返工之匪夷所思Part 2🧳買咩搞到新填地街響朶？😲老闆請食飯仲貴過自己食🥲邊度開工可以隊啤酒？🍻

鄭中基：實體版，NFT。Normal Folk T（笑）講完呢啲之後就有啲緊要野要講。好，大家記得要CLS同埋禁哩叮叮鐘。如果未加入自機友既就快啲加入自機友啦。好啦，唔阻大家太多時間，返工之匪夷所思Part 2嚟啦。

Jack Son：「Wee~~ 真人真事：當年有份工係日本公司嚟，咁我新入職第一次開會，有Sales Team 阿姊就話：「好，開始會議等我哋高呼一次先。」心諗係咪要講日文也咩嗲啲friend呢，咁我細細聲問我隔離，『咦喂，要嗌咩架？』」

鄭中基：佢話，咩嗌咩啊。佢話高呼啊嘛，嗌咩口號先得㗎。

眾人：（笑聲）

Jack Son：「佢忍笑扁晒咀同我講「屌你，Go Through呀！」我趴撚咗喺枱度扮咳咗10秒先停到」

鄭中基：（笑聲）

湘姐：好彩佢唔係即刻嗌出嚟。

鄭中基：好嘢！阿姐好嘢！

Kelvin Poon：「wee… 以前係TVB做你個節目美女廚房2，果陣有冰皮月餅贊助。我記得就好似係同啲嘉賓用月餅玩遊戲咁。咁玩完遊戲，推返啲月餅入後台啦，過左一陣我再望下啲月餅點解有個牙齒印係到，再得知返黎係原來有個同事以為啲月餅係真既，佢咬左一啖發覺係發泡膠黎，就放返係原位啦。」

鄭中基：個陣時公司同事都有試過去食buffet，姐係唔只一個同事，兩個分別唔同既同事。佢地去食buffet就攞左個麵包返嚟，好L大個。點解會有咁L大個麵包，佢又唔L切開架喎個麵包。成舊攞返咁樣，我地個個都係攞一片片。佢攞返嚟一切落去「古痴」一聲既，（字幕：未知物體踫撞聲）跟住我望過去。做乜L嘢呀你。佢話係囉，（叫左個侍應過嚟）佢話伙計，你個麵包點樣食呀，你睇下硬到咁。伙計話先生呢個Display嚟咗，唔食得㗎。

眾人：（笑聲）

鄭中基：咁另外一個同事就係日本啦，又係食buffet啦，筆完啲野返嚟，跟住我見佢一羹放入口「卡啦」一聲（字幕：牙齒斷裂聲）。姐係佢嗌出嚟添呀。（字幕：腦神經斷開）呀！咁樣嗌。呀！！跟住我問佢，做咩事呀。嘩，個啲豆好L硬呀。跟住我咪，喂個啲係墊底個啲石春嚟㗎。

眾人：（笑聲）

鄭中基：係分別唔同同事嚟㗎呢兩個，仲要係呢兩個同事係係佢地自己個部門最高級個個。（笑聲）

W’N Lai：「放工果時係公司部影印機旁邊發現左底褲……問晒d同事都話唔係自己既。到依家離職左咁多年都仲未揾到主人」

鄭中基：吓，一路擺係度呀。

W’N Lai：「究竟咩事要搞到除底褲放係到又唔著番呢？真係一個迷。」

（投稿者提供圖片）

湘姐：但佢似係女仔底褲囉，有蕾絲。

鄭中基：咁大條架咩女仔底褲。

湘姐：佢好似唔係蕾絲，係心形嚟架嘛？

鄭中基：真係唔知啦，要問下兩位 buffet 同事。

Howard Tsui：「Wee… 幾年前係落大雨果時... 地盤咁岩就有水氹... 我果時新入行，明明附近係平地... 點知原來有個好深的窿俾個水氹填滿晒... 我一腳踏落去... 即刻好似去左潛水咁，浸到上心口... 全身濕晒...」

