15/7《圍爐取戀》條仔成日攞我同Ex比較

東方昇：唔夠膽喇吓話，你鬧爆佢吖嘛！
Kneta：斬佢啦大佬！佢試下吖嗱！
叻叻：我嗰個喺純粹想，呀覺得真係讚我嘅嗰一種囉......
東方昇：哦~即係令你舒服嘅......
叻叻：係啦，氹得我好開心嘅......
東方昇：你真係冇我前度咁......差。
叻叻：咩意思呀？
東方昇：啫係你靚過我前度好多......
叻叻：係囉，都係讚我嘅，所以都氹得我好開心。
東方昇：我都冇......
專家Dickson：嗱，但係我呢，就經常俾人拎咗去同現任比較。
Kneta：點樣現任呀？
專家Dickson：你睇吓人地Dickson呀，幾好人！
眾人：（！）哦~
東方昇：指桑罵槐、借力打力。
Kneta：我明嘅，我明嘅，因為我都會嘅，但係絕對唔係踩佢嘅意思嘅，我覺得好普遍嘅啫呢啲現象。
叻叻：即係我現任做一啲嘢啦，即係我自己心入面都會咁樣諗呀，即係呢一個細心好多囉，比起我個ex咁樣。
東方昇：即係心裡咁諗啫......
叻叻：係啦係啦。
東方昇：因為其實正常呢，我覺得係人都會比較。
Kneta：一定有。
東方昇：但係心裡面比較咗......
叻叻：係呀係呀
東方昇：唔會講出嚟......
Kneta：講出嚟係呀。
東方昇：咁戇X吓話。呢個撩交嗌㗎喎真係......今日嗰個受訪者，個另一半就係咁戇X呀？
（就係）
眾人：（笑）
東方昇：唔係吖嘛？
（佢就係連前度嘅身材都會攞嚟比較）
（標題：本集主題：男友將我同EX比較）
專家Dickson：哇，唔係呀嘛？
東方昇：哇。
Kneta：好賤呀呢個。
東方昇：比較都戇X，攞身材仲戇X。
叻叻：哈哈哈。
專家Dickson：咁敏感。
東方昇：好，接佢過嚟。
—
（圍爐Buddy：阿鳳（化名） 聲音經過特別處理）
東方昇：阿鳳你好。
阿鳳：Hello…
東方昇：嘩你好你好，嘩，你個名好老土，一我聽好似40歲以上呀。好喂，阿鳳你個故事係點呢？
阿鳳：其實我同我另一半喺外國識嘅，都一齊差唔多三年，最初都幾sweet㗎，我覺得呢個人都幾好，不過後來佢就成日都會同我提起佢個ex點點點好呀。（男友對前度讚不絕口）你唔夠sweet呀，我鍾意人哋溫柔，又話佢身材好好，所有條件都係鍾意，話係佢心目中嘅女神咁嘅樣。我聽都哩啲，係女仔聽到都喊㗎啦，跟住佢就話，都唔知你喊乜嘢，我又唔係出軌。
東方昇：嘩！
專家Dickson：痴線！
東方昇：佢會幾時講佢個ex攞嚟比較呢？
阿鳳：例如之前有試過因為我喺外國呀嘛，咁佢生日，佢就覺得我應該要做啲乜嘢，咁但係因為我喺外國都好窮困，不如返嚟香港先再搞大佢啦，咁於是佢就喺度話你一啲都唔sweet.
