20/10《圍爐取戀》泰浪漫之旅撻著舊同學

東方昇：哦~

導演：咁但係呢我哋就留到最後先講，講吓今日個case先。

東方昇：係係係。

叻叻：好呀。

導演：咁我想問吓大家覺唔覺得旅行嘅時候係特別浪漫，特別容易同人撻着呢?

導演提問：旅行特別容易撻着？

Yvonne：我覺得我先！我先我先！就係咁嘅，我中學嘅時候有暗戀過一個師兄好多年啦，跟住有一次去台灣旅行，
咁佢又一班friend，我又一班friend，兩個係......

東方昇：我仲以為係學校旅行添。

Yvonne：唔係。

東方昇：台灣旅行......

叻叻：小學旅行係咪？

Yvonne：我返宿舍嘅時候呢，就咁啱同佢迎面經過咁樣啦，最浪漫嘅係得我同佢經過完之後呢係回頭望返對方囉。

叻叻：哦~

東方昇：直程好似電影橋段。

叻叻：茫茫人海中。

東方昇：個世界靜曬，跟住你哋喺度回望咁樣。

Yvonne：跟住我心諗死啦死啦，佢望住我咁樣啦，但係因為嗰陣時呢，我係冇同佢有任何交流嘅，就係因為嗰次對望，佢IG同我傾咗計。

叻叻：直到而家都係......

Yvonne：Friend…

背景：空歡喜一場

東方昇：Friend咋，超......

叻叻：咁唔好講出嚟啦。

東方昇：咁叻叻你覺唔覺得旅行係特別浪漫？特別容易同人撻着呢?

叻叻：係嘅會，因為你置身於第二個地方呢，你可以拋低咗喺香港嗰個好多.....唔知呀。

東方昇：嗰啲咩呀？嗰啲道德觀念，就開始解放，特別open.

叻叻：細聲啲......

東方昇：唔係，啲人咁講㗎嘛。

專家Dickson：去到巴黎咪可以唔著衫跑步囉。

東方昇：係啊。

叻叻：去到巴黎，我會有機會真係咁做㗎，咁到時睇下點啦。（巴黎大解放）

東方昇：下真係？俾人影到之後記住po上......網喎。

叻叻：講笑啫。

東方昇：Dickson...算啦都係唔好啦。

專家Dickson：係㗎啦嘛。

東方昇：唔係嗱，我會覺得去旅行真係容易撻着嘅，我唔知係咪我個年代呢，嗰時去旅行呢，仲係跟團呀。

專家Dickson：係咪有條友揸住支旗仔喺度搖嗰啲呀？

叻叻：戴住嗰啲cap帽係咪呀？

東方昇：係會鍾意咗同團差唔多年紀嗰啲女仔㗎。

專家Dickson：唔係啊，你去嗰啲老人團邊有女仔呀。

東方昇：唔係呀咁嗰啲阿爸阿媽都會帶住啲女㗎嘛

叻叻：佢就係鍾意嗰啲。

東方昇：咁冇嘢做，我就會𥄫嗰個女仔，睇下佢做咩，搵機會同佢傾偈。

Yvonne：會唔會偷偷地去佢間房度傾偈呀？

東方昇：咁又冇咁大膽，甚至乎我哋嗰陣時有個傳說，就話係嗰啲旅行團嗰啲導遊呢，係好容易會溝到嗰啲團友㗎嘛。

專家Dickson：又係喎。

東方昇：因為就係呢個就係旅行嗰個魔力，去到一個外地，所有嘅新鮮感，體驗都係新嘅，咁令到你好似會對一啲......

叻叻：新事物新人物。

東方昇：特別吸引㗎。

專家Dickson：同埋佢機率特別高，因為佢最可靠應該就係個導游呀嘛。

東方昇：都係，或者你喺個陌生環境，你要互相搵人依靠，咁你就會......

叻叻：你要去多啲旅行啦。

東方昇：產生多啲好感，係真㗎。

導演：真㗎，因為今日個case呢，都係喺旅行撻着咗一個舊朋友

本集主題：旅行撻着舊同學

東方昇：哦~聽下先，浪漫㗎嘛？

導演：極浪漫。

東方昇：好好好嚟嚟嚟。

圍爐Buddy：Caca（化名）

東方昇：Caca你好。

Caca：Hello，你好呀，大家好呀。

東方昇：哇你把聲非常之可愛，可唔可以今集你唔變聲，畀大家聽到你把聲呀。

專家Dickson：佢係第一次咁樣要求嘅啫。

東方昇：得唔得啊？真係你把聲好好聽呀。

Caca：Er…你哋鍾意啦？

東方昇：哇真係得呀。喂好，你係咪想同我哋分享一個你去旅行好浪漫同人撻着嘅故事呢？

Caca：浪漫就未至於好浪漫嘅，但都估唔到會撻着咗。（意想不到的收穫）

東方昇：好慢慢講慢慢講，係點樣開始嘅呢？

Caca：本身我地背景就係中學同學嚟嘅，中學嘅時候就冇乜交流咁樣嘅。一直到有一年啦，大學嗰陣時喇，個男仔
就提出話想去旅行，咁我哋就梗係追問點解啦，噉跟住然之後原來呢就話，佢之前買嗰啲酒店Villa嗰啲package過期啦就嚟，咁就冇人同佢去喎。

