【#香港重有無】香港重有無直角轉角唐樓？唐樓又係點嚟嘅呢？— Google Map 不會告訴你的事 EPISODE NO.8

【Google Map 不會告訴你的事】

哈囉，大家好，我係小雲。歡迎大家收睇「Google Map 不會告訴你的事」之香港仲有冇？

香港曾經有過好多唔同種類嘅唐樓，其中歷史最悠久嘅唐樓類型就係「直角轉角唐樓」嘞。而除了城市發展，好多唐樓都被拆卸重建，成為一棟又一棟嘅新式其他物業。而作為最耐歷史嘅「直角轉角唐樓」，唔知大家又見過未呢？

唔知香港仲有冇呢啲「直角轉角唐樓」呢？不過今次搵吓附近有咩人，睇吓佢哋知唔知「直角轉角唐樓」係咩嚟啦！

【訪問】

小雲：你印象中嘅唐樓係點樣㗎？
受訪者：殘舊！
受訪者：無𨋢！
受訪者：好舊！
受訪者：七層，無𨋢！
受訪者：舊啦！好少會有𨋢，行樓梯樓梯。
受訪者：要行樓梯囉。
受訪者：舊，要行樓梯。
受訪者：好臭。
受訪者：有啲舊，要行樓梯。
受訪者：無𨋢。
受訪者：天花板剝落。
受訪者：唔會有𨋢搭啦，比較焗。
受訪者：殘舊，好逼夾。
受訪者：舊同埋污糟。
受訪者：有啲污糟，多曱甴咁！
受訪者：外面就核空，入邊就豪裝㗎。
受訪者：其實嘅格局係幾四正，但係衰在窗戶比較小。
受訪者：間隔，應該係，實用了，唔安全囉！無保安囉。

小雲：你知唔知香港係有唔同種類型嘅唐樓㗎？
受訪者：唔知
受訪者：唔知
受訪者：唔係好知
受訪者：唔知
受訪者：都唔係好清楚
受訪者：知，但唔知啲名係咩。
受訪者：我淨係知深水埗嗰啲囉。
受訪者：上面住，下面做嘢，嗰啲囉！
受訪者：中式？西式？
受訪者：有電梯，冇電梯。
受訪者：有兩條樓梯，前梯同後梯囉。
受訪者：閣樓式個隻囉。
受訪者：我淨係知井字型嗰啲囉！同埋好舊式嗰啲囉！好似618嗰啲。

小雲：知唔知有一種類型叫「直角轉角唐樓」？
受訪者：冇聽過
受訪者：冇
受訪者：無聽過
受訪者：冇
受訪者：唔知
受訪者：誒，冇。
受訪者：真係唔識。
受訪者：新聞睇過。
受訪者：我記得係上環或者北角先有。
受訪者：好似見個下嘅，深水埗囉。U字型咁樣，我睇嗰啲好似係。

【香港重有冇?】

問咗咁多人，睇嚟大家對唐樓都有唔同嘅印象，但似乎對「直角轉角唐樓」就冇乜印象啦。其實香港係仲有呢種直角轉角唐樓㗎，不如就等我帶大家去搵吓啦！

「直角轉角唐樓」係港九都有，不過，今次我就先帶大家嚟到，位於港島西營盤嘅「直角轉角唐樓」德輔道西207號先，因為除咗啲棟樓本身有歷史價值之外，呢條街都充滿歷史價值㗎！

德輔道西，顧名思義，當然就係以一個叫做「德輔」嘅人嚟命名啦。

「德輔」呢個人就係，港英時期香港第十任港督——德輔爵士。而呢條德輔道西，其實係填海出嚟嘅，不過一開始提出填海嘅人，並唔係德輔，而係三十年前嘅另一個人。

時間返到去十九世紀初期，本來德輔道西，呢個位置就係海岸嚟，不過。到第四任港督寶靈爵士喺1854年來到香港之後，就發現香港島可以用作居住嘅土地唔多，而同時適逢當時清帝國面對緊太平天國之亂，大量嘅難民湧落黎香港，令到香港嘅居住需求暴增，因此寶靈就決定推動填海計劃，將當時喺皇后大道嘅海岸線，填到出去依家德輔道嘅位置。

