勁騎26 EP6－浪浪送行者

（勁騎26 Logo出現）

Alton走上樓梯，拍門。一名頭髮allback、穿著黑色吊帶背心（背面印有「浪浪送行者」字眼）、滿身紋身、戴眼鏡嘅30出頭肌肉男開門。
Alton：Hello，你好，我係搵阿峰同Sammi㗎。
紋身男：係，我係阿峰。
Alton（伸出左手）：你好，你好，你好，我是Alton。
阿峰（雙手回握）：你好，你好，你好.... 你知唔知道今日嚟做咩㗎？
Alton （繼續hand shaking）： 咁聽講係同啲動物嘅義工有關嘅
阿峰（繼續hand shaking）： 絕對正確嘅。

（阿峰，浪浪送行者義工坐係度獨白）
阿峰（斯文）：浪浪送行者主要呢係會去（公）路上面接收往生毛孩啦。咁姑勿論佢係被車死啦、毒死、被狗咬（死），咁我哋都會去出動嘅。咁我哋接收咗返嚟，就會將所有浪浪group埋一齊做個集體火化，等佢哋唔會一個人走咁孤單。啲流浪動物生前經已沒有人愛㗎啦，咁佢哋死後呢就（我們）不想佢哋走得咁孤單。

Alton（企係門口，繼續hand shaking）：有冇興趣坐低了解下？
阿峰（繼續hand shaking）：冇 （Alton想縮手）唔係，講吓啫，（我）有啲興趣。（Alton笑，阿峰拖著Alton手入屋）麻煩你坐一坐，我有啲嘢俾你做一做先。
Alton：好…（被阿峰拖至梳化坐下。梳化有Sammi（啡色長髮，穿著針織上衣嘅30出頭女士）同一Aiden（穿著黑衫（印有「浪浪送行者」字眼）、戴眼鏡嘅男小學生），Sammi笑出聲）

（阿峰同Alton仍然繼續shake hands）
阿峰：我今次歡迎你加入我哋嘅義工隊。
Alton：係。
阿峰：咁其實呢個moment，我哋呢個時間呢，我哋係度等緊個求助嘅call嘅
Alton：啱啱我係樓梯下面知道咗今天呢個topic之後呢，我係「吓？電單車係點樣同呢樣嘢，呢樣嘢點樣可以拉上關係？
阿峰（肯定語氣）：絕對拉得上關係！
Alton：係。
阿峰：即係，我哋電單車主要都會喺係highway啦或者行啲鬼祟嘅路。就算塞車，我哋可以快啲去到現場。
Alton：Umm （思考中）
阿峰：我哋義工隊八成都係電單車嘅，私家車嘅都有。如果係大型嘅狗隻嘅話呢，多數都用私家車㗎啦。
Alton（停止握手）：其實啱啱係呢個傾偈嘅過程呢，你都會mon住個電話（阿峰點頭）咁其實係你哋點樣去運作呢一件事？
Sammi：我哋依家個義工群呢大概有105位送行者啦，主要有3個主要嘅義工24小時收call嘅，咁其實一位就是阿峰啦，咁另一位就係新界大西北嘅，咁另外一位就係九龍區，咁九龍區（個位）就in charge埋香港島個邊。譬如佢依家接咗call，我哋就有個收call嘅群（組）/求助group，就會係裡面打「浪浪係貓定狗、個地點係邊度...
Alton：一啲基本資訊咁呀？
Sammi：係啦，咁就跟住我哋就會tag返個區嘅義工。
Alton（伸手向著小男孩）：八歲嘅Aiden，佢係咪都可以參加呢個義工活動㗎呢？
Sammi：er，可以呀，他就是其中一位比較年輕嘅義工。

（Aiden獨自接受訪問，背景有Alton、Sammi同阿峰）
Aiden：我叫Aiden，今年八歲。我做咗浪浪送行者一年。我支持爸爸媽媽（阿峰同Sammi）做呢樣嘢，因為佢哋執流浪狗個啲（遺體）都是有心的。（Aiden同Sammi笑到倒地）

