「Made by Google」發佈會懶人包・ iPhone撞車偵測揭發車禍・Apple 2024 年需棄用 Lightning | 廣東話【Price Weekly #135 2022年10月】

Price.com.hk 香港格價網 | 科技類 | Oct 17, 2022

此影片謄本由串燒製作

★非作商業用途，本檔案版權歸版權持有人獨有★

歡迎收看Price Weekly，我們一起看看今個星期最熱門的科技新聞！Google 喺過去嘅星期五就舉行咗「Made by Google」發佈會，正式發表全新Pixel 系列。手機就無大家最期待既 Pixel Fold 摺機，只有 Pixel 7 Pro 同 Pixel 7，熒幕尺寸分別係6.7吋同6.3吋。機身顏色方面，兩部機都有三隻色可以揀，而 Pixel 7 Pro 機背有 3 個鏡頭，分別係 5000 萬像素、4800 萬像素同 1200 萬像素，提供 5 倍光學變焦，而廣角鏡範圍由 114 度增加到 125.8 度。Pixel 7 機背就只有兩個鏡頭，分別係 5000 萬像素同 1200 萬像素，有 2 倍光學變焦。雖然硬件睇落唔算太吸引，不過功能上面就幾有新意，例如電影動態模糊功能可以喺拍片個陣自動將背景模糊，更加突顯主體，另外仲有“修復模糊“功能，透過 AI 技術將out fo既相片變返清晰，而「高解析變焦」同樣都係用 AI 技術去加強變焦效果，例如 Pixel 7 Pro 既 5 倍光學變焦，經過高解析變焦功能可以做到 30 倍既變焦效果。新機採用全新既Google Tensor G2 8核芯處理器，圖像處理轉用 Mali-G710，圖像效能提高 20%，功耗降低 20%，同埋提升 35% 嘅 AI 學習速度。

下載檔案

所有資料非作商業用途，若有內容侵權，請即通知我們移除。

而另一個焦點 product就係大家都等左好耐既Google Pixel Watch，分別有LTE同藍牙版本，錶面用左無邊框設計，配搭Gorilla Glass 5 玻璃錶面，熒幕係 AMOLED 解像度有 320dpi，喺健康功能方面，有步數追蹤、心率記錄、血氧感測、心電圖同睡眠監測，而且有 5ATM 防水即係戴住游水都無問題。新錶仲可以快速配對 Pixel 耳機，亦都有“尋找我的裝置“功能。Google 話出年會為 Pixel Watch，加入跌倒感應功能，當探測到用家跌倒個陣會協助聯絡緊急服務，如果喺指定時間內無回應就會自動發出求救訊號。而差電方式就採用錶底磁吸差電器，有 24 個鐘嘅續航力，暫時買錶只會送膠錶帶，大家可以另外買尼龍或者真皮錶帶去更換，但係鋼帶就要等到出年先有喇。一如以往，咁多款新產品都係未知會唔會喺香港推出行貨，如果想入手唯有考慮外國既 Google Store。提提大家，可以留意一啲近期匯率比較低既地區，我地就睇過美國同日本兩個地區既 Google Store 價錢比大家參考一下：Pixel 7 Pro：美國 HK$7012; 日本 HK$6712；Pixel 7：美國 HK$4672; 日本 HK$4455；Pixel Watch：美國 HK$2730; 日本 HK$2150。

Apple最新既iPhone 14系列，加入車禍偵測功能，但係早前華爾街日報就做左個實地測試，將部iPhone 14 Pro Max擺喺部車入面，再用另一部車撞落去，結果竟啟動唔到。Apple就回應話，原來要啟動到呢個功能需要有多種數據配合，例如動作感應器要偵測到動作變化，又或者收音咪要聽到碰撞聲，而氣壓計亦都要偵測到安全氣囊爆發時既氣壓轉變，再加上 GPS 讀數都要顯示汽車有急煞佢先會啟動，甚至連 CarPlay 同藍牙狀態都會有影響。雖然要求都幾高，但係都唔係無可能嘅事嚟嘅，話說早前有個美國iPhone用家揸電單車經過highway個陣唔小心跌左部 14 Pro Max，因為停唔到車結果就無執到部手機就走左去，但原來部電話自動著左個車禍偵測，唔單止幫佢報埋警仲幫佢通知屋企人，當屋企人收到msg嘅時候當堂嚇一跳，仲打晒去全紐約市既醫院逐間問，好彩最後搵到當事人，證明係虛驚一場。不過早前另一宗發生喺加洲既交通意外就無咁幸運，一架載住6個人嘅私家車失控撞左埋去路邊既大樹，其中一個乘客既 iPhone 14就啟動左車禍偵測功能，但可惜當救援人員到達現場時發現車上面6個人已經全部死亡，唔知大家對呢個車禍偵測功能又有咩睇法呢？

