【#香港尋奇】高尚住宅區隔離居然有條瀑布！？呢條瀑布可能改變咗香港嘅命運！？傳說中嘅「香港八景」嘅「扶林飛瀑」！— Google Map 不會告訴你的事 EPISODE NO.13

主持小雲：Hello大家好，我係小雲，歡迎大家嚟到Google Map不會告訴你的事之香港尋奇。唔知大家仲記唔記得，我之前喺「香港之最」嗰陣介紹過薄扶林水塘呢？而其實喺薄扶林，重有「香港八景」嘅另一個景點，呢個景點重被列入為「新安八景」之一，咁「新安八景」又係咩嚟呢？同「香港八景」又有咩關係？不如等我問吓附近嘅人睇吓佢哋知唔知先！

小雲：你有冇聽過咩係香港八景或者新安八景？

受訪者一（男）：冇啊
受訪者二（情侶）：香港八景？冇
受訪者三（兩女）：No.
受訪者四（男）：冇
受訪者五（情侶）：冇
受訪者六（女）：冇
小雲：冇聽過唔緊要
受訪者七（三男一女）：香港八景好似有聽過。
小雲：你記唔記得香港八景關於啲咩野㗎 ？有啲咩景色咁樣？
受訪者七：冇喎，純粹聽過呢個term囉。

小雲：嗯。咁喺香港八景入面呢有一個地訪叫做扶林飛瀑嘅，咁你覺得佢係一個咩形式嚟㗎 ？

受訪者一：中式嗰啲囉。（小雲：中式個啲...）喺蓮山寺會出現嗰啲囉。
受訪者八（夫妻）：係唔係啲歷史樓宇嗰啲嚟㗎 ？
受訪者九（男）：一幅牆嚟㗎 ？扶林飛木？樹嚟嘅！（小雲：扶林飛瀑）飛局？咩局呀？（小雲：你估吓）一個陣嚟嘅，天仙陣嗰啲。
受訪者十（兩女）：好多樹嗰啲？
受訪者三（兩女）：有樹有水嘅地方？
受訪者十一（情侶）：叢林嗰啲？海洋？（小雲：我講多次，係扶林飛瀑喎，係唔係啊。）飛木？（小雲：飛瀑）飛瀑，瀑布囉！（小雲：喺啦！瀑布。你咁勁嘅，你估到嘅）呵呵。
受訪者十二（情侶）：飛瀑？（小雲：嗯！飛瀑）邊個瀑呀？（小雲：你估吓）瀑布個瀑（小雲：係啦！咁你覺得係咩景色呢？ ）瀑布囉。
受訪者十三（男）：好多森林，好似一個森林，跟住有啲瀑布，有啲蝴蝶咁呀，係咪呀？（小雲：係喎！蝴蝶你估到喎！勁到咁！）我估㗎咋。
受訪者六：瀑布？（小雲：係啦，你點解覺得係瀑布啊？）因為個字，最後個字。

小雲：咁扶林飛瀑啦，你覺得佢喺香港邊一度啊？

受訪者八：公園裏面，係咪香港公園裏面嗰個？係唔係西貢嗰啲地方嚟㗎 ？
受訪者十一：新界，大埔嗰邊？
受訪者十二：大埔囉？
受訪者十：九龍區？西貢嗰邊囉，可能…唔會係香港島呢度（小雲：一係我俾你揀，扶林飛瀑係喺香港邊一個地方？美孚，薄扶林，寶琳，林村。你覺得係邊一個？ ）林村？林村冇聽過。所以可能林村掛。
受訪者十四（男）：因為佢同薄扶林個音有啲似，所以我估薄扶林。（小雲：係啦，就係薄扶林呢個地方啦。）
受訪者十二：（小雲：扶林...飛瀑...）扶林？（小雲：係啊）係邊度嚟㗎 ？（小雲：係邊度嚟？扶林喎）冇聽過...薄扶林？
受訪者六：都係啲郊區。可能大潭，我都唔知。（小雲：其實關佢個名時嘅。我讀一次俾你聽，扶林飛瀑）哦！薄扶林！
受訪者十三：扶林...飛瀑...扶林係邊個扶林啊？（小雲：你估下先啦）扶林喺薄扶林個扶，跟住林係森林個林。（小雲：咁勁嘅你！ ）
受訪者七：瀑布灣（小雲：瀑布啊？你有冇去過瀑布灣啊？）有呀（小雲：點解你會去嗰度嘅？ ）住嗰頭，因為我住嗰度。（小雲：你哋住嗰度，咁你哋大家都去過嘅？咁你哋覺得嗰度靚唔靚呀？）靚！好靚呀！

