鴉片戰爭嘅真正前因係同鴉片無關？｜為咗舐清，英國佬可以去到幾盡？｜清廷係點樣落英國佬面？｜米迦 講兩句 #9 鴉片戰爭的真正前因 The Truth of The Anglo-Chinese War｜

第一次中英戰爭
亦即係大家口中成日講嘅「鴉片戰爭」，不過成個鴉片戰爭嘅前因後果同埋經過，就唔係好似平時大家係中學個陣咁一兩句就講得曬，咁所以今集我就會同大家講下啲背景資料，等大家都唔會太過碎片化咁睇呢件對香港舉足輕重嘅歷史事件啦。而要講到呢件事起源，就要從一樣嘢開始講起，而呢樣嘢就係大航海時代啦。

鴉片戰爭的真正前因
早係之前講革命嘅「講兩句」入面，我已經提過少少有關大航海時代嘅概念，大航海時代為歐洲國家帶黎左既突破係遠洋貿易，咁講到遠洋貿易就不能不提歐洲遠洋航行嘅祖師爺葡萄牙喇。葡萄牙作為第一個踏入遠東地區嘅歐洲國家，喺亞洲建立咗唔少嘅窿路。佢哋係第一批同日本展開貿易嘅歐洲人。

佢哋最出色嘅航海家 達伽馬重踏足咗印度嘅科澤科德。而佢哋亦都殖民咗馬六甲，而其中最重要就係葡萄牙人亦都係第一批係當時都重係明帝國時代嘅中國度落腳嘅歐洲人。佢哋向明帝國租借咗澳門成為佢哋落腳點，亦都令到澳門成為咗當時東亞既一個好重要既貿易中心，幾乎所有係亞洲展開遠洋貿易既歐洲人又或者同歐洲人交易既亞洲人都要經過澳門。

而且係明末清初時期，葡萄牙人亦都壟斷咗中國最重要嘅對外貿易中心廣州，喺佢哋嘅勢力之下其他國家嘅商人同埋商船係冇辦法去到廣州，只有極之偶爾既機會先至獲準見進入，可見葡萄牙人海上勢力係幾咁強大。

人有三衰六旺，國家有時都唔例外，作為歐亞遠洋貿易既先行者，葡萄牙本身有一個好嚴峻嘅問題，就係本國地理位置嘅問題啦。由於葡萄牙喺伊比利亞半島沿海地區，佢要向內陸擴張領土嘅話，必須要面對當時啱啱開拓咗美洲新大陸實力強大嘅西班牙，係不斷推動貿易擴張殖民地領土既情況之下，葡萄牙無論係財力定係人才兩者，都逐漸開始變得捉襟見肘，力不從心。

而係無幾耐之後，葡萄牙喺新興海權國家荷蘭、法國同埋英國既挑戰之下，就節節敗退。去到十八世紀中期，亞洲已經有住好多黎自唔同歐洲國家嘅鬼佬，就好似荷蘭咁係1602年就已經成立咗荷蘭東印度公司，就係為咗劍指遠東地區，而唔夠一個世紀，荷蘭東印度公司嘅盈利總額已經超過一億法鎊，亦都壟斷咗馬六甲海峽有關香料既貿易。而另一間東印度公司，英國東印度公司當然亦都唔執輸啦，佢哋喺印度建立起自己嘅勢力，亦都開始向當時都係自詡緊天朝大國既清帝埋手，因為自明代隆慶開關開始，一陣「中國風」就席捲歐洲，好多歐洲人對於黎自中國嘅商品十分之感興趣，姐係話只要你係當時帶中國貨返歐洲賣，基本上你就發達啦。

不過同而家呢個世代唔同嘅係，雖然當時既歐洲人對中國趨之若鶩，但當時清廷嗰啲鬼佬就好似冇任何興趣咁，反而啲官員就對呢啲外國商人好有興趣，因為呢啲外國商人就好似生金蛋既雞一樣，任佢哋勒索又或者強徵重稅，就好似英國東印度公司嘅洪任輝只係因為入寧波做生意不成，轉移向清廷控告廣州官員腐敗勒索同埋非法強徵關稅。

