14/10《圍爐取戀》條仔有鋪偷拍癮

叻︰更加要睇吓佢

東︰我唔嘈，我細聲啲

K︰好大家靜少少

叻︰殊~~~

東︰嘩幾得意喎
T︰殊!!!

叻︰嘈醒佢

東︰好，我哋唔打擾佢

東︰生完之後見到佢有冇啲母愛氾濫出嚟呀？

K︰有啊，原來係真架，天性嚟架喎

T︰點呢點呢

K︰咩都要畀晒佢囉，即係自己嗰啲唔理啦

D︰你想講咩先？之後所有嘢再算 哈哈哈

K︰關注囉

東︰即係所有關注都畀晒佢

K︰係呀差好遠架，你見我個人已經肥咗咁多

東︰我都唔想，我都見到但係都唔想講但係

D︰你自己又咁老實嘅係咪先

K︰我點打理自己呀基本上

東︰都係，即係媽媽就將全部時間呀專注都畀咗佢。咁你辛唔辛苦呢近排？

K︰前幾個禮拜辛苦啲囉，因為去到最尾呢，個肚好重呀。咁之後後尾生嗰陣呢，做完手術真係好痛囉，即係都痛咗一個幾禮拜。

東︰哇都真係好慘

叻︰我淨係見到你話好想食嘢咋喎

K︰係呀，唔好講啦，我自己依家坐緊月呀

東︰吓？坐月都唔可以亂食嘢架？

K︰唔可以架，食啲嘢好難食架

東︰但你都肥咗喎，你等陣食得返你咪...仲肥！？

K︰(即刻反白眼)我依家肥係之前肥落架囉！

叻︰佢真係唔識嘢呀

D︰唔係呀佢關心你變咗肥媽咁樣，咁就大鑊啦

哈哈哈

東︰咁你覺得自己幾時會復出呀？

[觀眾最關心的問題]

K︰即係點呀，即係再次下海係咪呀？

東︰係呀 梗係啦 幾時呀

K︰Er…下個月啩

[準備極速復出]

東︰嘩 咁快？要修埋身喎

哈哈哈

我哋咁齊心嘅點解

C︰打嘴呀

K︰唔係喎我依家唔使修喎！我覺得自己好好喎

東︰身材仲好咗添吖嘛？(哈哈哈) 好啦好啦，唔阻你，知你辛苦喇。好咁OK你就隨時打畀我哋，就即刻上嚟啦，好唔好呀？

K︰好呀，拜拜。

東︰哇見到Kneta呢真係成個人唔同咗，好似...(叻︰溫柔咗) 係呀，真係做媽媽係唔同啲。但係可能係因為仲休養緊，遲啲希望佢個火返返嚟。

T︰同埋個BB仲細，咁得意，大少少就即刻...係咁鬧佢、一嘢銳落去。

東︰喂，好咁我哋今日嘅題目係乜嘢呢？

T︰今日其實就係女事主打上嚟，就話佢男朋友啦有啲壞習慣。個情況都...幾棘手，所以想大家畀下意見。

東︰嘩好好好，聽聽先。Betty你好(B︰你好你好)你今日想講嗰件事係點樣呢？

B︰我男朋友其實係一個十分之鹹濕，其實大家男仔鹹濕我都明嘅，但係佢鹹濕我覺得有啲位我係接受唔到囉。因為我知道唔同男仔可能鍾意一啲女仔唔同身體部位，即係可能鍾意胸部比較大嘅、有啲可能鍾意長腿呀嗰啲。咁我男朋友係好鍾意大pat pat嘅

T︰哦~~即係鬼仔性格

B︰係啦係啦

東︰啲人咁講啦唔知係咪啦。跟住呢？

B︰平時佢IG follow嗰啲都係鬼妹比較多嘅

東︰咁點呢？有咩問題吖？冇問題吖幾好吖

B︰咁我講吓我自己背景先，即係我平時有做開GYM，做咗GYM大概兩年幾三年左右啦，即係我覺得我唔係扁嘅pat pat囉。同埋我上圍都唔係話特別細嗰啲，即係都唔係iPad嗰啲嚟嘅。咁佢都鍾意嘅我知道。但係咁你有得睇嘅話你梗係唔會嫌多啦，係咪先？

東︰我唔敢答呀

T︰好難答啊

C︰即係佢周街睇呀？

B︰係呀係呀

T︰我諗起嗰張圖，即係拖住呢，跟住擰轉頭望嗰張

D︰隻眼好似嗰啲激光眼咁樣四周圍係咁掃喎

東︰咁冇嘢啦？當街望吓人哋個pat pat或者IG望吓

B︰唔係呀唔係呀，有一次我就見到佢個電話啦，佢睇緊條片，原來就係佢自己喺條街度影人哋個pat pat嗰啲..

