【#香港之最】全香港最古老嘅燈塔喺邊度？｜全香港唯一一個海岸保護區！｜打卡熱點背後嘅故事｜全香港最古老嘅燈塔— Google Map 不會告訴你的事 EPISODE NO.11

小雲（主持）：Hello 大家好，我係小雲。歡迎大家嚟到「Google Map 不會告訴你的事」之香港之最。唔知大家記唔記得曾經係咩作品入面出現過燈塔呢？ 你可能會記得由王家衛執導的電影《春光乍洩》，張震飾演嘅小張帶著錄音機去到世界盡頭嘅嗰個畫面，世界盡頭嘅燈塔故之然好有意境啦，不過想睇燈塔嘅話其實都唔一定要去到外國，因為喺香港就已經有著七座燈塔，而其中五座燈塔，仲要係喺1918年第一次世界大戰之前興建，咁而家我就帶大家去搵屬於香港嘅象徵意義啦。

唔知大家有冇嚟過我身處嘅呢個地方呢？呢個地方大家都應該有聽過，但係就未必嚟過。其實我哋要搵嘅燈塔就係位於鶴咀附近，咁不如等我一邊介紹鶴咀，一邊帶大家去搵燈塔啦？

（顯示地圖）
鶴咀半島係位於香港島東南邊，而鶴咀就是鶴咀半島上邊嘅一個海角，佢嘅對岸就係赤柱半島，而右下方就係已經停用嘅石澳石礦場。 鶴咀又叫做德己立角，佢重有一個唔係好睇得明嘅英文名，叫 Cape D’ Aguilar，係咪好特別呢？ 鶴咀除咗有一個好特別嘅名之外， 佢亦都有好多特別嘅地方畀我哋去探索㗎，而其中一個就係鶴咀燈塔喇。鶴咀燈塔喺1875年落成啟用，喺2006年3月3日就被列為香港法定古蹟，係香港現存五座戰前燈塔之一。鶴咀除咗有著一座全香港最古老嘅燈塔之外，佢都有著全香港唯一一個海岸保護區，所以公眾一律都唔可以喺鶴咀做任何水上或者沿岸嘅康樂活動，以免影響海岸生態。

平時我哋話香港好細，但係香港三面環海，可以放到燈塔嘅位置又咁多，到底點解香港第一個燈塔會起咗喺鶴咀嘅呢？咁又要從香港嘅歷史開始講起喇。

喺鴉片戰爭之前，香港海上貿易一啲都唔多，直到1842年，清廷喺鴉片戰爭戰敗後，同英國簽訂咗南京條約，被迫開放港口同埋割讓香港島。香港就因為有廣闊既海灣，同埋優越嘅地理位置，逐漸發展成為一個好重要嘅貿易港同埋中轉港。尤其係1869年蘇彝士運河開鑿後，中外貿易更加頻繁，香港作為轉口港嘅地位就更加重要啦。去到1867年，海軍測量員列特中校受命喺香港選址設置燈塔。當時佢建議喺橫瀾島同埋香港島以南嘅一個小島- 蚊尾洲，即係位於前往新加坡航路上面嘅Gap Rock，興建燈塔。但係由於當時呢兩個地方都係屬於清廷嘅管轄領土，英方同清廷談判不果，所以英方就擱置咗喺呢兩個地方興建燈塔嘅計劃。最終到1873年嘅時候，當時嘅香港政府揀咗鶴咀、青洲同埋歌連臣角呢三個地方興建燈塔。呢三個地方都係次選，但係佢哋就勝在全部都位於香港水域，而地理位置又可以扼守住香港東西兩面嘅入口，為駛入香港嘅船隻導航，所以當時嘅香港政府好快就展開咗呢三個燈塔嘅興建工程。先係鶴咀燈塔喺1875年4月16日正式落成，而青洲燈塔同埋歌連臣角燈塔亦都喺1875年7月同1876年3月相繼落成，鶴咀燈塔成為咗當時嘅香港政府喺香港興建嘅第一個燈塔。

鶴咀燈塔亦有另一個名叫德己立角燈塔。去到呢度，你可能又會問，點解佢又叫鶴咀燈塔，又叫德己立角燈塔呢？原因就係同一個人有關喇。頭先都有講過，鶴咀呢個地方嘅英文係叫做Cape D’ Aguilar，所以鶴咀就音譯咗做德己立角，所以喺德忌立角呢個地方嘅燈塔就叫做德己立角燈塔啦。去到呢度你可能又會有疑問，點解鶴咀唔係音譯做Hok Zeoi，或者用意譯，而要譯做Cape D’ Aguilar? 原來呢個名係為咗紀念1843年至1848年間，香港第一任副總督及駐港英軍總司令德己立少將，Major General D’Aguilar 而改嘅。副總督呢個職位僅次於香港總督，但呢個職位喺香港殖民地政府入面就只屬於虛位，冇任何權力，只有喺總督離開香港或者同時兼任輔政司嗰陣，先有實質權力。不過當時嘅駐港英軍總司令係直接掌控駐港英軍，指揮駐港英軍嘅行動，而當時香港係英國喺遠東嘅重要軍事基地，具有重要戰略價值。雖然德己立喺香港殖民地政府入面只係擔任副總督呢個虛位，但佢同時兼任權力極大嘅駐港英軍總司令，所以講到尾其實德己立喺·當時嘅香港社會都好有地位，而喺港島仲有一條街都係用佢個名來命名，嗰條街對於香港人嚟講應該都唔陌生啦，就係德己立街啦，亦即係蘭桂坊嘅主街。

