男友用$2000賣出可愛女友 自己卻在銅鑼灣人間蒸發？｜原子檔案 Mr Atom

年輕的「社女」
白萍憑著狠辣嘅手段同埋知人善任嘅能力，氹到好多年輕嘅男人為佢賣命，白萍更加會派出多名外表俊俏健碩嘅男人滲入學校、工廠等地方，引誘少女加入社團成為「社女」。佢哋一旦成功說服少女加入，就會得到白萍當眾嘅稱讚同埋重金獎賞，所以手下們都好落力招攪少女。好多少女都為求賺快錢，或者同外表俊朗嘅男人展開戀情而甘願成為「社女」。

就係咁，白萍經營嘅應召集團日漸壯大，其下嘅「社女」愈嚟愈多。原本佢嘅勢力範圍只係喺港島區，後嚟佢憑著佢嘅生意頭腦將勢力蔓延至九龍同埋新界，而「白萍」呢個名亦傳遍行內。白萍聲勢浩大，行內好多人都唔敢招惹佢，連警方都會不時聽到佢嘅大名，不過警方始終冇進一步嘅行動，而且得知佢勢力龐大亦都唔敢輕舉妄動。係無可奈何之下，只好任由佢繼續經營應召集團。

雖然黑白兩道都忌佢三分，但係就有人膽大包天，竟然試圖借住佢應召集團嘅漏洞嚟謀利，而亦因為呢個魯莽嘅想法，最終引發咗一宗轟動全港嘅案件。

騙財詭計
呢個咁膽大妄為嘅人叫做陳國祥，年約二十六歲，時常會同黑社會打交道，從中謀利。由於佢經常偷呃拐騙，所以被稱為「爛仔祥」。陳國祥性格市儈奸狡，成日都會諗到一啲詐騙嘅鬼主意。而係1972年5月，當佢得知道佢年約三十歲嘅好朋友楊連威追到一個年輕貌美嘅女朋友之後，就即刻諗到一個謀財大計。於是佢約見楊連威，打算將大計話俾對方知道。陳國祥先問起楊連威同佢女朋友嘅感情狀況，確定兩個人關係良好之後就講出佢嘅計劃。原來陳國祥得知到白萍嘅集團一直召募「社女」，佢竟然想打好朋友嘅女友主意，表示如果對方嘅女朋友加入集團，就能夠輕鬆咁賺一筆可觀嘅收入。

陳國祥講得興起，但楊連威就連番質疑，因為佢唔願意俾女朋友成為「社女」，被其他男人糟蹋。陳國祥為咗消除對方嘅疑慮，就承諾只係俾佢女朋友係白萍面前露面，三個人收到錢之後就即刻逃走。
楊連威深知道白萍嘅勢力龐大，若果呃佢可能會惹禍上身，但係佢又諗到自己近嚟因為賭博而欠債累累，所以打算將呢件事話俾女朋友知道，由女朋友自己決定。佢嘅女朋友叫做彭寶珠，花名「璧珊」，年約二十歲。佢對男朋友事事順從。當晚璧珊同男朋友楊連威見面，佢聽咗呢個計劃之後，唔單止冇拒絕，更加稱會順應男朋友嘅主意。楊連威考慮之後，最終決定參與陳國祥嘅計劃，三個人相約第二日再次見面，亦令之後發生嘅一切埋下咗關鍵嘅伏線。

會見大家姐
第二日，即係1972年5月22日嘅下午六點三十分，陳國祥、楊連威、璧珊三人係油麻地約見咗白萍嘅手下。手下見到璧珊之後，認為佢樣靚身材正，的確係做「社女」嘅材料，就打算帶佢去見白萍，於是三人就跟隨對方嚟到港島區，嚟到咗波斯富街寶明大廈三樓嘅一個單位。呢度係應召集團嘅「架步」，亦都係白萍嘅藏身之處。

