24/6《圍爐取戀》愛情與麵包の兩難抉擇

東：大家好，哇，嗱！我哋上集就係有一個男仔，就上嚟再一次求婚啦。不過我聽啊工作人員講呢，今集又係同結婚有關喎。好似變咗我哋係專家咁樣。

Ｄ：我係跳咗step㗎你知唔知呀。

東:係呀！你連拍拖都未，真係OK嘅我哋照樣可以討論嘅，今日嗰個係一個結婚嘅咩情況呢？

工作人員：今日就係女事主打上嚟，就諗緊好唔好同男朋友結婚。

東：好！咁我哋幫佢度一度啦。喂FION你好。

Ｆ：你好呀大家好呀。

東：喂，你有一個結婚嘅疑慮喎。

Ｆ：係啊。

東：結婚唔係應該好開心咩？

Ｆ：因為嗰個人呢唔係我特別鍾意嘅人囉。

東：哇~好！應該係一個好長嘅故事，好！慢慢講。

Ｆ：咁呢我就30頭啦，咁我男朋友呢就30中，咁我哋一齊咗唔係好耐，大概4個月左右啦。前排佢就同我求婚，我就好似冇好想結婚嗰種衝動囉。

東：但係4個月佢就向你求婚啦？

Ｆ：係啦因為佢屋企人都畀咗壓力佢嘅。

東：即係屋企人覺得︰喂你要結婚啦。所以呢佢就盡快覺得啱就即刻結婚啦佢想。

Ｆ：係啦，因為佢A0嘅。

東：哦！仲A0。

Ｆ：咁我就之前都拍過幾次嘅，咁我哋一齊咗咁耐啦，我哋係冇真正發生過關係。

東：哇，你想講係咪因為你唔係因為大肚而結婚。

Ｆ：唔係。

東：咁我想問你，你嗰個結婚嘅疑慮係咪嚟自呢度呢？

Ｆ：係啊，但係我哋都試過但係唔得囉。佢嗰方面好似有啲問題咁樣。

東：因為我都覺得奇怪，點解一嚟就講呢個問題，你鍾唔鍾意佢先？

Ｆ：我覺得佢適合結婚囉，都啱我嘅。但係我對佢冇乜feel咁樣囉。

東：哦~即係其實你某程度上都覺得自己都到適婚年齡。（Ｆ：嗯。）咁你遇到咁嘅人，即使你都講未必對佢有feel啦，但係你覺得「唉都好似都要搵個對象啦」咁可能唯有只有佢啦咁樣嘅。（Ｆ：係喇。）哦～但係而你當中有好多問題啦，咁你就話性係其中一個問題。

Ｆ：嗯，我哋之前呢有嘗試過一次嘅，佢戴咗個condom之後就軟咗囉。之後就冇再試過。咁佢都冇提過我。

東：即係你懷疑佢係性能力方面有問題。

Ｄ：佢係咪處男之身先？

Ｆ：係啊。

Ｄ：因為處男之身喺我嘅想像嘅世界入面呢，第一次一定係會有問題。

Ｋ：會緊張。

東：我都覺得係啊。我十三歲第一...唔係呀！啫係咁講哈哈！

Ｋ：嗱錄住㗎！

東：我嘅意思我嘅第一次呀都未必咁順利啦，甚至乎我唔好話第一次呀，就算新對象嘅第一次可能都未必咁順利㗎。

Ｋ：我都真係有其中一個，第一次軟咗囉，驚得滯，緊張呀佢。

Ｆ：咁如果當畀多次機會佢啦，我記得同佢都冇feel囉。我哋拍拖係從來無嗌過交嘅，佢好就得我囉，但係我就好似對佢冇乜感覺到話特別好開心或者唔開心。

東：咁你點解同佢結婚呢？
Ｋ：佢係未應承呀嘛FION

Ｆ：我應承咗

哦！？

東：咁佢有咩原因令到你...