鄭中基：哇！呢啲好危險，其實好危險架，入面你都唔知有啲咩。

湘姐：你有無睇過好多年前有個個踩單車，屌濕撚晒個個呀。

眾人：（笑聲）

（播片，字幕：童年回憶—海底奇兵；畫面中有一個少年係水浸既地方踩單車）
踩單車既少年：哇，呢度影最好，海底奇兵。
（少年連人中帶車中左落水氹，）
踩單車既少年：嘩屌！
旁觀：嘩！
踩單車既少年：嘩屌你老味。救我。
（有其他人拉返佢上去）
踩單車既少年：哎屌濕撚曬，哎唔撚驚。

鄭中基：呢個我自己都試過一次。（字幕：請出招）我仲要係特登飛落去添。讀書個陣時大家係度玩，又係落雨見到水氹就飛埋去、「踫」跳落去就咇曬啲水出嚟。咁我就見到一個水氹（笑聲），我就懶醒啦，一野飛埋去就係好似佢咁囉。但我就無咁深，我插到膝頭哥啫。

湘姐：係咪都會扭親架？

鄭中基：咪仆親囉，因為你無預到個個位呀嘛，成個人「嘩」（示範跌親咁向前撞）咁樣囉。

湘姐：嘩，你痴線架…

鄭中基：成身校服濕曬，所以無返學啦個日。（笑聲）

湘姐：地盤呢最怪係你係任何地方都會見到屎囉。

鄭中基：我就自己諗因為啲地盤夜晚黑呢就無人係到佢地成日養啲狗呢就係到趕下人或者啫係有啲狗（？），咁呢所以就會有好多屎係到囉。呢個就我估架啫。

湘姐：不過我相信依家大家都識分人屎同狗屎架啦。

鄭中基：係，經過Johnny Depp呢個case 之後大家都知道人屎同狗屎架啦。（笑聲）

Ryan Lee：「話說以前有一份工係做商業機器貨款，有一個新移民叔叔就入紙申請要買一架吊雞車，職責上我哋要問清楚個客既業務範圍，起初佢淨係同我哋講佢係運建築材料既，咁樣喺我哋公司既制度裏面係唔夠仔細既。但係個客唔知點解問極都唔肯講佢到底係運乜嘢，搞咗好耐個客先肯講，講之前仲要專登提醒我，嗱我唔係鬧你呀細佬，原來佢架吊雞車專門攞嚟吊鋁模，係一個鋁製既模具用作運到工地現場灌石屎，造成一啲組件，但係配合阿叔純正既廣東話，就變左屌老母，當時我用純正既廣東話重複左一次，旁邊啲同事已經笑到仆街……我好專業咁完成成個流程，收線既時候到我笑到仆街。」

鄭中基：我想知道佢係幾點鐘，個客係幾點鐘打嚟既。晨早比人地屌老母。（笑）我即刻要放飯～

Maise Yem：「Wee~ 之前番一間連鎖西餐廳，要著馬甲老西既，懶高級咁，啲客就出晒名西同on9。我負責水吧個位同埋要”北”雪糕。話說有個客，大約係三十幾歲既女人。要買雪糕，由於係不設試食，佢問我：想問開心果係咩味？我當時嚇一跳，然後得啖笑。我好認真咁同佢講：小姐，我唔識形容。然後佢再問我：想問雲呢拿，朱古力，芒果同開心果，邊一隻味最似薄荷味？我直接答佢：err 小姐冇一隻味似。心諗：大佬，你係咪玩9我。」

鄭中基：似玩緊好緊要個啲問答比賽個啲問題嚟既，一百萬獎金，呢條一百萬獎金（畫面扮百萬富翁）雲呢拿，朱古力，芒果同開心果，邊一隻味係最似薄荷呀？請作客。我我我…要打電話問friend…（笑）用曬所有錦囊都無人知。

Suey TY：「Wee~~ 請咗個fresh grad 既新同事，第一日返工佢問我係邊度可以攞多幾張白紙，我指咗一下部影印機，點知... 轉頭見到佢影印緊張白紙......」

