#MM｜建築系畢業生每個周末入蒲台島做「見習島民」 親手復修舊建築、畫壁畫 為蒲台島注入生氣 過夜跟村民出海捕魚、觀星、食晚飯體驗島民生活 感貢獻社區成留港理由｜#700萬種生活 #4K

Sherman︰如果佢哋想暗示我哋幫佢哋畫呢，就會油咗白色底油先。

(旁白：好睇啲壁畫同產泥好似同建築冇咩關係咁，佢哋做緊嘅嘢都有應用到建築知識，例如埲牆畫啲乜嘢，都會影響到使用者㗎。)

Sherman︰大家都見到西斜都好緊要，你會見到我哋特登喺窗既兩邊留白，加顏色落去一定會令牆越嚟越深色，留白嘅地方多啲，可以降低室內氣溫。

可以同班朋友嚟到一個世外桃源嘅地方大家做鍾意做嘅嘢係好難得。

（喺呢度畫壁畫嘅自由度係咪好大？）
Sherman︰都好大，唯一唔自由嘅地方就係要睇時間，中午時候就要暴曬，人會好容易攰，我都中咗幾次暑。

(旁白：羅成係村長，都係jacky佢哋嘅監督，1979年搬咗出市區生活，而家每逢假期就會返黎島。)

村長：村民同外來義工係真誠嘅合作，一齊製作混凝土。

（你哋係咪成日都會咁樣合作？）
村長：係呀，有時島上嘅嘢爛咗，每次同政府申請又會話私人土地同佢哋無關。

（其實讀建築會唔會做呢啲嘢？）
Jacky：建築只係單純畫圖，所以畫出嚟嘅嘢會不切實際，嗰啲判頭點解會不停鬧你，因為你畫嘅嘢根本係唔合理唔可行，佢淨係諗嗰件事靚唔靚，所以一開始嚟蒲台島嘅初衷，係諗住令到建築唔好咁理想化。

Jacky︰我哋做咗一啲嘢可能令佢哋想多謝我哋，但調返轉來講佢哋多謝我哋嘅時候，我哋又好想多謝佢哋。

（咁咪無休止講多謝？）
Jacky︰係呀咁咪好囉，唔係咩？代表着你喺呢個島入邊就係你對人好人就對你好，就係咁簡單。

(旁白：就咁樣一班平時喺冷氣房或圖則嘅年輕建築設計師，填平路面砌下磚，慢慢變成島民實習生。)

村長：（唱歌）維我蒲苔，漪歟盛哉，濟濟多士，樂育英才

（你有冇印象上次唱校歌係幾多年前？）
村長：我諗大約兩年前，我喺呢度讀書，我土生土長喺呢度出世。下面係操場，攀爬架係到，放咗學咪落水玩。

Sherman︰嗰時你話要重新去開上面條水潭仲未去開

Jacky：儲水庫定唔知乜嘢。

村長：我哋放咗學之後，因為冇水沖涼，咁咪去海度游水之後，想去山個水潭洗白白。但而家過咗咁多年，嗰個井已經被沙泥填滿左。

Sherman：呢個應該係我哋做完而家做緊嘅嘢之後想做嘅事。

村長：佢哋真係幫我還原返童年玩嘅地方。

Sherman：聽到佢哋講原來呢個島嘅歷史咁豐富，覺得原來有咁多驚奇嘅事隨時會發生。

Jacky：佢令我了解呢個島，地方引致呢度嘅居民有唔同嘅生活習慣，而嗰度嘅人造就左嗰個社區嘅特色。

Sherman：我唔會話蒲台島係一個好特別嘅島，有一個好客觀嘅角度出發，其實佢係一座島，我相信香港有好多島都好靚，因為呢度我嚟得好多，慢慢仔細觀察呢度嘅地方同埋人，令到呢個都變得特別。

你係一個都市人，但係你選擇咩生活係由自己決定，我哋而家學習成為一個島民，島民嘅定義唔止係地域上嘅意思，而係關於一種好親密嘅倫理關係，呢啲就係定義左成為島民嘅特質。