吓？唔係呀嘛！？

C︰咁你睇到個片你點樣知道係佢自己影？

B︰佢有同我講過佢嗰日會大概喺邊度，即係譬如話喺銅鑼灣，咁我認到嗰個商場係咩樣。跟住之後我睇睇吓呢，咁佢可能影完之後擺低部電話啦，我就係見到佢對鞋。

叻︰哦即係個鏡頭一掃落去，跟住影到係佢對鞋。

D︰即係影埋佢自己㗎啦其實？

B：係啦，影到佢啲衣物咁樣囉

東：咦咁我想問佢係影人裙底呀？定係點呀？

B：Er….即係譬如前面有個女仔可能著瑜伽褲嘅，佢鍾意嗰啲...

東：噢！！！唔係我嚟嘅㗎嘛？

C︰係咪影你呀？

叻︰你又係銅鑼灣喎

東︰唔係我嚟㗎嘛？（B︰唔係唔係）哦即係佢影人哋著瑜伽褲個籮柚嗰個樣。咁你見到之後你有咩反應呢？

B：我其實知道呢件事好耐，因為同佢一齊咗都三年左右（T：即係慣犯嚟㗎喎）咁佢平時鍾意都會上外國嘅Forum睇人哋啲裙底相。但係佢自己影就唔會嘅。但係遇到有個女仔幾正，咁咪大特寫佢個pat pat咁樣。

D︰唔係佢咁咪叫自己影囉，唔係自己影唔會有

叻︰即係我覺得你話佢鹹濕，咁我理解可能佢有啲需要囉。但係佢呢個行為已經超越咗鹹濕。

東︰我會問咁係睇到佢拍啲片出嚟啦，咁你點同佢講呀？

B︰其實我反映過好多次嘅，咁佢梗係應承你話「我知㗎啦唔會㗎啦」，但係你知身體總是誠實的。

D︰你同佢反映嗰陣時，你個語調有幾嚴重先？即係你有冇話畀佢聽，其實係好大件事先？

東︰或者我會問你，你知唔知個嚴重性有幾大先？

B︰佢知佢知，佢知道可能佢會承擔一啲法律嘅責任。但係冇呀，佢都照做。我見佢拖住男朋友嗰啲佢都會...

嘩唔係呀嘛？

叻︰佢有冇俾人發現過呀

B︰佢嗰個心態係，當下覺得佢幾正咪集郵咁樣囉。

東︰即係佢個變態情度已經去到，興奮到佢知道要坐監。人哋有個男朋友，如果俾人知道佢會俾人打鑊勁，佢都要做

T︰情況比我哋想像更加誇張喎

B︰係呀 因為我哋之前啲EX都唁會咁嘅(正常都唔會咁嘅 唔係你EX嘅問題)我都未handle過呢啲情況

東︰咁你今日打上嚟就係你要諗下點樣stop佢呢個行為啦？

B︰stop唔stop到我就唔知啦。因為我都講都講過啦，跟住又可能發脾氣又發過啦，但係佢都係照繼續都冇辦法嘅我覺得。

東︰明呀，起碼我覺得你知道佢呢個問題好嚴重，你有指出呢個問題，即係你冇縱容佢呀。好彩你係知啫，但係問題係佢唔知呀。

B︰咁你正常一個女仔，你個男朋友係咁喺度睇其他女，都會唔鍾意㗎嘛係咪先？

T︰咁Betty我想問下呢你頭先就話你有同佢嘈過呀嘛，我想知其實你同佢真係去到最激烈嗰一次，你點樣同佢講？

C︰即係話，我要同你分手㗎喇你再繼續咁樣？

B︰又未去到分手，因為其實呢個呢，相比起其他嘢嚟講都比較minor。其實佢之前都有做過啲更加過份嘅嘢嘅。

吓？

C︰呢樣已經好過份啦喎

B︰類似係出軌嗰啲咁樣嘅，咁所以依家我覺得，相比起佢之前做過嘅嘢，都算係...

