23/9《圍爐取戀》我條女係打卡狂魔

東方昇：咩呀？
Dickson: 你係鍾意影裸體相㗎。
東方昇：梗係啦！但係我係被迫㗎因為……
叻叻：被迫？我哋觀眾就被迫！
東方昇：你明唔明呀？但係冇辦法冇人幫我影吖嘛，我唯有噉樣囉，我都想係全裸呀。只可以半身裸咋，(想)影埋下半身你明唔明呀？Charlie呢？你應該冇呢個習慣呀嘛？
Charlie: 我好少打卡㗎，我男朋友會……打死我㗎。
東方昇：哦姐係你都想嘅，但因為佢唔想，制止你。
Charlie: 我一話想影，跟住啲嘢食可能嚟到啦，我就好想影：「呀~可唔可以影幾張相呀？」(男友:)「食啦影影影死港女噉樣！」
叻叻：姐係佢會鬧你㗎喎。
Charlie: 真係鬧我㗎。
叻叻：佢都幾惡喎。
東方昇：姐係最港女嗰隻，影食物咪算囉，有啲仲要攞住個香檳杯……
叻叻 (心虛)：佢好似講緊我喎。
Dickson: 得件豬扒冇我份，唔影。
東方昇：係呀，要兩塊豬扒都喺度。
All: hahahahha

東方昇：噉今日有咩題目，就係關於呢樣㗎？
導演：係呀冇錯呀，但係你哋啱啱講嗰啲case都係小兒科，因為今日打上嚟呢位事主呢，佢女朋友就係一個打卡嘅狂魔呀。
東方昇：嘩狂魔呀？着唔着衫㗎嗰啲？
Charlie: 睇吓點狂法喇。

東方昇：喂鐵人你好！
鐵人：Hello~
東方昇：係你好你好，聽講你嘅另一半係個打卡狂魔喎。
鐵人：係呀冇錯。
東方昇：我知你唔係影佢㗎嘛？你係影佢隻狗喎係咪呀？
鐵人：係呀，影我哋啲狗。
東方昇：哦~ 有幾狂先？
鐵人：除咗星期一至五要返工啦，星期六日佢基本上已經排好晒所有schedule去邊度打卡啦、去邊個café啦，喺香港你講得出嘅地方我基本上都去過。我因為佢都認識咗香港，嘩原來香港有咁多地方。
Dickson: 有冇去過啲好隱世嘅？即係完全冇人聽過嘅？
鐵人：有啲地方係九擔租，你有冇聽過？
東方昇：(黑人問號) 嘩咩嚟㗎，九寨溝我就聽過，九擔租呀？！
鐵人：係呀，係烏溪沙定唔知邊度再入，定唔知乜嘢。(烏蛟騰)
東方昇：我住馬鞍山都未聽過喎真係。
鐵人：甚至有啲燈飾呀、中秋節嗰啲燈籠我全部都去過晒。
東方昇：嘩！噉但係我想問，點解佢唔要求你影佢嘅？
鐵人：因為佢唔係想影佢，佢只係想影啲狗。佢對影狗呢樣嘢係有啲執迷，仲要幫佢哋換衫啦、戴夾啦，要帶十幾廿套衫出去幫佢哋換。有造型㗎，每一個場景都有唔同嘅衫配合返。
東方昇：如果俾你揀啦，你寧願影狗定影佢呢？
鐵人：Er.. 宜家聽到影相呢2個字都已經有啲驚。
東方昇：haha即係唔理影乜都唔得㗎喇。
Dickson: 會唔會咔嚓咔嚓噉樣你都好驚呀嘛？
叻叻：佢話個iphone如果有得delete嗰個相機掣，佢都想㩒走佢。
鐵人：係喇冇錯啦，因為又有相機啦、電話啦、gopro啦……
東方昇：嘩有晒架撐。啲架撐係你買定係佢買㗎？
鐵人：我買嘅，買嚟送畀佢嘅，跟住又係自己用返噉樣囉。

東方昇：噉講吓有幾瘋狂啦，即係有冇一次經歷係影得幾癲呢？
鐵人：即係好似講返嗰個中秋節噉樣啦，我哋就去咗元朗，有好多燈籠嗰度影相。
叻叻：大橋呀？
鐵人：係喇，大家都知㗎喇喺邊度。
東方昇：因為呀叻叻都叫男朋友去影相，去過㗎喇。
鐵人：跟住影完之後又去咗炮台山嗰個東岸公園度影相。
叻叻：咁遠個距離？！
鐵人：跟住再去咗大埔，唔知影個月球定咩。
叻叻：哦！咩小白鷺。
鐵人：噉其實都唔緊要嘅，因為去大橋嗰日呢我係九點幾起身陪佢去，因為佢話晏晝多人。噉我影完返到屋企，佢就喺度睇相啦，跟住睇睇吓佢又覺得嗰啲相唔靚，佢要再去影。
東方昇：哦~ 要補拍。即係我哋拍嘢有時會噉樣嘅，拍得唔好要補拍，你都要嘅。
鐵人：係喇，佢話我唔靚要再去影，我嗰一刻真係崩潰咗。
叻叻：嘩……其實你係冇放過假㗎喎。
鐵人：我冇呀，真係呢4年幾係完全冇。
東方昇：嘩4年幾？！維持咗4年。
鐵人：係呀4年半囉。