三個人等咗一陣，白萍就帶同丈夫同埋幾名手下嚟到佢哋面前。白萍打量咗璧珊一番，都認同佢外表好好，非常滿意。於是陳國祥就即刻要求對方支付三千蚊嘅酬勞，但係白萍嘅手下就表示只能夠支付二千蚊嘅酬勞。而以七十年代初就業人士月入中位數唔足一千蚊嚟睇，二千蚊呢個金額已經相當唔錯，所以陳國祥已經心滿意足。不過佢為免對方走數，就要求對方先俾咗一千蚊，聽日璧珊開始「返工」嘅時候再俾埋剩返嘅一千蚊。

白萍同意陳國祥嘅要求，然後佢就叫另一個男人去攞現金。楊連威同埋陳國祥收到錢之後，非常興奮仲即刻打算離開，但係白萍嘅手下就要求璧珊留低，唔俾佢走。但係璧珊隨即表示自己未準備好同埋瞓唔慣陌生嘅地方，請求對方俾佢離開。

正當陳國祥同楊連威唔知點算好嘅時候，白萍就叫停手下，大方咁俾陳國祥同楊連威帶走璧珊，不過白萍就叮囑璧珊聽日下午兩點鐘準時返嚟「開工」，璧珊即刻應承對方，然後三人就離開。雖然佢哋已經順利得到一千蚊，但係陳國祥並唔滿足，因為一不做二不休，佢同楊連威決定第二日再帶璧珊返嚟搵白萍，收埋剩返嘅一千蚊尾數。但係佢哋冇諗到呢個貪得無厭嘅決定最終會令自己萬劫不復。

逃出大廈
時間到咗5月23日嘅下午兩點鐘，陳國祥同楊連威依時帶璧珊嚟到寶明大廈，白萍嘅手下就遵守承諾，即刻支付一千蚊嘅尾數。陳國祥同楊連威收咗錢之後就離開，留低咗璧珊。但楊連威離開嘅時候，就非常擔心女朋友嘅安危，而係陳國祥多番安撫之下，佢先之放心返屋企等女朋友返嚟。

而咁啱得咁蹺，璧珊當日「開工」之後，仲未有客人帶走佢要求提供額外嘅服務，於是佢就一直尋找機會逃出寶明大廈。直到下午六點鐘，佢終於趁白萍嘅手下冇為意偷偷離開。佢跑到男朋友嘅住所，楊連威知道白萍發現女朋友失蹤之後一定會派手下四出尋人，所以佢就叫女朋友番返去自己屋企避一避。之後，楊連威試圖聯絡陳國祥商討點樣去應對，但係佢就一直聯絡唔到對方。

與此同時，白萍嘅手下已經發現璧珊失蹤，就將呢件事話俾白萍知道，但係就即刻被白萍大聲咁鬧同埋掌摑。白萍認為陳國祥同埋楊連威存心借璧珊呃錢，非常之嬲，就即刻命令手下搵返兩個人出嚟，打算逼佢哋交返兩千蚊，仲俾啲教訓佢哋。

就係呢個時候，陳國祥同埋楊連威成為咗白萍嘅頭號目標，佢嘅手下已經到咗各個地區尋找佢哋嘅蹤影。但係楊連威當時天真咁低估咗呢件事嘅嚴重性，以為自己未有咁危險，所以佢事成之後冇潛逃，反而繼續大搖大擺咁係鬧市出沒。亦因為咁樣，佢同陳國祥走上咗一條不歸路。

利誘上釣
係璧珊逃走之後嘅第二日夜晚九點鐘，三個白萍嘅手下係旺角西洋菜街荷里活戲院發現楊連威，佢哋合力挾持楊連威上咗一架車，仲駛往長沙灣道。之後，三個人就帶佢去到一個單位，手下即刻緊閉大門，開始對佢郁手郁腳。楊連威以一敵三，毫無還擊之力，好快就不斷求饒。為免搞出人命，佢哋都停手俾楊連威透一透氣。然後，三個人再轉移陣地，帶楊連威到銅鑼灣羅素街麗園大廈嘅一個單位，繼續困住佢。