雖然後來清廷就撤左粵月海關監督嘅職務，但作為原告嘅洪任輝因為佢既言行唔好就被清廷罰咗去澳門坐咗三年監，喺洪任輝之後，清廷亦都正式落實左一項規定，就係以後只有廣州先至係對外商唯一開放嘅港口口岸。呢個就係所謂嘅「一口通商」喇。呢樣野直到1842年英國人強行用拳頭逼清廷開放港口之後，呢個「一口通商」既政策先至告終嘅。

咁可能大家都會問，點解中國人會咁唔鍾意同歐洲人做生意既呢? 其實除左因為係當時嘅社會文化入面，作為商人佢地既地位係十分之低賤之外，一直以黎中國人對於對外貿易都係抱持住一種「封貢」心態，大多數既當權者都認為作為天朝大國嘅中國，係冇需要外來嘅貨物，所以我畀你係中國做生意就係對你呢班鬼佬賜恩既標誌，令到你哋呢班鬼佬對我哋皇帝感恩戴德既手段。姐係話作為歐洲商人基本自由嘅通商權利喺中國嘅角度嚟講，就係一種特權。而呢種特權就由當今聖上所賦予，即係話聖上亦都可以隨時收返，而同時朝廷亦都規定咗外國商人，只能夠透過特許嘅中國商人黎同中國官方溝通，所以官方嘅外交渠道同埋交流係唔需要存在既。而呢個亦都係點解喺廣州就會衍生出十三行呢類，替鬼佬同中國官員打交道嘅華人行商呀啦。

不過無論點都好，英國人都重係好想舐清嘅，好想喺中國做生意，因為對於英國人黎講，自從茶葉呢樣嘢係1705年嘅倫敦亮相之後，茶葉好快就成為咗英國全國嘅熱門商品。飲茶從此就成為咗一種英國嘅國民時尚，咁所以係當時清帝國同英國嘅貿易總額入面，有成差不多接近90至95%嘅貿易額都係同茶葉有關。而由於當時嘅中國都仲係唔係太需要外國嘅產品，呢樣嘢就造成龐大嘅貿易逆差。除此之外，黎到廣州做生意嘅鬼佬，亦都要遵守中國頒布嘅行為守則。其中就例如外國船都要停泊喺珠江口，唔準入虎門。外國嘅婦女亦都唔可以去廣州，外商亦都唔畀買中文書，亦都唔畀學中文。

基本上除咗做生意之外，可以話係乜都唔畀做。所以當時喺廣州做生意嘅鬼佬，真係可以話係慘過坐監。可能啲鬼佬每次都想大聲斥責清廷嘅所作所為，但無奈佢哋喺廣州賺到嘅錢實在太多啦。喺廣州賺錢既速度之快，令到佢哋甘願忍受呢啲待遇，默默咁舐清，但亦都無阻佢哋對呢啲措施嘅不滿。漸漸地佢哋開始認為，佢地真真正正有需要中國政治嘅中心建立對話渠道，等佢哋可以投訴下佢哋喺廣州面對到嘅問題。有見及此，英國方面亦都好快咁決定咗要派一個官方使團造訪北京。

雖然當時英國東印度公司並唔滿意英國政府嘅呢個決定，因為怕咁樣做會危害到現存同中國嘅貿易關係，畢竟邊個係會想為咗啖氣而失去咗賺錢嘅機會呀。不過到最後英國東印度公司都依然承擔曬呢個使團所有嘅費用，同埋呈獻畀清帝國皇帝嘅禮品，並且差遣左一個叫做凱思卡既國會議員，成為左呢個使團嘅特使。當時英國政府畀凱思卡特別要求就係，希望佢此行能夠改善中英既貿易關係，取消所有嘅貿易既限制，打消清政府認為英國人想企圖侵佔清帝國領土嘅疑慮。姐係「我英國係支持世界和平有錢大家一齊搵」之類嘅說話，同時英國亦都透過凱思卡特向清政府提出一個請求，就係希望清政府可以畀一個比廣州嘅地理位置更加便利嘅一小塊土地又或者孤島，當成係英國治下既貿易貨棧。

而係知道曬要做啲乜嘢之後，呢個訪清使團係1787年12月出發去亞洲，但好快就遭遇到連環不幸事件，首先就係作為特使嘅凱思卡特，唔知點解中左嚴重嘅肺癆，然後隻船又經歷咗好多次嘅風暴同埋逆風航行。去到1788年嘅2月，船上面嘅水手仲中埋瘧疾添，係咁多災多難嘅處境入面。，連咳都冇力既凱思卡特都依然堅持到底，死都一定要去到中國為止。而結果就係佢到死都去唔到中國，係當年嘅6月10日就客死途中啦。失去左特使既使團，就只能夠回程返返去英國喇。

