24/7《圍爐取戀》條仔食咗我8年軟飯

Stephanie：係呀係呀。

東方昇：哇，正呀正呀正呀。好，講嚟聽吓先點派!?

Stephanie：話說我同前度拍咗拖八年，初時佢係好上進嘅，半工讀拍咗拖三個月之後呢，佢畀個客投訴啦咁就冇咗份工啦。咁好多時候出街睇戲食飯嗰啲全部都係由我去肩負。

東方昇：因為你做咗嘢㗎啦?

Stephanie：係啦，我全職嘅嗰陣時。

東方昇：咁佢呢，佢冇零用錢嘅咩?媽咪冇畀零用錢佢嘅咩?

Stephanie：爸媽係有嘅，好似大概每個月都二千蚊。

東方昇：咁你就補貼啦，派張消費劵畀佢啦。嗰時大約派幾多呢?

Stephanie：嗰陣時兩個人使費都去到七八千蚊㗎。

Kneta：哇，咁你每個月搵幾多先?

Stephanie：嗰陣時我一開始係萬三四嘅。

眾人：哇…一半有多喎…

東方昇：但係七八千蚊係包埋你自己嘅?

Stephanie：係包埋我自己嘅。

東方昇：即係當佢一半，三千到啦。

Stephanie：係啦係啦。

東方昇：喂等等先，佢都幾好搵喎，月月咁有五千蚊，多唔多過綜援啊。

Kneta：多過。(註：健全單身成人綜援金為$2,755港元一個月)

Stephanie：之後咁佢書都讀唔成，唔諗住繼續讀，諗住佢就不如出嚟做嘢啦。咁佢就開始搵工啦，但係佢好多理由話唔返啦，因為佢係一個有長期病患嘅人嚟嘅。

叻叻：介唔介意講係咩病嚟?

Stephanie：佢有癲癇嘅。

眾人：喔…

東方昇：真嘅?

Stephanie：真嘅，但係呢其實頭嗰兩年呢，我係冇見過佢發作過嘅。有聽佢講話醫生話係輕微嘅。

東方昇：啫係唔係好嚴重嘅病嚟既。

Stephanie：唔係好嚴重，咁其實我都有勸佢話：「喂~其實唔嚴重你都可以照返工呀，試吓」咁但係佢都好抗拒啦，開始使費越來越多啦，我又要出埋電話畀佢啦，又要幫佢交埋電話費啦，仲要食嘢嗰方面，啫係我哋唔係M記呀或者譚仔呢啲呀。我哋都有時可能百零二百蚊，甚至三百四百都食過。咁都開始入不敷支啦，咪努力啲返工，幫人頂埋更呀。

東方昇：嘩~你都好抵得諗喎。

Stephanie：我覺得依家我為你捱冇問題，因為其實我覺得兩公婆一定要捱，喺呢個世代入面。冇可能話我淨係依賴你。

東方昇：有冇苦盡甘來呢?

Stephanie：梗係冇。咁仲要係佢越使越大啦。因為佢出咗架車啦。

Knate：哇…(差點爆發)

叻叻：等陣先等陣先，出咗架車係你出畀佢㗎架車?

Stephanie：本身架車初初就係話出嚟係for我返工用嘅。

東方昇：啫係做你司機，佢講到好漂亮既。

Stephanie：係啦，因為我份工係真係需要。因為有時候啲時間冇車搭，因為我返機場㗎。當然燕梳(Insurance)、牌費，所有嘅消耗品都係我出錢啦。其實我有叫過佢唔好渣嘅，直程唔好掂架車，其實架車真係for我返工用。

東方昇：係咪(癲癇)發作所以會危險?佢有車牌㗎可?我驚佢連車牌都冇。

Stephanie：佢有車牌，但係佢未有車牌之前其實已經枕住玩賽車game，其實佢好鍾意車。

東方昇：玩賽車game(笑)

Stephanie：咁之後佢仲要撞咗啦。

東方昇：哦…咁你賠咗幾多錢呢要?

