#MM｜貪靚女棄奢華生活變海洋拾荒者 西貢划獨木舟出海執垃圾逾400次 愛海少女為淨灘綑邊、攀岩、DIY繩索裝置懸崖底運海洋垃圾 搞海廢展推海洋保育｜#700萬種生活 #4K

「咁我哋去咗羊洲，今日去個原因呢係因為啲樹冧咗，咁之前入咗去嘅發泡膠我哋可以拎返出黎。有能力嘅就再去枕頭洲嗰度清上次未清完嗰個鬼網，大部份，仲有四份三。」「你兩個識唔識划架？你話你自已識划架喎，雙人艇畀你」

2010年呢開始搬入黎西貢，咁我個初心其實就係想著bikini游水影下靚相、Po相呃like嘅啫，女人嘅初心嚟嘅啫。2017年6月第一次划艇，一個人見到好多網，嗰時我乜嘢裝備都冇呀。第一次係拉唔到因為好重，跟住但係啲水入返嚟，就同自己講，我用曬所有力再拉多一次，結果我真係將嗰個鬼網拉咗落自己嘅獨木舟度。咁我冇位坐㗎啦，坐返嗰邊緣嗰個位囉。全部都係啲網啊、石頭呀，結果有啲人呢見到我啦「hi好犀利呀你」ok喎過到關喎，原來可以做到啲嘢冇人鬧喎，唔係太差喎。Post咗上我個社交平台嗰度，咁有啲潛水朋友都睇到，佢話「我可以嚟幫手」之後其實從來冇停過。

枕頭洲啦、羊洲、牛尾洲、馬屎洲、赤洲。講咗係到今年已經四百次啦。(你嘅裝備係慢慢升級架？)係呀，都係緣份黎嘅，人哋咁啱有啲話唔要咁我買咗。(所以你先至用獨木舟啊？)獨木舟係因為冇錢啫，因為你獨木舟大，如果攞去掉好大件事，修補返用得返㗎嘛，修補返用返囉咁。

數十個袋，其實我地一個人三袋。(我發覺你地整裝待發，包到冚一冚喎，點解要包到咁嘅？)咁我哋個叢林因為講緊幾廿年冇人入過囉，所以就啲蚊好肚餓，咁我哋請佢食嘢咁樣囉，咬到成個禮拜重痕緊。我哋唔好亂咁執玻璃就得啦，呀入去喇。

有，呢度成日有曱甴㗎，啱啱發覺一揭起啲嘢就會好多曱甴好快咁樣行黎行去。係呀，我試過俾蟻群攻擊。我真係好唔鍾意見到啲膠袋同發泡膠喺個海度嘅感覺，發泡膠喺個林度係好大件事，因為當下次颱風黎，佢又會將佢帶返出黎個海度囉。植物如果你畀一啲垃圾纏住，如果就係一個簡單嘅膠袋纏住樹幹呢都會其實霉架，即係會爛，因為都抖唔到氣。啲發泡膠呢已經跟住啲樹根痴埋咗黎生，例如話好似呢度呢，其實你見到呢佢唔係壓住咗，而係因為啲樹呢太耐呢發泡膠喺度，佢連埋啲根生咗落去啦，佢已經part of棵樹，因為啲根起發泡膠入面。

依家其實世界各地都有啲叫做發泡膠帶，可能成個加拿大咁大。你聽完都覺得「真的嗎」咁，真係好驚囉。

(FION有咩未見過呀？)
「Condom見過、見過有針筒嘅針囉、係啊雪櫃個蓋啦、電視啦、滑水梯啦、三張三人梳化啦。有一次喺大澳我哋執完垃圾划走啦，魚排嘅人呢見到我哋隻艇上面有好多垃，咁佢哋同我講「喂！執垃圾呀？有袋垃圾你幫我拎走啊。你唔攞呀？我掉落海囉」我覺得佢都係靠呢個海生活架嘛，但係佢都可以講呢啲嘢出黎，有時會覺得好失望。」

每次出動執垃圾，唔止要唔怕攰、要唔怕污糟、唔驚畀蚊咬，仲要唔驚日曬雨淋呀。我哋執到一半就落咗一場大雷雨。有時啲雷暴嘅嘢好難搞，所以好辛苦呀我哋嘅活動，又要體力呀、又要膽識喇、又要技術啦、又要有Heart呢，又要俾蚊咬。

為咗安全起見，我哋最終都係要提早返返上岸。城市人覺得大海同自己好遙遠，但係對由市區搬入西貢嘅kitty嚟講，大海就係佢嘅comfort zone。喺佢嘅生活中迷惘、失去方向、唔想同任何人接觸的日子，大海就係佢嘅陪伴者。

「我喺市區嘅生活呢，屋企有生意，咁我都唔係一個為搵錢而生活奔波嘅人。我成日都係諗住扮靚，一日換三次衫嘅。到而家呢仲有幾多件未著過呀？或者有90年左右。咁嗰啲衫幾多錢唔講啦。最初我入嚟西貢我都係開party，一開就「呀？又係呢啲呀」跟住發覺我唔係想要呢啲，可能好物質嘅，可能好似我以前個我啦。當你奢華夠啦，你發覺原來不外如是」