當時英國政府想舐清嘅心願未了，所以佢哋一直都搵機會再派人去清帝國建交，不過係上一次出使之後，英國東印度公司嘅態度就一直曖昧，而啱啱法國又爆發左個光復法國嘅時代大革命，令到歐洲當時局勢比較動盪，所以出使清帝國嘅呢件事擱置左一排。

直到去到四年之後嘅1792年9月26日，英國政府就派出咗曾經出任過駐俄羅斯大使愛爾蘭同英國國會議員愛爾蘭首席大臣西印度格林納達總督，同埋馬德拉斯總督嘅猛人外交家，時任英王喬治三世既表哥馬甘尼勳爵。帶住一大堆禮物同埋一大堆英國出產既貨品出使清帝國，當時馬甘尼嘅任務就係要打開清帝國同英國之間嘅貿易大門，而遠在廣州嘅英國東印度公司，亦都早已經為馬甘尼打點好一切，佢地提早向左兩廣總督福康安通報咗，而當時馬甘尼使團既名義就係話當幫乾隆皇帝祝賀八十大壽，而當時乾隆亦都對呢個第一次嚟北京「朝貢」嘅英吉利使團感到十分之欣慰，重下左命令要好好招待馬甘尼一行人添。

之後就係好出名嘅嗰啲單膝跪定雙膝跪呀交換禮物嗰啲事啦，其實呢啲都只不過都係小事嚟嘅，而係過程之中，馬甘尼就用盡方法嘗試去同乾隆皇帝傾建交嘅嘢，但次次都傾唔成，然後佢就轉而向乾隆最寵信嘅大臣和坤，就擴張商務同埋交換使節等等嘅事情談判，但個談判未開始就已經結束左，因為無論邊一次見面都好和珅都極力避開馬甘尼任何同談判有關嘅提議。

和坤都極力避開馬甘尼任何同談判有關嘅提議，最後喺馬甘尼嘅強烈要求下和坤先叫馬甘尼寫低啲要求，然後再幫佢呈上俾皇上皇上，咁所以係冇幾耐之後馬甘尼就以英王嘅名義呈送咗一份照會。裏面有六項嘅請求，(一)英國想將貿易拓展到舟山、寧波同埋天津，(二)按照俄羅斯人嘅先例，允許英國商人喺北京設立一間貨棧銷售貨物，(三)喺舟山附近指定一個未經設防嘅小島比英國商人居住、存放貨物以及停泊船隻，(四)喺廣州附近指定一小塊地方俾英國商人居住並允許佢哋自由來往廣州同埋澳門，(五)取消澳門同廣州之間嘅轉運說，或者至少將稅率降低至1782年關稅嘅水平，(六)准許英國商人按照中國所定稅率切實納稅唔喺稅率以外另行徵收稅款，並請賜一份中國稅單俾英國商人參照。

馬甘尼所提出嘅條件其實係普通不過既外交請求，睇落都只不過係想搵個地方做吓生意，但又唔想成日比中間人掠水，不過清廷就抱着一副未見官先打三十大板嘅傳統精神對待呢個英國使團，因為佢哋認為馬甘尼嚟到中國係為咗同皇帝祝壽，咁當馬甘尼做咗呢件事之後就代表佢已經完成使命，而且馬甘尼得到咁體面嘅接待，係應該感恩戴德謝主隆恩咁樣返英國，留低做啲乜嘢外交談判都係唔合適嘅事。所以冇幾耐之後，和坤亦開始幫乾隆落逐客令，馬甘尼都明白到佢咁樣瀨死唔走都係無補於事，所以係1793年10月7日馬甘尼使團就離開咗北京，先去到廣州再去澳門，終於係1794年嘅9月4號就返咗去倫敦啦！而陪住馬甘尼返到去倫敦嘅仲有兩份乾隆皇帝俾英王喬治三世既敕書，其中一份就講到清廷全數駁回馬甘尼提出個六項要求，總之馬甘尼呢次出使清帝國係以失敗告終。不過馬甘尼都仲係覺得清政府係唔拒絕對外交往，隨後佢亦推薦咗佢出使嗰陣嘅副手史丹頓以英王使節兼駐廣州英國大班領袖嘅身份再次出使清帝國。雖然英國政府對呢個建議頗為感興趣而且都開始咗籌備相關嘅工作，但史丹頓係1801年無啦啦瓜咗柴，再加上英國捲入左拿破崙戰爭，令到呢個計劃又再次被無限期擱置。