但佢呢個決定，一開始就遭到大量海權商人反對，但到最後佢都成功推動呢個填海計劃。德輔道嘅前身——寶寧海旁道，就係咁樣嚟架喇。

不過，由於寶靈嘅填海計劃係分兩期進行，結果就令到「寶寧海旁中」同「寶寧海旁西」連唔埋，中間就有一個海角，而呢個海角就喺文咸東西街同埋永樂街。

喺寶寧海旁道起好之後嘅三十年入面，「寶寧海旁中」同「寶寧海旁西「都分開嘅。咁點解最後佢哋都會黐埋一齊嘅呢？呢樣嘢就同德輔有關啦。

其實早喺德輔嚟香港之前，港英政府經已計劃緊，再次填海。德輔之前嘅港督，係寶雲爵士，佢喺德輔上任嘅兩年前，就已經卸任返咗英國。而喺兩年入面，香港就只係得署任港督，而呢個署任港督就係威廉馬殊William Marsh。

馬殊，有另外一個譯名就叫做「馬師」。無錯啦，灣仔馬師道嘅「馬師「就係佢嚟。

威廉馬殊喺寶雲同德德輔中間嘅空白期嗰段時間，就嚟咗香港在署任港督。期間，佢接到英國殖民地部嘅命令，要求佢執行一個叫做《柴維克報告書》嘅調查報告，上面嘅建議。《柴維克報告書》係由一位英國皇家工程師柴維克所寫嘅調查報告，佢喺1881年來到香港，視察咗一年之後，就寫好咗呢份報告書。

報告書就指出，香港嘅華人社區居住環境係極之惡劣，人口極為密集之餘，樓與樓之間既無通風設備，又無下水道設施，如果唔立即改善嘅話，就會好容易引發疫症。

而柴維克亦都指出，當時香港係無一套行之有效嘅城市系統設計，例如無下水道系統，自來水供應又不足，公廁都係旱廁，又缺乏公共浴室，又缺乏畀市民呼吸新鮮空氣的地方。

因此，報告書就針對住，呢啲城市規劃嘅問題，要求政府立即改善呢啲情況。

問題係，要改善呢啲情況，唔係想唔想做咁簡單，而係唔夠地方。因此，喺當時威廉馬殊，同埋佢組織嘅調查委員會，就認為要用填海來增加土地，同時亦都可以係填海嘅土地嗰度，起返套下水道網系統，連接其他下水道。因此，喺德輔一任無幾耐，係遮打爵士力排眾議嘅支持底下，佢就提出咗「海旁填海計劃」，將西環同中環連埋一齊之餘，仲得到大量嘅土地，工程喺1890年開始，去到1903年就完工。

就係咁， 「德輔道西」同「德輔道中」就正式喺香港誕生咗嘞！

講完德輔道西嘅歷史，不如我哋講返呢座「德輔道西207號」先啦！呢幢位於德輔道西207號嘅「直角轉角唐樓」，係喺1921年起好，佢樓高四層，外觀係廿十世紀初的唐樓建築風格，並且設有陽台，係香港少有嘅戰前「直角轉角唐樓」。

唐樓大家就聽得多啦，不過唔知大家又知唔知唐樓係有分好多種嘅呢？唐樓，雖然係叫做唐樓，但其實佢並唔係中式建築黎㗎，而佢嘅建築風格，亦都有住香港嘅一種特質，就係中西合璧啦！

唐樓，雖然係叫「唐樓」，個「唐」字，可能會令大家諗到呢個係代表華人嘅建築物，但其實香港嘅唐樓，可以話係一個混血兒嚟。除咗會用上瓷磚嘅中式建築風格之外，箇中亦都有西方外廊式嘅建築特色，所以呢個亦都係，點解唐樓會咁有歷史價值嘅原因。

而講到香港第一代嘅唐樓，其實早喺香港開埠初期就已經有㗎啦！

當時港英政府計劃緊喺上、中、下、西環，四環之間，興建維多利亞城，而同時亦都有大量華人移居香港。呢班華人，就以前舖後居嘅建築風格，喺上環同太平街一帶興建咗好多外型似積木嘅唐樓。呢啲早期嘅唐樓，因為無受到政府嘅監管，所以呢啲唐樓嘅居住環境係十分之惡劣，例如冇獨立廁所樓，同樓之間又無後巷，好似背對背咁，而普遍，呢啲唐樓嘅窗都會比較細，屋入面有極唔透光。