（快鏡：「候命中：22:36 —〉23:09 —〉23:42 —〉00:00」 ）
Alton：（望向鏡頭）依家已經係12點01分，經歷咗90分鐘嘅等待啦。（望向Sammi）今晚會唔會出動呀？
阿峰：差唔多㗎喇。
Sammi：當我們想瞓覺個陣時，通常就電話響㗎啦。
阿峰：咁我哋去瞓覺先。

男幕後工作人員：有冇咩tips俾佢呀？
Sammi：我好相信佢一陣間去到現場嘅時候...
阿峰：就不係呢種心態
Sammi：佢就不會驚呀啦。我們有一位義工嗰個er..另一半，佢都係話唔執（遺體）㗎開頭...
阿峰：佢話好驚、好驚、好驚
Sammi：好驚呀，但去到現場有一刻見到啲狗B呢，係附近望著我哋嗰個送行者執個隻浪浪，咁變咗佢......（阿峰聽電話）

阿峰：啱啱有miss call喎。
Sammi：（望向阿峰）你打返（電話）（望向製作組）有call，可能係（有人求助）...
阿峰：可能係

阿峰：喂？係 （電話開擴音）
電話女聲：我上網睇到你Facebook，想請教吓你，因為呢（我）見到隻貓貓走咗啦。
阿峰：係
電話女聲：咁佢已經全身僵硬，凍冰冰
阿峰：係邊度？
電話女聲：係元朗大棠
阿峰：okay
Sammi（細聲）：可唔可以send個location過嚟？
阿峰：你介唔介意WhatsApp send個location俾我？
Sammi （望向製作組）：有call （求助電話）
電話女聲：可以，我即刻send俾你呀！
阿峰：好，唔該，唔該，唔該，唔該
Sammi：好

Alton（起身，攞起一個浪浪送行者嘅布袋）：okay，執嘢先。
（所有人起身執嘢走）
Alton：okay，次序係手套...
Sammi：阿峰，係影印機下面攞疊單（據）俾我呀。
Alton：俾多個我（往生蓮花）。
Sammi：俾埋呢個（往生蓮花）你。
Alton：呢三個嘢都放係佢嘅身上先，跟著就包起佢，包起佢之後呢，就用膠袋裝住佢。
（鏡頭前所有人執緊嘢）

Sammi：Alton，你睇唔睇隻貓係點樣樣？
Alton：好呀
Sammi：可能有剪耳，如果有剪耳朵嘅話…睇吓先（放大手機照片）牠有剪到耳仔嘅，咁我到時候就可能要你用這個...
Alton：okay呀
Sammi：呢個就係晶片機　
Alton：好（攬起浪浪送行者布袋）

男幕後工作人員：Alton，依家感覺如何？
Alton：要了解多啲嘢，啫，行動上就可能係「我見到佢（遺體）就執起佢囉」但係，啫你想賦予佢 意義嘅話，其實你係，你係要知道自己為咩做呢樣嘢呀。

男幕後工作人員：好，出發！
Alton：出發啦。（行行下回頭）我唔會（再）見Aiden㗎啦喎？
男幕後工作人員：係呀。
Alton：Aiden，bye bye。（門外揮手道別）
Aiden：Bye bye （坐梳化揮手道別）
Alton：你記唔記得我叫咩名呀？
Aiden：唔記得。
Alton：由得佢啦咁。（笑）

