暗諷 Nothing？配件廠出 “Something” 機背貼・Galaxy Z Filp 4 登場・iPhone 13 成功擋子彈 | 廣東話【Price Weekly #124 2022年7月】

講返Nothing Phone (1)，近日有外國網民發現，用咗新機一日之後螢幕底部就出現泛綠情況。亦都有人發現，相機位置出現水氣和起霧的問題。而我哋Price喺試機呢段時間就暫時未見到以上的問題，嚟緊我哋會密切觀察，如果發現以上情況就會再同大家講。

Samsung 宣佈將會喺8月10日夜晚9點舉行Galaxy Unpacked 2022發佈會，喺19秒嘅官方宣傳片入面，見到一部紫色嘅摺機，估計就喺 Galaxy Z Flip 4。驟眼望落，同上代分別唔大，初步見到鏡頭微微凸起，電源掣亦都貌似大粒咗，而鉸位嘅結構亦都同之前差不多，至於熒幕上的摺痕暫時就仲未睇到。唔知Galaxy Z Fold 4、Watch 5 和Buds2 Pro又會唔會同步登場呢？

之前就同大家介紹過華碩最新推出嘅電競手機ROG Phone 6，宜家終於都正式開賣，售價由$8,998起。而 Phone 6 Pro就賣$10,298將會限量推出，三個版本跟機都會送翻Aero嘅專屬保護殼，同埋65W 快速充電器。首批訂購嘅用家，最快可以喺8月7日或之前拎機。

繼UE Fits之後，Ultimate Ears再推出一款提供 IEM 訂製服務嘅真無線耳機 UE Drops。透過複製用家嘅耳形去提高耳機的貼合度同埋隔音嘅效果，同UE Fits唔同嘅喺，今次用家會收到一套 FitKit 取印包，入對有一對自動塑型耳塞，只要跟住 App 嘅指示，就可以塑造出一對屬於你自己嘅耳印，成個過程只係大約1分鐘。完成之後寄返比廠方，2-4星期就會收到一對專屬你嘅耳機。規格方面，UE Drops 採用 9.2mm 驅動單元，具備環境聲模式，但就無ANC功能，一次充電可以用到8小時，充電盒就可以額外提供14小時續航力。暫時只係可以喺美國訂購，售價喺 $449美金，計返港紙大約$3500，唔知大家又有無興趣買嚟試下呢？

我哋之前都有報導過13 吋 M2 MacBook Pro 嘅 SSD 讀寫速度比上代慢咗接近一倍，但估唔到呢個問題同樣出現喺 M2 版 MacBook Air 身上。近日有外媒就用8GB RAM+256GB SSD嘅M2 MacBook Air 去跑分，結果就發現SSD嘅寫入速度慢過上代 15-30%，而讀取速度更加慢咗 40-50%。同一時間有外國YouTuber 拆機之後亦都證實，256GB MacBook Air 同 MacBook Pro 一樣，都喺由兩粒 128GB Nand flash變咗 1 粒 256GB，所以寫入速度相差一倍亦都喺意料中事。對於SSD嘅速度下跌，Apple就回應指256GB 嘅 SSD 跑分，可能會同上代有分別，但配備 M2 晶片嘅新機實際用落都會比較快。

為咗慳位Apple曾經喺Macbook用過蝴蝶式鍵盤，但相信用過嘅朋友都知，呢個設計唔止手感差仲好容易壞，亦都因為咁就喺美國引起咗一場集體訴訟。呢場官司打到依家，終於有結果。Apple 同意俾 5,000 萬美金和解，只要法官批准初步協議，他們就會向美國部份州份需要維修嘅客戶作出賠償。根據律師嘅講法，換過幾次keyboard嘅人預計能夠獲得 $395 美金嘅賠償。而換過一次keyboard或者淨係換過幾粒掣嘅人，就分別可以攞到$125 同$50美金。而喺和解條件之下，Apple唔需要承認任何錯誤，但嚟緊仍然需要向消費者提供4年內嘅免費keyboard維修服務。

Netflix公布財政報告，指上季流失咗97萬個付費用戶，連續第二季下跌。佢地決定要出招止跌，第一步就係要打擊串流寄生族。Netflix將會喺部份美洲國家試行新嘅收費辣招，一旦偵測到用戶用屋企以外嘅電視串流多過兩個禮拜，就會提示用戶要額外支付大概$3美金嘅費用，否則兩個禮拜後就會封鎖呢個「第二地點」。不過呢個計劃目前淨係會限制電視嘅帳戶，換言之呢班串流寄生族暫時唔需要俾錢都可以繼續照用手機同電腦睇片。聽落都幾寬鬆，至於成效係點，遲啲又會唔會喺香港推行，都要再過多排先知。另外，佢哋將會同Microsoft合作，推出含有廣告嘅低價訂閱方案，希望吸納到一啲唔介意睇廣告嘅新用家。

衫袋入面嘅某種硬物，意外擋著咗粒子彈，令主角被人開槍射都死唔去嘅情節，電影成日都有，但喺估唔到呢啲情節竟然喺現實上演，而呢件硬物仲要喺一部iPhone13 Pro。講緊嘅喺上星期五Reddit有條片，就顯示一個烏克蘭士兵喺件穿咗窿嘅背心衫袋拎咗部iPhone出嚟，見到機背玻璃已經碎曬，仲要有粒子彈攝咗喺入面。最誇張嘅係部iPhone竟然冇穿到窿，仲救咗佢一命。條片出咗之後，好多網民都認爲Apple可以挑戰Nokia嘅地位，成爲新一代嘅「不死手機」，唔知大家心目中最硬淨嘅手機又係邊部呢？