叻叻：佢冇人同佢去，佢一早又book呢啲package嘅？

Caca：因為散咗。

東方昇：哦~即係本來同個女朋友就反轉個Villa啦，由嗰個池底就玩到落上床，再玩到去浴室咁樣嘅。

Caca：咁所以就向我哋埋手啦，就諗住搵啲朋友一齊，同佢孖份，share啲旅費。（分手後找事主頂上）

東方昇：哦~咁嘅藉口都得嘅咩？

專家Dickson：我要學下，我要學下。

Caca：但係呢最尾夾到時間嘅剩係得四個，最尾就兩男兩女咁去嘅。

東方昇：但我想問一個問題，你唔會覺得佢揾你喺療傷呀？

叻叻：唔係個個都好似你咁㗎。

Caca：因為都隔咗一段時間嘅。

東方昇：哦OK，OK。咦咁你哋有冇心理準備其實係諗住互溝嘅呢定係冇？（東方昇提問：出發前有想過發展嗎？）

Caca：冇㗎，完全冇嘅。因為識咗10幾年，冇諗過會一齊，同埋佢哋兩個本身都唔係我啲理想型嚟嘅，純粹諗住去玩嘅啫。（Caca表示：出發前完全沒有感覺）點不知就最尾撻着咗啦。

東方昇：點解？過程點樣先？

Caca：咁我哋呢就四個人一齊去啦，但係另外兩個人就約唔到時間，我哋喺旅行嘅前一日呢就淨喺得我同佢一個，單獨可以出嚟買嘢啫，咁我哋就叫做第一次約出街，就去買嘢，食埋飯返屋企。（因籌備旅行而拉近距離）

東方昇：要買啲乜嘢去旅行？

叻叻：唔係呀藉口嚟嘅、藉口嚟嘅。

東方昇：去旅行之前買啲咩呀？

Caca：因為我哋去泰國，跟住又可以......

東方昇：買泳衣？

Caca；唔係，買浮潛嗰啲鏡呀。

東方昇：哦~OK，OK.

專家Dickson：但係咁呢啲你可以幫自己買啫，你點樣幫埋另外嗰兩個人買？

東方昇：你咁樣好無知呀Dickson，你問呢個無知問題令我好尷尬，由唔係買比堅尼，買比堅尼就話分size啫。

專家Dickson：我以為......

東方昇：買都係買一對......嗰個眼罩。

專家Dickson：我以為佢買嗰件潛水衣。

東方昇：唔係呀。

Caca：跟住然之後就去旅行啦，佢就好gentlemen咁樣拎嘢，幫埋另一個女仔（主動幫忙搬行李），但係喺個過程裏面，你會feel到佢有啲位呢，淨喺對我自己一個係咁，例如凍嘅時候佢會借件褸畀我着啦，但係另一個女仔都凍喎。

東方昇和叻叻：哦~

Caca：跟住然之後呢又會，我哋去過馬路嘅時候呢，另一個男仔同另一個女仔已經過咗嘅，咁但係佢就拖咗我過去嘅。

東方昇：哩個係，你哋去泰國呀嘛？

Caca：係呀。因為泰國係呀，個交通狀況呢，係好混亂，嗰啲車係咁標呢，係真係一個好好嘅機會，借啲意拖住個女仔。

Caca：係啦係啦。類似咁樣啦。

東方昇：正喎。

Caca：咁但係你會睇得出佢唔會特別忽略咗另外嗰兩個，淨係掛住去追我㗎嘛。

東方昇：唔係，多數嗰啲係要咁樣嘅，因為費事好明顯，佢好似淨係鍾意你。（東方昇分析：所謂一視同仁只是製造煙霧）即係Dickson如果暗戀阿叻叻呢，都會對阿Yvonne好嘅，跟住又會格硬對我好嘅，係咁樣嘅。