不過有關係中國貿易嘅情況亦都隨着歐洲大陸嘅局勢變得緊張，事緣就係英國擔心法國會喺葡國佬手上面奪取到澳門，令法國可以透過澳門操縱遠東嘅貿易航線，所以係1802年同埋1808年英國人就曾經兩次佔領澳門，咁當然清帝國就一如大家所料咁抗議澳門係中國自古以來嘅領土，係唔會有法國佔領嘅問題。但係1808年嘅嗰一次，英軍統帥海軍上將度路利就拒絕撤軍，兩廣總督就立即中斷咗同外國嘅通商，呢個舉動令到所有嘅外國人都感到十分之不滿同埋不便。度路利為咗解決呢啲問題就提出左同兩廣總督回晤，但當佢被拒絕之後度路利就好挑釁性咁帶領三艘戰艦闖入虎門停泊在喺黃埔，再次提出左會唔嘅要求，然後就同清軍發生咗武裝衝突。英國人亦係衝突之中有所傷亡，局勢緊張嘅情況直至去到當年嘅12月，英國東印度公司叫葡萄牙人交付六十萬洋銀贖金俾清帝國，保證英國會撤軍，局勢先至得以緩和。除此之外，當時十分惹火嘅英國人嘅行為亦難免令到中英關係變得緊張，先係英屬印度進攻中國嘅藩屬國尼泊爾，尼泊爾最後要將南部大片嘅土地割讓俾英國東印度公司。呢樣嘢某程度係落晒清帝國既面，另外由於係當時英國同美國都一直打緊仗，係1814年4月英國軍艦「脫里思號」喺廣州水域捕獲美國嘅蒸氣船，呢樣嘢令到廣州當局抗議英國破壞咗清帝國喺廣州嘅管治權。所以佢地都恐嚇英國話佢哋將會再次中斷同英國嘅貿易，不過今次喺廣州嘅英國社團就拒絕讓步，令到中英關係又再次變得緊張起來。英國東印度公司就請求倫敦要快啲解決呢啲事，而當時啱啱拿破崙就係滑鐵盧比英國人收咗檔，喺維也納會議之後歐洲就已經恢復和平，英國人終於能夠從歐洲事務之中抽身繼續處理呢啲清帝國嘅外交事務。

所以好快英國就第二次出使清帝國，今次由阿美士德勳爵所帶領。英國對阿美士德勳爵既訓令就要消除喺廣州嘅種種困難，令到中國同英國商人之間可以自由貿易，同時希望清廷可以廢除公行制度，給予英國人能夠自由居住係商館而不受限制嘅權利，同時可以比佢哋傭用華籍嘅僕人，亦都希望可以建立商館同埋中國官員之間嘅直接聯繫，亦請求清廷開放更多嘅通商口岸，再加埋請求喺北京派駐外交使節嘅權利之類。呢啲都係當時馬甘尼大致上講過嘅嘢黎，而阿美士德仲要消除清帝國對英國喺尼泊爾嘅疑慮，同解釋「脫里思號」事件嘅原因，可以話責任重大！係1816年2月8日，使團就出發去到中國附近海域嗰陣，佢哋因為怕中國人喺廣州擋住唔俾使團北上所以就無經廣州直上天津求見清帝國當時嘅皇帝，乾隆嘅繼任人，嘉慶皇帝。

