真心話大冒險 ft.姜濤❤️原來我哋喺同母異父嘅兄弟😮？！即興扮演「熱情大叔」遇上「俏姑娘」😳

遊戲規則：每人都有各自嘅問題卡，兩位需要輪流從對方嘅問題卡中抽取問題並且要向對方提問，每條問題都可以選擇答或者唔答。如果唔答嘅話，就需要完成工作人員界嘅任務，用特定嘅語氣閱讀有關於預防HPV嘅訊息，完成之後先可以輪到下一位抽取問題，如此類推，直至所有問題抽晒為止。

鄭中基：你係客人，你抽先吖。
好，我抽先。問題：你最想挑戰乜嘢角色？
鄭中基：我最想挑戰嘅係做一個啞嘅殺手，又有型啦做殺手，噉啞嘅又唔使記對白啦。我諗大家覺得好似好懶噉，其實好有挑戰性。我答完喇，到你。
姜濤：好。

鄭中基：有機會同Ronald合作，最想做啲乜嘢？
姜濤：梗係想同你一齊拍戲啦hahaha，因為我真係好中意你啲戲。
鄭中基：多謝多謝。
姜濤：係囉，因為以前真係，我又唔想講由細睇到大……
鄭中基：噉應該又唔會由細睇到大嘅。
姜濤：但即係入行之前就真係好中意你啲戲，所以就好想同你一齊拍戲囉
鄭中基：我諗諗啦 (大家可以期待一下)，到你喇。

姜濤：到我喇，請問電影阿龍幾時上？
鄭中基：Err 呢個我唔係唔想答，但我真係答你唔到。好啦，噉我哋要抽喇。「用領導人嘅語氣」，哇好耶喎呢一個，幾啱喎。好，嚟喇。「超過140個國家/地區均推出計劃鼓勵適齡人士預防HPV，韓國、美國、英國、澳洲、加拿大。
姜濤：啱喇，到我。
鄭中基：你頭先好似有啲疑惑喎。
姜濤：唔係呀唔係呀。

鄭中基：如果冇參加全民造星，你覺得你係做緊咩呢？
姜濤：我未參加全民造星之前係讀sport coaching嘅，咁我諗我會做一個體育老師囉，因為我自己好鍾意小朋友，咁我諗我會做個小學嘅體育老師。
鄭中基： Sport coaching係每一個運動都要讀嘅？即係唔係讀死一個嘅。
姜濤：可以揀定一科想專長啲，但就真係咩運動都玩囉。嗰時攀石啊游水啊我全部都想考牌，但係全部都考唔到。
鄭中基：好似係衛生巾下面寫嗰啲，爬山踩單車游泳咩都有haha。吓，你又答咗，咁好啦到我喇。唔好抽啲咁難啦，次次都係我讀。

姜濤：通常你創作嘅靈感係來自邊度呢？
鄭中基：創作嘅靈感啊？通常都係來自生活同來自身邊嘅人。
姜濤： Hahaha我真係好鍾意呢段。
鄭中基：咦？咁就當答咗得唔得呀呢一個。
姜濤：得呀得呀，我真係好鍾意呢段。

鄭中基：好，呢個我諗有得讀啦你。請講出一個花姐嘅缺點。
姜濤：花姐嘅缺點。搵啲咁嘅嘢嚟玩。花姐嘅缺點…佢會嬲㗎。佢冇㗎，佢好好㗎，佢冇缺點㗎。
鄭中基：係呀咁穩陣起見，你都係讀啦。咁你要抽張語氣卡。
姜濤：對仇人嘅語氣…我唔會望佢㗎喎對仇人。「醫管局數據顯示，過去10年25至29歲嘅子宮頸癌平均發病人數係20至24歲嘅7倍，45至49歲女性係子宮頸癌確診嘅高峰。準媽媽要留意，因為HPV有機會經母嬰傳播，為仔女，接觸HPV前及早預防，可獲較佳保障。」我想睇吓你用暴龍哥嘅語氣讀hahahah