同時，唐樓入面嘅公共廚房位置，亦都只係靠一個小煙通嚟排氣，因此空氣流動嘅情況係非常之差。再加上呢啲唐樓一戶，可能有幾十個住客，仲未計喺屋入面，會飼養埋家畜。人同豬欄一齊瞓，可以話係正常不過嘅事，所以我哋亦都唔難想像，當時呢啲唐樓嘅衛生環境係有幾咁惡劣。

結合埋，頭先我提到嘅《柴維克報告書》嘅情況，結果去到1894年，真係畀柴維克嗡中咗，喺太平山街真係爆發咗一場疫症，就係香港有史以來，死亡率最高嘅疫症——鼠疫。

當時大約有二千人染疫身亡，死亡率，大概係95%，同時亦都有三份之一人口，因為鼠疫逃離香港。

港英政府眼見鼠疫對香港造成咁大嘅影響，決定要正視呢個問題，所以除咗推動唔同嘅衛生政策之餘，佢哋亦都同時著手對唐樓嘅居住環境，加以限制。喺1903年，港英政府公佈咗《公眾健康及建築物條例》，主要針對唐樓嘅建築設計同居住環境，例如禁止興建背對背唐樓。

樓同樓嘅背面，一定要有最少六呎闊嘅後巷。又規定，每個人至少要有1.65平方米嘅室內空間，每間房都要有門窗，以及，樓宇嘅高度，係唔可以大於街道嘅闊度，避免影響日照。因此，當時嘅唐樓就只有三至四層樓高。而有啲唐樓，中間仲會設有天井，令到空氣更加流通添。

而去到三十年代，由於技術嘅進步，當時啲人起唐樓嗰陣，已經開始用上大量嘅石屎同埋鋼筋，而政府亦都喺1935年訂立咗《建築物條例》，對唐樓嘅深度、樓梯，同埋透光，亦都有更加多嘅限制。而且，規定起唐樓，係一定要經由建築師設計先起得。呢啲措施，除咗令到唐樓更加安全、更加衛生之外，唐樓喺呢段時期嘅花款，仲可以話係百花齊放添。

簡單嘅一棟唐樓，可以同時體現出，現代主義、新古典主義，同埋中式美學的元素，亦都有Art Deco嘅建築特色。

最著名的例子，莫過於喺1931年起好嘅——雷生春。不過，去到1950年，唐樓又再次迎嚟變化，為咗逃避國共內戰，大量難民走返落嚟香港，再加上戰後嬰兒潮，香港人對住屋需求亦都再次迎來新高。

政府為咗解決房屋問題，所以，佢哋決定放寬對唐樓嘅高度限制。由在戰前最多只係三至四層樓高，變成起至少六層高，都無問題。以後嚟唔少嘅唐樓，更加設有升降機等現代化設備添。

雖然居住環境，比起一開始開埠嗰陣係改善咗好多，不過，當時大多數嘅香港人依然住喺一啲狹窄、擁擠，同埋衛生環境惡劣嘅居住環境入面，例如喺李鐵導演執導，著名影星吳楚帆同張瑛，擔綱演出嘅香港經典電影《危樓春曉》入面，我哋就可以好清楚咁睇到，當時香港人喺唐樓居住嘅生活情況啦！

之後嘅廿年，香港經歷咗唔同嘅大時代，但香港人嘅居住問題一直都懸而未決，直至去到麥理浩港督上任，佢喺任內，推動咗唔同嘅房屋政策，促使大量嘅徙置區、居屋同埋公屋，相繼落成。提供咗更加多，同四正嘅居住環境俾香港人，漸漸地，呢啲公營房屋，就成為咗香港人主要嘅居住地方之一。

而唐樓嘅功能，亦都開始慢慢被取代，呢啲記載住，上世紀早期香港人生活嘅歷史見證，隨著唔同市區重建計劃嘅拆卸工程落實，而慢慢係，我哋呢個城市景觀入面消失。

就正如阿飛上集咁講， 歷史建築嘅意義，係在於我哋呢啲作為身處其中嘅人，有冇將呢啲歷史，傳承落去，先會有令到佢哋有存在的價值。就正如呢啲「直角轉角唐樓」，雖然喺我哋城市面貌入面逐漸消失，但當我哋記得佢哋存在過，咁佢哋嘅歷史價值，先唔會隨住被拆卸而褪色。

今集「Google Map 不會告訴你的事」之香港仲有冇，就講到呢度，我係小雲，我哋下集再見，拜拜。