小雲：問咗咁多位朋友之後，睇嚟大家都未聽過咩係「新安八景」，但係就估到「扶林飛瀑」所指嘅就係薄扶林。咁今日出發去我哋嘅目的地之前，不如就等我講吓新安嘅歷史同埋新安八景嘅由來啦。

之前同大家簡單介紹過「香港八景」，但大家又知唔知「香港八景」其實係點嚟嘅呢？第一次聽香港八景呢樣嘢嘅觀眾，可以先喺度停一停，去睇返之前有關「仙橋霧鎖」嗰集嘅香港尋奇再返嚟。其實「香港八景」嘅出現係源自於「新安八景」，咁一於講吓「新安八景」係點嚟先啦。

係清朝康熙年間，香港係一個以農業、狩獵、捕魚同埋產鹽為主嘅漁港，對當時朝廷來講係一個十分之唔起眼嘅地方，所以當時嘅香港係冇一個專屬嘅名，而係同依家深圳大部份地區一齊合稱做新安縣，隸屬廣州府。咁「新安八景」係點嚟嘅呢？咁就要有一次遷界令，即係我哋而家所講嘅逼遷講起啦。

呢條遷界令喺米迦之前嘅片入邊已經有提過，喺第一條「超簡略台灣史」入邊，就超簡略咁講過呢條遷界令嘅由來，咁喺呢度就再講多少少佢嘅影響啦。順治18年至到康熙17年，合共20幾年期間，新安縣曾經經歷過幾次遷界令，原因就係因為清政府擔心閩粵沿海居民會接濟企圖反清復明嘅鄭成功。

為咗避免呢件事發生，清廷就決定實行遷海政策，強迫住喺沿海嘅居民搬入內陸。係呢次遷界令入邊，新安縣有三分之二嘅土地被劃入遷海範圍。因為大規模嘅遷移，新安縣嘅人口大大減少，人去樓空，田園荒置，所以令到當地嘅經濟活動大不如前。因為咁，即使清政府係幾年之後允許新安縣復界都好，新安縣剩低嘅就只有一片片荒島，再加上海盜問題嚴重，所以對當時嘅人來講新安縣實在係一啲吸引力都冇，肯搬返嚟嘅人都係得小貓三四隻。

有見及此，當時嘅知縣李可成就決定做返啲嘢，吸引人入藉新安我揀咗，其中一樣就係揀咗八個最具代表性嘅景色，作為新安八景啦，呢八景包括有赤灣勝概，梧嶺天池，杯渡禪踪，參山喬木，廬山桃李、玉勒湯湖、鰲洋甘瀑、龍穴樓台。可能就咁睇名睇唔出，但呢八景其實有兩個景色係位於香港，分別係「杯渡禪踪」同埋「鰲洋甘瀑」，而「鰲洋甘瀑」即係「香港八景」中嘅「扶林飛瀑」，而呢個「扶林飛瀑」就係我哋今日嘅主角喇。

「扶林飛瀑」所指嘅「扶林」其實即係薄扶林咁解，咁「飛瀑」就更加簡單啦，即係瀑布咁解。咁所以「扶林飛瀑」所指嘅就係位於薄扶林嘅瀑布。咁我而家身處喺瀑布灣公園嘅入口，不如就等我帶大家睇吓呢條瀑布有咩咁特別啦。

根據《新安縣志》入面嘅記載，鰲洋甘瀑在七都大洋中，有石高十丈，四面咸潮，中有甘泉飛瀑，若自天而下。呢度短短幾句已經概括晒薄扶林瀑布嘅特點，相傳當時嘅人認為香港島嘅外型就好似一隻巨鰲，即係中國古代神話入邊龍頭龜身或者係龍頭魚身嘅嗰隻神獸。係呢個四面環海嘅巨鰲之中，有一條瀑布從十丈高嘅石上面流落嚟，喺遠處望過呢條瀑布就好似從天而降咁，再加上瀑布嘅水係淡水嚟，對比起附近嘅鹹水就顯得特別甘甜可口，所欲呢個景就叫做「鰲洋甘瀑」喇。