姜濤： Mirror 12個入面最中意邊個？
鄭中基：梗係你啦，今日第一次見，梗係你啦。

鄭中基：你覺得自己最大缺點係咩呢？
姜濤：其實最大嘅缺點一定係我自己有時硬頸，完全唔聽身邊嘅人。對於自己嘅歌啊，或者對自己表演嘅嘢就不嬲都係。可能嗰件事係錯嘅，但我都會繼續做落去囉，因為我唔想後悔呀嘛，如果唔係我就會成世記住，我又冇做冇做多件事，所以好多時係好硬頸嘅，有時的確出到嚟個效果冇咁好。
鄭中基：其實我覺得做artist某程度上都需要一份堅持嘅。
姜濤：我好努力搵緊嗰個平衡。
鄭中基：係呀啱呀，應該趁而家後生嗰時，而家可以慢慢硬頸，慢慢可以一路從呢個經歷啊，咁樣一路就會知多啲，所以硬頸其實唔係錯嘅。
姜濤：花姐聽到啦？
鄭中基：我講比佢聽㗎，我唔係講俾你聽嘅花姐。

姜濤：如果你唔係演員唔係歌手你會做咩工作？
鄭中基：我諗我會做唱片監製啦。我最鍾意就係音樂，我以前個心願唔係做歌手㗎其實，我真係做監製，因為我嗰時喺錄音室度打暑期工，嗰時我見到啲歌手就覺得，哇，遙不可及，我終於見到你。咁但係到佢錄音嗰時，我見到啲監製係咁鬧啲歌手，所以我覺得監製威呀。我都係想做監製，起碼可以鬧啲歌手。係呀係呀，嗰時噉諗，依家唔得啦，我依家好錫啲歌手。

鄭中基：講一個自己近期後悔嘅決定。
有啲咩呢？
鄭中基：我就建議你唔好答，啱啱先答完話就算錯嘅都要堅持，你宜家答嘅話啱啱前面嗰條就唔啱啦。
姜濤：哦，係咩。
鄭中基：係呀，不過我呢段話會剪咗佢嘅。
姜濤：唔係真係有一件事嘅最近，我有同花姐鬧交囉，咁唔講啲咩，但係真係激親佢。呢件事我係好後悔，即係我哋喺電話度鬧交嘅，佢真係激到好嬲，未試過，我諗呢幾年反而佢冇諗過同我鬧交鬧得最勁，嗰件事我係好後悔嘅。
鄭中基：即係由識佢第一日到而家，最甘最甘係呢一次。
姜濤：係，甘到我聽身邊嘅人講話佢要食啲高血壓藥添，所以我現時之後真係好後悔，好唔應該咁樣同佢喺度嘈。
鄭中基：都過咗去啦，同埋你而家都後悔咗，咁佢睇到就應該冇事㗎啦，即刻食返啲升血壓藥hahaha。

姜濤：講一件最近煩惱嘅事。
鄭中基：最煩呢應該係嚟緊嘅台灣小巨蛋個演唱會，因為而家好多譬如隔離啊嗰啲時間好唔sure，有時短啲有時長啲，但係因為我哋要埋班揾band。揾所有人呢，我哋都冇辦法同人地講到其實我哋需要你幾多日，咁跟住我哋自己幾時出發呀，所以我而家最煩惱嘅就係呢樣嘢。

鄭中基： Hahahaha 請示範如何令我成為姜糖。
姜濤：我會誠邀你睇一睇我嘅MV啦，你得閒返去睇吓，可能就鍾意咗。
鄭中基：淨係MV？戲呢？
姜濤：戲都……我覺得自己都…. 可能你會覺得，都係走啦。
鄭中基：唔會嘅，咁冇信心嘅？
姜濤：對自己演戲就真係冇乜太大信心，啲人話我係歌手演員，但我真係唔覺得自己係演員囉，我覺得冇咁輕易成為一個演員。
鄭中基：其實演戲係有幫助嘅，因為好多時表演唱歌，你冇可能每一首歌嘅歌詞你都經歷過㗎嘛，咁好多時你演戲嗰陣都冇可能個對手永遠都係你前邊同你做，好多時會對空氣做、對住個拳頭做，嗰陣時可以訓練你嘅幻想空間，到你真係唱歌嗰時，你諗嘢、諗嗰隻歌可能有多咗唔同嘅畫面喺度。
姜濤：努力緊努力緊。
鄭中基：Ok ge ok ge

姜濤：十秒內講5個同姜濤嘅共通點，除咗眼耳口鼻同男人。
鄭中基：好簡單姐呢個。好攞嚟啊(語氣卡)
姜濤： Hahahahah
鄭中基：街頭銷售員嘅語氣。
姜濤：你扮嗰個吖(貓爪手勢roar)。
鄭中基：嗰個唔係，嗰個空姐嚟㗎。「喂搵嚟啦喂，唔買都睇吓啦喂！感染HPV可以引致cancer 㗎，嚟睇吓啦喂，HPV相關疾病難斷尾㗎，會不斷復發，快啲埋嚟！最驚手尾長累街坊，搞到女朋友就唔好啦。埋嚟睇！貴唔貴？醫cancer就梗係貴啦，梗係預防啱數啲，咁好啦約好聽日上嚟同醫生傾吓啦！」
姜濤：好，哇…