（Alton係電單車隔離戴頭盔，坐上鐵騎駛離村屋。電單車駛上高速公路畫面）

（到達時間：00:30
往生浪浪：貓
地址：元朗大棠）
阿峰（從電單車落地）：求助人俾嘅位置大概係呢度啦
Alton：okay
阿峰：係啦，咁我哋都要搵一搵先嘅（戴上藍色即棄手套）咁啱啱求助人話嗰隻貓貓係完整嘅，（身體）僵硬咗啦，唔排除係（被）車撞啦，咁一定係未（腐）爛晒㗎啦。
Alton：（行行下停低）係咪嗰個呀？（指向某點）
阿峰：似係呢度，似係呢個位置。
（影頭Zoom近貓貓遺體，係一隻三花成貓，橫瞓係度）
阿峰：介唔介意講吓有咩感覺？
Alton：望到（手足無措，周身摸）......好奇怪
阿峰：邊方面奇怪？奇怪的感覺
Alton：......咁我哋嚟執行...啲...我哋嚟做嘢（處理遺體）㗎嘛。
阿峰：記唔記得啲步驟先？（Alton搜布袋）毛巾呢？

（係地下鋪好毛巾）
阿峰：唔使驚，嚟呀（二人合力抱起貓貓）嚟啦，嚟 （將貓貓放上毛巾）okay，好。咁佢表面上好似好乾淨啦，但仲有啲污糟嘅，用濕紙巾幫佢抹一抹。
（Alton抽出濕紙巾）
阿峰（清潔貓貓塊面）：幫佢抹下塊臉啦。我將佢調一調（翻身）先，因為佢另一邊瞓係沙地個度，另一邊比較污糟少少......
Alton（強忍淚水）：okay
阿峰（繼續清潔貓貓中）：呢啲位置......沒事啦，佢唔咬人㗎，瞓咗覺㗎咋。.......（貓貓）剪咗耳仔，有機會有晶片。

（檢查晶片）
阿峰（遞晶片機俾Alton）： 嚟，㩒實呢個掣。
Alton：係 （接過晶片機）
阿峰：係（晶片機發出聲響）即係有個number
Alton：係…
（阿峰用手機check緊晶片資料，Alton繼續清潔貓貓）
Alton：佢其實冇乜表面傷痕。
阿峰：疑似被毒死，佢又唔似被狗咬，因為被狗咬嘅話會有口水漬，同埋會有個狗咬嘅窿係度嘅。
Alton：毒死呀？
阿峰：有機會被毒死...
Alton：可能佢食咗啲......
阿峰：老鼠藥，或者可能係有啲黑心嘅人啦，將啲貓糧撈埋啲毒藥都有嘅。一係貓糧撈毒藥，一係貓糧撈呢個...漂白水。可能要噴多少少，因為我見到有蝨。

（阿峰包起遺體，Alton放上往生蓮花）
阿峰：我諗佢死咗都有一日度。
Alton：一日呀？
（Alton打開膠袋）
阿峰：垂低，垂低（膠袋入口），係啦。（阿峰抱貓貓連布放入膠袋，束好）我哋儘量都唔會放落地下度嘅，依家用啲索帶索一浸先（阿峰抱著貓貓，Alton上黑色索帶）
阿峰：（手點向貓貓頭部）個頭係呢度，（大悲咒）癡落個頭度
Alton：一張？
阿峰：一張夠啦。
（阿峰雙手遞貓貓俾Alton，Alton雙手接過）
阿峰：好好拎著佢，呢個頭，呢個身。
Alton：好啦，貓貓安息啦。我哋已經儘量將呢段路嘅尾段做得好啲㗎啦，希望你開心。

（貓貓改名：豬柳強
估計死因：中毒
接收義工：Alton）
（Alton抱著貓貓，同阿峰走回電單車）
阿峰：係咪比你預期嘅感受，同實質嘅感受好唔同呀？
Alton：本身這樣工作，我叫佢做「工作」啦，係理性嘅。但當你…（深呼吸一口氣，清一清喉嚨）啫係你見到佢嘅身體之後，完全係感性主導。

（第一節浪浪送行者完，去廣告）

（01:47）
電話女聲A：Hello，浪浪送行者
電話女聲B：喂？
電話女聲A：Hello？
電話女聲B：我哋係八鄉古廟個度有隻狗呀，er，我屋企個啲普通光管仔呢唔夠光呀，咁我就睇唔到佢係邊個位（置），但係呢佢喺一個斜坡下面。
電話女聲A：我照去咗嗰個地點睇一睇先啦。

