【#香港之最】香港最早被列為法定古蹟嘅古蹟係喺邊度嘅呢？原來歷史建築評級都唔可以完全保育古蹟？— Google Map 不會告訴你的事 EPISODE NO.7

【GoogleMap 不會告訴你的事】

Hi，大家好，我係阿肥。歡迎嚟到GoogleMap 不會告訴你的事之《香港之最》。

法定古蹟，係指受到香港法例第53張古物及古蹟條例所保護嘅歷史建築，或者係具有考古價值嘅地方。不過，大家又有冇諗過，究竟古物及古蹟條例又係點樣嚟嘅呢？而第一個受到法律保護嘅法定古蹟，又係邊一度呢？而嗰個古蹟又有啲咩咁特別呢？

不如就等我問吓附近的人，又睇下佢哋知唔知呀！

【訪問】

阿肥：如果有一提起香港嘅法定古蹟呢？你第一時間會諗起邊一個法定古蹟？

受訪者1：我諗應該係港島區嗰邊，有間紅屋。

受訪者2：虎豹別墅。

阿肥：你呢？

受訪者3：誒⋯⋯立法局。

受訪者4：香港大會堂。

受訪者5：鐘樓。

受訪者6：大館算唔算係呢？（阿肥點頭）係啦！大館啦！

阿肥：係你覺得全香港有幾多個法定古蹟呢？

受訪者：啊⋯⋯十零廿個掛？（身邊的人：唔止掛！三十幾個啩！）

受訪者：多過廿個⋯⋯廿、三十個？

受訪者：廿、三十個？

受訪者：百幾個？

受訪者：我記得好似三百個左右。

受訪者：一百零八個。（身邊受訪者：二百？）

阿肥：你知唔知第一個法定古蹟係邊度？

受訪者：真係唔知喎，哈哈哈哈。

受訪者：好問題，我唔知。

受訪者：係咪嗰啲，醫院嚟㗎？

受訪者：第一個法定古蹟呀？真係唔知喎。

受訪者：估唔到，真係。

受訪者：唔知。

受訪者：皇后像廣場？

受訪者：美利樓？

受訪者：宋王臺嗰啲？

受訪者：天星小輪算唔算？

問完唔同朋友之後，似乎佢哋都對香港嘅古蹟有一定嘅認知。不過就好似我一開頭咁諗，佢哋都唔係好清楚，第一個受到法律保護嘅法定古蹟係邊一度。不過其實我一早就知道喺邊！跟我嚟啦！

我依家已經嚟到法定古蹟嘅所在地，就喺我依家身處嘅大浪灣呀！大浪灣係位於港島南區嘅東面，石澳半島以北嘅一個海灣。喺秋天、冬天嘅時候尤其大浪，吸引咗唔少嘅滑浪好手，前往係香港少數可以滑浪，同時交通又比較方便嘅沙灘。而喺沙灘嘅旁邊嘅石壁，就有全香港最早嘅法定古蹟大浪灣石刻喇！

喺身後面呢個，就係大浪灣石刻喇。不如我同大家講下呢個石刻係幾時畀人發現呢？話說，喺70年代嗰陣，有個警察就喺大浪灣沙灘旁邊嘅石壁，發現咗一個90cm乘80cm嘅史前石刻。根據考古學家嘅估計，呢個石刻刻鑿嘅年份，係喺新石器時代，大概係喺七千年前至廿千年前不等。

呢個石刻上面刻有抽象嘅鳥獸紋，圖文大致係呈幾何形嘅。至於石刻上面嘅圖案，代表啲咩就眾說紛紜啦！有啲人就認為，當時嘅人覺得呢啲圖案，可以保有航海嘅人，於是就刻喺石上面。另外亦都有一種講法，石刻上面嘅圖案，其實係同祭祀有關。古時候嘅人希望透過石刻上面嘅圖案，表示對上天同埋對大海嘅敬意，藉此祈求風調雨順。

不過無論點都好，都已經證明咗香港係好耐之前就已經有人喺度居住過！有人類生活過嘅足跡，既然呢個石刻已經存在咗咁耐，點解要到到70年代先制定有關法律去保存呢啲咁有歷史價值嘅古蹟呢？一切就要由60年代開始講起喇。

70年代開始，香港嘅城市急速發展，唔少嘅城市建設都喺呢段時期相繼落成，例如有隧道醫院公屋，仲有唔同嘅商業大廈等等。而建造呢啲城市建設，少不免就要拆除一啲舊有建築，因為當年政府係無一個有效的政策，去釐訂唔同嘅建築有無歷史價值。所以，當年政府經常就住邊啲建築物應該要保留，邊啲建築物可以拆卸而煩惱。