除咗楊連威之外，白萍仲吩咐手下搵出陳國祥，於是佢哋就逼楊連威打俾陳國祥，引誘佢出嚟，而楊連威只好乖乖就範。係電話入面，佢謊稱白萍會再俾多佢哋一筆錢，仲叫佢即刻到麗園大廈。陳國祥向來見錢開眼，冇懷疑對方係咪講緊真話，於是就即刻趕到麗園大廈。但係佢先到步冇幾耐，就俾多名白萍嘅手下拉入單位。佢哋決心要教訓一下陳國祥，但係陳國祥唔單止冇道歉求饒，更加試圖奮力反抗，但係佢呢個行為反而令對方更加兇狠，直到佢嘅身體再無動靜先停手。當時佢哋突然發現陳國祥已經冇晒反應同埋呼吸，先驚覺出咗大事，於是佢哋就即刻通知「大家姐」白萍，聽從佢嘅指示。

不明巨型物體
白萍嚟到咗單位，確認陳國祥已經冇咗氣息，於是佢就冷靜咁指示手下用毛巾同埋床單包裹住佢，然後就由一名車手將佢運到深水灣道山邊棄置。另外，楊連威就繼續被困係麗園大廈。由於手下唔小心搞出人命，所以白萍冇即刻搵人尋找璧珊嘅下落，打算俾呢件事慢慢淡化。手下依從白萍嘅吩咐，順利棄置陳國祥之後，就以為呢件事已經告一段落。但係佢哋係處理嘅時候，唔小心留低咗證據，導致後患無窮。

係5月25日中午嘅十二點鐘左右，一名外籍人士趁連日大雨之後終於好天，就獨自揸車到郊外散步。佢駛近深水灣道香港哥爾夫球場附近嘅時候，發現路邊有一包以床單包裹嘅巨型物體。係好奇心驅使之下，佢落車走到物件嘅旁邊睇一睇。佢估咗好耐，都唔知道眼前係一件咩物件，就嘗試用腳輕輕咁踢一踢。包裹隨即鬆開，係呢個時候，一隻人手竟然出現係眼前。外籍男子大吃一驚，於是即刻報警。

關鍵的記事簿
警方接報之後，大量警員趕到現場，法醫亦到場檢驗。法醫發現男子嘅身上遍佈瘀黑同傷口，推斷佢生前遭到多人嘅攻擊，警員認為加害嘅人因為尋仇先會落咁重手。同時警員又發現近日連場大雨，街道都充滿咗積水，但係包裹非常乾爽，所以警方推斷嗰個男人係另一個地方遭遇不測之後，就被帶到現場棄置，而且棄置時間應該係停雨之後，估計被外籍人士發現嘅時間差距唔遠。

不過，由於對方嘅身上冇證明身份嘅物品，令警方暫時未能夠確認佢嘅身份。但係警方係佢嘅衫度發現嘅其他遺物就成為咗破案嘅關鍵。呢啲遺物包括咗一條鎖匙、一張洗衣單、少許嘅金錢同埋一本記事簿。警方打開記事簿，發現簿入面記錄咗好多聯絡人嘅電話同埋地址，於是佢哋就逐一聯絡記事簿上面嘅人。當中好多人都認出受害人就係陳國祥，警方亦因為咁樣確認咗對方嘅身份。

