全新iPad 登場、iPad Pro 處理器升級、Pixel Watch 爆芒、GeForce RTX 4080 12GB 難產| 廣東話【Price Weekly #137 2022年10月 】

之後到第十代 iPad，呢個都算係更新比較多嘅產品，首先係外形方面轉做全螢幕設計，機頂粒Power掣做埋 Touch ID
，螢幕增加去到10.9吋、機身顏色方面有4隻色可以揀，新iPad 用咗 A14晶片，比起上一代CPU提升20%、GPU 提升 10%，設計風格好接近iPad Air2，前後鏡頭同樣都係1200萬像素，不過前置相機改為橫置形式，支援人物置中功能，視像個陣就可以打橫部機，方便好多。另外要留意係新 iPad 插頭位換左 USB-C，不過呢部 iPad 只係支援第一代 lightning 頭嘅 Apple Pencil，所以依家買第一代 Apple Pencil 嘅話就會送埋 USB-C 轉換器，價錢方面由 $3499 起，依家已經可以係官網到預訂。

最後就嚟到 iPad Pro，今代一樣有 11 吋和 12.9 吋兩個版本，新版 iPad Pro 嘅外形同規格都無太大改動，主要係升級咗做 M2 晶片，CPU效能提升咗15%、GPU效能提升咗35%。功能方面，新加入支援 ProRes 影片同埋對應Apple Pencil 懸浮感應功能，筆尖同熒幕上懸浮12mm 距離內都可以見到落筆點，畫野或者素描嘅時候就可以更加精準。價錢方面 11 吋版本賣 $6,499 起；而12.9 吋版賣 $8,999起，10 月 26 日正式開賣。

Google 第一隻智能手錶 Pixel Watch，早前就開始陸續發貨，有收到新錶既網民就發現Google無話過支援無線充電既 Pixel Watch，如果放係 Qi 無線充電板或者支援無線反向充電嘅手機上面，一樣做到無線充電。件當然引起網民熱烈討論，不過好快就有位自稱係Pixel Watch產品代表既網民，喺討論區留言 強調手錶唔支援無線充電，佢仲解釋話可能係特定裝置上面，會觸發到短暫充電但無辦法保證可以用無線方式正常同穩定咁充電，所以建議大家都係乖乖地用翻跟機送嘅叉電座叉電；另外一位外國網民亦都分享佢既開箱經歷，話說佢隻 Pixel Watch 開箱唔夠一分鐘就唔小心將隻錶離地一米高跌落地，結果塊大猩猩玻璃錶面就粉身碎骨，事後呢位網民向 Google 求助嘅時候，對方就表示因為錶面碎裂不包保養範圍內，無得整之餘亦暫時無其他維修方案，認真慘情。

NVIDIA 前排推出 RTX40 系列顯示卡，當中包括我哋評測過嘅 RTX 4090同埋兩款原本預計 11 月推出嘅16GB 同 12GB 版本 RTX 4080 顯示卡，但日前突然宣布取消推出 12GB 版本。官方表示，主要原因係顯示卡命名方式唔恰當，怕會造成消費者混亂，所以決定取消上市。事實上當初公佈呢 2 個版本個陣，已經見到兩張卡嘅規格相差好遠，睇翻佢哋官方嘅評測數據，係玩某啲遊戲既時候，16GB 版本比 12GB 版本快成 30%，兩個版本嘅分別都幾大似乎唔單止記憶體唔同，而 16GB 版本 既 RTX 4080就會照原定係 11 月 16 日開賣，價錢係 US$1,199，至於 12GB 版會唔會仲有機會同大家見面呢？

暫時都未知道之前都講過PlayStation，會出一隻PS5 版嘅 Elite 掣DualSense Edge，咁官方最近都終於公佈咗佢嘅詳細資料啦。新掣嘅底部多咗，兩個掣比玩家Set個蘑菇掣亦都可以用到唔同嘅頭，而壞咗仲可以成個拆出嚟換，唔洗成個手掣扔；另外後面嘅L2 R2 仲有3段可以較，比玩家根據隻Game 去決定個掣嘅鍵程，新手掣會喺10 月 25 嘅接受預定，出年1 月 26 正式開賣，售價係 199.99 美金，唔知各位Gamer又有無興趣呢？

如果你係耳機既發燒友，對於 Shure SE846 一定唔會陌生，出色既音質加上可換式導管，隨時可以改變音色，令 SE846 有唔少擁躉，日前 Shure 就係香港發表 SE846 Gen2，延續上一代既特色，採用 4 個度身訂造既發聲單元，創新既低通濾波之外，佢既可換式導管設計令到用家可以根據自己口味去改變音色，好玩又貼心；黎到 Gen2，可換式導管更由上一代既 3 個增加到 4 個，除左平衡、明亮同溫暖三種音色，依家仲可以揀清徹令高頻表現更加出色，立體感同空間感都有進一步既提升，顏色方面有3隻色可以揀，唔知大家鐘意邊隻色多啲呢？

宜家大家都習慣用串流平台聽音樂，前排消委會比較咗7個音樂串流平台包括 Apple Music、JOOX、KKBOX、MOOV、Spotify、TIDAL同埋 YouTube Music，分別以歌曲數量、收費、音質、支援界面、離線功能，各方面嘅服務去做評定準則；係歌曲數量方面，平台之間可以相差 1 倍，除咗 MOOV 無提供相關資料之外，其餘 6 個平台嘅歌曲數量大約係 4,000 萬首到 9,000 萬首；而收費同音質方面，7 個平台嘅個人計劃收費就介乎 $48 至$ 58，如果想聽靚聲要揀支援 Hi-Res 音質既月費計劃，消委會指只有Apple Music 、JOOX、MOOV同 TIDAL嘅基本計劃，已經支援無損音樂，其他平台就要額外加錢，如果大家唔想加錢嘅話，我哋都整咗個表，比大家睇下係基本收費計劃入面，所支援嘅最高音質，都提提大家，如果用支援 Hi-Res 音質嘅 plan，記得用返支援到嘅播放裝置。

Lenovo 最近係Tech World嘅活動入面，展示咗一部用咗捲軸式熒幕嘅手機同laptop同之前講過嘅 LG Rollarble 唔同，呢2部機係採用上下捲動嘅方式。先講手機，只要㩒兩下掣熒幕會由5 吋拉長到 6.5 吋，比起左右捲會更加方便單手用；至於部laptop，一樣都係垂直拉長，個mon可以由 13 吋拉長到 15.3 吋，方便用家multi-task，雖然呢兩件產品目前仍屬於概念性質，距離正式推出都仲有一段時間，但齋睇都好令人期。

有睇過電影Terminator嘅朋友應該知道，戲入面曾經就提過想毀滅人類嘅SkyNet，運算性能去到60 Tflop/s，亦即係每秒可以運算 60 兆次，而新一代顯卡皇 RTX 4090係 3.15 GHz 頻率之下，GPU可以達到 100 Tflop/s。咦～咁似乎係電影入面無所不能嘅SkyNet都只不過係等於 0.6張 RTX 4090咋喎。不過Terminator係係1984年上映，而世界上第一張顯示卡只係早佢3年面世，個陣嘅顯示卡，仲係插緊一個頻寬得 8bit ISA slot，所以話SkyNet嘅性能有成 60Tflop/s已經好誇張㗎啦，雖然宜家呢張 4090毀滅唔到人類，但係都可以用嚟證明下，現實世界都有超越到科幻電影嘅一日。