Ｋ：好想同佢結婚咁樣？

Ｆ：第一個啦，佢好就得我啦。咁第二個呢就係佢本身屋企環境經濟環境都OK嘅。咁另外一個就係我自己本身都想生小朋友，因為我已經30頭嘅，我驚太大生唔到小朋友囉。但係就會覺得同佢係爭咗少少感覺。我唔知道係因為我為咗結婚而結婚啦，定係因為恐婚咁樣囉。

東：咦但係你係拍過幾次拖㗎嘛，其實你都應該清楚㗎喎。咁你鍾唔鍾意你之前嗰啲男朋友呀？

Ｆ：我之前嗰啲都鍾意嘅，但係呢拍咗一段時間之後都會慢慢覺得個感情會變淡囉。咁我同呢一個男朋友呢，就係覺得一開始就已經好平淡咁。

東：一開始已經淡啦？！

Ｄ：可能掉返轉

Ｋ：但我想知係點一齊㗎？

Ｆ：即係有一日我哋行吓街咁，佢就好主動咁樣拖住我隻手囉，但係佢又冇好明顯咁樣同我講話「對你有啲承諾」就冇嘅。

Ｄ：咁我再問遠啲，咁你哋係點樣識㗎呢？

Ｆ：都係friend攏friend咁樣。

東：唔係呀冇㗎，都唔使問啦，因為佢...聽得出係好機械式㗎。咁佢求婚嗰吓係點呢？

Ｆ：佢求婚嗰吓真係一隻戒指囉，跟住佢又冇話跪低呀，或者係同我講咗一啲好承諾嘅嘢囉。

東：其實如果你依家疑惑，你可以反悔㗎嘛，係咪呀？

Ｆ：可以反悔嘅，但係就會傷害到佢啦一方面，另外一方面我係真係搵唔到好似佢條件咁好，或者咁適合我嘅男朋友囉。因為我之前都拍過好多次拖啦，之前嗰啲男朋友都有五六年，拍拍吓大家都淡咗囉。所以我就會覺得佢呢，係一開始就好平淡咁樣，但係我就會覺得咁樣都幾好呀，冇太大嘅感情嘅波動啦，結咗婚當冇結婚咁樣囉。

(哇 唔係吓話)

Ｄ：嗱我又想問啦，佢有冇做過啲乜嘢嘢，令到你覺得「呢個人真係好鍾意我」咁樣呢？

Ｆ：我想買咩佢就會送咩畀我囉。但係之前嗰啲男朋友就會好計較好小器囉。

東：經濟條件好囉其實。

Ｋ：嗱我係即係感情至上，我係好好奇，揀一點啦，係如果呢個男朋友冇嘅，你係絕對唔會諗同佢結婚嘅。

Ｆ：冇錢。

東：我唔評論你呢個選擇呀，因為有啲人係可以咁樣選擇嘅。如果你咁樣選擇咗呢，你要甘心咁樣就一世㗎啦喎？你得唔得先？

Ｆ：係呀我覺得我自己依家好糾結囉，即係就算我搵到一個我有感覺嘅人，咁我可能當下，或者結婚嗰吓係開心或者有feel好鍾意呢個人，但係唔排除之後可能感情都會變。

東：但係我想問呢，其實你眼前你講到畀我聽呢，得兩個選擇，一係就同佢結婚，一係呢就冇，因為你搵唔到呀。其實你可以單身㗎喎。

Ｆ：我唔想單身呀，我係想生小朋友，係呀。

Ｄ：所以亦都可以解釋得通嘅，點解佢咁在意嗰個性能力究竟係有冇問題。因為如果佢有嘅話呢...

東：哦~即係唔係為歡愉嗰個角度，係為生育個角度。

Ｆ：係呀係呀兩方面都有嘅。其實講句難聽啲嘅，咁我同佢係埋一齊嘅呢段時間啦，其實我都有識其他男仔嘅，咁可能都係好短嘅時間，即係一個月就斷咗嘅。咁我就會覺得「其實哦~其實都幾好呀」即係佢會默默咁樣陪伴住你咁樣囉。

Ｋ：唔OK嘅一樣嘢就係，原來佢會有一個心去搵第二個㗎喎。其實你唔係真係覺得佢有錢就ok啦，其實你都注重感情，你要面對呢一樣嘢喎。

東：我甚至會講「身體很誠實」囉。可能佢嘅性無能同你有關㗎，因為你都唔鍾意佢，咁佢梗係畀唔到反應你啦。

Ｆ：可能係呀，因為我有時候會嫌棄佢唔係好體貼啦，跟住又好悶囉。即係愛情同麵包我兩樣都想要。

東：但問題係你愛唔愛到佢先？愛到佢我覺得呢性問題都解決到㗎。

Ｆ：佢又唔係好愛我囉。

東：咁就大鑊啦。

Ｄ：因為雙方冇一個肯主動去愛對方嘅人，咁點會令到慢慢可以變到有愛。

東：因為呢其實好多人都會㗎，同另一半結婚純粹因為經濟好，但係你要知道，我同佢結婚係因為佢嘅錢。你唔好奢望有其他嘢喇。即係你食得西餐，你就預咗佢冇點心食㗎啦，你自己揀㗎喎，你唔好食咗西餐之後就話「黐線嘅間舖頭，都冇點心食嘅？」因為你揀咗喇已經。所以反而好奇，點解你要咁急結婚，點解你一定要有一個經濟條件咁好嘅人呢？