Dickson: 我想問吓呢，佢話會覺得啲相影得唔好，噉佢係點判斷㗎？
鐵人：佢就覺得嗰隻狗隻眼唔夠大啦、條脷太長啦。
東方昇：條脷太長？！
鐵人：係喇，但係你控制唔到㗎喎，唔關個攝影師事。
東方昇：因為影狗係最難㗎，你好難叫佢坐定定昒㗎嘛。
鐵人：係……同埋我同佢去café影相呢幾年係冇食過熱嘅嘢，我一嚟就要影咗一個鐘頭先。我踎喺張枱度抬住隻狗噉樣。
東方昇：哦即係要影埋隻狗同埋個食物！嘩好慘呀！所以呢幾年係未食過熱嘢嘅？
鐵人：冇食過熱嘅嘢㗎。同埋我每一次同佢去café呢佢自己都有啲checkpoint嘅，所以佢要影到呢樣嘢。通常係點呢？影完隻狗同埋啲嘢食啦，噉我就超快食返晒啲嘢，因為通常都有限時㗎嘛。
東方昇：90分鐘噉樣。
鐵人：如果影唔晒或者影得唔靚，我又要唔知幾時再去嗰間café 又要再影一次。
東方昇：其實嗰個情況係，佢女朋友同啲狗拍拖，你係個攝影師啫。
鐵人：係我就係嗰個工具人囉。我成日都話我係嗰個奴隸呀嘛，抬住隻狗同埋影啲狗。
Charlie: 個過程你會唔會擺出個唔耐煩嘅樣，定係你都會扮影到好開心噉樣㗎？
鐵人：有陣時會有少少唔耐煩囉，但係因為我要引啲狗，如果我再擺出唔耐煩，即係我影嘅時間又要攤長。
叻叻：嘩求生意志力好高呀。
Dickson: 作為一個專業嘅攝影師。
東方昇：佢真係專業㗎喎，如果我有情緒呢，就會影響個拍攝進度。其實你一至五嗰份工轉做攝影師仲好啦，你已經練到好勁，一身本領㗎喇喎。
鐵人：我喺佢身上學識咗嗰啲相機係點較呀。
東方昇：講幾個技巧俾我哋知，如果當我要幫女仔影相有咩技巧呢？
鐵人：哦~ 最緊要個光圈夠大囉，你先影到前清後濛呀。
東方昇：係~
鐵人：然後我哋影狗呢，快門要夠快。
東方昇：係呀會郁㗎。
鐵人：係呀即係嚓嚓嚓噉樣囉。
東方昇：噉我問吓，因為影動物係好難嘅，點樣令到隻動物坐定定俾你影呢？
鐵人：好問題，所以我就要好似個傻仔噉喺後邊大叫，嗌佢呀、尖叫呀，令到佢望住你囉。
Dickson: 即係一路影，一路「旺財旺財呢邊！」
東方昇：所以咪齋影相唔拍片囉，如果拍埋片就見到「呀！！哦！！(高八度)」噉樣㗎。
叻叻：呢個唔係份工嚟㗎可？即係佢唔係做KOL或者靠呢個做收入嚟？
東方昇：係都唔得啦！