Stephanie：計計埋埋…咁多次，有三次。

Knate：咩話，炒三次!?

Stephanie：三次加埋五六萬。

眾人：哇……

Stephanie：整車錢都整咗我三萬四萬㗎啦已經係。

Knate：啫係十萬啦。

叻叻：點解佢仲要堅持揸車呀?

東方昇：佢以為打緊賽車game吖嘛。

叻叻：或者收咗佢條車匙囉。

Stephanie：係呀，其實我有收過佢條車匙嘅。咁佢當然係發哂脾氣，鬧我啦，話我啦。

專家Dickson：咁呢樣嘢(炒車)其實同佢嗰個病有冇關係嘅呢?

Stephanie：冇關係嘅。

Knate&叻叻：咁啫係純粹係技術問題! 啫係廢!

東方昇：同佢打機嘅技巧有關係!

專家Dickson：佢純粹當係GT吓嘛?

Stephanie：咁之後其實我屋企人都問啦，見我開始唔畀家用喇，我就會用好多理由話：「我病呀，我睇醫生呀」。

東方昇：啫係為咗貼條仔跟住你就令到可能你自己家用都畀唔到屋企人喇。

Stephanie：係喇係喇。

東方昇：咁佢後尾之後有冇搵工呢?

Stephanie：咪就係會有搵到但係唔長囉。唔過probation㗎。咁我有再就搵第二份工畀佢啦，咁呢一份呢就係喺地盤嘅範圍做嘢嘅。咁之後呢，做咗第二個月突然之間同我講話要請假，整親條腰。然之後我宜家申請工傷，但係一claim就claim咗兩年。

東方昇：就嗰兩年就冇做嘢喇。

Stephanie：係喇，咁每個月都有畀病假嘅錢佢㗎嘛，咁你咪攞啲錢出嚟填補返大家嘅使費。但係呢，冇畀之餘仲要使突埋我嘅錢。

東方昇：哦~總之佢claim到錢啦，有錢落袋啦，佢就冇畀返你。

Stephanie：仲要中途有一次，佢同我講話佢班friend約咗佢入長洲玩，咁之後啦嗰一晚啦就好似失咗蹤咁樣樣。之後第二日我執屋嘅時候發現佢一部唔用嘅電話擺咗喺一個好鬼鼠嘅地方。之後我一打開，原來佢save咗一啲出軌嘅相。

東方昇：哦…

Knate：係咪床照?

叻叻：定係搭住膊頭嗰啲，跟住一齊合照，好sweet嗰啲相?

Stephanie：係佢同一個女仔喺間房喺張床上面除哂衫，喺到自拍影相。

(註：Knate忍不住了，直接爆粗)

專家Dickson：吓?啫係影裸照?

Stephanie：係呀，之後好嬲囉，我執哂所有嘢想走啦，想同佢分手啦，之後佢跪喺到呀，又囈我呀，又話「係我飲醉咗酒我做錯嘢」「對唔住呀」

東方昇：啫係你咁辛苦搵錢佢仲要去偷食。

Knate：咪就係囉，我真係之前有分享過，但唔知記唔記得。我真係有個ex呢係真係一模一樣。唔返工，不斷去推卸，之後要我買部車畀佢，唔知你哋有冇印象啦。

東方昇：有冇癲癇㗎?

Knate：冇癲癇!

叻叻：係咪同一個人嚟㗎?