之後，警方係呢啲聯絡人口中得知到受害人陳國祥同楊連威關係好好，但係警方就聯絡唔到楊連威，所以警方推測楊連威可能同案件有莫大關係，所以就即刻派出人手去尋找佢。另外，警方查出陳國祥生前曾經聯絡白萍嘅手下，佢哋根據線索嚟到咗麗園大廈調查。但係警方冇諗到，佢哋嚟到咗麗園大廈之後，就意外發現昏迷不醒嘅楊連威。警方當場拘捕單位入面嘅三名手下，仲將楊連威送院。冇幾耐，楊連威醒返之後，警方就即刻進行問話，楊連威將事件嘅來龍去脈話俾警方知道，亦因為咁樣令白萍經營嘅龐大應召集團開始瓦解。

白萍的神秘身份
警方根據三名手下同埋楊連威嘅言詞，追查到白萍多個應召集團嘅地點，最終警方係寶明大廈發現白萍，亦漸漸揭開白萍嘅另一個身份。白萍又名溫妹妹，原來呢個被稱為「大家姐」嘅三十三歲江湖女子已經成家立室，而佢嘅丈夫姓李，兩個人已經育有四個小朋友。

面對警方，白萍表現得相當冷靜，仲聲稱自己係下毒手嘅主謀，佢嘅手下同呢件案件無關。但係警方冇因為佢承認罪行而停止調查，好快就再拘捕另一名手下，前後總共拘捕咗四男一女。係警方嘅盤問之下，五個人都指因為陳國祥同楊連威企圖騙財，所以佢哋先會向佢哋尋仇。雖然警方推斷參與行動嘅人數至少有十人，但係佢哋都唔願意供出其他嘅同伴。之後警方決定控告五人。

最終，係一年之後，即係1973年嘅5月，五人被裁定謀殺同埋嚴重傷人罪名成立，當中包括白萍在內嘅四個人都被判死刑，而一名年齡未滿十七歲嘅手下就等待英女皇發落。就係咁，白萍就成為咗香港第二名被判死刑嘅女囚犯。審判專員表示：五個人為咗兩千蚊令陳國祥失去生命，事後更加將對方棄置荒野，手法殘忍。係同年嘅10月，五個人上訴請求推翻原判，但係合議庭法官駁回上訴，維持原判。

雖然香港係1966年至到1993年間名義上仍然有死刑嘅制度，但係係呢個時期被判死刑嘅犯人都會由英女皇伊利莎白二世或者港督赦免死刑。係1974年，港督麥理浩爵士亦赦免咗唔少被判死刑嘅罪犯，當中亦包括咗白萍等五人，所以白萍被改判入獄25年，其餘四人就被改判入獄22年。

《大家姐》大受歡迎
雖然白萍同四名手下保住條命，而且冇供出其他參與案件嘅同伴，但係自從白萍被捕之後，佢嘅應召集團就被警方迅速搗破。隨著白萍入獄，佢多名嘅手下已經潛逃外地。「大家姐」威風一時嘅勢力正式瓦解。經過呢件案件之後，警方更加致力打擊其他社團嘅應召集團。

係呢件事發生四年之後，即係1976年，麗的電視以白萍係藍本，創作出一套叫做《大家姐》嘅劇集，由黃莎莉主演角色「大家姐」，係一名由江湖人士轉為正當職業，而且帶領一眾兄弟警惡懲奸嘅女漢子。劇集大受歡迎，一年之後開拍續集《大家姐與大狂魔》，可以見到「大家姐」強悍嘅形象已經深入民心。可惜現實中「大家姐」白萍嘅經歷同埋下場就同劇中嘅主角大相逕庭。

陳國祥同楊連威呢對所謂嘅「好朋友」因為金錢嘅誘惑，竟然實行一個賣女朋友嘅魯莽計劃，仲自作聰明咁以為可以暪天過海，最終不幸令其中一個人失去生命，實在一啲都唔值得。但可幸嘅係，白萍嘅大型非法應召集團就因為呢件案件而意外被搗破。由呢個角度嚟睇，陳國祥不幸嘅離世可以話間接咁減少咗少女誤入歧途嘅機會，亦為之後嘅社會帶嚟咗一啲正面嘅影響。