Intel第13代Core處理器全面曝光． Amazon首部手寫筆電子書．Apple Watch及Ultra疑現Bug | 廣東話【Price Weekly #134 2022年10月 】

而另一個技術就喺Clair等離子殺菌，呢部空氣清新機會不停釋放多於每立方厘米1500萬粒等離子，佢嘅潔淨空氣輸出比率係每個鐘7立方米足夠覆蓋一般辦公室桌面範圍，出風位仲可以30度轉動，令新鮮空氣直接吹向用家並且提供3段風速調校，而頂部既OLED熒幕就可以睇到風速、空氣質素同濾芯更換提示，熒幕外圍有唔同顏色既燈光顯示返空氣質素，非常清晰。除此之外，佢亦都支援Type C充電配備專用電池，喺毋須插電情況下可以拎住四圍去，比用家隨時享受潔淨嘅空氣，連埋電池重量都只係370g，跟機亦都有埋車用底座，唔單止可以放喺車箱入面，連BB車都用得。而家Price既觀眾只要喺10月內購買Plasma Go就可以享有獨家優惠，只要入呢個優惠碼就會送多兩個免費濾芯。

$3,000消費券今日就到手喇，想好好善用呢$3000就記得Mark實Price嘅網購優惠，唔單止有熱門產品開搶，買Price網購禮券更會額外送高達$200。

今次有兩款電競產品想介紹比大家，兩款都有Price嘅獨家優惠加埋免運費添。第一款就係GIGABYTE 27" 165Hz FHD 電競螢幕，佢有超快1毫秒反應時間加上165Hz嘅超快速更新頻率同高清解析度，超頻仲可以去到170Hz，可以提供一個無殘影同超順暢的嘅遊戲體驗；螢幕亦採用咗人體工學設計，無段式嘅支架可以比用家調節各種高度同角度，用最舒適嘅姿勢用電腦。呢個Mon仲有啲遊戲專屬嘅feature，譬如係針對遊戲更新與安全性備份嘅Auto-Update，打機個陣就可以避免更新失敗；Black Equalizer可以增強對比度同明暗場景嘅可見度，大家打槍擊game嘅時候就可以容易啲搵到躲藏的敵人。

另一款要推介嘅就係MSI GF63 Thin 11SC Lite 電競laptop，機面採用金屬髮絲紋嘅設計，重1.86kg，而厚度只有21.7mm，無論係拎出街定喺屋企用都相當方便。規格上就搭載第11代Intel Core i5 11400H 嘅 6核心處理器，加埋採用咗渦輪加速技術可以將效能提升15%。另外透過獨家嘅長效散熱設計，可以令電腦效能保持安靜同穩定，系統運作嘅時候亦唔會出現過熱嘅情況，續航力就有7小時。依家Price獨家優惠做緊5,499起，一樣全港免運費，有興趣嘅朋友就可以去下面條link睇下。

上個星期講完 iPhone14 有 BUG，最近就有外國既用家反映Apple Watch Series 8 同 Watch Ultra 嘅收音咪都出事，用用下會突然無反應，仲會持續一段長時間，令到所有支援 microphone 嘅 Apps都出現錯誤訊息、甚至停止運作。除咗收音咪之外，喇叭都一樣出現問題，喺撳入去測試噪音水平嘅app個陣都彈出咗呢個訊息，無辦法量度環境噪音。有網民就話reset之後情況可以暫時解決，但隨時都有機會再發生。希望Apple會盡快修復呢個問題。

Netflix除咗有戲睇之外，遲啲仲會有game玩。佢地日前就宣佈將會喺芬蘭成立自家首間遊戲工作室，目標係製作無廣告同埋可以唔使課金嘅世界級原創作品。其實由上年開始Netflix 已經以旗下自家劇集為題，推出多款手機遊戲，不過一直都係依靠第三方開發，而且佢地亦都密密收購多間遊戲開發商，例如 Night School Studio、Next Games同 Boss Fight Entertainment等等，藉此招攬唔同既人才。不過由於新遊戲係由零開始製作相信都要幾年後先會有作品同大家見面，各位遊戲迷就要畀多啲耐性喇

