28/10《圍爐取戀》陪患癌前度走到最後（嘉賓：Dear Jane）

Tim：未識驚住。

東方昇：會唔會話早啲重呢？就起碼好過近嗰陣時中。

Tim：有邊個冇咁諗過啊？

東方昇：哈哈哈。今日你哋咁難得嚟，其實我有好多問題想問你地，因為我見你哋出好多情歌啊，而你哋唱嘅情歌都非常好啊，感動到好多人，其實想問你哋四個係咪本身都將愛情擺得好重要嘅位置，或者好熱衷愛情呢？因為你哋啲歌當中，好多愛情嘅觀察都好獨到。

Tim：其實首先講我覺得人類正常都會擺愛情擺得幾前。

東方昇：Dickson…

Dickson：我擺到好前，因為我前到過咗龍，所以咪冇囉。

東方昇：哈哈哈。

Jackal：係佢擺得前，但係人哋接收，係收到幾多呢？

東方昇：將佢擺好後。

Jackal：係喇。

東方昇：對你來講都係愛情好重要？

Tim：我諗重要嘅，咁亦都係一個係音樂上或者唱出來嘅message上，大家最容易有共鳴嘅一樣嘢啦。

東方昇：啱啱啱。

Tim：有陣時我哋寫多啲呢類型嘅歌，亦都多啲我哋嘅分享咁樣啫係其實。

東方昇：咦咁我想問隨着年紀嘅成長，個觀察上有冇唔同呢？同你地幾年前。

Howie：都有嘅係咪呀？細個梗係寫啲「哎呀佢飛咗我呀，好唔開心」咁樣，咁大個咗，即係就可能人哋飛你，你都唔開心，但都唔係咁大件事囉，即係開始講，可能之前嗰首〈銀河修理員〉，係講用咩嘅智慧，點樣先可以同一個人可以行一段好長嘅路，唔同階段嘅人會諗唔同嘅嘢囉。

東方昇：心知乎你有啲結咗婚啦，對愛情有冇睇法，有冇唔同咗呢？

Tim：我對愛情……認……嘅……認識……

Dickson：即刻窒呀！

Tim：大家未試過唔知呀嘛係咪先？其實原來係不斷咁樣學習。

東方昇：都係學習緊嘅。

Tim：大家一齊行一條路，咁而家有埋小朋友嘅時候，所謂嘅愛情其實都唔係淨係愛情，兩個人嘅嘢啦已經係包含着小朋友呀、好多層次嘅嘢，但係開心嘅，我覺得唔可以好似當初初戀嗰種咁單純嘅愛情，唔會last好耐㗎，大家成長咁樣，大家記住啦！

Jackal：賜教賜教。

叻叻：學到嘢。

Tim：到時又輪到你哋口窒㗎啦。

東方昇：哈哈哈。咁你有咗小朋友，遲啲可以寫呢個係比小朋友。

Tim：其實小朋友寫緊歌㗎啦。

東方昇：吓？

Tim：好好笑㗎。

東方昇：佢寫俾你啊？

Tim：我個女釋出我哋啲歌㗎，佢而家講嘢唔歲啦，五歲小朋友講嘢仲未算係最好㗎嘛，咁但係佢會記得過melody，但佢自己塞啲歌詞入去，好搞笑。

東方昇：好啊Terry我哋今日嘅題目係乜嘢呢？

Terry：今日呢個故事呢其實有啲sad嘅，就是說呢個男事主打上嚟，就話佢前度生cancer，然之後事主陪佢走埋人生最後一段路。

東方昇：都幾沉重喎，聽下先。Vincent你好。

Vincent：大家好。

東方昇：知道喺你身上有個比較沉重啲嘅經歷，可唔可以同我哋分享吓呢？

Vincent：可以，就係關於我前女朋友嘅，咁我同佢一齊其實總共都橫跨左10個年頭啦，初初一齊其實都好好嘅，我哋都住埋左埋一齊七至八年到啦，因為其實佢屋企嘅生活環境比較差啲啦，佢阿媽就好鍾意儲野嘅，唔捨得抌野，咁所以佢成日都想搬出去住，咁後尾因為我哋兩個大使啦，一齊咗成10年都結唔到婚，亦都搬唔到出去住，所以佢就搵咗第二個，而決定同我分手啦。