東方昇：唔係甚至乎我問，上一個女朋友點做先？我聽吓有幾sweet先。
（東方昇提問：男友前度有多甜蜜？）
阿鳳：佢之前有同我講過：「你睇下人地差唔多情人節喇，佢自己親手畫咗一張卡，仲雕埋出嚟」，咁然之後我就話：「吓，咁但係人地係一個學畫畫，教畫班嘅人嚟㗎嘛，咁其實佢做呢啲，同佢哋翻工做嘅嘢係冇分別㗎喎。」
東方昇：佢用意係咩？因為我反而覺得奇怪，呢啲嘢唔係應該女仔講嘅咩？
（男友反應比較罕見）
Kneta:係囉。
東方昇：女仔話：「你睇下人哋做到幾好，你又冇。」點解個男仔會講啲咁嘅嘢嘅？
阿鳳：我都覺得好奇怪呀，但係佢就話：「我想你了解我多啲，我希望你可以做得到好好，咁令到我都好鍾意你咁樣。」
叻叻、東方昇：嘩。
東方昇：咁我會問喇，佢做咗啲乜嘢先？
Kneta：係囉。
叻叻：佢為你生日做過啲咩啊？我嗰陣時就啱啱返咗嚟香港㗎喇，咁所以佢就有帶我去食Buffet咁樣囉。
專家Dickson：幾浪漫。
Kneta：食自動餐......
專家Dickson：真係真係浪漫呀。
Kneta：多謝佢呀，食自動餐啊。（我真係恭喜你呀）
東方昇：即係食buffet啫。咁你係乜都冇做過嘅？
阿鳳：嗰年第一年嘅生日就真係咩都無做過嘅，咁但係之後就都有整啲嘢嘅，譬如佢臨生日嘅嗰個月份，咁我就整聖誕嗰啲，咪有好多個日子一路篤篤篤篤到......
眾人：哦~
阿鳳：聖誕節嗰日嘅......
東方昇：倒數嗰啲。
阿鳳：咁我就整咗，係喇。
東方昇：聽完佢講之後，你都有落心思整嘅。
阿鳳：其實都會㗎，因為我自己都會整下小小手作仔，但係佢就會話，「呢啲我唔覺得係有啲咩囉」咁樣。
（阿鳳透露：即使送手作禮物 但男友仍嫌棄）
（無言）
東方昇：除咗送禮物之外，仲有啲乜嘢成日攞個ex嚟比較呢？
阿鳳：其實後尾佢成日都喺度話：「佢身材好好呀好靚呀，然之後好温柔呀」（讚前度樣貌身材），記住我都已經開始喺度喊，跟住我唔想聽呢啲嘢，我唔想知道，所以佢後尾話費事講出嚟喇咁。
東方昇：嘩。
東方昇：都費事啦費事。
叻叻：辛苦。辛苦曬啊。
（事主反被男友責怪）
東方昇：冇錯，係我費事講出嚟呀，費事hurt到你啦，但我諗就係咁諗㗎啦。
阿鳳：係喇，係呢句喇。
專家Dickson：即係你喊緊佢都冇同你道歉嘅？
阿鳳：冇呀。我喊佢就話：「都唔知你喊乜嘅」。
Kneta：係囉。
東方昇：嗱嗱我公平啲先，因為你哋係外國識㗎嘛，佢ex啫係個鬼妹嚟㗎？
阿鳳：咁唔係，香港人嚟嘅都。
東方昇，專家Dickson：哦~係~
東方昇：因為如果鬼妹，我都覺得佢咁講都合理呀，咁種族唔同。
Kneta：跟住見到對波咁大！
（高熱火焰！）
東方昇：你有冇反擊呢話：「咁你咪X掂啦。」
Kneta：問：「你係咪好大碌先」
阿鳳：哈哈哈。冇啊我又冇特別去話佢，我覺得我講得好白㗎喇，話我唔想再聽到任何關於呢個人嘅野。就算我之前嗰啲，我都唔會特登去問佢哋，之前發生過啲咩，佢就只會同我講話：啲ex其實都好姣㗎，我好鍾意咁樣。
Kneta：我啲ex…
阿鳳：但係我就覺得，唔......咁你直接話我鍾意你姣啲，咪已經可以囉。點解要加個ex呢？
東方昇：啱呀啱呀，咁嗱我都問喇，佢係咪本身個性格好鍾意比較呢？
（東方昇好奇：男友是否任何事也喜歡比較？）
即係例如街市買菜，欸，喂隔離嗰檔大棵好啲又平啲，係咪佢連買菜都比較呢？
阿鳳：佢有幾多嘢都會係咁話吓，呢啲好啲，譬如佢會話「以前食過嗰間餐廳呀，好過呢間好多啦嗰啲啦」
東方昇：即係佢係腦裡面，不斷喺度比較任何嘢，咁只不過你係其中一個，佢都會比較你嘅......