上個月 AMD 發表全新既 Ryzen 7000 處理器，今個月就輪到宿敵 Intel 出招發表第 13 代 Core 系列處理器。今代CPU繼續採用大細核嘅設計，但就大幅增加咗 E-Core 嘅數量，Core i9 系列由 8 個增加到 16 個；而Core i7 與 i5 系列就由 4 個增加到 8 個。以頂級 Core i9-13900K 為例，就有 8 個 P-Core 同 16 個 E-Core，合共 24 個 Core、而 P-Core 同 E Core嘅時脈分別去到 5.8 同 4.3GHz。官方話相比起 i9-12900K，佢嘅單核效能勁咗 15%，而多核更加勁咗 41%，10 月 20 號就會開賣既第一輪貨主要係 K 同 KF 型號，售價由319美金起，唔知大家睇中邊粒 U 呢？

講完處理器就輪到 Display 卡既消息，Intel 之前就確認左，Arc A770 會喺 10月12號開賣，日前台灣既 Intel Open House 活動入面就展出咗非公版既 Intel Arc A770 同 A750，不過就無開機示範，都幾令人期待佢既實際效能，好多人都好期待嘅顯示卡皇NVIDIA RTX 4090，喺10 月 20 號先至正式開賣。但日前就見到一個香港嘅拍賣平台有得買，仲有埋實物相，雖然底價高達兩萬元，比起原價萬三元貴一大截，不過早買早享受，呢單交易好快就成交，後嚟個買家仲喺討論區出 post 晒卡，但無幾耐香港代理就指出涉事既 display 卡係之前運輸途中，俾人偷走既賊贓，而有關既帖文同拍賣page亦都已經好快刪除。事實上 NVIDIA 到目前為止都未發放 RTX 4090 既驅動程式，就算有卡喺手都用唔到，大家唯有乖乖地等多陣啦。

耳機市場競爭激烈，好多品牌都keep住推出新產品吸引大家，6月先推出 Px7 S2 既 B&W日前宣佈推出全新頭戴式降噪耳機 Px8，新耳機用鋁同皮革做主要物料，睇落相當有格調；而音質方面就採用，40mm 動態全範圍碳錐驅動單元，廠方指可以減少失真同提高清晰度，而且支援aptX Adaptive編碼配合 DSP 技術 可以做到 24-bit 串流，降噪方面就有六個收音咪，其中四個負責降噪；另外兩個就用黎處理語音通話，續航力有30個鐘亦都支援快叉，差電 15 分鐘就可以用到 7 個鐘。

Sony 對拍片相機市場一向都好積極，為左照顧唔同要求既用家，日前佢地發表一部最新拍片相機 FX30，定位屬於入門級，外形方面可以話係同 FX3 完全一樣；而部份 FX3 嘅配件，佢都可以用到至於拍攝規格，FX30 採用 APS-C 格式2,600萬像素嘅感光元件，支援最高 4K 120FPS 錄影，16-bit RAW 輸出、眼部對焦同埋Active Mode 拍攝模式等，功能同FX3相當接近，另外仲加入咗A7 IV 的 Focus Map，可以顯示景深嘅情況。新機由即日起可以預訂，淨機身定價 係$14,990。

不少人都習慣一邊睇書一邊寫低啲notes，但唔係所有電子書都支持手寫筆；而 Amazon 終於都發布一款支援手寫筆嘅電子書 Kindle Scribe，佢配備10.2 吋大嘅 e-ink 屏幕，有300ppi 解像度，同大部分 Amazon 嘅電子書一樣，續航力都夠用幾個月，至於手寫筆方面就唔需要額外叉電，可以磁吸喺機身上面，高階版仲會有埋「擦膠」同一粒可以自訂功能嘅掣，相信手感會再真實啲。Kindle Scribe 宜家已經可以預訂，普通版由339 美元起

而跟住要同大家介紹下我地Price嘅新主持，淇淇：「Hello大家好，我係淇淇，嚟緊我會同大家報道最快最新嘅科技資訊，仲有唔同嘅評測影片。」Pinky：「而我嚟緊喺同price嘅合作模式就會由full-time變成freelance，因為自己都想試多啲新野，好多謝大家一直以來對我嘅支持，嚟都會有唔同嘅機會繼續同Price合作，大家依然可以喺到見到我。如果大家想知我最新動向，就可以留意我嘅instagram啦。」