東方昇：嗯…跟住呢？

Vincent：然後呢就分咗手唔夠一年到啦，佢又一日就WhatsApp我，就同我講話，佢發現沖涼嗰陣時就係pat pat嘅位置就摸到粒好似肉嘅嘢，更硬地嘅，醫生就同佢講話可能係痔瘡嚟嘅啫，就俾咗啲藥佢，但其實過咗一段時間都冇好過，仲越來越大，跟住就決定要抽組織，咁驗完之後就發現咗係個cancer嚟嘅。

Tim：哎喲。

東方昇：咁佢同你講之後，你當時嘅反應係點呢？

Vincent：其實個下都好shock嘅，點會無啦啦咁後生會發生呢啲事？醫生都話其實比較罕見嘅，呢個病其實一般係出現喺小朋友身上，係叫做「橫紋肌肉瘤」，咁但係醫生都冇諗過會喺個成年人、30零歲都會有呢啲事發生，咁之後都係做化療啊、電療咁樣，咁但係其實我覺得可惜嘅係佢同我傾訴嗰陣時呢，其實佢係諗住成家立室、有自己嘅家庭、去結婚生小朋友咁。咁但係當你接觸到電療同埋化療，其實個身體應該就唔可以再生育㗎啦。

東方昇：咦咁當時佢係同佢新嗰個男朋友一齊嘅？

Vincent：係，冇錯。佢就同佢一齊之後，就同我和平分手啦跟住佢就一齊咗之後呢，大概我諗一年多少少，佢有呢個病之後個男朋友照顧住佢都半年左右，但係個男朋友就同佢講啦：「我決定同你分手啦，因為我都想有我嘅將來，我都想成家立室。」咁所以就決定同佢分手。

東方昇：咁個刻你個前度點諗呢？

Vincent：其實佢嗰下個世界晴天霹靂囉，即係覺得我諗住搵個家庭行埋下半生，但係原來你最初頭同我講嘅承諾最後係兌現唔到嘅時候，就係你真係冇諗住照顧我咁樣囉。

東方昇：因為我會覺得呢個係一個好大嘅抉擇，如果真係咁不行，可能你另一半有病，或者我自己有病啊，咁另一半要照顧我，我都好難抉擇，究竟我需要佢嘅照顧啊，我又會耽誤佢嘅幸福，呢個係好難，同埋有個道德嘅捆綁，就算點你都要同佢行落去，即係外人會咁樣諗呀。

Jackal：係囉係囉。

Howie：即係你作為患病嗰個人，你就要做嗰個決定囉。

東方昇：所以我覺得EX嘅前度，即使離開佢，冇得怪嘅，係一個好難嘅抉擇嚟㗎。跟住呢？咁點啊？

Vincent：佢就打電話同我喊啦，其實我都唔忍心，既然佢而家咁嘅情況，知道其實可能日子唔長，決定真係陪佢行埋呢段路咁樣囉，但其實係一個朋友嘅角色。

東方昇：咁我想問你有冇猶豫過會唔會繼續照顧佢呢？

Vincent：其實就冇嘅，因為嗰下都仲有啲感覺，同埋我都真係識咗佢好耐，大家都好熟，咁我冇理由抌低佢㗎嘛。

Jackal：始終都仲有啲感情。

東方昇：好勇敢，所以我就係話你好偉大啊。

Vincent：其實我又唔敢講話偉大，因為其實我覺得係人之常情嚟嘅。

Tim：好有責任心啊，好勇敢。

Howie：即刻接棒就即刻……

東方昇：因為畀著正常人，可能會嬲佢。

Dickson：可能會有個好邪惡嘅想法，你係咪因為嗰邊冇要你，所以你先過返嚟搵我呀？

東方昇：即係水泡喎係咪？

Jackal：佢諗都冇諗過喎。

東方昇：係呀，你冇諗所以其實你係好偉大呀，真係唔好咁謙虛。