湘姐：佢可以同頭先個個（上集）做friend。

鄭中基：係呀，佢地兩個玩L死部影印機囉。

湘姐：部機心諗，你放過我啦…（字幕：Let Me Go）

WaiWai Yeung：「以前返過份工個老細平時好撚孤寒，有日突然話大家做得辛苦請食飯。雖然個個都唔想去，但佢又好有誠意咁叫就照去啦。點知去到埋單比錢果陣，佢係到狂篤計數機。」

鄭中基：使唔使Sin Cos個啲呀？

眾人：（笑聲）

WaiWai Yeung：「原來佢話請食飯真係淨係請食白飯，」

鄭中基：（笑）唔係呀嘛！？

WaiWai Yeung：「叫餸唔該大家夾返份。仲要𥄫住邊個食過邊樣，例如ABC食過咕嚕肉就要除返3份，ABCD食過魚香茄子就除返4份。」

鄭中基：哇！！！

湘姐：佢餐飯咪好L忙。

鄭中基：所以佢咩都無食過囉，佢自己唔洗比錢囉，淨係食白飯。即係佢聞就得架啦。咁我覺得你地應該全部公司同事請老細食飯，就唔洗set位比佢既，你聞就得架啦，唔洗錢既。

Paul Wai：「Wee!!! 話説早前有個同事想同經理申請放假，個同事就同經理講話想放三日假，之後經理就問佢邊三日，同事再講三日假，經理再問佢邊三日，於是佢地來來回回搓咗幾板都係圍繞住三日假，同邊三日，之後同事突破語言界限講左個英文字Bird呼Day (Birthday)，之後我地成班同事爭D忍唔住笑左出嚟，原來係要放生日假，唔係三日假！」

湘姐：哇OK喎呢個，三日假。

CoCo Lee：「Wee，話說我係做物業管理既工作，想當年負責既物業需要管理既公眾地方唔大，得個電梯大堂100呎左右同20級唔夠既樓梯，果老闆落現場視察完，話「小心地滑」牌唔夠，同埋點確保唔會俾人偷，叫我去大手購入，前前後後買左2、3次，買到新填地街果姐姐一見到我就大叫，「地滑」牌果個阿妹又嚟...仲問我做野個地方好大架？乜你做野果度好「線」架？屌……講真地滑牌邊有人偷架。最匪夷所思係佢叫我逢星期一、三、五，去影啲地滑牌，確保佢地安全。自此，我身邊既朋友一見到呢個牌就諗起我，呢件事亦成為職場上既污點。最重要，我係新填地街有朵。」

湘姐：好威啊，地滑妹。

鄭中基：係囉，呀地滑妹。哇，佢個名有好撚多個i 喎。

Fiiiian：「以前返餐廳水吧，教完個新人就比佢試下自己黎。有個客人叫左杯凍檸咻走冰話好耐都未到，我就上去水吧跟一跟。點知佢話：係呀，杯茶係度，但d冰仲未融曬喎，咁點算好？」

鄭中基：佢係有跟足你既指示做既，凍檸茶就係要有冰，咁呀無冰咪等佢溶囉。你食完餐飯就有架啦。

Jacky Tsui：「wee~ 十幾歲果陣做飲食廚房parttime，做cleaning 果陣有個鄉音姨姨好大聲咁問我，喂~打左個飛機未啊，」

湘姐：好忙呀。

Jacky Tsui：「我就吓左出黎，咁佢就再重覆一次，我話乜野打飛機啊？佢就指住個咖啡機講：你洗（射）左個咖啡（飛）機未啊？之後全場同事就笑到癲，事件流傳到而家我返去探朋友都講起。」

鄭中基：洗左個咖啡機未啫係。

Fiona Lau：「Wee~ 我前男朋友之前係做廚房既。有一日餐廳未開門，個個都係廚房準備緊食材，無啦啦有個廚房佬對住洗碗姐姐大嗌：「呀姐！你個西漏水呀！」，全部人即刻望住呀姐，而呀姐亦都好尷尬咁呆咗。然後個廚房佬再講：「你拎住裝菜個個篩係咁漏水，成個地下濕晒啦！」，所有人即刻爆笑，仲以為廚房佬無啦啦講啲咁黐線既野。」