直到1971年11月3日，前民政司局陸鼎唐爵士就草擬咗最初嘅《古物及古蹟條例草案》，當時佢喺立法局進行首讀嘅時候就指出，希望日後用呢條法例，去保護文物或者古蹟嘅時候，以確保有需要嘅發展，唔會因為要保存一啲重要性較低嘅文物而受到阻礙。

由此可見，陸鼎唐爵士希望透過清晰嘅法律條文。去釐清需要保育嘅古物同埋古蹟，以確保唔會喺發展期間，清拆咗一啲極具歷史價值嘅文物，亦同時唔需要因為側重於保育而放棄發展。

在同年嘅12月1日，立法局亦都通過咗《古物及古蹟條例草案》嘅三讀，呢條條例正式就成為咗香港嘅法例。

之後嘅1976年，古物古蹟辦事處亦都正式成立，佢哋嘅職責就係，為唔同嘅文物進行評級、釐定法定古物同埋古蹟。古物古蹟辦事處嘅最高評級就係法定古蹟。而次一級嘅就係一級歷史建築，之後就到二級歷史建築，最後就到三級歷史建築。不過唔知大家又知唔知，法定古蹟同一至三級嘅歷史建築物，有啲咩唔同呢？

一切就在乎一個「拆」字。

頭先都講到古蹟辦喺1976年成立，致力確保香港最具價值嘅古蹟文物建築物，得到保存落嚟。咁就好似啱啱咁講，古蹟辦可以將唔同嘅古蹟分別評為：法定古蹟、以及一至三級歷史建築。不過喺依家嘅保育政策評級機制之下，一至三級歷史建築只係屬於參考性質，係無任何嘅法律保護效力，而只有評為法定古蹟嘅歷史建築物，先知真正可以受到法律嘅保護，而喺任何嘅情況之下都不能被拆毀。

因此，就算古蹟辦將建築物評為一至三級歷史建築都好，呢個建築物嘅持有人，亦都有權拒絕呢個評級建議，而按照自己嘅意思處理呢個建築物，例如2014年被清拆嘅何東花園。何東花園係一座建於1927年嘅豪宅，當年係由何東爵士買入並加以改建。佢嘅建築風格係融合咗中西建築特色。嗰陣時，山頂係西方有錢人居住嘅地方，而何東爵士就係第一個買山頂物業嘅華人。

華洋共存嘅建築風格再加上何東爵士係香港近代歷史入面舉足輕重的地位，所以佢嘅故居係極具歷史價值嘅。而到2010年嘅時候，何東花園更加正式被列為一級歷史建築。不過亦都喺同年，何東花園嘅業主何東爵士嘅孫女，何勉君就希望將何東花園拆卸重建，而政府得知呢個消息之後，就希望可以將何東花園保留落嚟，所以就向何勉君提議，透過用換地嘅方式，或者以HK$30億收購何東花園。

可惜嘅係，最終呢座極具歷史價值嘅何東花園，喺2014年嘅時候就被完全清拆。而喺2015年嘅時候，何勉君亦都將何東花園嘅原址地皮，以51億賣出。政府用30億佢保育何東花園，聽落就好似好多，但從何勉君賣出嘅地皮嘅結果，我哋就可以睇到呢個地方嘅市場估價，其實根本就唔只係得30億。

我哋亦都唔難明白，喺寸金尺土嘅香港要保育文化古蹟，唔係一件容易嘅事，有時係需要犧牲天文數字嘅利益，先可以保育到呢啲文化古蹟。而呢啲文化古蹟充滿著歷史嘅痕跡，係香港歷史嘅一個見證。但可以肯定嘅係，依家嘅文物保育政策，係存在一定嘅局限性。

保育古蹟一向都係一個好複雜嘅議題，因為箇中牽涉的「人」同「事」唔能夠單以「對」同「錯」嚟做判斷。

古蹟之所以需要保育，係源自於整個社會認知到古蹟嘅文化價值同埋重要性，遠超於單純嘅實際利益。而歷史古蹟之所以存在住呢啲文化價值，就在乎於我哋作為身處此地嘅人，去將故事承傳落去，之後再將呢啲故事流傳開去，咁呢啲古蹟先有佢存在嘅意志。

反之，如果少咗人去談論佢地嘅話，咁呢啲古蹟，只不過係一棟好普通嘅建築物。法定古蹟遍佈全港僅有一個喺你左近，或者一直係大家冇留意到，又或者大家只係習慣咗佢哋嘅存在。下次見到呢啲古蹟嘅話，除咗打卡之外，不妨了解下佢背後嘅故事令自己更加了解呢個香港作為講故事嘅人，將故事承傳落去啦！

今集GoogleMap不會告訴你的事之《香港之最》就嚟到呢度先。我係阿肥，我哋下集再見，拜拜！