【#香港尋奇】墨寶於鬧市中重見天日｜第一位參加威尼斯雙年展嘅香港人｜九龍有一個皇帝：曾灶財— Google Map 不會告訴你的事 EPISODE NO.9

大家好，我係阿肥！歡迎返到嚟Google Map不會告訴你的事之香港尋奇！「九龍皇帝」曾灶財作為一位係上世紀街知巷聞嘅街頭藝術家，我相信有唔少嘅香港人都仲記得曾經有一段時間喺港島九龍嘅大街小巷入邊，好容易就會搵到「九龍皇帝」嘅墨寶。隨著城市嘅發展，「九龍皇帝」嘅墨寶已經慢慢褪色，又或者已經用油漆覆蓋住，所以已經不復存在啦。唔知而家嘅香港市民仲有冇聽過九龍皇帝呢個名呢？而佢哋又可以係邊度搵到佢嘅作品呢？不如就等我問吓附近嘅人，等我考下佢哋先！

阿肥：你有冇聽過「九龍皇帝」呢個名啊？
市民一：有
市民二：有
市民三：有
市民四：冇喎
市民五：有
市民六、七：有

阿肥：你可唔可以簡單應用一下「九龍皇帝」嘅作品？有啲咩特色呀？
市民八：粗獷
市民九：佢啲字好特別囉，比較橫啲，同埋……感覺似象形文字咁樣
市民二：係塗鴉咁樣嘅形式呢，喺啲柱到寫咗佢自己想寫嘅嘢囉
市民三：好有佢自己嘅個人味道
市民五：雅俗共賞
市民十、十一：可以做wallpaper嗰啲囉

阿肥：咁你覺得佢嘅作品值唔值得保留呢？
市民十二：值得呀，都係香港文化嘅一部份！
市民十三：我覺得值得，對於好多香港人嚟講都有一個共同回憶
市民十四：當然要啦！
阿肥：嗯！
市民十四：嗯！
市民十五：值得呀，咁大家都記得都係一個特色嚟嘅～
市民十六：值得，都係一個香港嘅本土文化囉。

問完唔同朋友之後，似乎都仲有唔少人知道九龍皇帝係邊一個，而今日我就率先帶大家嚟睇吓最近喺鬧市之中重見天日嘅一塊墨寶，呢塊墨寶就位於旺角鐵路天橋底嘅呢幅牆壁，唔知大家行過嘅時候又有冇留意到呢？不如我就同大家一齊嚟睇吓！

呢一幅重見天日嘅「九龍皇帝」塗鴉位於旺角花墟公園附近、界限街鐵路橋底嘅牆身，喺最近就被路過嘅市民發現，現時可以見到重見天日嘅墨寶只係佔咗牆身嘅一小部份，而且並唔完整，主要都係出現喺「不准標貼」嘅告示牌旁邊嘅部份位置。然而曾灶財嘅工整文字排列同佢獨特嘅書法字體已經清晰可見，例如「英國」、「中國」、「國皇」、「廣東」呢啲字眼已經可以辨認到出嚟。

而事發之後亦都引起網民嘅討論，更加有網民搵到二十幾年前同一個位置未被油漆覆蓋嘅相，同而家嘅外觀進行對比，可以見到呢個位置原本應該係成幅畫都充滿着塗鴉嘅，所以更加可以證明，今次重見天日嘅塗鴉就係當年曾灶財嘅塗鴉嘅一部份，亦都係純純淨淨「九龍皇帝」真跡墨寶啦！

至於點解呢幅圖我會突然之間重見天日呢？暫時仲未有一個定論。不過網民普遍認為，因為之前用嚟覆蓋塗鴉嘅油漆老化、再加上最近天氣潮濕，令到原本牆身上面嘅油漆氧化、碎裂、同埋剝落，被油漆覆蓋嘅墨跡反而因為咁樣而得到保存，再次重見天日啦！

康文署同港鐵方便亦都回應會盡量原址保留曾灶財嘅塗鴉，如果屬實嘅話，大家可以睇到「九龍皇帝」嘅真跡嘅地方又多一個喇！

九龍皇帝嘅墨寶我哋可能就見得多啦，但係曾灶財係一個點樣嘅人，我諗就好少人知啦！咁究竟曾灶財嘅作品點解咁值得保留，而佢背後有經歷過啲咩呢？故事就要由一開頭開始講起啦…

曾灶財本名曾財，生於廣東肇慶蓮塘村，16歲嗰陣已經嚟到香港投靠佢嘅舅父，生活困苦嘅佢做過好多唔同嘅工作，有一次佢喺垃圾站工作嘅時候，不幸被大型垃圾桶壓傷左左腳，從此就不便於行，需要依靠拐杖行走。

據說係佢30幾歲嗰陣時，曾經有一次返鄉下整理祖先遺物，二手喺嗰陣時搵到一本族譜，好奇嘅佢查咗一下族譜，發現佢嘅祖先居然曾經獲得清朝御賜九龍作為食邑，即係封地，亦即係話佢嘅祖先曾經係九龍嘅地主，而曾灶財正正就係封地嘅繼承人。

