ASUS Zenfone 9 輕巧旗艦．Pixel 6a 指紋辨識爆漏洞．香港製造 賽車遊戲《Rev to Vertex》| 廣東話【Price Weekly #125 2022年7月 】

Google Pixel 6a 今個禮拜正式喺海外開賣，但話咁快就俾外國用家發現安全漏洞，話呢部手機嘅屏下指紋解鎖功能似乎唔多信得過。有外國媒體實測Pixel 6a測試機嘅指紋解鎖，淨係將右手拇指的指紋登記入手機，但系統就買一送一，用冇登記過左手拇指都一樣解鎖到。另一位印度YouTuber，同朋友兩個人登記咗三個指模，但成功解鎖到手機嘅人就遠遠唔止依個數目喇。究竟問題係出喺硬件定軟件度? 公開發售嘅版本有冇同樣問題? Google官方目前仲未有回應。

雖然Pixel 6a嘅保安疑雲仲未解開，但同佢一齊登場嘅新功能Camouflage就確定會開放埋俾Pixel 6 同 Pixel 6 Pro，呢個「偽裝變色」功能 唔單止可以俾用家將相入面多餘嘅物件移除，仲可以變換物件色調，有咗佢就唔洗再怕相入面有雜物太過鮮色搶晒fo喇。

Samsung 近日宣佈入門級嘅 5G 手機 Galaxy A13將會喺8月19號正式開賣，呢部機採用咗 Dimensity 700 處理器，同 6.5 吋 TFT 熒幕，解像度有 1600 x 720，而刷新率就去到 90Hz。相機方面佢就配備 50MP 自動對焦鏡頭，2MP 景深鏡頭 同 2MP 微距鏡頭，而前置鏡頭就有 5MP，至於電池容量為 5000mAh。A13 有黑、白、淺藍三種顏色，亦都有 4+ 64GB 同 6 + 128GB 兩個版本可以揀，售價分別係 $1498 以及 $1998，作為入門機嚟講都真係幾抵玩。

Sony喺今年一月宣布過會為PS5專門研發一套VR頭戴裝置，到依家，官方終於預告呢部PS VR2一系列嘅新功能。首先係透視影像功能，PS VR2新增前置攝影機玩家只需要切換分頁，即使戴住裝置一樣可以睇清周圍環境，雖然暫時只可以睇到黑白畫面，不過至少唔洗再特登除低裝置去搵手掣咁麻煩。呢個前置攝影機仲可以掃描房間，配合埋Sense控制器，做到自訂遊玩空間嘅效果，打緊機嘅時候如果玩家行近自己設定的邊界就會收到系統警告，咁就唔怕行差踏錯喇。另外PS VR2仲支援播送玩家真人嘅遊玩實況，只要將PS5嘅HD 攝影機接駁到遊戲主機，就可以拍到玩家嘅肢體動作，兼且識得自動去背，唔洗綠幕都可以融合遊戲內畫面同時直播將打機時嘅反應都分享埋俾觀眾知。最後PS VR2 亦都多咗個劇院模式，俾玩家喺一個虛擬嘅劇院螢幕上睇，唔係VR格式嘅遊戲同片。不過講咗咁多，Sony都係仲未公佈PS VR2嘅開賣時間表，所以有興趣嘅朋友睇嚟要再等多陣喇。

繼好colourful嘅G435 耳機同G304 滑鼠之後，Logitech 近日就推出咗Aurora Collection，希望藉住用色同設計吸引女性用家。新系列入面包括G735 無線耳機、G715 G713 鍵盤同埋G705 滑鼠，所有產品都以白色做主調，配上柔和嘅RGB 燈效，成個感覺都幾靚幾夢幻。當中比較特別嘅係G715 同G713 兩款keyboard，都會送返一個成舊雲咁嘅手腕墊，令成個setup 更加有少女感。而為咗令女Gamer可以用得更舒適，部分產品都有重新設計，好似 G735 無線耳機，就採用咗輕量化設計，只係得260g。而頭帶亦都係針對頭比較細嘅用家作出改良。不過呢個系列都唔平，成套買齊都要$500美金，即係大約港幣$3900，絕對唔係入門級嘅產品。

最近，香港 Z-Challenger 宣布將會推出一個賽車遊戲R2V《Rev to Vertex》，呢個遊戲嘅特別之處係製作團隊參考咗光學雷達測量出嚟嘅數據，再1:1咁整返香港山路同公路出嚟，所以遊戲入面嘅賽道都好逼真，就連大帽山嘅「英雄亭」有都有。遊戲以都市公路賽車作為主題，而製作團隊亦都揾埋職業賽車手幫手，希望可以盡量還原現實世界嘅物理系統，等玩家可以感受到最真實嘅賽車體驗。遊戲亦都設有故事模式，玩家需要挑戰唔同嘅車隊，完成唔同嘅任務先可以推進劇情、解鎖新車，而官方仲話遲啲會出埋多人模式，等大家可以約埋班friend一齊玩。《Rev to Vertex》預計9月尾會推出測試版，而 12月尾就會喺Steam度正式推出。

天文台宣布今個月係自1884年有紀錄以嚟最熱嘅7月，酷熱逼人嘅天氣就令喺街等車嘅時間更加辛苦，所以爲咗協助市民解暑，九巴就將其中4部電動巴士，調配去位於荃灣西站深水埗欽州街，寶林總站同埋黃大仙總嘅巴士站，用嚟做流動冷氣侯車室，俾市民一邊涼冷氣一邊等車。除咗呢個措施之外，依家車長亦會喺情況許可下俾乘客提早上車，仲同政府申請喺多啲巴士總站加設加水站同飲品售賣機。網民對呢個流動冷氣等車房反應都好兩極，有人認爲可以有效減少市民，喺酷熱之下不適嘅機會，但亦都有人覺得巴士站，附近嘅商場已經有冷氣，所以冇需要特登安排冷氣房，如果大家等車嗰陣見到呢幾個候車室又會唔會入去涼下冷氣呢？

唔知大家有冇試過錯手將啲有用嘅嘢當係垃圾咁丟棄呢? 2013 就有個一軟件工程師唔小心將個放咗8000粒bitcoin嘅hard disk扔咗，一直都冇辦法揾得翻，但眼見依家bitcoin不斷升值，最近佢就決定以AI、機械狗，喺有可能收埋hdd垃圾堆填區到揾翻佢以前錯手丟咗嘅hdd。目前，嗰8,000粒Bitcoin嘅市值接近2億美元。而今次個計劃會有2間投資公司嘅資助，由8位專家組成，預計要用1,100 萬美元，如果成功揾翻嘅話，工程師同埋投資公司就會喺嗰2億美金入面分30%，而其餘嗰40%就會分發比垃圾場嘅居民。成個搜索計劃預計需要3年時間，不過呢個計劃仲要得到當地政府批准之後先可以動工，唔知到時嗰8000粒bitcoin嘅市值係幾多呢?