新一代藍牙編碼LE Audio規格・傳Samsung棄用自家Exynos處理器・Zenfone 9 將於7 月 28 日晚正式發表 | 廣東話【Price Weekly #123 2022年7月】

Price.com.hk 香港格價網 | 科技類 | Jul 26, 2022

此影片謄本由綾崎颯製作

★非作商業用途，本檔案版權歸版權持有人獨有★

歡迎收看Price Weekly，我們一起看看今個星期最熱門的科技新聞。如果不想錯過我們的新片就快點Subscribe Price youtube channel，，再按旁邊的鐘。

長時間使用電子產品會影響眼睛健康就係人都知，但又好似避無可避。為咗保護眼睛，Philips推出A5智能護眼檯燈。呢盞燈採用微弧形嘅出光面，覆蓋範圍可以去到120cm照曬成張檯，而護眼光覆蓋面積更比國際要求多出3.8倍。燈頭上面仲有3D立體護眼光設計，以主光源配合防眩輔助光源，減少光暗對比。而其他功能包括色溫、亮度等等，就可以係燈頭側邊嘅觸控面板上操作。至於智能功能亦同樣貼心，內置入座感應探測器，只要喺燈照50cm範圍內坐低，就會自動感應開燈，同埋實時監測環境自動調節枱燈光線。另外仲有個40分鐘休息提醒，等大家避免用眼過度，建立一個健康嘅用眼習慣。枱燈係全金屬轉軸設計，燈臂好長，有五個骹位可以轉動，非常靈活。除咗可以座檯擺放之外，想幫書檯慳位嘅你仲可以加個夾式底座，當夾燈使用，而且打横或者打直夾都可以，大部份書檯都一定啱用。售價方面賣$2,180，夾式底座售價賣$180，不過由今個月開始去到9月8號去代理Zenox度買A5就會送埋夾式底座，有興趣嘅朋友就快啲去下面條link睇下喇。

下載檔案

所有資料非作商業用途，若有內容侵權，請即通知我們移除。

藍芽技術聯盟SIG宣佈，佢哋喺2020年發布嘅新一代藍牙規範 LE Audio歷經一年測試之後，終於正式進入市場。相隔17年，新一代嘅LE Audio採用全新LC3編碼格式，比起03年推出嘅SBC編碼。LC3有低耗能、低延遲、高音質嘅優勢。根據負責開發嘅機構測試，LC3只需160kbps就可以提供到SBC編碼345kbps嘅音質。LC3好聲得嚟又慳電，意味住未來市場上嘅無線藍芽耳機除咗能夠有更高嘅續航力，耳機體積仲可以跟住電池一齊縮細，相信可以帶嚟更多變嘅外觀設計。睇翻傳統嘅音頻傳輸技術，一部手機只可以用Single Stream嘅方式，將音頻先傳送到其中一邊耳機，再將訊號傳去另一邊，難免會出現耳機左右耳唔同步嘅問題。但新嘅LE Audio就開發咗Multi-Stream技術，可以同時向幾部藍芽音訊接收器，發送高同步嘅獨立音訊流。唔單止可以改善同步率問題，仲實現咗Auracast音訊廣播功能。譬如我哋聽歌睇戲嘅時候，隔離嘅朋友只要戴上LE Audio傳輸嘅耳機，就可以同步聽埋一份。LE Audio規格容許產品同時支持採用先前編碼格式，例如係SBC、AAC同LDAC等等嘅Classic Audio。SIG已經陸續認證緊LE Audio設備，Sony前排都有宣佈品牌現有嘅部份藍芽耳機已經做好硬件準備，用家遲啲升級番耳機firmware就可以用到LE Audio。相信未來幾個月就可以見到首批支援LE Audio 嘅藍芽裝置上市，唔知你又有冇興趣呢？

潮流興復古就連手機都玩埋一份，經典牌子 Nokia就係其中之一。當年3310被稱為最堅硬手機，什至有人話擋子彈都無問題添。最近佢哋又有新搞作，繼重出經典型號 3310同 8110之後，將會推出呢部 Nokia 5710 XpressMusic。至於有咩賣點，就咁望落唔算特別，但原來機背上方採用滑蓋式設計，向下推就會出現一對擁有4小時續航力嘅藍牙耳機。聽歌嗰陣拎出嚟，聽完放返落去充電，一嚟出街唔使帶多樣嘢，二嚟冇咁易唔見都幾方便。手機設有 2.4吋 QVGA彩色屏幕，最大支援 32GB Micro SD，可拆式 1,450mAh電池，6小時通話續航力，待機嘅話最長可達至 20日。支援 4G+4G雙卡並支援藍牙 5.0，售價為 74.99英磅(約696蚊港紙)。

