Meta Quest Pro登場．Steam Deck新底座支援Display Port．Microsoft Surface添新成員｜廣東話【Price Weekly #136 2022年10月】

Price.com.hk 香港格價網 | 科技類 | Oct 17, 2022

此影片謄本由串燒製作

★非作商業用途，本檔案版權歸版權持有人獨有★

歡迎收看Price Weekly，我們一起看看今個星期最熱門的科技新聞！Meta 最近就舉行咗 Connect 2022 嘅年度大會，CEO 朱克伯格正式公布大家期待已久嘅全新 VR 裝置Meta Quest Pro，新裝置雖然有唔少升級嘅地方，但睇翻規格就無之前傳聞講到咁勁啦。Meta Quest Pro 沿用 inside-out 嘅定位方式，有 10 個 AR/VR 鏡頭和感測器可以追蹤用家對眼同臉部表情，包括微笑、戚眉等，都可以即時反映在虛擬角色上。不過眼罩嘅解像度就追唔上對手 VIVE Focus 3，淨係得每隻眼 1800×1920、3,500 萬像素 LCD 顯示器，解像度比起 Quest 2 高咗 4 倍，雖然比起上代有改善，但係同價位嘅VR裝置相比，仍然有段距離。至於外型方面，就同之前洩漏條片一樣，眼罩用咗 Pancake 鏡片，比 Quest 2 薄咗 40%，令到頭盔無咁厚，而電池就搬咗去後尾枕位置。規格方面Meta Quest Pro 採用Qualcomm Snapdragon XR2+ 處理器，效能比上代提升 50%，至於手掣方面新嘅Touch Pro 手掣取消紅外線追蹤環，但每邊就加咗 3 個 Inside-Out 追蹤鏡頭，加埋 Qualcomm Snapdragon 662 處理器，個掣就可以更準確咁偵測用家嘅動作。Touch Pro 尾部同時有精準筆尖配件，所以個掣亦都可以變成虛擬畫筆，比用家喺虛擬世界畫畫。新裝置會係 10 月 25 日率先係 22 個國家發售，賣$1,499.99 美元，大約港幣 $12000，今代規格升級有限，但價錢就貴過上代三倍，唔知大家會唔會考慮升級呢？

下載檔案

所有資料非作商業用途，若有內容侵權，請即通知我們移除。

自從年頭 Valve 推出Steam Deck之後，一直都有唔少話題，之前仲買到斷曬市。最近Valve就表示Steam Deck現貨充足終於可以向海外地區發貨，日前更加推出 Steam Deck dock比玩家透過USB-C Port將部機駁落電視、電腦mon而且個dock 仲有齊 DisplayPort 1.4、HDMI 2.0 同 3 個 USB-A。除咗輸出到2個mon之外，仲可以駁埋Keyboard、Mouse。官網已經正式開放預訂，定價係 89 美元，不過香港嘅預購網站就暫時未有更新。同時間佢哋都出咗條宣傳片做推廣，不過有網民發現係介紹主機離線遊玩功能嘅時候，條片入面嘅Steam Deck竟然安裝咗 Switch 的模擬器「Yuzu」，網民就懷疑係 Valve 員工之前係Steam Deck 到 download 咗，但剪片個陣就唔記得咗 del，不過 Valve 即刻下架咗條片，將原本見 Yuzu 模擬器嘅 icon 換成，Valve 旗下熱門遊戲《傳送門2》嘅新版本。大部份可以係電腦上用嘅 software，Steam Deck 都可以用，所以係 Steam Deck 用到 Switch 模擬器，同埋玩 Switch 遊戲呢件事其實都唔意外，不過呢樣野可唔可以當係宣傳手法就係另一回事啦。

Microsoft 係前幾日舉行左發佈會，一次過推出咗 Surface Pro 9、Surface Laptop 5，同埋 Surface Studio 2+ 三款新機，仲有 2 款新配件，宜家同大家簡單介紹一下新 Product。首先係 Surface Pro 9，用左全新顏色嘅鋁製外殼，有 4 隻色可以揀，搭配 13 吋 PixelSense Flow 窄邊框觸控式螢幕，支援最高 120Hz 更新率及 Dolby Vision IQ顯示。處理器就有兩種選擇，分別係 Intel 嘅第 12 代 Core 處理器，同埋支援 5G 連線的 Qualcomm Snapdragon SQ3。香港會有 Core i5、i7 晶片版本，可以揀選 8GB 至 32GB RAM，同埋有 1TB SSD，價錢方面就係 $8,688 起，11 月 11日正式開賣。

跟住到 Surface Laptop 5，同樣有 4 隻色可以揀，不過今次就無分唔同廠牌嘅版本啦，淨係得 Intel Evo 平台嘅機，分別有 13.5 吋同埋 15 吋，螢幕依然都係 3:2 嘅 PixelSense 觸控螢幕，解像度為 2,256 × 1,504，兩個Size都支援Dolby Vision IQ技術。至於規格方面新機將會搭載 Intel 第 12 代 Core 系列處理器，GPU 就用 Intel Iris Xe，支援 Thunderbolt 4 同埋 Wi-Fi 6，最高 32GB RAM 和 1TB 儲存空間。價錢方面就賣$8,488起，10 月 25 日就會正式開賣。