專家Dickson：即係冇理由買蛋撻淨喺買一個㗎嘛。

叻叻：係呀煙幕煙幕。

Caca：咁所以就你會feel到佢顧及大局之餘，佢又會對你有少少體貼嘅位咁樣。（Caca表示：從旅行途中發現對方不同優點）而且佢又有leadership啦，因為成個trip呢係得佢先知個Villa個Resort地址，咁所以佢就會負責plan囉。咁你又會睇到佢特登帶個board game過去，夜晚同我哋一齊玩。

東方昇：好細心喎。

專家Dickson：佢細心到呢我直情覺得呢，佢呢個旅行成團，並不是一個巧合嚟嘅，而係一個部署嚟嘅。（早有預謀）

東方昇：Exactly就係因為去旅行好多問題要解決呀，無論係搵嗰啲地方呀，坐嗰啲Tuk Tuk點樣去呀。都令到個男仔有機會發揮佢嘅魅力。

叻叻：同埋魅力。

東方昇：係呀。（旅行能創造機會）

Caca：係呀係呀，其實你完全突顯到佢嗰樣好㗎，同埋我哋去旅行呀嘛，咁其實你瞓醒，成個樣素顏啦，其實大家都睇曬。（女士素顏之憂慮）

叻叻：我明呀，女仔會留意呢啲嘢㗎，男仔可能唔係好介意。

東方昇：喂男仔素顏冇嘢呀嘛。

叻叻：「I mean女仔可能會介意：『呀死啦，呢個男仔會唔會介意我素顏嗰個樣呢？』」

東方昇：「咁你有冇特別着啲性感嘅睡衣呀？」

CaCa：「同埋我哋有一個契機嘅，我覺得就係因為我哋四個呢就去玩嘅時候就會搭船，又會搭巴士去一啲遠啲嘅地方玩㗎嘛泰國。有啲人會鍾意瞓覺，有啲人會戴耳機聽歌。我同佢係瞓唔到覺，又玩唔到電話。」