喺講完燈塔同德己立之間嘅關係之後，咁不如依家我就帶大家去睇全香港最古老嘅燈塔- 鶴咀燈塔啦。連同鶴咀燈塔，喺香港呢啲充滿住歷史痕跡嘅戰前燈塔，就只係得番五座。其餘嘅就係青洲新、舊燈塔，橫瀾島燈塔同埋燈籠洲燈塔。呢五座燈塔亦都已經被列為法定古蹟，每一座燈塔，喺香港海事史上面都佔有好重要嘅地位。

講返鶴咀燈塔先。佢樓高17米，係一座白色圓形石塔，燈塔底座同埋拱形入口都係由粗琢嘅石塊砌成。入口嘅鐵門頂上面，有幾何花紋裝飾，而入口四邊重有雕琢過嘅花崗石圍住，充滿住新古典主義色彩。而佢嘅信號燈係採用媒同埋石油氣燈，利用折射原理將光聚焦到中心。喺天朗氣清嘅時候，信號燈嘅白光可以照到23海里以外。由於燈塔現代化都係近3-40年嘅事，以前嘅燈塔需要全人手控制，於是乎當時香港政府喺英國請咗一個燈塔看守員，負責管理日常運作同維修，嗰陣燈塔看守員都算係技術性職業，中級管理層。喺香港，燈塔看守員嘅人工係高過喺英國一倍，所以都算係一份幾好嘅工嚟嘅。不過嗰陣就只限歐裔人士做喇，早期嘅看守員一更就係一個月，之後先可以放一個禮拜假。嗰陣又冇得上網，又冇智能電話，唔知佢哋喺呢度做嘢，會唔會覺得好悶呢？去到1893年嘅時候，橫瀾燈塔落成。鶴咀燈塔嘅功能就畀佢取代咗，失去咗使用價值，所以鶴咀燈塔喺1896年就停止咗運作喇。喺1905年嗰陣，政府計劃拆去鶴咀燈塔上面已停用嘅一級號燈同埋附屬設備，移去青洲燈塔，提升青洲燈塔嘅照明性能。直至喺1975年嘅時候，鶴咀燈塔改為自動化操作，燈塔上面嘅燈光先再次著返起，重新投入服務，直到而家。不過鶴咀燈塔依家就冇以前咁高，就只係得番九點七米高。

除咗鶴咀燈塔外，其實鶴咀都重有其他歷史古蹟同埋得意嘅景點㗎。等我同大家略略介紹下啦。其實行入去睇燈塔嗰陣，我哋就一定會經過一個地方，就係鶴咀村喇。而鶴咀村入面有一座過百年歷史嘅二級歷史建築，鶴咀村更樓。喺19世紀至20世紀初期，香港海盜猖獗，當時鶴咀村嘅村民經常受到海盜滋擾，所以佢哋就起咗呢一座兩層樓高，而且設有槍洞同埋天台城牆嘅更樓，去保存村入面嘅貴重財產，同埋防範海盜喇。另外燈塔下面一帶就係鶴咀海岸保護區，香港大學都喺呢度興建咗一座海洋科學研究所，以保育海洋資源同進行科學研究。呢個保護區佔海域面積大約20公頃，保護區入面有各種魚類、石珊瑚、軟珊瑚等等嘅海洋無脊椎動物喺度棲息。呢度仲有各式各樣嘅岩石，其中最古老嘅有由火山爆發而成嘅凝灰岩，其次就係花岡閃長岩，流紋斑岩同玄武岩。但係呢個海岸區入面最出名嘅係一條有成十米長嘅巨型鬚鯨骸骨標本，呢條鬚鯨喺1955年喺維港擱淺後被製成標本，輾轉間就嚟咗呢度喇。而喺「鶴咀海岸保護區」牌坊對面，有一個地方叫雷音洞，顧名思義，佢係同聲音有關嘅一個洞穴。雷音洞係一個長年累月受海浪衝擊之下形成嘅海蝕洞，洶湧的海浪湧入去洞穴入面，撞擊之下就會發出巨響。喺雷音洞附近仲有一個地方叫蟹洞，佢同樣都係海蝕洞嘅一種。與其話佢似一個洞口，倒不如話似一道拱門。但佢點解又叫蟹洞呢？就係因為佢個外型好似一隻蟹咁，不過呢個位就比較危險，大家去附近玩嘅時候就唔好行咁近啦。

喺鶴咀呢個小小嘅海角入面，就已經有住兩座歷史建築，見證住香港嘅沿海歷史。鶴咀燈塔又好，鶴咀更樓又好，佢哋都陪伴同守護咗鶴咀呢個地方超過100年。今日同大家介紹咗咁多個歷史建築同埋自然景觀，唔知大家最鍾意邊一個景點呢？你哋又搵到自己想陪伴同守護嘅嘢未呀？好天嘅話，大家都不妨參觀下感受下鶴咀獨特嘅景色啦。今集Google Map不會告訴你的事 之 香港之最就講到呢度先，我係小雲，我哋下週再見，拜拜!