Surface Studio 2+新機主要更新咗硬件既配置保留 Z 形支架同 28 吋芒，效能方面會採用 Core i7-11370H 處理器，CPU 效能提高 50%，另外配搭 NVIDIA GeForce RTX 3060 顯示卡繪圖效能提高一倍。香港將會賣 32GB RAM / 1TB 版本，定價係 $38,888，11 月 4 就會正式開賣。

同時 Microsoft 亦都推出咗 2 款配件，包括係 Presenter+ 同埋 Audio Dock。先講 Presenter+，佢係第一款獲得 Teams 認證嘅 Presenter，可以控制基本嘅 PPT 操作之外，仲係 online meeting 入面，加入咗經常會用嘅 Teams 快捷鍵，同埋靜音掣。另外除咗 Teams 之外，Slack、Zoom 等第三方程式都可以用到，價錢方面賣 80 美元。最後就嚟到 Audio Dock，即係一個有喇叭嘅 dock，係 Audio Dock 後面有一個 60W 嘅 USB-C、2 個 USB-C、一個 HDMI 2.0 同埋一個 USB-A，提供唔錯既擴充性。音效方面採用 Omnisonic 喇叭，有雙指向降噪收音咪同靜音控制，方便控制 online meeting，至於價錢就係 249.99 美元。

唔知大家屋企部laptop幾重呢，Acer最近就推出咗一部號稱係「世界最輕」嘅 16 吋 OLED Laptop Swift Edge，呢部laptop係專為Hybrid Work Model而設，採用超薄鎂鋁合金機殼，重量只有 1.17kg，而厚度亦都只係得 12.95mm，所以呢部機都的確好方便攜帶。除咗輕身之外，部機嘅OLED 螢幕規格亦都係賣點之一，佢擁有4K 解析度，支援 100% DCI-P3 色域，最高500 nits亮度，同埋0.2毫秒顯示反應時間。效能方面Swift Edge 搭載 AMD Ryzen PRO 6000 系列處理器，如果追求更高效能嘅朋友，仲可以揀多達 8 個 6nm嘅Zen 3+核心用嚟提升佢嘅反應速度。另外新機亦都內置咗Microsoft Pluton安全處理器，提供多層安全功能幫啲重要或者敏感嘅資料提供保護。同時，部機亦都加入咗生物辨識驗證功能，同埋Noble Wedge電腦防盜鎖插槽，新機10月就會係部份地區上市，定價由 US$1,500 起，但暫時仲未知道香港幾時會開賣，如果有興趣嘅朋友就要繼續留意啦。

華碩最近推出咗一款14 寸嘅便攜熒幕 ProArt Display PA147CDV，呢個mon最特別既地方，就係佢既 32:9 比例，因為呢個芒既目的，其實係要做一個控制面板，提供 ASUS Dial 同埋觸控功能快速調整 Adobe 軟件嘅功能去提升工作效率。另外，佢具備超廣色域，就算係啲比較深嘅原色都顯示到，例如係紅色、綠色同藍色，外型設計方面採用獲得專利嘅機械無段式支架設計，大家做野個陣無論係想打橫打直定打斜都可以隨心所欲調校個角度。呢個mon宜家已經正式開賣，定價係 12,900 台幣，大家又覺得呢個芒仲可以有咩玩法呢？

Sony 日前就推出全新相機 ZV-1F，新型號比起上代 ZV-1，機身重量減至 256g 之外，鏡頭焦距亦改為 20mm，光圈就有 F2.0，Sensor 方面就採用 1 吋 Exmor RS CMOS，為左方便用家喺開啟錄影功能之後，熒幕會出現紅色框，鏡頭隔離亦都會有紅色燈提醒用家，避免做直播既時候唔記得停機。功能方面新加入 S&Q 模式，可以做到 5 倍慢動作同 60倍縮時攝影。另外 Shot Mark 功能畀用家更快搵到需要既影景，唔使喺一大堆片入面慢慢搵。新機會係 10 月 21 號發售，價錢係 $4,290。另外由今日到 10月19號會有優先預售，買機既朋友會加送 USH-II 128GB SD卡，另外可以加 $790買埋無線遙控手柄，鍾意自拍既朋友對新機有咩意見呢？歡迎留言話畀我地知。

英國音響品牌 KEF近日再同設計師 Ross Lovegrove 合作推出全新頭戴式耳機 Mu7，新機嘅設計風格同之前嘅真無線耳機 Mu3 一脈相承整體造型圓潤、線條柔和，可以話係相當特別。另外耳機外殼以鋁合金製成，採用 40mm 全音域動態單元，支援藍牙5.1、 atpX HD 編碼可播放 24bit/48kHz 的高解析音樂，加埋有齊 ANC 同通話降噪功能，售價方面Mu7 賣 HK$2,980，有銀灰色同炭灰色可以揀，依家KEF嘅官網已經有得賣。