旁白：有時呢班年輕見習島民會留起蒲台島過夜，見證島上冇晒遊客嘅平靜時光，同事開始佢哋嘅假日島民生活。

Sherman：日頭就好想捕捉個時間，因為有船期，夜晚就好似同時間一齊漂流。

旁白：蒲台島嘅夜晚就好似一個與世隔絕嘅地方，手提電話收唔到， Jacky同Sherman會同村民食飯打牌出下海。

Sherman：而家去淺海探險記，唔係係去捉魚

（咁大浪）
Jacky：係呀，而家出咗呢個海灣，不過如果冇大船經過，都唔會話好大浪，都OK嘅。

Sherman：你睇吓有好多星星。

Jacky：嘩，真係好靚。

Sherman：想當年我第一次嚟蒲台島露營就係為咗睇星，其實夏天嘅星空係特別靚。

Jacky：今日我哋嘅蒲台大灣捕魚之旅就安全着陸結束。

村長：而家jacky會主動搶嘢講，以前唔會，我同佢講三句說話都唔睬我淨係顧住畫畫，因為我感覺佢哋鍾意呢度。好簡單如果你唔喜歡呢度的話，唔會幾年都走來幫你畫畫。

（飲杯）

旁白：每逢週末嘅夜晚，蒲台島都會特別熱鬧，因為唔少以前搬走咗嘅村民都好似Jacky佢哋咁樣假期會返番入嚟，有時會喺到上面唯一嘅酒樓食飯聚一聚。

（會唔會有個禮拜佢哋唔入嚟就會掛住佢哋，見唔到呢兩個靚仔？）
村長：有，冇人幫我哋溝水泥，我見佢哋傻下傻下，唔識游水所以教佢游水。

Jacky：大家見到成個蒲台島就係一個海灣，其實每個村民可能都係由細玩到大，喺同一個地方讀書， 6:30到9:00就去坐喺呢度飲完啤酒之後就去下一張台食嘢。我成日覺得呢度嘅長輩，同自己就好似有親屬關係咁。

村民1：佢哋原來會畫畫，你到你到有好多牆比佢哋畫，佢哋畫完一間又一間，之後就咁friend。

村民2：我有底裏，但佢哋都唔睬我，唔會出嚟呢度玩。

旁白：不過天下無不散之筵席， Jacky下個月就會去荷蘭讀兩年嘅碩士課程，要暫別蒲台島嘅生活。

村民： 為荷蘭敬一杯，返唔返嚟？
Jacky：我應該會返
村民：應該要返
Jacky：會返
村民：Jacky走咗真係有啲唔捨得，因為佢好乖好有責任心
村民：將我啲獨木舟放喺呢度，等你兩年後返嚟
村民：我怕你讀半年，唔捨得蒲台島要翻返嚟
Jacky：唔好咁講啦，我哋飲杯
村民：祝Jacky學有所成，前程錦繡

（我哋今晚訓邊到？）
Sherman：我哋今晚訓呢個當年自己起出嚟嘅涼亭，係一個開放式睡房，有三張充氣床墊同兩張帆布床。

（應該幾好瞓，點好晒蚊香）

第二日
村長：我哋過嚟拜一拜神先
（大家拜神：順順利利，身體健康）

Jacky：有啲嘢唔到你唔信，呢度嘅天后娘娘好靈驗

Jacky：有一種感覺係入到蒲台島一定可以放鬆，係一種好可靠嘅感覺

Sherman：我覺得呢個係關於村民本身嘅凝聚力好強

(有冇覺得近幾年既凝聚力消失左?)
Sherman：一定有，其他人都開始吾係呢到，你肯定都有好多朋友離開左，我覺得會走既人都係冇留底既理由，我覺得完成呢個計劃，我就有留係呢到既理由，我覺得原來自己都有啲野可以做到既。

Jacky︰琴日村民都幫我餞別左，因為我就黎要去讀碩士，但佢地都問我會唔會返黎，我會返黎，無論如何都會返黎，當你知道左呢個地方，自己係有能力去做一啲野，令呢個部份既香港更加靚，更加屬於自己有回憶有歸屬感既時候，你就會開始萌生，我係吾係想留係呢道既諗法。