Knate：我唔知!嗱，我出咗部車畀佢，咁之後佢就話用部車去工作，做完嘢搵到啲錢之後呢，我就話：「欸你有錢返㗎嘛應該?」佢話：「又入油又呢樣嗰樣」，啫係唔攞錢出嚟。OK，算。佢就用呢一架車去溝女，又係第二部電話。其實點解佢哋咁理直氣壯呢?或者係點解我哋會繼續上當呢?就係佢喺我哋面前係扮到好軟弱，例如話：「我唔得呀」、「我搵唔到工呀」、「我好廢呀」。

東方昇：啫係覺得自己係受害者，我係命運嘅受害者，我又有病啊…

Knate：係喇，又話：「我又冇人請呀」，咁但係去到出面呢，你點知呀，佢有錢有車，啲女就上㗎啦。

東方昇：就變成好自豪㖭啦，我唔使做又有女朋友畀錢我。

Knate：係呀，佢唔會夠膽同人哋講㗎。

叻叻：(唔夠膽)同人哋講有女朋友。

Knate：係呀，係呀，佢唔會講。

東方昇：你心軟都係因為呢啲原因啦，係嘛?

Stephanie：因為我愛佢㗎，如果唔係我愛佢，真係就唔會拎咁多錢出嚟，幫呢個人。但係佢永遠都meet唔到我嘅希望。(註：事主觸景傷情 開始哽咽)

東方昇：你嘅希望都好低㗎啦。希望佢生生性性搵份工，正常，畀返家用，其實你嘅要求唔係高。

專家Dickson：甚至乎事主覺得你唔返工咪我返多份囉，已經去到咁樣樣。

東方昇：但係佢就係咁仆街。咁我想問喇，最尾你因咩原因令你咁決斷地就要離開呢個男人呢?

Stephanie：中途發生咗件事就係話佢突然之間話要同我結婚。

東方昇：點解呢?

叻叻：吓，好突然喎依件事。

Stephanie：之後我話：「何來有錢結婚?」佢話：「你出住先啦!咁我claim完工傷之後咁我咪褪返啲錢畀你。」

Knate：黐孖筋。

東方昇：咁我想問點解佢有呢個諗法呢?

Stephanie：因為我哋嗰陣時拍咗拖六年㗎喇，佢覺得再唔同我結婚呢，我就會同佢分手。

東方昇：我直程懷疑覺得佢同你結婚係佢覺得啲禮金可以收得返，又有錢攞!

Knate：自己袋!

東方昇：所以咁樣同你結婚咋我懷疑。

Stephanie：係呀，佢已經plan好哂之後搵咩工，點樣安排我哋嗰婚禮，畀幾多錢禮金。我信多佢一次，咁我就答應咗嫁畀佢。啫係你都知結婚，首先要落咗訂先㗎嘛啲野。咁落完訂，要找尾數，咁其實都冇錢找尾數。隔咗一個月，我就同佢講喇：「我今個月已經開始no pay啦。因為疫情，一個月得返六千蚊左右，但係我每個月還緊嘅係講緊係萬六七嘅債，你可唔可以攞五千蚊出嚟幫補吓還錢嗰一part呀?」之後佢話：「吓!我咪同你講㗎車攞咗去車房整囉!」話要還咗車房條債先喎。仲話：「你之前咪借咗錢嚟結婚㗎囉，嗰啲錢使哂喇?」

專家Dickson：哇…真係…

Knate：好賤呀，真係好賤呀!

Stephanie：其實我嗰陣時已經心諗不如走咗佢啦，我唔想再還錢，我直程有輕生嘅念頭出嚟。咁日日都唔使返工嘅時候，咁就喺屋企打機啦，打機嘅時候都會遇著一啲「機友」㗎嘛，大家都有分享吓大家疫情嘅生活係點。講吓講吓又講起啲私人嘢出嚟喇。咁佢哋都覺得：「哇!唔得喎你咁樣樣」。有個人就點醒我啦，佢話：「個男人唔幫你捱嘅?梗係要一齊捱㗎啦!如果唔係點結婚呀?」

東方昇：你係咪其實嗰時先點得醒呢?其實因為外人睇就其實個…

Knate：一早就要走啦!