東方昇：「因為你哋已經…已經對對方有愛意先咁啫。即係Dickson平時都成日戴住耳機，我肯定如果佢遇到一個吸引嘅對象呢，佢一定唔聽耳機！」

專家Dickson：「未上車都除低喇咩呀！」

東方昇：「咪係囉！」

專家Dickson：「我同你講我水都唔識游，我都照跳落海呀！」

東方昇：「所以因為嗰陣時已經撻着咗啦，有啲愛意啦。

CaCa：「係咁嘅咩？」

東方昇：「梗係啦。」

CaCa：「咁傾吓傾吓，越傾就發現你又識嗰啲呀？又玩嗰啲呀？跟住又好夾呀，傾到落船都仲繼續傾緊，另外嗰兩個就繼續瞓覺。」

東方昇：「因為佢哋冇…」

Yvonne：「佢哋冇愛意。」

東方昇：「首先佢哋冇愛意，同埋佢無謂做電燈膽呀，即係岔開個話題令你地三個傾啦。」

專家Dickson：「我覺得caca好正呀，佢唔想承認自己有愛意先呢，係咁扮巧合喺度。」

叻叻：「你唔好篤爆佢。」

CaCa：「咁所以就我哋就多咗地方傾偈囉。如果冇呢啲單獨相處嘅地方，其實就好難喺嗰四五日會真係最尾一齊。」

東方昇：「呢個就係去旅行呢，啲路程好遠呢，焗住喺一個空間就要傾偈呀嘛。」

專家Dickson：「咁你喺成個旅程裏面最親密嘅接觸係咩呢？」

CaCa：「其實如果唔係話最尾一齊嗰日佢錫我嘅話呢，其實中間就會係拖我啦，甚至乎我哋影相嘅時候就會：『呀！我揹你呀』，公主抱啦呢啲。」

東方昇：「哇！」

叻叻：「好出面喎！完全唔係佢講嗰種咩，對大家一視同仁嗰種喎。」

CaCa：「之後嘅…」

東方昇：「咁你頭先講話佢最尾錫你，係點樣呢？」

CaCa：「其實係last day，朝頭早淨係得我哋兩個起咗身，咁跟住之後另外嗰兩個未起身嘅，之後佢就走埋嚟錫左我一啖，大家就…噢～即係一齊啦咁樣。」

東方昇：「好刺激喎。我鍾意呢啲比較霸道少少，即係同你喺被竇裏面，你哋就坐喺床邊就錫喎。」

叻叻：「好有畫面。」

專家Dickson：「哇欸？咁似我尋晚睇嗰套…」

東方昇：「電影，都好刺激喎真係。」

CaCa：「同埋唔係面珠墩吖嘛？係直接錫咀呀嘛？女仔仲覺得浪漫啲，呢啲位置。」

東方昇：「咁另外嗰兩個團友咪好不是味兒囉？成個團好似係你哋嘅愛情之旅，佢哋淨係負責夾錢嘅咋喎，同埋係幫你拎行李呀嘛。」

專家Dickson：「佢哋連伴娘伴郎都唔係呀！」

CaCa：「之後知道咗我哋一齊之後，佢哋係有打咗個突嘅，都會質疑下到底係咪…」

東方昇：「直程啦！姦夫淫婦！」

專家Dickson：「咁你又唔好咁講。」

東方昇：「明明打龍通啦！又喺度錫，可能望到啊佢哋。」

CaCa：「咁但係最尾我哋淨係錫咗之後就冇繼續其他嘢嘅，即係繼續同大家玩。」

東方昇：「佢哋喺度呀嘛。」

叻叻：「佢好想有其他嘢嘅。」

東方昇：「點做其他嘢啫。但係我有個好重要嘅問題想問，因為嗱去旅行，就係個氣氛會好好啦，咁驚唔驚返咗嚟香港之後，就覺得係一場幻覺呢？」

CaCa：「因為我哋又唔係淨係得兩個人，我哋有四個人㗎嘛，咁我哋做嘅嘢又唔會特別浪漫，即係比較平淡少少。你返到嚟，我哋第二日已經即刻約出嚟嘅。」

東方昇：「哦～啫係食住個勢嘅，即係冇浪漫完咗，happy咗一晚之後，第二日就唔識人嘅。即係返嚟香港，翻返嚟現實世界啦，都係繼續追求嘅。」

CaCa：「係會追求。除非我覺得淨係我哋兩個囉，即係如果佢由一開頭已經係淨係約我一個，咁你就會對呢個旅行太有期望。咁反而返到嚟香港，就有少少唔同。」

東方昇：「因為你哋感覺上係一班人，就算失敗都冇咁瘀呀嘛，當識朋友咁樣。」

CaCa：「冇錯，就算我哋失敗咗都可以繼續扮朋友，跟住就…」

東方昇：「係呀。」

CaCa：「之後最多咪‎WhatsApp唔講太多嘢囉。但係如果你淨係兩個人去嘅話，就有啲尷尬嘅，如果真係失敗咗嘅時候。」

東方昇：「咁我想問最尾你哋係拍拖拍到而家嘅？」

CaCa：「係呀，我哋嚟緊結婚啦。」

眾主持：「哇！」

東方昇：「幾多年呀？」

CaCa：「我哋拍咗七年幾啦。」

東方昇：「哇，即係嗰個旅行嘅愛意係可以延長到…係七年。直程結婚㖭喎，好彩有去呢個旅行咋。」

CaCa：「即係我覺得就算冇呢個旅行啦，可能我哋遲早都會傾偈，不過可能要一個耐少少嘅時間，我哋先會約出嚟，我哋先會拍拖。」

東方昇：「你講得啱，因為濃縮咗呀。就算我溝一個女仔啦，我要認識咗佢啦，我都要今日約完佢，起碼隔兩日我先再約佢啦。咁每次見都食餐飯，咪見兩個鐘咋嘛。但係佢呢四日係廿四小時見着㗎嘛。」

CaCa：「係呀，跟住你同埋好多細節嘢，你會睇得到。」

東方昇：「係呀，因為佢扮唔到假呀，因為佢長期真面目會呈現出嚟。」

專家Dickson：「啲人話『同住難』就係咁解。」

東方昇：「咁你結婚，去到蜜月會唔會返泰國呢？去返嗰間Villa呢？」

CaCa：「佢話絕對唔會喎。」

東方昇：「點解呢？」

CaCa：「佢就話：『而家我哋兩個人去唔抵呀。』咁樣囉。」

Yvonne：「到時渡密月會唔會叫埋嗰兩個friend去？」

叻叻：「哇，唔好咁殘忍啦！」

專家Dickson：「咁咪可以exactly有回憶又抵啦。」

東方昇：「夾埋錢㖭呀要佢哋。但係都會去到蜜月嘅？」

CaCa：「旅行渡蜜月就返鄉下。」

東方昇：「哦～返日本。」

CaCa：「係。」

東方昇：「正呀。咁喺度預祝你哋新婚快樂啦，同埋旅行愉快啦。」

CaCa：「好多謝你哋呀。」

東方昇：「之後我哋聽你呢個分享，都感受到嗰種甜蜜呀真係。」

專家Dickson：「我直頭覺得係天賜良緣呀。」

東方昇：「係係係。恭喜晒，恭喜晒。多謝你嘅分享，拜拜。」

CaCa：「拜拜。」

叻叻：「哇，真係好羨慕呀。」

東方昇：「你係羨慕佢去旅行？定係有愛情呢？」

叻叻：「Er，Both得唔得呀？」

東方星：「得。」