「你哋去邊度呀？」「我哋去執垃圾」

「其實每個人都會有好想靜嘅，跟住都係想自己一個。你入咗個新地方又發覺咦好簡樸都好舒服喎」

「海係一個你可以去到好自然，可以畀你一個逃避一啲煩惱，經濟呀事業呀目標呀或者感情問題。眼睛可以睇水底所有嘢而唔理水面上嘅嘢。我每個禮拜至少去兩三次，基本上好鍾意一個人，划到出去唔使講嘢呀，我可以食下嘢呀曬太陽睇動物。就係咁囉，個人正常啲」

「咁到底我去個海度到底係咪享樂呢？定係咩呢？佢係我一個好重要嘅支持者啦，或者而家更加係有品牌嘅支持啦，要我一齊去帶隊啦。咁我就都覺得我會擺時間喺呢個位，點樣由品牌嗰邊開始減廢，或者令到佢哋多一點對大自然關注。呢個係動力之一，咁呢個係我依家做嘅嘢。」

(你依家mou喺度做緊咩呀？)

Mou喺度睇緊啲蟹，佢舉手一嚟就話畀你聽呢個係佢嘅地盤啦，今日你見到呢兩隻行得好埋你就會覺得佢可能疑似想打起上嚟。十二點鐘方向兩隻打緊！啊打完啦。睇佢哋打交都好搞笑。

為咗大海而去到盡嘅唔止kitty，仲有呢個影緊蟹仔，花名叫大便妹嘅女仔。十幾年前起，為咗大海同環境而改變自己，唔止日常生活走塑，減少流入海洋嘅垃圾，佢仲走咗去台灣嘅海洋大學讀書，畢業之後去埋菲律賓做鯨鯊研究。

「我因為對個海其實係非常之好奇，特別係海洋生物嘅生態習性，好奇心驅使我好想學多啲。當你真係覺得嗰啲海洋生物好得意嘅時候你就會想去保護，你就想佢有一個好嘅環境。」

(你人生最接近個海，最connect係幾時嘅事？)「最connect係我去菲律賓研究鯨鯊嘅時候，因為每一日都要落海，每一日都要浸海水，跟住呢係一路keep住咁樣過咗四個月。係每一日，因為我好鍾意鯨鯊，每日就係去個海度睇你最鍾意嘅嘢同埋喺度游，係最貼近個海同埋最幸福嘅時候，最貼近夢想嘅時候。」

返到香港睇唔慣海洋垃圾咁誇張，仲搵埋成班朋友去最險要嘅懸崖底淨灘。為咗令到個海乾淨返， 佢哋不惜攀岩、綑邊、甚至喺懸崖邊diy咗個25米長嘅繩索裝置嚟運垃圾添。「woooo好重嘅感覺呀」佢哋唔止執呀，仲幫助環保團體，將一年嚟執起嘅海洋垃圾，搞咗個海洋廢物嘅展覽，話畀人知佢哋見過咩垃圾。

「我哋淨灘淨係執啲好得意嘅垃圾，所以執執下我哋就忽發奇想，不如我哋搞一個海廢展呀？等大家都有機會睇到海邊嘅垃圾。呢個係好有歷史價值，呢一個玻璃嘅浮波，可能係四五十年前嘅漁業會用嘅浮波嚟。呢度有一批就係唔同年代嘅樽啦，可能有一啲已經係，40年前係玻璃樽呀。因為淨灘我哋有一次，其實喺同一個灘度有執咗520個火機，咁我哋就一次過將520個火機放曬入去同一個樽度，我哋都偏向其實呢一路可能用彩虹嘅一啲擺設去放我哋嘅垃圾。因為普遍大自然嘅顏色都係，可能海邊嘅都係比較沉色嗰啲，啡色呀，但好多時呢其實我哋人類嘅垃圾係會令到個沙灘變得非常之繽紛，我哋賦予咗佢好多顏色㗎。但係其實呢啲顏色未必係對環境有好處。即係(彩虹色)好有希望但其實都係一個悲慘嘅故事嚟㗎喺背後。」(嗰邊我見到好多...夠開玩具店嘅嘢)「嗰邊其實係特登將所有玩具都放曬落去嘅，可能最早係去到1985年，無論係個女仔玩嘅barbie公仔呀定還是係男仔玩嘅超人玩具，其實我哋都執到非常之大量。雖然我哋將啲垃圾擺得好靚，但係我係想大家知道，其實任何一樣我哋喺日常生活掉出嚟嘅垃圾，其實佢都有機會落入個海度。即係呢件事係我哋冇辦法撇清話，海邊嘅呢啲嘢完全同我哋冇關係。其實香港同個海係好近㗎，你只要去到其他國家，你就會覺得冇一個地方個海比香港更加正。」

「嘗試話俾好多香港人聽香港嘅海、香港嘅資源係非常之豐富嘅。我哋可以落水底去睇，嘗試可能分享多啲自己嘅相信嘅一啲價值同埋諗法，有時候好似一個小太陽咁樣樣，發放一啲小光芒小熱力。」

守護大海唔能夠單靠個人嘅力量，企業嘅參與同行動同樣重要。同海洋有著深厚連繫嘅護膚品牌La Mer，以深海巨藻研發出嘅miracle broth活膚精華作為所有產品嘅核心成份。正因為對保育海洋嘅承諾，La Mer堅持一年只會用人手採摘海藻兩次，確保巨藻可以可持續生長。La Mer為咗推動海洋保育嘅訊息，唔單止創辦La Mer Blue Heart海洋保育基金，亦希望透過種植紅樹同埋採用回收物料呢啲行動來回饋海洋。今年限量版嘅blue heart面霜就以海浪繪畫風格呈現海洋嘅傳奇力量，時刻提醒大家愛護我哋嘅大海。