東方昇：係呀!但係嗰吓佢提一提你先醒。

Stephanie：其實佢點醒咗我嘅，咁我就好婉轉咁同佢講話：「我呢幾日要搬返返屋企住，臨結婚之前陪呀媽。」之後佢就即刻話：「你返咗娘家你就唔好再返嚟!」然之後「分手啦!你估我唔知你同啲機友搭上，既然你主動同我講分手，咁就分手啦。」

東方昇：哇好彩咋喎。

叻叻：好彩佢肯放你走。

東方昇：係呀，我懷疑我覺得佢諗住大你㗎。

Knate：係呀，冇諗過你咁順攤。

東方昇：係呀，落咗訂咪分手囉!好彩你真係決絕地分手。

Stephanie：之後一個禮拜後，囈我返嚟。(眾人笑) 我話我要冷靜吓，之後好啦，我依然都唔返佢屋企，咁佢就同周圍嘅身邊嘅朋友圈嘅人講話：「我同咗佢分手喇，因為佢出軌，佢畀綠帽我戴。」

專家Dickson：哇…呢個人係

叻叻：自編自導自演。

專家Dickson：係呀，啫係佢呃呢個世界，同埋佢呃埋佢自己，係呃哂㗎喇喎已經。

東方昇：咦咁我想講而家就好啦，你離開咗佢啦，但係佢留返嚟嘅債咁點呢?

Stephanie：自己捱囉。然後之後咁啱係我崩潰嘅情況之下就出現咗個男人知道我有經濟壓力，所以一開始就畀咗幾千蚊我，「你當係朋友幫你嘅，你到時候有錢喇，你還返畀我啦。」咁呢個男仔一直都喺度陪伴我啦，陪我捱過呢個關口。經歷左大半年，我卒之同呢個男仔一齊囉。

眾人：嗯~

東方昇：佢就幫咗你喇。

Stephanie：嚟緊都諗住結婚㗎喇。

專家Dickson：哇，好彩有個好結局呀。

東方昇：如果唔係就真係好慘呀。

叻叻：即刻個心舒服好多呀。

Knate：咁我想知嗰個，你嗰個賤男，個仆街無…

東方昇：知道你咁happy，有無再搵返你呀? 以佢性格似喎。

Knate：鑿返筆呀? 哇~幫你搵到個有錢人喎。

Stephanie：無呀，佢轉個頭已經搵咗第二個女仔。

東方昇：第二個受害者呀。哇，好彩啦你，我哋都戥你開心你而家搵到好結局啦。人生真係唔好再遇呢啲人喇。好多時你陷入嗰個戀愛當中呢，你睇唔清。你係我另一半，唔通同你計錢咩。

Knate：係呀，嗰啲咁樣嘅賤人就會用呢個咁嘅心理去捉你囉。

東方昇：希望你繼續幸福落去啦。

Stephanie：好呀多謝你哋。

東方昇：感謝你嘅故事分享，拜拜~

Knate：我都係過來人啦，啫係好容易陷入咗呢啲畀人利用嗰個情感，尤其是同理心。我自己覺得啦吓，啫係錢固然係要分得開啲，但係呢，唔係話完全唔相信人。啫係你好似見啱先阿Stephanie都搵到另外一個好啲嘅對象啦。女仔要小心啲之餘，(拍Dickson膊)你哋都要小心啲。

專家Dickson：點解你搭住我?點解你搭住我講嘅?

Knate：我覺得呢個(Dickson)好易會墮入情網 哈哈。

東方昇：定係已經墮入咗喇?有無呀?

專家Dickson：我成件綠衫已經著住係度喇已經。

東方昇：你撈咁耐都好似好寒酸咁，你係咪已經畀人呃咗啦?

Knate：你係咪畀人呃哂喇?

專家Dickson：唉，我地，幕後講。(眾人笑)

東方昇：所以大家其實男女都要小心啲，但係我覺得起碼個底線，唔好因為另一半而借錢。你要咁樣set，咁樣會好啲。

Knate：呢個好緊要。

東方昇：希望大家都學到嘢啦，就唔好咁樣畀人呃啦。好!拜拜!