東︰我會覺得出軌呢，出軌係傷害佢另一半姐，即係佢出軌就傷害你。但係呢個我覺得個傷害仲大，因為係有好多女仔受害呀。我覺得呢個嚴重性仲大喎。

B︰係呀係呀，我唔知點同佢講呀所以

東︰因為嗱如果佢話佢唔知道嗰個法律責任，佢咁樣做呢，你就可以同佢講

T︰係呀，會犯法㗎喎

東︰因為以我所知有條叫做窺淫罪呢，其實依家就新訂落嚟，就係捉呢啲影裙底呀、影私密地方嘅...(T︰刑事化咗)係刑事化嘅。咁如果佢話佢唔知，我話畀佢聽過嚴重性，咁佢有阻嚇「欸咁我唔做啦」。咁而佢係知道喎

T︰好棘手呀

D︰然後知法犯法喎

東︰所以係要stop佢呢個行為，個難度其實係好高喎。

Betty:係呀係呀！其實我都有喺Telegram，我都有join啲group，好多男仔開咗啲鹹group咁樣啦，我都見到有人偷影我嘅發現

眾人:哇

東方昇:你嘅感受如何？你作為嗰個受害者，你感受如何？

Betty:好唔鍾意啦當然，同埋令我驚訝嘅係原來香港其實有好多男仔都係咁…［Betty驚訝：偷拍不只一少撮人]即係個group可能成幾萬人，全部都可能偷影街啲女仔，着短裙呀或者yoga pants嗰啲。

東方昇:咁你呢個受害經歷，你男朋友知唔知呢？

Betty:佢唔知佢唔知，我冇同佢講

東方昇:咁你點解唔同佢講呢？

Betty:我覺得喺佢個角度佢反而會更加開心，因為以我對佢嘅認識，佢覺得「哇！我女朋友俾人appreciate呀！」

叻叻:黐線㗎喎！我想講你真係不如同佢分手啦

東方昇:咁我會問，點解你唔同佢分手呢？

Betty:一開始有分手過，有分過嘅其實我哋。但係後尾又覺得大家都仲有感覺，咁就一齊返

東方昇:但係佢有機會因為咁樣犯法，跟住拉咗坐監㗎喎，你覺得呢個係幸福嘅結果咩？

Betty:唔係㗎…

叻叻:同埋係一個值得付托終身嘅人咩？

東方昇:係呀啱呀啱呀！

Betty:其實我都有成日諗呢個問題嘅，所以我都唔知。即係一方面自己仲係鍾意佢嘅，除咗呢樣嘢之外，佢其他又唔係話…

東方昇:吓？呢樣..呢樣已經夠衰

專家Dickson:咪住先！

叻叻:係呀呢一樣嘢係仲過分過cover晒其他小事 [一個嚴重缺點 足以分手]

東方昇:唔係話佢有其他好你就話我忍受呢個缺點。呢個缺點係差到極點啊！

Terry:一個致命嘅缺點嚟！

東方昇:即係佢殺人你冇理由包容佢啦大佬，佢就算對你幾好，佢殺人佢都有問題㗎喎

Betty:嗯

東方昇:即係佢呢個行為都係一個好低賤嘅行為啦，咁你其實可以同佢分手㗎啦喎？！

Charlie:但我覺得嗰個點係，你講到你好鍾意佢啦，但係其實佢鍾唔鍾意你呢？

Betty:佢鍾意嘅我知道，但係就係呢個位佢克制唔到

東方昇:那我幫你呢，首先我幫你處理咗你同佢嘅關係先，我梗係建議你分手啦！你話唔得嘅話，嗱，如果你係鍾意佢嘅話呢，你就一定要幫佢stop咗呢個行為［東方昇分析：無法分手的前提下 唯有逼佢改過]因為我之前講過啦，佢知道個重要性，而知道你唔鍾意，佢都照做。咁建議呢其實要搵一啲醫生幫助，因為佢直程係一啲性癖

專家Dickson:而且佢係控制唔到啊，因為佢知道呢件事其實係錯㗎喎，可能你揭發佢嗰陣時，佢會覺得好罪疚、好慚愧點點點，但係佢跟着照做喎，即係佢個控制能力出咗問題喎[Dickson分析：男方以無法自拔]

東方昇:所以已經值得去轉介佢去睇，一定要去睇醫生添啦！我知道你都知道佢有行為問題，但係你有責任囉 [Betty有責任阻止]

叻叻:同埋你係比較上可以阻止佢做呢件事嘅人

東方昇:係呀，你係愛佢，即使你哋之後係咪喺埋一齊，你愛佢你就要提醒佢，即刻Stop佢呢個行為喎！

Betty:我會再同佢講囉，但係如果唔得嘅話，可能真係要轉介去睇醫生。因為持續咗好耐呢件事

Terry:我想問多少少你嘅感受，因為其實我覺得我哋講嗰啲嘢呢，你都諗過㗎啦。但係我就想聽多啲你有個咁嘅男朋友，其實你係面對緊有幾大壓力？我相信你都唔好受啊 [Betty有何感受？］

