呢，要有啲處男情意結，不妨搵Dickson即刻搵佢冇問題㗎。好！今日差唔多拜拜～～