iPhone 14來臨！Apple 發佈會9月8日舉行．PS5 專業級手掣 DualSense Edge．懷舊金曲變硬碟剋星 | 廣東話【Price Weekly #129 2022年8月】

除咗Apple之外 Sony最近都宣佈，將會喺香港時間9月1號舉行發布會。雖然官方無講明係咩新product，但睇宣傳片都可以估到今次就係 Xperia 5 IV。之前就有傳新機會keep 返6.1吋 21:9 嘅設計，同埋 3.5mm ear jack，並且加入無線充電。而拍攝方面就會跟返Xperia 1，加強錄音同直播功能。

Sony 最近喺英國捲入一場集體訴訟，PlayStation 被指控利用市場地位，每隻 Game 都收取高達 30% 嘅佣金，抬高價錢去敲詐使用者。如果告得入嘅話，佢哋就要向 900 萬個英國消費者賠償接近 $460 億港紙。不過早喺 7 月嘅時候，Sony 都成功說服過美國法院駁回另一單指控佢哋反競爭嘅訴訟，唔知今次佢哋又會點應對呢？

講起 Playstation，佢哋最近就發布咗全新嘅專業版 PS5 手掣 - DualSense Edge。新手掣同 Xbox 嘅 Elite 手掣定位相似，主打高自訂性。外觀望落同 DualSense 分別唔大，特別之處在於玩家可以自行替換手掣嘅硬件，而跟機嘅搖桿有標準同高、低圓頂三種選擇，背面嘅掣就有半圓頂同槓桿可以揀。新手掣嘅功能比起 DualSense 有多冇少，玩家仲可以自定搖桿同其他掣嘅靈敏度、死區同埋鍵程等等，仲可以儲存幾組設定檔，而且只要撳一撳新增嘅 Fn 掣，就可以快速切換成另一個Setting，啱晒同屋企人共用手掣，或者係習慣每隻 Game 都有唔同打法嘅朋友。跟機將會送一個支援盒內叉電嘅收納盒，而發售日期同定價就暫時未有消息，有興趣嘅朋友記得留意喇。

Samsung 近日宣布推出新嘅 M.2 NVMe SSD 990 Pro，雖然新型號同用咗好多年嘅 980 Pro 一樣，都係採用 PCIe 4.0 嘅標準，但性能都有唔少提升，當中包括讀寫速度分別去到 7,480 同 6,900MB/s，更加接近 PCIe 4.0 嘅8,000MB/s 理論值，而隨機讀寫速度亦都去到1,400K 同 1,550K IOPS，勁咗 55%。另外 Samsung 今次仲喺原廠 Heatsink 加咗 RGB，迎合返一班鐘意玩燈嘅朋友。而無 Heatsink 嘅版本就會率先喺 10 月開賣，1TB 賣$1400左右，而 2TB 就賣$2400左右。

Adidas 間唔中都會推出一啲運動耳機，而最近佢哋就同合作開嘅瑞典音響品牌Zound Industries推出一款無線頭戴式運動耳機，外形上同上一代大同小異，但今次就採用咗回收塑膠同尼龍製造。而最大賣點就係加入咗耳機市場上比較少見嘅太陽能充電功能，無論係自然光定係人工光源都可以為耳機充電。支援太陽能充電嘅係一種叫Powerfoyle嘅高彈性太陽能電池，因為靈活性高，所以尺寸可以做得比同類嘅產品細，仲可以以絲網印刷印喺耳機上面。一般嘅太陽能充電都係需要被持續同埋較強的自然光照住，但Powerfoyle就連人工燈光都可以儲存，當然，耳機亦都可以用Type-C充電。另外佢嘅續航力達到80個鐘，比上一代足足高咗一倍，亦都支援IPX4嘅防水功能，售價方面賣 $230 美金，大約 $1,800 港紙，而家己經有得買喇。

Bose對上一次推出真無線耳機都已經係兩年前嘅事，最近就有傳佢哋將會帶住QuietComfort Earbuds嘅第二代回歸。傳聞就話新耳機嘅外形唔會有好大變化，側面將會沿用標誌性嘅長形觸控面板設計，有黑、白兩色可以揀，就算變得的骰輕巧咗都仍然保持到6個鐘嘅續航力。售價方面有傳將會以 $299 美元喺美國發售，折合港元大約是 $2,340，定價比上代再貴咗少少，但 Bose 今次兩年磨一劍，唔知喺技術上又會唔會帶嚟驚喜呢？

相信有打開機嘅朋友買Mon嗰陣都會留意反應時間，目前反應時間就有 GtG 和 MPRT兩種不同的顯示規格，但其實呢兩個指標都未必可以完全反映到個Mon拖影或者殘影嘅情況，所以美國視訊電子標準協會 VESA最近就推出一個叫 ClearMR 嘅標準，為熒幕嘅 motion blur 去分級，更清楚地界定「動態清晰比」，LG 和 Samsung 等多個大廠商都對呢個規格表示歡迎。ClearMR 可以應用喺 LCD 同 OLED 產品上，包括電視、電腦mon、laptop、tablet等等，暫時就只會對 SDR 模式做認證，而 VESA 就透露會擴展至 HDR 規格，以後大家買mon嘅時候就記得留意喇。

以往用網頁版 WhatsApp一定要連接手機登入，萬一部電話冇電就會連網頁版都用唔到。而 Whatsapp 上個月就發佈咗macOS 測試版程式，而近日Windows版亦都正式上架喇，新程式同網頁版最大分別就係即使手機喺離線狀態之下，都依然可以繼續使用，而且成個介面比起網頁版再簡潔啲，加上專為 Windows 嘅環境而設，兼容度亦都會高啲，換言之速度就會更快同更穩定。要留意嘅係新程式只支援 Windows 10 或以上嘅電腦，至於 macOS 正式版 WhatsApp估計亦都即將推出。

唱歌高音到爆玻璃就聽得多喇，但有無諗過聽歌都可以聽到壞 hard disk 呢？講緊嘅係最近有個 Microsoft 嘅工程師，就分享咗一個大約 20 年前嘅離奇故事: 當時一個電腦製造商就發現喺播放 Janet Jackson - 1989 年嘅金曲 Rhythm Nation 嘅時候，就會令到特定型號嘅電腦死機，最誇張嘅係連隔離嗰部無播歌嘅電腦都遭殃。經過反覆研究之後，呢個咁得人驚嘅現象最終都得出咗合理嘅解釋，原來全部出事嘅 laptop都係用緊 5400rpm 嘅 hard disk，同首歌某段落嘅自然共振頻率一樣，由於震動嘅力度過大，令到隻 hard disk 都震到壞埋，結果嗰個生產商就決定喺播依首歌之前過濾走嗰啲特定嘅相沖頻率。畢竟都已經係 20 年前嘅 laptop，如無意外而家已經都絕跡市面，相信呢啲咁離奇嘅事應該都唔會再發生。

今集 Price Weekly 又差唔多，你哋最期待邊件新product呢？歡迎在下面留言分享畀我哋知，我哋好快就會有新片同大家見面，記得Subscribe Price YouTube Channel，再按旁邊的鐘。