Sony Xperia 5 IV 移除無段式光學變焦！iPhone 14 料加價15%？ Corsair 推出「能屈能伸」曲面螢幕 | 廣東話【Price Weekly #130 2022年9月 】

Sony Xperia 5 IV 正式發佈，今代沿用細機身嘅設計，採用 6.1" FHD+ 120Hz 屏幕，有黑白綠三隻色可以揀。鏡頭方面就移除咗Xperia 1 IV 無段式光學變焦，改為 16、24、60mm 的三定焦相機組合。另外支援 20fps HDR 連拍、眼部對焦及物件追蹤功能，並可以拍攝 4K 120fps慢動作影片，加上機身輕咗，令到佢嘅追焦功能都會提升。規格方面，新機採用snapdragon 8 Gen 1晶片，為咗加強機身嘅散熱能力，Sony 今次就加大咗散熱版面積，宣稱散熱效能可以比以往低1.5至兩度。另外有5000mAh大電池、支援無線叉電，售價係 $6,999，淨係得 8+256GB 版本，由即日起就可以預訂。
AMD Ryzen 7000 系列 CPU

AMD Ryzen 7000系列CPU近日終於正式發佈，採用 Zen 4 架構嘅新處理器，IPC 同單核性能分別比上代高 13% 同 29%，而成個系列嘅基礎時脈更由 4.5GHz 起跳，當中頂級型號 Ryzen 9 7950X 嘅最高時脈更加衝上 5.7GHz 新高，根據官方數字喺 V-Ray 嘅表現，7950X 足足勁過Intel 頂級嘅i9-12900K 62%，不過呢啲數字都係聽下就算，實際表現都要等跑分出嚟至知。而 X670E 與 X670 主機板預計會喺 9 月上市。最後價錢方面新系列嘅CPU將會有四款型號，9 月 27 日推出。

為咗減少高階晶片流入中國軍方嘅機會，美國政府近日下令禁止 NVIDIA 同 AMD將部分晶片賣到中國，亦都包括香港。聽到呢度相信大家最擔心嘅就係呢個措施會令到大家買唔到顯示卡，但其實今次涉及嘅晶片只係得 NVIDIA A100、 H100、同埋AMD嘅 MI 250。呢幾款都係用嚟做 AI 運算，屬於 Server 先會用到嘅High End 型號，普通消費者應該都接觸唔到，所以各位Gamer大可以放心。

HP前排就推出多款laptop，其中比較多人留意嘅就喺Spectre x360 14同埋 Envy x360 15。前者的機身沿用啡金色嘅設計，不過線條就圓潤啲，同上代嘅感覺有啲分別，搭載13.5” 3:2嘅熒幕，等個mon睇落好似大啲。規格方面就配備第 12 代 Intel Core i7 處理器，最高有 32GB Ram 同 2TB SSD支援Wi-Fi 6E，售價由 $14,999 起。至於 Envy x360 15就採用 15.6吋 OLED touch mon，具備 VESA Display HDR 認證，並且搭載 Nvidia RTX 獨立顯示卡，而處理器同樣都係採用第12 代 Intel Core i7，有16GB RAM 同 1TB SSD。機身就有 2 個 Thunderbolt 4，2 個 USB-A，同埋 1 個 HDMI接頭，應該都夠大家接連唔同裝置，售價係$14,999，兩部機宜家開始已經有得買。

DJI最近推出咗新航拍無人機「DJI Avata」，主打「人機合一」的沉浸式飛行體驗。Avata 即係虛擬化身咁解，用家喺戴咗飛行眼鏡之後，用埋 Goggles 2 同穿越搖桿，就可以用第一身嘅角度去操控，非常真實。規格方面配備 1/1.7 吋影像感測器，提供 155° 超廣視角，最高可以拍攝 4K 60格影片。除咗可以影到更多嘅飛行場景之外，飛機嘅安全性亦都有唔少嘅提升，例如加入咗「下視雙目視覺感應」，同埋ToF 紅外線感測系統，可以減低碰撞風險，喺低空或者室內飛都得。至於機身重量只有410g。售價方面，進階套裝賣$10,298，入面會有齊飛行器、Goggles 2、穿越搖桿、同埋一粒電池。

唔知大家有冇興趣呢？唔知大家心目中最經典mouse係邊隻呢？自從Logitech 2014 年出咗G502之後，呢隻mouse就成為咗大部份玩家嘅首選。而最近Logitech就推出咗新款嘅G502 X，一共有3個版本，分別係有線嘅G502 X、無線嘅G502 X Lightspeed、同埋無線加 RGB 燈嘅G502 X Plus，全部都有黑白色可以揀。三隻mouse都採用全新嘅Lightforce複合式光學微動開關，將傳統用金屬接點做觸發嘅方式改成遮蔽光線做觸發點，去保留微動開關嘅觸感，而且用上新版 HERO 25K 感應元件，相信速度同準確度都會有所提升。重量方面 3隻mouse都幾輕身，分別只重89g、 99g 同埋 106g，暫時仲未知香港幾時開賣。

摺mon機 近年都見唔少，而電競設備品牌 Corsair 最近都唔輸蝕，推出一款「能屈能伸」嘅 OLED 電競 mon，用家只要𢺳住熒幕兩邊嘅手柄就可以將個mon隨意屈曲或者拉平，最大曲率達到 800R，左右兩邊仲可以獨立調節，想一平一曲都冇問題。而且熒幕仲配備旗艦級電競規格，21:9 嘅 45 吋 mon 有3,440 × 1,440 解像度、1000 nits 峰值亮度、更新率最高可以去到 240Hz、仲有低達 0.03 毫秒嘅反應時間、同埋 0.01 毫秒嘅像素開關時間。官方承諾三年保養，而發售詳情就會喺年尾公佈。雖然未知價錢，但睇返今次同 Corsair 合作嘅 LG，19年都出過一款可以捲起收埋嘅電視，叫價 $68 萬港紙。唔知今次呢隻 mon又有冇機會晉身電競界「新貴」喇。

打機都係求開心刺激，但投入得濟玩到激親都係人之常情。最近外國遊戲網站 Time2Play就訪問咗一千個玩家，發現大約六成人每個禮拜都會玩Game玩到㷫烚烚。而比起玩 PS、Switch 同 PC，Xbox 嘅用家似乎特別火爆，平均每 5 個就有 1 個日日都會打機打到發脾氣。至於頭三位嘅導火線就係遇上卡關、外掛同埋遊戲 bug。而最易激嬲玩家嘅榜首魔鬼遊戲就係《Call of Duty》，緊隨其後嘅竟然係行輕鬆歡樂路線嘅《Mario Kart》同《Minecraft》。唔少人仲嬲到要掟嘢，有七成時間慘遭毒手嘅都係手掣、keyboard 同 mouse。為免傷及無辜同自己嘅荷包，喺度都係奉勸各位唔好太動氣喇

今集Price Weekly又差不多，你們最喜歡期待邊件新product呢？歡迎在下面留言告訴我們，我們很快就會有新片跟大家見面，記得訂閱Price的YouTube channel，再按旁邊的鐘，拜拜。