Kneta：或者係咁問，佢係有好到去邊度，即係唔係李嘉誠，即係李嘉誠咁我就行呀。

東方昇：係呀。

Fion：有樓有車咁樣囉。

東方昇：幾多層樓啊？

專家Dickson：咦，佢冇喎。

東方昇：係得一層樓咋嘛係嘛。

專家Dickson：成幢啊定係？

Fion：（尷尬不失禮貌的笑聲）

東方昇：咁我就話啦，如果Dickson有層樓有架車，要同你求婚，你都同佢一齊呀？

Fion：我要諗到係咪可以溝通到囉。

東方昇：但係你話同你而家嗰個可能未必溝通到喎。

專家Dickson：我有啲質疑呢，佢係咪真係唔鍾意佢嘅男朋友，反而我係調返轉頭，我有啲質疑佢男朋友係咪鍾意佢，因為你俾個咁嘅選擇佢嘅時候，佢嗰個猶豫呢，如果正常佢係有個理性嘅判斷嘅話，邊個有錢啲，我揀邊個。

東方昇：係呀。

專家Dickson：咁佢就唔會有猶豫嘅，如果Dickson咁梗係Dickson啦，當然我都好想佢揀我，但係佢猶疑喎。

Fion：我覺得佢好似都唔係特別鍾意我囉，佢係純粹為咗應付佢父母，佢覺得我適合，所以同我求婚。

Kneta：係咪其實佢兩個呢，都迷失左一個情場遊戲入面。

東方昇：就係因為想結婚而一齊囉。

Kenta：兩個都係。

東方昇：係呀。個男仔都可能未必鍾意你。

專家Dickson：個目的就係。

東方昇：唉， A0我知道死囉，我冇咗你之後呢我就搵唔到第二個，總之我搵個人同我生仔，咁佢咪搵咗你囉，而你都因為想搵人生仔，加欣賞佢嘅經濟條件而同佢一齊，咁咪就係冇愛咋嘛。

Fion：係呀。

東方昇：咁就係你一世得唔得先。

Fion：好似好難，我覺得如果我咁樣同佢一齊，我可能會出軌囉。

東方昇：咪係囉。

Kneta：或者你點樣都會離婚囉。

Fion：所以肯定會有呢個問題存在。

專家Dickson：咁就唔得啦。

東方昇：而所以我在歸根究底，我要問你一個問題，點解你咁冇信心你搵唔到下一個係你鍾意，即係未必話要有樓啦，可能起碼佢照顧到你啦，甚至乎比到你性上面嘅開心啦，其實唔難搵㗎喎。

Fion：好難搵囉。

東方昇：點會呀。

Fion：我之前嗰啲男仔呢都係拍拍下就冇乜feel，成日嗌交啊唔適合囉。

東方昇：你要解決嘅係你識男仔或者點樣令到佢誤會可能攞咗你着數就走，而唔係選擇食嚿屎嗎，即係你話：「唉，我喺屋企，我想落街食嘢，但係落街食嘢好煩啊，又要落去搭Lift，又要俾錢，為屋企有嚿屎喎，哎呀！咁呀食嚿屎先呀！」

Kneta：食住先啦。

東方昇：唔會咁樣呀嘛。

專家Dickson：嘗試下可能係咪改變下自己某一啲溝通方式，然後去搵個好啲嘅條件。

東方昇：咁你唔會食屎㗎嘛。

Fion：係。

專家Dickson：因為如果呢佢係鍾意你嘅話呢，我都會覺得你哋呢段婚姻係有得發展落去嘅。

Kneta：嗯。

專家Dickson：但係個問題就係我重好多聽返嚟佢講嘅嘢呢，我覺得對方其實都未必係咁鍾意你，其中一個呢就係求婚，我都覺得佢嘅誠意唔係好夠啊。

Kneta：咁hea呀，係呀。

專家Dickson：咁佢又可以有幾鍾意你呢？

東方昇：我覺得你應該有返啲信心，對愛情或者對你自己有啲信心，要相信自己可以搵到另一個，咁你要將對另一半嘅經濟條件降返低，其實係唔係可以照顧到你，即係唔使好富裕都得啊？咁你咪易啲搵囉，我俾你生到仔啦⋯⋯