Kneta：被比較嘅。
專家Dickson：但係咁佢會唔會比較佢自己㗎？
（Dickson提問：男友會將自己跟別人比較嗎？）
東方昇：係啊，會唔會？
專家Dickson：將自己同人地比較。
阿鳳：咁就唔會喎，但係佢就會話「咁我都想知道你以前嘅嘢，咁你講吓你到底鍾意人地點樣對你？唔鍾意啲乜？」咁我咪照直講鍾意點樣囉。
Kneta：咁但係你講完佢有冇做先？
阿鳳：係冇乜點樣做嘅。我都同佢講話，「人人性格都唔一樣，咁你用你嘅方式咁我都ok㗎」
東方昇：即係呢啲叫咩，待人以嚴，待己以寬，係咪呀？
阿鳳：我覺得有陣時都係嘅。
東方昇：咁我都會問，點解你又同佢拍咗3年拖......
Kneta：係囉。
東方昇：你都仲同佢一齊呢？
阿鳳：習慣囉，好多啲生活方面都可以夾到，返工嗰啲嘢，咁又可以同佢傾下，因為我哋本身工作類型都有啲似。
東方昇：但係會唔會因為喺呢個比較上，你贏咗所以，佢先對你好咋？或者同你一齊咋？
（一語道破 阿鳳疑慮）
阿鳳：我有咁諗㗎，你知我會覺得係有啲地方，我可以值得利用，所以佢先會......
東方昇：係喇，嗱，如果佢咁樣比較，即係如果你係比ex優勝，佢係咪會讚你煮餸好味？
阿鳳：佢有讚過我好獨立，佢都有話過俾我聽，佢欣賞我啲乜嘢方面。咁但係就......
東方昇：都係攞ex嚟做準則？
阿鳳：我覺得喺嘅，因為佢有話我學歷上係比較好，咁但係呢啲嘢就好似，隔幾個月就會發生一次。
東方昇：唔係，我覺得直程唔係隔幾個月呀，喺佢腦裏面每秒都比較緊呀。
叻叻：哈哈。
東方昇：同埋我覺得阿鳳都算做得好呀，如果嗱你老公比較ex（指著Kneta）
Kneta：我先攞把菜刀出來，兩把老牛在腰間，我話你聽，你試下啊喇！
東方昇：你斬咗佢啦。
Kneta：係喇。你分享故事咁樣講，即係道出，呀~以前同個ex做過啲乜，我OK嘅，但係你唔好咁樣去比較，因為你揀咗我啦嘛，咁你揀咗我，你再攞我嚟去比較，即係點呀，攞我嚟攝住定係......咩意思先？
（Kneta認為：既然選擇了我 何必再比較）
東方昇：我覺得你係咪弱得滯呀？你有冇一次發大脾氣呀？
阿鳳：我發脾氣然後佢咪話：「我都話你個人脾氣差㗎啦」，跟住就開始會......
東方昇：又比較你同我ex都唔會發脾氣嘅。（責任全在女方）
Kneta：反客為主。
東方昇：即係你已經表達，你唔鐘意嘅嘢，但係佢都無動於衷？
阿鳳：係呀，已經咩嘢都做曬㗎啦。
Kneta：我想知你有冇試過，即係講你ex？係喇。
東方昇：即係以其人之道還治其人之身呀。
阿鳳：佢有試過問我一次，我有好長篇咁樣講咗一啲嘢啦，咁然之後佢就話嗯，我好理解到你地之前嘅關係都真係好好嘅，咁我以前同我啲ex都可能會去到咁深入嘅地步，但係同你都未係得囉咁樣。
Kneta：好串喎。
專家Dickson：反擊喎真係。
叻叻：佢完全不將你放在眼內，你宜家有冇男仔追你呀？
阿鳳：冇呀。
叻叻：作一啲出嚟。
（叻叻建議：虛構追求者出現）
叻叻：有個男仔追我真係好好㗎......