（到達時間：02:03
往生浪浪：狗
地址：元朗八鄉古廟斜坡下）

（Alton同阿峰停車，落電單車，除頭盔）
Alton：戴返口罩先。
阿峰（紮辮中）：好

（阿峰用電筒照向斜坡）
阿峰：好似唔係好夠光㖭。
男幕後工作人員：Alton（遞上電筒)
Alton（雙手接過）：Thank you
（Alton用電筒照向斜坡）
Alton：哇！吓？冇...吓？
男幕後工作人員：咩話？
Alton（驚訝）：唔啦，唔係呀？面目全非喎。
阿峰（冷靜）：咁應該浸咗好幾日囉。我戴返副眼鏡望吓先。
Alton：你再照照，我睇唔到。
（二人蹲下來繼續照）
Alton：豬，豬嚟㗎？
阿峰（企起身）：我哋冇得游繩，我哋搵下條路落去，睇下有冇先，河實有路下去。（轉身走）
Alton（搖搖頭）：搵路先。

（現場環境惡劣令工作人員擔心）
女幕後工作人員：阿峰你可能要幫我同Alton講聲話「佢唔可以落去」。
阿峰：係。
女幕後工作人員：因為要多經驗先得。
阿峰：Um，好呀。

Alton：呢度睇得清楚啲喎。
男幕後工作人員：小心啲呀！
Alton：得。
男幕後工作人員：呢度唔好踩落去，（石）灰嚟㗎咋。
Alton：佢已經係脹到，你同我講佢係野豬，我都信喎。

（Alton返去阿峰隔離）
Alton：我啱啱企喺個度睇呀...
阿峰：點呀，點呀，點呀，點呀...?
Alton：好核突，睇得好清楚。
阿峰：okay，咁陣間搬咗佢上嚟之後，可以望得更加清楚嘅，那不過呢個步驟等我嚟搞掂得，因為你經驗尚淺。咁umm，我預備落去先。
Alton：係。

（阿峰將所有用具收係身上，方便落斜坡）
阿峰：上唔返嚟喎，呢度。
Alton：小心呀！
（阿峰落斜中，Alton一路望住）
男幕後工作人員：我想問你，你想唔想落去呀？
Alton（回望工作人員）：其實我都落到去嘅。
男幕後工作人員：咁Alton，Alton，Alton...
Alton：係。
男幕後工作人員：量力而為呀。
Alton：係，好呀。
男幕後工作人員：記住呀。
（Alton慢慢落斜）
男幕後工作人員：小心呀，小心呀，個度（啲泥）軟㗎。

（事後訪問）Alton：其實阿峰本身係唔需要我落去嘅，但係我自己覺得佢二話不說咁落去嘅時候，我都要二話不說咁落去。

（現場）
Alton：Level 10 嚟㗎喎。
男幕後工作人員：一喺不做，一喺做Level 10。
Alton：係好hardcore（困難重重）。
男幕後工作人員：戰鬥，戰鬥...
Alton：因為聽佢哋講係真係有蟲。對我嚟講，係好大嘅挑戰。

阿峰：請問有冇手套呀唔該？
Alton：好，手套嚟緊，準備咗啦。
Alton （行進中）：我搵石頭....著錯鞋啦今次
Alton：手套（遞向阿峰）
（阿峰帶著膠袋，走向狗狗）
男幕後工作人員：加油呀，英雄。佢哋叫咩名？
Alton（望向鏡頭）：浪浪送行者。

Alton：佢冇就咁拎起具屍體，反而係用成個膠袋兜起佢先。我諗佢係擔心如果就咁拉（扯）佢嘅話，我諗拉邊個關節佢都會爛。個問題係既然我哋做得呢件事，就係想佢最後呢一程可以安好。可能你會話爛都避唔到㗎啦，但係盡量避囉。
（求助人一直見證拯救過程）
Alton：唔好忘記咗本身我哋點解做呢件事。