專家Dickson：趕得切喇。

東方昇：嘩！仲慘呀。

Kneta：咁邊個邊個湊呢個？

東方昇：係呀仲慘呀真心。

專家Dickson：個仔都慘呀真心。

Kneta：真係好現實啊。

Fion：我會再諗吓囉。

東方昇：但我真係想問吓你嘅條件好差嘅咩？

Fion：都唔係嘅。

東方昇：係囉，我聽你把聲都好靚呀。

Fion：即係我驚年紀大啦，生小朋友會難生啲。

東方昇：唔會啦而家科技。

Fion：同埋真係搵唔到。

Kneta：三十六、七歲都仲生到。

東方昇：你如果36歲都仲未生到，你搵Dickson。

專家Dickson：喂～嘩！

Kneta：我幫你！

東方昇：Dickson係呢幾年努力買個單位。

專家Dickson：唔係我唔係呀我應該努力養好身體。

東方昇：係，我明理解，因為香港太現實啦，即係一個打工仔每日朝頭早迫地鐵，一返工就好似做奴隸咁樣。

Kneta：我都想坐的士啊。

專家Dickson：成世人好似為咗層樓咁。

東方昇：係啊。有時會令你選擇錯誤啊，但係有時要清醒返。

Fion：明白。

東方昇：可能即使你第日搵過另一半，冇咁有錢嘅你都係要迫嘅，但起碼你迫完之後，喺公司做完奴隸之後，你返到屋企，都見到個你鍾意嘅人，攬住佢乜都值得啦，明唔明呀？

Fion：我覺得要自己要靜下自己個心，知道自己想要搵一個點樣嘅另外一半，即係唔好太過心急住求其做一個令自己後悔嘅選擇。

東方昇：你一定後悔㗎啦。好啦好啦希望幫到你。

Fion：多謝你哋呀。

東方昇：好，唔該晒。拜拜加油加油。

Fion：byebye~

東方昇：嗱大家見到我哋啦三個好似偵探咁樣，點解呢？因為我哋呢傾吓頭先熄咗電話之後呢，為唔對路喎，因為呢頭先喺尾段嗰時呢，我開始以為佢係咪咁自卑，即係覺得自己搵唔到另一個更好囉，但係諗諗吓我哋喺度，喂唔係喎… …

Kneta：頭先我哋問佢都冇答到。

東方昇：佢可能嘅原因係因為佢嘅未來老公真係好有錢呀，因為呢你記唔記得我哋問佢「喂有幾多層樓先」，咁諗住大佢囉，佢直程唔出聲。

專家Dickson：靜咗成分鐘呀。

東方昇：所以的確可能佢未來老公真係好有錢，心知乎一結婚即刻比一棟樓佢，所以佢即刻靜咗，而佢一定唔會係冇得選擇，因為當中已經同另外一個人傾緊計呀嘛。

Kneta：交流下。

東方昇：以佢有拍過咁多次拖，所以根本呢個盤啊真係好優厚。

專家Dickson：有得揀㗎喎。

東方昇：所以點解咁難揀，因為……

Kneta：真係～～～～～咁樣樣囉。

東方昇：但係冇呀，係冇好結果㗎。即係問你個問題就係愛情究竟可唔可以妥協呀嘛，我個答案就係愛情除咗愛之外呢，其他所有嘢都可以妥協嘅，只要你愛對方，就算對方冇乜條件，你咪就佢囉，你都夠愛就得啦，但佢呢個情況根本母愛，就乜都唔係啦。

Kneta：我覺得唔係妥協係交易。

東方昇：哈哈啱呀啱呀，真係勞資糾紛。

Kneta：係呀係呀。要想小額錢財。

東方昇：真係勞資糾紛啊， 唉一係就揀咗麵包，咁就唔好理愛情。我唔會睇小你嘅，呢個選擇嚟嘅啫。

Kenta：唔好咁貪心呀。

東方昇：每個人有唔同選擇。

Kneta：但我會覺得佢呢個真係一個貪心嘅小狗嘅典範。

專家Dickson：嘅故事係咪呀？

Kneta：係呀，邊度有得即係又想愛情又麵包，冇可能呀。

東方昇：佢自己含着嚿金，跟住見到嗰度有舊骨，又想要埋，又唔想放低自己嗰個金，大家千祈唔好學佢。

專家Dickson：不要學習。

東方昇：不過我覺得佢迷惘姐，希望佢講完之後反思下啦，好，差不多，拜拜。