東方昇：哦哦......
Kneta：呀上司嗰啲呢......
叻叻：係呀。
Kneta：同事隔離位嗰啲呀。
東方昇：呢個經啊哩個，直程唔係同ex比較，同我下一個男朋友......
眾人：（笑）
東方昇：喂，真係得喎，唔係你要令佢嬲，可能咁樣先至理解呀，當佢嬲咗之后，你先話畀佢聽：「嗱，其實我就係想你感受下呢樣嘢」，因為佢唔理解人哋嘅感受呀，而我地嗰個方法就係話，你等佢感受吓，當佢俾人比較，佢有幾難受，咁佢可能會了解多啲，下次唔去做。
阿鳳：好。
叻叻：阿鳳，咁佢有冇啲咩優點呢？係可以令你繼續，即係經歷咗呢3年......
阿鳳：我覺得佢有陣時都會係幾肯幫我，（男友也有體貼一面）同埋我自己都係一個，脾氣唔係幾好嘅人嚟嘅，佢有陣時都會係忍我㗎囉。
東方昇：我覺得阿鳳呢就，一定唔會離開佢喇。佢從頭到尾都冇諗過離開佢，你接受咗佢呢個性格，但係問題就係，佢而家呢個性格令到阿鳳時不時又唔開心。
專家Dickson：係係係
東方昇：或者我會咁講，佢呢個比較、呢個特質有冇佢個好處呢？即係可能因為佢斤斤計較，佢喺經濟上好市儈，令到你哋屋企生活好富裕。
專家Dickson：同埋佢去買餸，你永遠都有靚餸。
東方昇：係喇係喇。
（凡事都有兩面）
東方昇：即係佢呢個比較，可能可以有好嘅一面㗎嘛。
專家Dickson：係
阿鳳：我覺得最好嘅地方，就係佢真係會知道邊啲餐廳好差，邊啲餐廳好好。
（人肉米芝蓮）
東方昇：有好處嘅。
Kneta：百科全書。
東方昇：同埋我覺得係咪佢好少比人呃嘅？
阿鳳：我諗都算係啦，我覺得佢係即係都幾批判，即係佢會諗啲嘢諗得好通透囉。
東方昇：因為點解我會咁講呢？我自己都係一個比嚟比去嘅人。
Kneta：但係唔會講出口。
東方昇：係喇，我唔會講出口嘅。
專家Dickson：我哋其實feel到㗎。
眾人：哈哈哈。
東方昇：呢種人有佢個好處，例如佢可能買棵葱都會有精明選擇，或者咁講，佢同你拍拖3年，佢繼續係你身邊......