相信大部分人嘅屋企都應該有齊Micro USB、Type C同埋Apple嘅Lightning三種線，不過用Apple嘅朋友遲啲就唔使另外再買條Lightning線啦，因為歐洲議會已經落實由2024 年起所有手機、平板電腦、相機、耳機、耳筒、遊戲機之類100W 以內嘅行動裝置都要強制統一用 USB-C 充電頭，不過Laptop就可以去到2026年先統一轉做Type C。除咗統一叉電頭規格，未來 USB-C PD 快叉功率亦都劃一定為 18W。呢個政策推出嘅目的喺希望減少電子垃圾，但係 Apple 就認為統一規格會減慢創新速度、搞到造成更多污染，咁唔知對於大家嚟講呢個喺一個好消息定壞消息呢？

講完 Lightning，不如講下 USB，雖然依家 USB 既應用已經好普遍，不過有關 USB 嘅規格名稱就睇到人眼花暸亂，例如 SuperSpeed USB 10Gbps，同埋 USB4 20Gbps，其實簡單黎講就係代表 10Gbps同 20Gbps 速度既 USB 規格。而負責制定 USB 規格既 USB-IF終於都順應民意，日前宣布改變 USB 叫法，用速度作為命名準則，咁以後就會用USB 10Gbps、USB 20Gbps嘅形式呈現，等大家聽落無咁亂，但係根據呢個邏輯去計，依家既 Hi-Speed USB 2.0應該叫做 USB 480Mbps，但係今次又無幫佢改名，不過 USB IF 都有解釋原因，話係驚大家會認為 480 係大過 20 同 10做成誤會買錯野，所以就唔改名。咁呢份細心大家又受唔受落呢？

只係推出左兩款產品既 Nothing可以講係話題性十足，之前推出 Nothing Phone（1）已經吸引到唔少人既注意。黎緊將會推出第三款產品 Nothing Ear（Stick），睇落都好有gimmick。呢對新耳機上個月就率先喺LFW曝光，見到個充電盒好似枝唇膏咁，傳聞話會轉用半入耳式設計，但廠方暫時就賣晒關子，只係話呢隻耳將會係旗下最靚聲既產品，今個月 26 號就會正式發表喇！唔知大家又期唔期待呢？

鍾意頭戴式耳機既朋友黎緊又有多一個選擇，講緊嘅係法國高級音響品牌 Focal就發布咗旗下第一款無線降噪耳機 Bathys，佢用咗品牌旗艦耳機所配備既鋁鎂M型振膜單元。USB-DAC 模式可以解碼 24bit / 192kHz，支援 SBC、AAC、Apt-X 同 Apt-X Adaptive 解碼，配備 8 個收音咪，提供兩種主動抗噪模式。廠方亦有專用手機app去調校 EQ，連接方面可以用藍牙、3.5mm同 USB。續航力方面可以連續用到 30 個鐘，售價係 799 美元。

唔知大家印象最深刻嘅keyboard係點嘅呢？日本Google最近就推出咗一款超長鍵盤「Gboard棒」，呢個keyboard有成165cm咁長，但只喺闊 6.4cm，比起一般keyboard長好多，同時又窄好多。Gboard棒同傳統嘅keyboard非常唔同，佢將所有鍵盤掣排成一行，你可以由A至Z咁排，亦都可以跟返傳統鍵盤嘅排法。Google話呢個設計除咗慳位啲同易清潔之外，啲掣都可以容易啲搵到，仲無咁容易比屋企隻主子踩親喎，大家喺咪以為咁就完呢？呢隻keyboard除咗可以用嚟打字之外，仲可以用當係「懶人棍」咁用，譬如係攞佢嚟撩一撩沙發底，又或者喺幫手篤一篤啲電制。keyboard長度仲可以容納到四個人一齊用，咁就可以當埋喺交友工具、增進感情，而行山嘅時候又可以當喺行山杖，仲可以拎埋嚟幫小朋友度高，可以話喺超多用途。不過Google就無打算將佢大量發售，只想推廣自家輸入法。「Gboard」既創意之作唔知大家又覺得呢個product得唔得意呢？