但係相信大家都知道，現實就係清帝國早喺1860年同英國簽訂嘅《北京條約》，將九龍半島割讓比英國。之後嘅清帝國滅亡啦，所以曾灶財更加發現自己雖然有「九龍皇帝」之名，卻無「九龍皇帝」之實。再加上生活困苦嘅佢帶嚟嘅壓力影響之下，就憤然喺九龍同港島嘅多個地方書寫塗鴉，嘗試透過用呢個方法向英政府控訴、並宣示主權。

但係其實曾灶財並冇讀過好多書，所以佢寫出嚟嘅圖多數都係以單字、詞語、地名同埋人名為主，甚少有完整通順嘅句子，所以大眾基本上難以透過閱讀佢寫嘅嘢去明白佢想表達嘅嘢。再加上佢嘅塗鴉行為都係喺公眾地方進行，利用好似牆、電箱呢啲公共財產來做佢嘅「畫布」，以致有唔少嘅香港市民都對佢嘅行為感到疑惑，甚至認為佢嘅行為影響市容添。

而當時亦都不時有警察阻撓佢塗鴉嘅行為，多次帶走或者檢控佢，但即使係咁都仍然冇辦法阻嚇到佢、冇辦法動搖佢喺公眾地方寫字塗鴉嘅決心。

雖然大眾未必明白曾灶財嘅作品嘅固中玄機，但係佢嗰種方形嘅書法風格，以及工整嘅文字排列就漸漸深入民心，以至遍布多區嘅塗鴉亦都成為左一種香港先見到嘅獨特奇觀，慢慢開始有人以藝術嘅角度去欣賞曾灶財嘅塗鴉，形成咗佢獨有嘅曾灶財風格啦！

而同時佢富有傳奇色彩嘅事蹟亦都引來大眾嘅討論，甚至有人會將曾灶財喺公眾設施上塗鴉嘅行為解讀成一種反殖民主義嘅行為，為佢嘅形象再添上一層深度。

以佢嘅個人風格同事蹟，亦都開始漸漸影響到當時唔同嘅文化界別，就好似香港殿堂級樂隊Beyond喺1993年出嘅一首歌《命運是你家》嘅靈感來源就係來自曾灶財。又好似霍耀良執導，2000年嘅電影《九龍皇后》宣傳海報上邊就用上曾灶財嘅塗鴉作品。仲有好多唔同嘅創作都借用左曾灶財傳奇嘅故事作為藍本，可見呢位「九龍皇帝」已經係不知不覺之間成為左一種香港嘅文化象徵。

就正如開頭所講，去到2003年威尼斯雙年展，曾灶財嘅作品獲邀參展，成為第一個獲邀參展嘅香港人。證明咗咁多年外界對佢嘅評價係點都好，佢嘅作品最後都受到藝術界所肯定。可惜嘅係，係2007年，香港人認識嘅「九龍皇帝」曾灶財因為心臟病發而「駕崩」與世長辭，享年86歲。

得知佢嘅死訊之後，文化界紛紛表示對佢嘅離世感到惋惜，而佢嘅塗鴉作品亦都順理成章地成為絕響。

去到2020年，兩幅曾灶財嘅作品喺香港蘇富比拍賣會更加分別以$69,300同$100,800成交，再次印證咗曾灶財嘅塗鴉已經唔單只係一種文化象徵，更加已經成為藝術收藏家眼中嘅珍品。

其實除咗啱啱喺旺角介紹嘅果一幅墨寶之外，其實香港仲有好多個地方都可以搵到九龍皇帝嘅真跡嘅。首先就係我依家身處嘅尖沙咀天星碼頭喇，呢一幅位於柱上嘅塗鴉已經經過膠板嘅保護，大家就可以放心欣賞啦。

而令一個可以搵到嘅地方係位於觀塘坪石邨附近嘅燈柱，呢一幅同樣地都已經經過膠板嘅保護。而另外仲有秀茂坪道同順安道交界嘅天橋底、同埋中環近山頂纜車花園道站嘅橋底依然存在。至於觀塘偉發道同茶果嶺道交界嘅觀塘繞道橋墩，本身都有發現曾灶財嘅塗鴉嘅，但係就喺2021年4月嘅時候，被發現塗鴉被人用紅色油漆打上交叉而遭到破壞。另外亦有一幅位於觀塘道近坪石邨電箱嘅塗鴉，喺2017年嘅時候，因工程承建商誤油上白色油漆而遭到遮蓋，所以可以睇嘅地方就有少咗兩個啦。

當然啦，想睇到妥善保存嘅墨寶嘅話，去西九文化區M+博物館都係一個好嘅選擇嚟，如果大家係有興趣嘅不妨去睇吓！

「九龍皇帝」已經離開咗我哋一段時間，但係佢留低嘅唔單單係一幅作品，仲係佢堅持不屈嘅精神。即使佢嘅人生係充滿不幸、即使佢面對着世人對佢嘅唔理解，但係佢依然都堅持住佢一直以來所選擇做嘅事。同樣地，無論大家因唔欣賞曾灶財嘅作品都好，我諗佢呢一種精神係冇人可以否認嘅。佢嘅行為同埋作品都已經成為左香港嘅文化象徵，係值得大家認識同埋留意嘅，亦都希望大家會珍惜我哋僅存嘅文化象徵啦！

今集Google Map不會告訴你的事之香港尋奇，就黎到呢度先，我係阿肥，我哋下集再見！拜拜~