（東方昇認為：三年感情 代表男友認可阿鳳）
東方昇：其實你要知道佢覺得你係好嘅，咁樣一個咁挑剔嘅人都選擇你。
專家Dickson：其實係某程度上嘅認證吖嘛。
東方昇：係只不過佢把口就衰。
專家Dickson：係。
東方昇：點都要擺喺口度講，令到你唔開心，所以我覺得阿鳳其實都會繼續同佢行落去，因為佢都理解佢有佢好處，但係你要叫佢改下把口囉。
阿鳳：我都明嘅，因為我都話宜家，反而佢唔算好成日講起佢嘅ex啲嘢，但係我就會有陣時嬲到話：「誒~你嗰陣時咁樣對佢，又唔咁樣對我嘅？」。
東方昇：你呢個方法都幾好呀，因為你用咗個幽默嘅方法變咗好似打情罵俏咁樣，睇佢呢啲咁嘅嘢吖嘛。
（將爭執變打情罵俏）
東方昇：OK呀，我覺得。呢個可能係一個你哋相處嘅一個方式，每次佢一講，你就笑咗佢，撒嬌咗佢。即係亂噏呀，唔準你提佢~~佢知道，哦，你其實提緊佢，咁而你又唔係用一個好嬲嘅情況表達出嚟。佢知道哎，咁我唔講啦，可能用呢啲方式去處理。
阿鳳：扮可愛嘅方式。
東方昇：係啊。用翻呢招，咁你就話呀，我冇佢嘅身材咁好，但你都同我，咁鍾意我，一定我有其他好嘢，講嚟聽下......即係用翻呢啲去四兩撥千斤，咁樣做，我覺得會對你哋嘅關係有好處。
專家Dickson：以柔制剛。
東方昇：係呀。
阿鳳：係，應該咁樣會好玩啲嘅，總好過成日都喺度嬲啊鬧啊咁樣。
東方昇：啱啊。
Kneta：又或者單單打打。
東方昇：係啊。所以你識㗎啦我覺得，係用呢啲方法就應該，即係你解決埋呢個問題，我覺得佢都係一個幾好嘅伴侶嚟嘅，係咪呢？
阿鳳：其實都算係嘅，都好多嘢都幾照顧我嘅。
東方昇：反而我覺得你，你幾好，因為你係睇到佢啲衰嘢，因為如果佢好小心眼呢，就不斷打上嚟講佢提ex，跟住就好嬲咁講，但係其實你一路保持住好冷靜，而你有我哋問你，你又講到佢好處，其實我覺得真正好嘅係你，多啲欣賞自己呀。
阿鳳：好，多謝曬你哋。
東方昇：好啊好啊掂啊。
眾人：拜拜......
阿鳳：拜拜......
—
東方昇：頭先個case講明咗一個道理，我哋同情侶嗌交，嬲係得嘅，但係當要諗到係咪要分手呢？其實你要知道，究竟引致鬧交，係咪因為好似頭先個case咁，因為佢份人係好鍾意計算，但係其實好多時佢呢個特質，佢有佢個唔好處，但係其實都有佢個好處。
（每種性格都是雙面刃）
Kneta：我都自首先，因為我都係一個好奄尖嘅人嚟。
專家Dickson：係呀我哋都知嘅。
Kneta：係呀大家都明㗎啦。真係好麻煩，咁但係我老公都發掘到，我啲好嘅方面......
東方昇：（難以置信）有咩？
Kneta：有！梗係有啦！
東方昇：講嚟聽下！有嘅有嘅......
Kneta：越奄尖嘅人，其實係越鍾意有planning㗎嘛，因為佢覺得呢啲嘢唔ok嘅時候，佢就會搵方法。
東方昇：追求完美。
Kneta：係啦，咁你接受到佢嘅時候，咁咪冇問題囉我覺得。
叻叻：嗯，都係嘅，即係呢好似嗌交係一定好正常囉，其實我都會嬲到，真係好想同男朋友分手囉，跟住就覺得唉，點解佢咁多缺點㗎？脾氣又差或者又惡死噉樣，但係調返轉頭諗呢，即係我係一個，就係鍾意俾人保護嘅女仔囉，所以有陣時佢就係夠惡呢，起碼我覺得有種出到去都唔使俾人蝦嗰種感覺。（性格強勢反而有安全感）
東方昇：即係如果你淨係focus佢嘅壞處，你變咗好似輸打贏要咁樣，好處你又唔攞出嚟講，唔識欣賞，淨係睇住佢嗰啲唔好處，喺度不斷攞嚟講，其實對個關係都唔好嘅。（切忌雞蛋挑骨頭）咁希望大家都要留意吓，多啲欣賞對方嘅好處多啲。好，下個禮拜再見。
眾人：拜拜......