呢度嘅泉水除咗零瀑布灣得到「鰲洋甘瀑」呢個美譽之外，仲同香港點解叫做香港有啲關係。關於香港呢個名嘅由來其中，一個講法就係因為瀑布灣嘅水味道甘甜，吸引到附近嘅居民同埋行船嘅人成日都會嚟呢度攞淡水作為日常用途，於是就幫瀑布灣改咗個名，稱之為香江，而香江嘅入海口就叫做香港。所以本身香港呢個名係淨係指呢個位置，到後來先慢慢泛指晒成個港島。不過係1841年嘅時候，香港呢個地名就曾經因為定義唔清晰，冇一個確實嘅範圍，而引起清政府同英國官員嘅爭拗。

喺《穿鼻草約》入面，其中一條草案係割讓香港島，但當時嘅兩廣總督琦善同駐華商務總監查理義律對於「香港」呢個詞語都有唔同嘅理解。琦善就認為香港係指香港島西南面嘅位置，即係而家香港仔一帶，但義律就認為香港係指成個香港島。喺得到雙方有共識之前，義律就決定按自己嘅理解，佔領哂成個香港島。於是，英軍就喺1841年1月26日從上環水坑口登陸港島，並且第二日喺島上面升起英國國旗。呢個就係我哋一般認為英屬香港嘅開始。直至1860年，第二次鴉片戰爭之後，英方喺《北京條約》要求愛廷割讓九龍半島，將維多利亞港另一面嘅陸地歸埋落英屬香港入面，最後加埋1898年《展拓香港界址專條》入面嘅租約範圍，即係九龍界限街以北同埋深圳河以南嘅新界，呢三個地方夾埋就係英屬香港，即係我哋而家認知中嘅香港喇。

除咗東方歷史記載之外，早喺十九世紀初，即係香港開埠初期，瀑布灣就已經出現過喺西方書籍同埋畫作入面，書籍入面形容嘅瀑布灣景色怡人，而幅畫作更加係香港藝術館嘅藏品添.喺十九世紀初，英國政府曾經派出當時嘅外交官阿美士德勳爵組成阿美士德使團訪華，希望同清廷商討有關中英貿易嘅事，遊說清廷開放自由貿易。不過阿美士德使團訪華之行並唔係重點,如果你哋想知多啲有關使團訪華嘅詳情，同埋臨洲國家去東南亞貿易嘅經過，可以睇返米迦嘅《講兩句》《鴉片戰爭的真正前因》，不過點解我要講起呢次訪華呢? 就係因為隨團嘅醫生暨博物學家 克拉克‧阿裨爾(Clarke Abel)博士寫咗一本書，紀錄呢次嘅訪華經歷，而喺書入面就有提到瀑布灣。喺佢本書《Narrative of a Journey in the Interior of China》，佢就係咁講嘅，「從船上面睇起，呢座島中間圓錐形嘅山峰十分引人注目，旁邊重有一條好靚嘅瀑布，源源不絕嘅水流將岩石染成藍色，好似要帶著呢舊石衝入海咁。」。佢仲話佢認為呢個瀑布係今次訪華嘅其中一個主要目的，而嗰幅依家喺香港藝術館嘅藏品《香港仔附近的瀑布》，相信亦都係阿美士德訪華使節團團員威廉‧哈維喺船上所繪，係描繪香港面貌最早期嘅作品之一。除咗阿裨爾博士之外，喺1817年仲有另一本書曾經描述過瀑布灣，就係英國另一位外交官 Henry Ellis 享利‧埃利斯所寫嘅《 a Journal of the Proceedings of the Late Embassy to China》。佢喺呢本書入面就咁樣形容瀑布灣，「為咗補給船隻嘅儲備用水，我哋駛到一個名為Hong Kong嘅小島，水源周圍嘅環境好似一幅畫咁靚，從山上面湧出嚟嘅瀑布形成咗呢個咁特別嘅小島。除此之外，四周圍突出嚟嘅地形將呢度圍成咗一個小海灣，絕對係漁船嘅庇護所。」。相信大家喺呢短短幾句入面已經可以感受到當時嘅瀑布灣係幾咁吸引，亦都睇得出當時嘅英國人有幾鍾意呢個海灣。豐富嘅飲用水源再加上啲水嘅味道清甜，配上宜人嘅景色同埋優秀嘅地理位置，令到瀑布灣喺華南地區嘅一眾內港之中突圍而出，享負盛名，所以當時所有駛往廣州經商嘅歐洲船隻都會特登經過呢個位置，作為攞水嘅補給站，甚至有人話係呢個時候嘅瀑布灣令英國人發現咗香港呢個優良嘅港口，為日後佔領香港埋下咗伏線，所以大家明點解我喺呢條片嘅開頭話「瀑布灣決定咗香港嘅命運」啦。