阿峰：（拎著狗狗行緊鏡頭）好臭呀。
Alton：好，好臭。阿峰，我哋可以點樣backup到你？
阿峰：要幫一幫忙。
Alton：（行近阿峰）好。
阿峰：你o唔okay？
Alton：okay
阿峰：（氣味）好強烈㗎喎。
Alton：我聞到啦，feel到啦。
男幕後工作人員：好勁
Alton：好。Rain P（望向幕後工作人員，接過膠袋）
阿峰：我想再笠多重膠袋，因為我哋唔笠多重呢，我哋好難搬上去
Alton：知道。（打開膠袋，阿峰將狗狗放入膠袋）
阿峰：曱甴嚟啫，唔使驚。Hold住，得，放放放放，放地下先。嗰邊乾唔乾淨？
Alton：放晒。
（阿峰上黑色索帶）
男幕後工作人員：我諗Alton上咗去先，阿峰再遞上去。
（Alton自行行上坡）
Alton：可以。
（阿峰連狗狗一齊行上坡，Alton幫手扯起其他上坡嘅工作人員）

阿峰：好重er (放低狗狗係地面)
Alton：我放低晒先啦，我唔理啦 （扯開手套）
Alton（望向阿峰）：You okay？
阿峰：有啲攰（坐係椅上）
Alton：你啱啱話呢個係年度最哽呀嘛。
阿峰：係囉，本年度2022年最哽嘅一次。因為呢隻（狗狗）半邊身浸咗落水起碼四至五天度，發脹晒同埋有（蛆）蟲。最麻煩係佢係冇路行落去個水塘，保守估計嗰條坑渠嚟嘅。
Alton：依家係夜晚兩點半，45分鐘之前，我都仲係情感係隻貓貓度，但係依家見到呢一隻（狗狗）係超級弱點攻擊：極污糟、極濕、極臭，但我自己會諗before that佢係一個生命嚟嘅。
阿峰：Um，啱呀。
Alton：所以你一諗到呢一樣嘢，其實冇人辛苦得過佢囉，亦都係令我哋去做呢樣嘢嘅動力。

（狗狗姓名：沙皮
估計死因：原由古廟飼養，因生病自行走往下水道過世
接收義工：Alton）

（一空地上，阿峰將膠袋放係大毛巾上，Alton剪開索帶）
Alton：我已經開始適應到你嘅節奏。
阿峰：okay，good。
Alton（剪開膠袋）：憑信念，揸緊個信念。
Sammi：你當聞唔到就得㗎啦。你同自己講你幫緊佢就得㗎啦。
Alton（忍氣中）：我係咁同自己講緊㗎啦，講緊㗎啦。
阿峰：你同佢傾吓偈。（準備倒隻狗狗出嚟）得，hold住（膠袋），唔使，等我嚟。
Sammi：你退後，俾佢倒出嚟。
（遺體傳出難以承受嘅氣味，Alton退到牆邊）
Sammi：你可唔可以俾個漂白水我？
阿峰：落去邊度呀？
Alton：我可以唔睇、唔聽、唔feel，但我冇辦法唔聞呀嘛，你明唔明呀？......依家可以做啲咩？
Sammi：將呢桶水倒下去，即係好似同佢沖涼咁，但係要溫柔地倒。
Alton（忍氣倒漂白水中）：okay，（望著狗狗）我係嚟幫你㗎，我係嚟幫你㗎，我係嚟幫你㗎...咁可以嗎咁樣？
Sammi：依家等佢一陣，等佢乸下啲蟲先。
（Alton退到牆邊大啖透氣）