相比乾隆皇帝來講嘉興皇帝就唔太願意接待外國使節，同時佢都擔心英國人係見面嗰陣會提出新嘅要求，所以對呢次嘅英國使團十分冷淡，話如果英國人係想來朝貢嘅話就由得佢朝，但如果呢班英國人唔肯遵從大清嘅禮儀嘅話咁就喺天津送客，結果阿美士德真係因為禮節嘅問題唔肯行磕頭禮，結果真係卡住咗係前往北京嘅路上。清廷講到明如果唔行禮制嘅話就唔使入京啦，而其實阿美士德本身對叩頭都冇乜所謂嘅，佢一早就知道出使清帝國有機會需要叩頭，而佢亦受命係可以便宜行事嘅，不過英國東印度公司嘅董事就建議佢抵制中國禮節，以免損害英國嘅尊嚴同埋威望。就連阿美士德自己使團嘅兩位副使都係有完全相反嘅意見，佢同清廷嘅官員講話佢只會單膝下跪低頭三次，再重複三次以代替三跪九叩禮。但清廷依然都係唔接受呢啲建議，結果英國使團就喺通州滯留左10日。喺冇幾耐之後，嘉興皇帝見到阿美士德都仲係唔肯行磕頭禮，但至少都有所謂嘅跪叩，所以佢就放佢哋一馬，叫人安排使團可以喺第二日到召見。使團一聽到呢個消息就要立即趕路，係第二日凌晨到達北京，阿美士德知道嘉興皇帝將會喺頤和園召見佢，但因為路途太顛簸同天氣熱嘅關係，所有嘅隨行物品都係後面嘅行李車，佢請求稍事休息，但結果就因為呢件事同隨行嘅清廷官員發生嘅激烈嘅爭執，阿美士德憤然轉身離開。當皇帝傳召阿美士德嗰陣喺由於負責藩人既理藩院冇辦法帶佢去見皇帝，所以佢哋就講大話阿美士德病咗，咁大使病咗咪請副使囉，但理藩院尚書又話連兩位副士都病埋。嘉興皇帝一聽到就嬲到爆炸，覺得使節扮嘢呃佢，話我唐唐中華之國係天下共主豈能夠如此大辱呀！

結果嘉慶皇帝一聲令下將英國使團逐出京師，亦謝絕左佢哋嘅供品同時都取消咗佢地覲見嘅機會。雖然係之後嗰日嘉慶皇帝都知道咗英國使團所遇到嘅問題，不過佢金口都開咗都冇得返轉頭㗎啦，結果英國使團只能係1817年1月28日喺廣州返去英國。無論阿美士德拒絕清廷禮儀係咪被驅逐嘅唯一原因都好，使團既失敗代表左英國兩次出使想進行和平談判嘅努力亦都失敗告終。咁即係話，去除咗和平談判呢個選擇之後英國係清帝國嘅問題上只係得返三個選擇，(一)服從清帝國嘅指令，(二)放棄同清帝國嘅貿易，(三)用軍事手段去改變現狀。

對於當時作為世界上最強大嘅國家，日不落帝國以及海上霸主嘅英國來講，前兩者嘅卑躬屈膝行為一定係冇辦法接受㗎啦！咁即係話到最後就只能夠用武力去解決問題。但問題就係用武力解決嘅話都唔保證貿易會暢順，所以英國政府一直都猶豫不決。不過如果冇解決貿易問題嘅話，廣州嘅貿易順差只能繼續偏向清帝國嗰邊，外國商人帶嚟嘅金銀亦只會不斷流入清帝國，就好似曾經有傳英國東印度公司出去中國做生意嘅商船上面至少有90%以上裝載嘅嘢都係黃金白銀，而只有10%嘅貨物係賣俾中國嘅貨品，可以見到呢個貿易逆差問題係幾咁嚴重。係1781年至1790年間從 英國 流入清帝國嘅白銀大約有1640萬兩，1880年至1810年就有2600萬白銀流入清帝國，不過20年之後嘅1831年起至到1833年呢三年間將近有1000萬白銀從清帝國流出，而1833年之後清帝國對英國嘅貿易逆差進一步擴大，咁究竟係啲乜嘢令到英國商人咁快就扭轉左對中國嘅貿易逆差情況呢？呢個就係我哋一直以來以為嘅主角鴉片喇！咁究竟鴉片係啲乜嘢嚟嘅呢？佢係點樣為英國帶嚟如此龐大嘅貿易嘅呢？其實清帝國早喺1729年就已經下達禁煙令禁止鴉片嘅輸入，咁點解鴉片貿易喺呢一百年入邊都相安無事，突然係1839年先有一場浩浩蕩蕩嘅禁煙行動，開啟又個一場影響香港深遠嘅戰爭呢？

我係米迦，我哋下一次返嚟再同大家講多兩句啦！