鄭中基：如果你可以完全放假一日，你會做啲咩呢？
姜濤：如果得一日就應該真係係咁瞓覺，我哋前一排四月就真係每一個隊員都忙到痴線，咁我哋每一個人嘅答案都係一樣㗎，就係係咁瞓。
鄭中基：我哋都經歷過，係咁冇得停呀，返去真係沖個涼，跟住就要再出發冇得抖嘅。車呀，travel嗰段時間先至真係有得休息，真係好慘。

鄭中基：你有冇預防HPV呀？
姜濤： Hahahaha當然有啦，我做教育大使㗎嘛。香港平均每日都有男士罹患HPV相關疾病，個案多過女士㗎。為咗保護女朋友，男人係要挺身而出㗎，及早預防HPV。
鄭中基：好嘢，你好hea。
姜濤：你做咩？
鄭中基：冇啊我睇吓仲有幾多張咋嘛。

姜濤：身為歌手同埋演員嘅前輩，有咩建議同姜濤分享？
鄭中基：其實好多可以同你分享㗎喎，睇吓你想聽邊一方面，即係你想知邊一方面，我都會答你，如果我答到你嘅話。
姜濤：方方面都想知喎。演員囉，因為我最近拍戲比較多，都有好多戲拍，所以關於演員嘅好多嘢我都唔係好了解。好多情緒會好難再嚟過，有時候佢一take OK嘅我，但啲燈唔OK，要再嚟過，咁我就好難去番0再reset過。嗰個我就覺得原來演員係咁難㗎，要take take都係重新將自己歸零再嚟過，呢個我真係好難。
鄭中基：其實唔使歸零嘅，即係eg呢一take嘩你覺得你OK，咁你唔使再由頭嚟過嘅，再嚟嘅話我會開始加啲嘢或者減啲嘢，令自己覺得有啲新嘢，或者有啲嘢未講，take time去再諗吓有啲咩可以好啲，或者自己之前嗰個其實有啲乜嘢講多咗嘅可以cut番，或者可能去到某個位我可以再放大少少。即係其實你每個take你都可以試唔同嘅嘢，而係去俾個導演揀。
姜濤： Okok，過2日就開喇，我又即刻試吓先。

鄭中基：如果你變成女仔最想同邊位團員拍拖？
姜濤：攞嚟啦(張卡)
鄭中基： Hahaha
姜濤：你睇吓我哋有幾揀唔到。診所姑娘嘅語氣。
鄭中基：係，假設有人打電話嚟俾你，我打俾你啊。
姜濤：喂，呢度HPV問有咩可以幫到你？
鄭中基：(口音)我就想問吓，喂？姑娘？係，我想問男人會唔會感染到呢個HPV 㗎？會唔會致癌㗎？
姜濤：男人感染HPV可以致癌，大約每兩個男人就有一個有機會中招，感染HPV男性將致癌HOV傳染俾女性嘅風險，比女傳男高約5倍。
鄭中基：哇5倍咁多呀？兩個男人就一個同呀？我而家想約上嚟，我想深入啲同你了解吓，我而家book個時間聽日嚟搵你啦。
姜濤：好呀唔該你。
鄭中基：兩點byebye
姜濤：終於有機會真正睇到。

鄭中基：呢條咁簡單嘅。今朝早餐食咗啲咩？
姜濤：水囉，齋啡囉，新鮮嘅空氣。非常豐富。
鄭中基：係囉夠啦夠啦太多添啦我覺得。

鄭中基：好啦咁我哋今日啲問題都已經問晒啦。
姜濤：我覺得我哋都互相了解得多左。
鄭中基：係，同埋加上我知多咗HPV嘅資訊。
姜濤：可惜節目時間有限，如果唔係都想真係再講多啲。
鄭中基：你想講多啲有關HPV嘅資訊定係真心話呢？好啦我哋個節目都真係差唔多啦，仲有各位觀眾，無論你好似我係爸爸咁，定係好似姜濤係單身人士咁，都應該要關注HPV嘅資訊。無論你係男定女，記得要及早預防HPV啦！