不過時至今日，隨住城市發展，瀑布灣嘅用途已經唔同晒，所以而家就算喺返原址，我哋都唔會再有機會睇到書籍上面所記載，宏偉壯觀嘅瀑布，而呢一樣嘢就同薄扶林水塘有關喇。之前我就同大家介紹過薄扶林水塘可以儲起薄扶林谷地嘅雨水畀市民飲用，不過大家又知唔知其實薄扶林水塘嘅水除咗雨水之外，仲有啲咩水源呢? 答案就係瀑布灣喇。為咗解決當時食水短缺嘅問題，當時嘅香港政府決定興建水塘儲水，增加食水水源，因為瀑布灣優良嘅水質同埋薄扶林谷嘅地勢，佢哋盲決定截取瀑布灣嘅源頭，興建薄扶林水塘。自此之後，瀑布灣嘅水流就大大減少，失去咗昔日壯觀嘅景況。除咗水資源嘅運用之外，二十世紀嘅瀑布灣仲擔任過另外一個好重要嘅角色，呢個角色就係保衛香港嘅前線喇。喺第二次世界大戰期間，英軍曾經喺瀑布灣對出嘅石灘設立瞭望台同埋機槍堡，防止日軍以海路從港島南面登陸香港發起進攻。不過最後日軍喺從港島北面嘅北角、鰂魚涌同埋筲箕灣登陸上岸，所以呢座機槍堡最後都冇派上場。雖然而家呢座機槍堡同埋瞭望台已經變成咗戰前遺物，亦都受到年月嘅侵蝕而睇落破破爛爛，不過若然大家想親身睇吓，喺瀑布灣對出都仲可以見到佢哋嘅身影。

雖然瀑布灣充滿歷史痕跡，但千祈唔好以為佢淨係得過去式，因為就算唔講歷史，對於薄扶林村同埋香港傳統文化嚟講，瀑布灣仍然擔任著一個好重要嘅角色,因為呢個地方仲承傳緊一個過百年嘅香港傳統習俗—舞火龍。喺2017年，薄抓林村嘅舞火龍獲列入香港首批非物質文化遺產。每年中秋節，薄扶林村都會舉行有過百年歷史嘅舞火龍。舞火龍嘅隊伍先喺村口嘅薄扶林道打龍餅，俗稱「蟠龍出洞」，然後入村拜祭李寧仙姐同埋西國大王，再喺村入面巡遊，為每家每戶送上祝福，最後向住華富邨繼續行，以瀑布灣作為終點。到達瀑布灣嘅時候，隊伍同村民就會合力將火龍掉入海，進行「龍歸滄海」嘅儀式，咁成個舞火龍先算完成。不過近幾年為咗保護環境，避免污染海洋，村民決定將火龍行返上陸地處理。雖然舞火龍嘅做法已經隨住年代而有啲唔同，但不變嘅係，瀑布灣仍然承幹住薄扶林村村民每一年祈求合境平安，袪災除病嘅心願，同時亦都承載住屬於我哋獨有嘅文化。

隨住時代嘅變遷，瀑布灣都以唔同角色見證著香港嘅發展，無論係佢獨特嘅自然面貌、悠久嘅歷史過去定係豐富嘅人民情懷，都代表著呢個城市獨一無二嘅價值，希望大家都會將呢啲價值同埋文化繼續承傳落去啦。今集嘅 Google Map不會告訴你的事之香港尋奇 就講到呢度先，我係小雲，我哋下集再見，拜拜。