鐵人：唔係呀唔係呀！
專家Dickson：冇理由你全面為佢服務架嘛。
鐵人：佢做文職咋嘛。
叻叻：係呀係呀。你有冇試過話講聲話你攰呀？
鐵人：有，曾經有協議過就係我哋星期六日放假就影一日，唔影一日，當然就只係實行左兩個禮拜就冇咗呢件事啦。
專家Dickson：然後就變返日日啦？
鐵人：係啦。好似上個月到，突然之間佢同我講嗰日冇plan到嘢，咁我滿心歡喜。
大家：正呀。
東方昇：佢冇plan到就留喺屋企執相啊。
鐵人：係呀，勁開心咁樣。跟住嗰日晏晝佢就同我講：「我搵咗間Cafe啊，我哋過去食嘢啊，因為你都要食嘢㗎嘛。」但我嘅食嘢呢係真係想食嘢，我唔係想話好似一個Mission咁樣，成日都要去achieve 呢樣、achieve個樣，其實攰就攰喺呢個點囉，唔係話攰同佢出街、去邊度去邊度，即係譬如我哋去離島咁樣，都冇睇過個離島係啲乜，淨係我哋影到啲咩咋嘛。即係我都試過反抗嘅，因為呢我同佢呢四年幾，我身邊啲朋友同屋企人都知道，佢係打卡狂魔，就好少約我星期六日出街㗎啦。咁有一次第五波疫情完咗之後啦，我啲屋企人就話：「不如同啲小朋友去長洲啦，因為太耐冇出過去啦。」咁我就同佢講，我就話：「我想嗰日星期六去長洲。」跟住佢就話：「吓？咁我咪冇得影相囉，點解一定要去啊？」如是者到嗰日朝頭早我話：「我真係想同啲屋企人出去長洲。」佢嘅意思就係我唔想囉：「同啲小朋友又影唔到相，點解你要咁想去者？」咁我就突然之間就嬲咗。
東方昇：都唔突然㗎啦。合理呀。
專家Dickson：太過分。
鐵人：我突然之間嗰團火出咗嚟，咁我就自己一個啦，諗諗吓越諗越嬲就自己去咗長洲，join我啲屋企人咁樣，跟住後尾佢都知道我嬲嘅，佢就自己入咗嚟長洲，當然都會帶埋隻狗啦。咁本身我都諗住同我啲屋企人食飯，咁佢啱啱入到嚟，佢又未影相，咁後尾都係我啲屋企人走咗，跟住我留低喺長洲陪佢影埋啲相。
東方昇：都仲要影埋相？！
叻叻：即係你已經嬲到咁樣，你都仲要完成任務。
Charlie ：佢入嚟長洲係….搵定景點俾你嘅？
叻叻：都唔係氹你囉。
鐵人：係佢有搵定㗎。
大家：嘩～

東方昇：咁我想問，點解會變成咁一個狂魔嘅？一定係你地縱容佢喎。
鐵人：係呀，我縱容佢囉。我個人就係，即係譬如佢鍾意做咩，我都想盡量陪佢做嘅。即係希望佢開心啦，鍾意一個人都係想佢開心啫。
專家Dickson：呢個想法啱。
鐵人：但係其實以前冇咁嚴重嘅，佢可能都仲會兩個人出去、睇吓戲啊、食個飯啦咁。咁但係越縱容佢呢，就越嚟越嚴重好似而家咁。
東方昇：應該我諗你都唔會再睇戲，因為睇戲又唔可以帶狗、又唔可以影相，啲活動冇㗎啦呢啲活動。
鐵人：我同佢一齊呢，最開心就係上年生日囉，因為我中間有三個鐘係唔使影相。
大家：哈哈哈！
叻叻：好sad啊！咩事呀…
專家Dickson：老老實實係咪鍾意返工多過鍾意陪佢先？
鐵人：返工係唔使影相係好開心嘅。
東方昇：但係你有冇好認真同佢一次講呢個問題呢？
鐵人：有嘅其實勸又勸過啦、鬧又鬧過啦。咁每一次同佢講佢都係「嗯，我知㗎喇」「我會調節下㗎啦」但係下一個禮拜六你都係要跟住佢schedule，你又唔想話禮拜六同佢繼續嗌交，即係唔想喺嗰個loop入邊，咁我就算啦，就同佢去咁樣囉。
叻叻：嘩！佢係一個控制狂嚟㗎喎。
專家Dickson：咁你有冇一次試過好堅決，我一定唔會同你去嘅？
鐵人：有，好似中秋節，我唔係話佢又要返去嗰度再影嘅，咁果次我真係超堅決，我話一定唔會再去嗰度，跟住佢就會不停喺你隔離嗰度講「我真係好想去嗰度」跟住有一日我夜晚返到屋企，我發現我唔記得買啲嘢啦，咁佢就：「我幫你買咗啦。」我心諗：「咁好？」跟住佢下一句就話：「咁你同我去嗰度影相啦咁樣。」
Charlie ：嘩，等價交換。
叻叻：其實我最sad個位就係佢每做一樣為你好嘅事，佢都係有嗰個影相嘅目的喺度囉。所以其實好唔開心囉。
鐵人：所以即刻唔想…
東方昇：我覺得你要企硬，因為就算唔係影相、唔係影狗啦。其實同男仔鍾意砌模型或者鍾意打機一樣咋嘛。佢冇理由禮拜六日都打晒就唔陪另一半，所以其實你要分配你個時間喎真係。
鐵人：係，但係我都唔知點樣講佢先聽，我自己有啲唔開心就係，譬如好似話陪我屋企人去長洲果次，其實我係要一日咋嘛，甚至我可以同佢講你唔使去㗎，即係我自己去都OK，都唔得。所以點解我咁嬲。
叻叻：真係冇晒私人時間
鐵人：係啦。呢四年幾，我同啲朋友同啲屋企人出街係少過四日嘅我諗。