除此之外仲會推出另一部摺機Nokia 2660 Flip，呢款手機主打高續航力，而且鍵盤位置相當大。1.77吋 QQVGA外屏，以及 2.8吋 QVGA內屏，最大支援 32GB Micro SD，內置 30萬像素鏡頭以及可拆式 1,450mAh電池，並設有 3.5mm耳機孔，售價為 64.99英磅(約603蚊港紙)。

最後一款 Nokia 8210 4G型號，經典嘅外觀仲設有沙色、紅色同藍色3種，並支援埋藍牙 5.0，其餘規格就連售價都同上一部 Nokia 2660 Flip一樣，唔知大家又鍾意邊部呢？歡迎喺下面留言分享下。

早前華碩官方頻道意外流出咗新機Zenfone 9嘅資料，呢款被稱為「碩果僅存」嘅細小旗艦機以「Compact Size、Big Possibilties」為標語，繼承上代Zenfone 8嘅輕巧機身，5.9吋120Hz AMOLED屏幕，採用Snapdragon 8+ Gen 1 CPU，設有50MP IMX766感光器、廣角，以及 50MP 超廣角雙鏡頭。主鏡更設有雲台式防手震功能，有埋3.5mm耳機孔，以及IP68防水效能，更配備4,300mAh電池。部機要等到月尾7月28號晚上9點先會正式公布，大家又期唔期待呢？

一直以嚟Samsung Galaxy S 系列手機都有兩個版本，一個係用咗 Snapdragon 嘅處理器，而另一個就用咗Samsung 自己研發的 Exynos 處理器。不過最近就有傳明年推出嘅 Galaxy S23好可能會得返Qualcomm 嘅版本。消息指，Qualcomm 嘅旗艦級處理器Snapdragon 8 Gen 2好可能喺今年 11 月底推出。但因為呢粒處理器，係各方面都好過將會用喺 S23 嘅 Exynos 2300，所以Samsung就唔打算喺呢個系列採用佢哋自家製嘅處理器。其實喺Samsung 過去推出嘅手機入面，Snapdragon 處理器喺絕大多數情況下，性能或者續航力都會好啲，所以一直以嚟 Qualcomm 嘅版本都係比較受歡迎。所以如果今次呢個消息屬實，Exynos 真係唔知何去何從。

用得YouTube Premium，其中一樣最方便嘅就係有畫中畫功能 PIP，睇片嘅同時可以去其他界面覆message或者碌Facebook IG。其實早喺2018年美國嘅Android用戶就已經可以免費用到PIP，YouTube喺近日就終於正式宣佈將依個福利免費開俾Apple用戶。可惜嘅係暫時只有身處美國ios15或以上嘅iPhone同iPad用戶，先可以免費享用依個功能。但係就只會支援非音樂類型嘅影片，即係如果想聽住歌做野就唯有幫襯返YouTube買個Premium會籍。而香港用家似乎要再等下啦。

相信大家對「付費以解鎖更多功能」呢句說話一啲都唔陌生，通常喺啲採用訂閱制嘅電腦軟件、手機程式、串流平台等嗰度見到。近日BMW嘅Connected Drive商店，喺唔同嘅option提供咗一個月免費使用嘅選擇，例如座椅加熱功能免費使用一個月後，就可以俾18蚊美金，約$140港幣一個月去訂閱。亦都可以用406蚊美金，約$3,250港幣，一次過買斷。安全系統、行車記錄儀、Apple Carplay同大燈等功能，都可以用呢種月費模式。唔同 option唔同訂閱選擇，條數點先至最化算呢？車主朋友真係要慢慢計啦。

基本上大家每日返工返學，等車都會用到電話APP睇到站時間。近排九巴APP App1933 – KMB ‧ LWB就進行咗個好實用嘅更新，將政府「資料一線通」整合嘅專線小巴實時到站數據加入到app入面。換言之九巴app就可以同時睇曬九龍巴士、龍運巴士、同埋專線小巴嘅到站時間。目前運輸處已經上載咗453條專線小巴路線上資料庫，更加表示計劃喺今年年底前上載埋淨低大約100條路線嘅資料。相信呢大家以後等車嘅時間都會更易掌握，你平時又有冇用依類app嘅習慣呢？不妨喺下面留言講吓你用開邊個app啊。

中秋節就到喇，Price網購為大家搜羅各式各樣嘅月餅，選擇豐富，總有一款合你意。而家仲有早鳥優惠，多款月餅低至64折。無論係自己享受定買嚟送禮，我哋都應有盡有。買傳統、奶皇、冰皮定榴槤月餅好，入嚟Price網購慢慢揀啦。今個月用恒生信用卡優惠就更抵，買滿 $400 用埋恒生信用卡優惠碼，減多 $50（HSMOONCAKE），所有優惠詳情記得留意返下面條LINK啦！