鄭中基：噢，姐係個個…個個篩。哦…佢話佢個篩漏水呢我就諗起以前拍戲啦。咁呢話說我就拍心想事成個陣時呢，我就好想就拍一場戲就係戶外，有個營火，咁跟住有個個啲camping 個啲camp呢就兩個人講心事咁樣既，拍一場咁既戲。咁我地就生左個火係出面，話說我地有個茶水姐姐佢叫做Pauline，咁佢行到好埋。跟住突然間有個場務就一手係佢後面抽佢上去。喂！唔好行咁埋呀！Pauline姐姐就問咩事呀。你隻鮑魚熟架啦！

眾人：（笑聲）

鄭中基：跟住我就罰左個個場務個晚就要係到看景。

唔好開名：「Wee~ 話說，我就係返老人院既，我地有一個清潔姐姐好鍾意返工飲汽水。」

鄭中基：即係一路揸住汽水啜啜，一路抹野，好可愛喎。

唔好開名：「有一日佢拎住一罐綠色包裝既有汽飲品，開頭我地以為係忌廉/ 七喜/ 雪碧。之後我地個護士見到，好大聲講左句「啤酒黎既」。然後個清潔姐姐問返我地轉頭，話返工唔可以飲啤酒架咩？呢件事之後我地匯報左比主管聽，主管就約左佢去傾計，主管就問佢乜你唔知道返工唔可以飲啤酒咩。呢件事之後我匯報左比主管聽，主管就約左佢去傾計。」

湘姐：我以為約左佢去飲野。

唔好開名：「主管就問佢，乜你唔知道返工唔可以飲啤酒架咩？佢就答返主管「我以前返酒樓既時候都有飲啤酒，我唔知道返工唔可以飲啤酒」ps：個清潔姐姐已經冇做。」

鄭中基：哦～原來返酒樓可以飲啤酒既…

旁白：我要揾Part-Time。我記得最震撼係之前見到有個𡃁妹戴住口罩，跟住隻手揸住罐獅威。

鄭中基：吓！

湘姐：哇～正喎。

旁白：我揾返張圖比你地。

（相入面係一個著住校服既女仔右手拎住媽咪麵，左手拎住罐啤酒）

鄭中基：哇係喎，個罐野好似好凍。

旁白：佢仲要送媽咪麵添架。

湘姐：係喎，但佢乖豬樣嚟架喎。

鄭中基：但係都未去到我個陣時個個程度。我係上堂同啲同學一齊飲，（字幕：學生典範）係個先生已經知道我地係唔上堂個啲學生嚟既。佢就話你地呢啲，唔上堂個啲呢同我坐去個邊，上堂個啲就係呢到。好配合，我地就坐曬係個邊飲大啤，玩番攤。

湘姐：仲要係大支個啲大啤呀。

鄭中基：大支個啲，跟住玩番攤，跟住就係個邊飲醉酒，唔夠鈕喎玩番攤個陣時就去啲乖同學度扯爛佢啲衫。「啪」（字幕：乖同學的哭泣聲）跟住攞左啲鈕之後就繼續玩番攤。

湘姐：多謝你既分享，但係唔建議。

鄭中基：係呀，唔建議。今集最匪夷所思係個個老細請食飯，個個真係好匪夷所思，係睇住曬邊個人有食，哦你無食咁就三人鉺啦，有食就四人分。同埋我好鍾意個個清潔姐姐囉，咩唔可以飲啤酒架咩。（笑）同埋高呼個個都幾好笑呀。好啦，開會之前我地高呼一下先。Wuhoo~Wow~Wee~（笑）

湘姐：好彩我地唔洗啫。

（字幕：出事了）

眾人：（笑聲）

鄭中基：我地朝朝早都要上去唱SAS。（笑）

鄭中基：好啦，如果大家鍾意我地既片既話記得CLS同埋禁哩叮叮鐘。記住，記住要參加我地自機友呀。好，我地下次見。拜拜～

（字幕：今集完結了，下次見！留言俾我地啦 Please！）