東方昇：咁我問一個好認真嘅問題，如果同佢分手你得唔得呀？
鐵人：即係我又覺得未去到呢個moment嘅。
東方昇：仲未去到！？你已經好痛苦㗎啦喎。
叻叻：佢係好痛苦，但係你feel到佢真係仲好愛佢囉。
鐵人：其實我依家四年呀嘛，咁我哋又開始計劃將來啦，早嗰排又買咗樓。即係好多嘢共同去做，之後我又諗為咗呢啲嘢要分手，即係係咪一個啱嘅決定啦？但係呢我都同佢講，我就嚟爆煲㗎啦。
東方昇：反而我覺得就係因為你諗長遠，你先要同佢分手喎。
專家Dickson：嗱，佢有冇試過調返轉頭陪你去做一啲你好想做嘅事呀？
鐵人：所以呢個就係我好唔開心嘅點。
東方昇：即係冇囉。的確我係建議你分手㗎，唔好意思。因為你唔係佢另一半，你係佢奴隸啊。狗都應該好過你啦，個對待。
鐵人：當然啦，係呀，絕對係。
東方昇：我覺得你可以有信心少少，我覺得而家你嘅情況呢，係佢需要你多過你需要佢，因為剩係得你可以控制佢啲狗。真係呀！
Charlie ：王牌啊！
東方昇：佢一定會言聽計從㗎，佢搵唔到另一個比你好呀。

專家Dickson：因為如果唔係你咁樣行落去呢，我淨係望到你嘅將來只會24個鐘頭都要影晒囉。同埋一個好嘅相處應該係雙方都舒服先啱㗎嘛，而唔係你喺度揼石仔，跟住佢就好過癮咁樣㗎嘛。
鐵人：係呀，其實你問我，我有時都係想佢陪返我做返少少我想做嘅嘢啫。即係咁樣其實你自己感受都會balance啲嘅。
東方昇：勇敢啲同佢講啊。不過講之前啦，佢影相係po上IG 㗎嘛？
鐵人：係呀係呀。
東方昇：攞咗佢IG Account，就隨時delete佢。要挾佢！
叻叻：好絕啊你咁樣！
Charlie ：真係分手㗎啦。
專家Dickson：佢何止分手呀？隊冧你都得呀！
東方昇：聽你講就係知道你個痛苦呀，但冇辦法啊，只可以咁㗎咋我哋。你呢段片佢會唔會睇啊？你介唔介意俾佢知道啊？
鐵人：佢成日睇你哋啲節目㗎。
東方昇：唉～咁得啦，得㗎喇得㗎啦。你講到咁樣佢知㗎，希望佢睇完之後反省下啦，唔係唔俾佢影，但係影少啲。
叻叻：合理囉要。
東方昇：顧及你嘅心情多啲。
鐵人：適可而止我覺得。
東方昇：好啦拜拜。
鐵人：多謝你拜拜。

Charlie ：我諗其實可能事主個女朋友，應該都唔夠愛個事主，所以先將佢擺得太低，先會咁樣對佢。
東方昇：佢愛自己多過愛事主啦。
專家Dickson：甚至乎佢愛隻狗都多過事主啦。
叻叻：頭先聽阿鐵人講，佢話佢連買個日用品俾佢，即係可能牙膏牙刷呢啲嘢咋喎，跟住佢已經開心到咁樣，真係可想而知佢平時對佢都唔好得去邊囉。
東方昇：同埋有時啲人話，外人好難評論一段關係，因為一個願打一個願捱，但係頭先個case擺明係願打嗰個，打到捱嗰個係爆曬缸，佢都唔知自己打得咁大力，就嚟死啦。真心呀玩SM呀，S嗰個係咁鞭打佢，而M嗰個其實要出聲㗎，因為就算SM都有個Safe Word，話俾佢聽「我頂唔順啦」。其實頭先鐵人根本就係呢個情況，所以佢一定要講。
專家Dickson：佢應該要嗌㗎啦。電腦電腦電腦！
東方昇：係呀一定要講㗎喇！燒賣燒賣咁樣！如果唔係就遲早直程死咗。
專家Dickson：咪就係囉。虛脫而死啊。
東方昇：就冇㗎啦，就唔好太遲啦！所以早啲提出。好～今日差唔多。
大家：好～拜拜