Alton：你哋兩個咁樣（反應）呢同我形成好強烈嘅對比呀。
Sammi（笑）：我哋聞慣咗嘛。
Alton：聞慣？
阿峰：我們有很大對比？
Sammi：係會慣㗎。這隻都唔算係最臭（Alton驚訝），曾經有一隻真係（會令人作）嘔㗎。......依家我哋要將佢翻轉先。
Alton：吓？（呆）
Sammi、阿峰：Um（點頭笑）
Sammi：一齊呀。（Alton嚇到dum晒腳）你可以嗎？（普通話）
阿峰：點呀？師公上咗嚟（附身）未呀？
Alton：okay，捉住邊度？
阿峰：手、蘿友...
Alton：捉住隻手...
阿峰：捉住個頭
Alton：跟著翻呢邊。
阿峰：係啦，預備好未？
Sammi：向自己個邊翻
阿峰：記住唔好扯佢喎，要𢭃住佢個蘿友，𢭃佢頸...
Sammi：小心呀。
阿峰、Sammi：如果唔係好易好易甩㗎
Alton（強忍呼吸）：我知道呀。
阿峰：你個馬紮好未？
Alton：等陣先。
阿峰：行埋啲呀，唔使驚喎。
Alton（哭腔）：我知道唔使驚。
Sammi：加油，你得㗎，憑信念。
阿峰：憑傲氣呀。
（Alton幫狗狗轉身）
Alton：我幫你㗎，我嚟幫你㗎…可以啦，翻過嚟，係咪？
阿峰：Um，係啦。
（Alton幫狗狗轉身後，即刻企係身）
Sammi：你要將佢推返去膠墊度。
（Alton深呼吸，再蹲低）

（阿峰用水喉仔細沖洗狗狗）
Alton：其實我唔係怕隻狗仔㗎本身，我係怕污糟呀嘛。隨著漂白水開始沖走啲味啦，佢身上嘅泥水開始（流）走啦，（我）開始見到隻狗嘅形狀，其實唔肉酸㗎，其實唔肉酸㗎…（望向Sammi）我，我開始明你係10分鐘前話慣個樣嘢。
Sammi：你已經唔覺得臭啦？

（阿峰同Alton合力包裹屍體）
阿峰：蓋住佢，冚住佢，舒服晒。走啦，沙皮。
Alton：沙皮，辛苦晒啦。
Sammi：大狗要放三個（往生蓮花）。（遞俾Alton放係沙皮身上）
Alton：我啱啱都同咗你哋講，就係俾著你係佢嘅時候，你都會想有人幫手。咁但係邊個就係嗰個人呢？到你真係做，做完之後就會發現係值得嘅。

（Alton填寫善終單據）
Alton：佢上面有一項寵物名稱，我們知道佢叫沙皮啦，係前面加個暱稱啦，叫做「Alton的朋友」啦。
（Alton將沙皮放入冷藏櫃）

（一星期後，Alton、Sammi、阿峰、Dicky齊聚動物靈堂）
Alton：3511，朱柳強；4099，辣椒仔； 5839，小麗； 5840，小可愛； 5841，小虎； 5843，牛牛；5844，小福（將一疊善終單據交俾Dicky）
Dicky：我係Dicky，我係寵物善終公司負責人。浪浪義工佢哋接收咗一啲遺體啦。佢哋嘅冷藏櫃差唔多滿嘅時候呢，佢哋就會通知我們。咁然之後我哋嘅程序就會係安排一個時間，咁然之後去將浪浪（們）進行一次火化。
（沙皮已交回八鄉古廟為佢善終）
（縱然生前無人寵愛，往生後也有人送行）
（Alton同Dicky為浪浪們進行儀式，Alton推浪浪到火葬爐）
Alton：呢一個幫忙就正式嚟到呢度，我覺得就係一種有始有終嘅愛囉，令到佢哋好有尊嚴咁樣離開。唔係淨係幫到佢哋，係幫到我自己㖭。我學到唔好睇少自己嘅力量啦，只要你做到一分力，然後會影響到其他人再做多一分，其實個份力量可以好大。
Dicky（關上火爐門）：好啦，咁就可以㩒呢個掣準備開始火化㗎啦。
Alton：浪浪就，上彩虹橋開開心心啦。（㩒掣）

完