Betty:頭一年半左右完全唔好受，因為我完全唔知點解佢會咁囉，但係我有提出分手，分過嘅。但係當佢又返返嚟同我傾番計嘅時候啊，我控制唔到自己，所以其實係好辛苦嘅頭一年半

叻叻:其實你係咪好矛盾呀？

Betty:係呀係呀超級矛盾我就係，其實都難過左幾場一段時間…

Terry:我希望啊，個男仔睇緊呢段片嘅。因為佢要知道呢佢偷拍呢個行為唔止係傷害左俾佢偷拍嗰啲人啊，其實阿Betty都好難受個內心 [女友亦受到傷害]我會判斷，其實你男朋友唔係好愛你，因為你咁耐以來其實你唔開心，佢知㗎。你頭嗰一年呢，你有同佢表達同佢嘈過㗎嘛，佢都唔改，所以我覺得直程係唔夠愛你啦

東方昇:佢愛pat pat多過愛你

Terry:冇錯呀

專家Dickson:佢令你喺個咁難堪嘅位啊

Betty:係呀，呢個佢自己都認，佢直頭認，即係我哋分手嘅時候佢有認㗎

Terry:所以就兜返去佢哋講嗰個，如果真係處理你地兩個嘅關係嘅時候，你就真係要用呢樣嘢嚟考慮囉

Betty:嗯嗯嗯

東方昇:所以啱呀，首先我希望佢睇緊啦，佢睇緊佢要知道呢件事嘅嚴重性，因為佢可能，佢就係嗰啲Telegram嗰啲group嗰度，嗰啲同溫層就係全部都變態[同溫層會影響判斷]，覺得冇問題，你快啲去影過嚟一齊分享，佢個同溫層係咁樣啊，佢令到自己嗰個行為合理化，所以我希望佢睇緊，啲網民一定會鬧佢，啱呀大力鬧，俾佢知道佢個行為係有幾可恥、俾佢知道有問題喎，咁就立地成佛，立即停止呢個行為。或者如果自己解決唔到，即刻要去睇醫生啦！

Betty:問醫生呢個我真係好同意嘅，我之前有諗過嘅

專家Dickson:如果我覺得呀，你決定選擇同佢分手之後啊，你分咗手之後記得揭發埋佢造福社會啊大佬

Betty:好好好

東方昇:同埋我希望，如果網民有啲咩方法，可能喺個留言度講低，可以幫到你點樣做啊或者點樣搵心理醫生啊，問多啲人意見啦。加油加油！

Betty:好唔該晒你地

眾人:拜拜

東方昇:喂咁我想問吓你哋，如果嗰個男仔係你哋嘅男朋友，你哋會點呢？

叻叻:如果佢係我男朋友呀，佢會死得好慘囉。即係如果勸佢幾次佢唔掂呢，我一定會報警拉佢囉

東方昇:啱呀正確

Charlie:如果係我一定會用分手嚟阻止佢做呢位事啦，因為如果我講埋分手喎，我要走啦喎，佢都仲要繼續做呢，咁即係其實佢都唔係好愛我啦。咁我仲會分手之餘仲要篤埋佢灰，係我同佢一齊嗰陣時候仲懶係冇嘢咁樣。

東方昇:我覺得你仲要攞把鉸剪，一嘢睇吓幫佢解決嗰個問題

Charlie:Chop Chop Chop

東方昇:所以我哋男仔聽到我哋都好嬲，但係其實頭先個女仔打上嚟，我反而係同情佢嘅情況，因為真係其實佢都面對住好大嘅壓力，而佢知道佢男朋友嗰個情況好嚴重，但係佢真係愛莫能助所以搵我哋幫手。所以其實喺我哋個角度，我哋都係要慢慢解釋過件事，因為我哋驚就係如果當我哋話個女仔，咁佢呢，佢覺得我打上嚟你咁樣鬧我呢，可能佢就係為一一個幫到佢男朋友嘅人。如果佢都唔信我哋，就連幫都幫唔到啦。咁同埋我會覺得而家社會上香港性越來越開放啦，其實好事嚟嘅，大家開始了解左一啲自己性嘅癖好，咁其實講到我鍾意SM，我係S，我搵到個女仔佢係M，我哋玩得好開心，其實冇問題㗎我覺得係可以㗎。但係佢個情況就係，喺人哋唔知情嘅情況你影人，其實呢個係完全不能接受。

專家Dickson:咁等同你鍾意SM唔等同於你可以揸住條鞭周圍發人。

東方昇:啱呀所以如果佢，咁佢鍾意影籮柚，我就大贈送啦，影我！我個籮柚大大個畀你影，冇人想影㗎，我願意呀！好啦，我哋今日講到呢度，拜拜！