3/6《圍爐取戀》PK前度決戰M底情聖 （嘉賓：洪嘉豪）

群：大家好！
東方昇：我哋今日有歌手洪嘉豪喺度，嘩！ ！ ！
洪嘉豪：好開心呀！我終於上到嚟啦，我第一次嚟100 毛呀。
東方昇：多謝你嚟啦。
洪嘉豪：多謝你哋邀請～
東方昇： 喂，但係你嚟都唔會饒恕你嘅，都要審問你嘅。
洪嘉豪來！好呀，嚟吖。
東方昇：咁我想問嘅問題就係呢，我見你啲歌全部都係慘情歌，咁你自己嘅拍拖經歷係咪都係好慘烈嘅呢？
洪嘉豪：又唔可以講好慘烈嘅，咁樣講好似好衰。其實……哈哈，Er…… 因為我……
專家Dickson：苦笑喎！ ！！
洪嘉豪：嚟緊有隻碟嘅另外B cut呢就有五隻歌，咁真係我真實一段感情嘅五個階段咁囉～ 咁就……你話係咪好痛苦呀？都唔係嘅～即係上一課囉！
東方昇：哦～都好正面嘅。

專家Dickson：咁你最深刻一課係咩呀？
洪嘉豪：學到最深刻一課就係唔好太衝動同一個人拍拖囉。因為有兩種㗎嘛，一係你好了解嗰個人之後一齊；同埋你唔係好了解嗰個人，但一齊咗之後再了解。
東方昇：係。
洪嘉豪：咁我其中一課就係後者囉。
專家Dickson：即係先鍾意，然後再了解。
洪嘉豪：係喇，咁就變咗呢，好似原來有啲嘢都係……冇話邊個錯邊個啱嘅，就係唔夾囉。
東方昇：就性格不合啦成日都話。
洪嘉豪：原來有啲嘢真係磨合唔到呀我覺得。
東方昇：咦，咁你經歷過咁多呢，其實你會覺得……代觀眾問啦！
Kneta：一段感情咁多……
東方昇：代歌迷問㗎 ！我諗好多人都想知，咁你覺得咩對象係適合你呢？
洪嘉豪：我自己都好誠實嘅，我都幾鍾意靚女嘅。
Kneta：嗯～

東方昇： Dickson都係㗎，所以你唔使尷尬。Dickson咁樣都係㗎 ！
專家Dickson：只不過係我得唔到啫！
Kneta：鍾意靚女但係冇。
洪嘉豪：如果你而家問我，我會希望嗰個女仔係叻嘅，但係佢又唔好太聰明囉。
Kneta ：太醒係咪好難……
洪嘉豪：太醒嘅話有時同佢……即係可能一件事但係大家兩個睇法，好難拗。
東方昇：咁就唔啱啦！根本唔應該同女人拗！係咪都認錯咁咪得囉！
洪嘉豪：嗱，係啦！我又唔鍾意喎。
東方昇：好啦！放過你啦！我哋今日都有個case嘅，而今日case就係想我哋鬧醒佢，因為佢仲鍾意緊前度咁樣嘅。好！我哋接佢入嚟！

東方昇：阿肥你好！
阿肥（花名）：你好你好你好。
東方昇：喂，以我所知你打嚟係想我哋……
Kneta ：鞭吓你喎。
東方昇：鬧吓你定鞭吓你，你想點呀？
阿肥：係呀，指點下迷津啦。
東方昇：好啦好啦，指點吓指點吓。你講咁可以講吓你嘅故事啦。
阿肥：話說早排我同拍拖三年嘅女朋友分咗手啦，跟住本來我都同佢求過婚嗰啲嘅，開始傾結婚嘅時候呢，就去到嗰啲樽頸位呀。即係諗緊…… 唉，咁之後會唔會幸福呢？係咪應該繼續同佢落去呢？咁樣。咁就其實呢個EX都唔算好嘅係呀，佢經常好多大話啦、試過出軌啦……
東方昇：嘩……
阿肥：咁佢發起脾氣上嚟就會郁手嘅。
群：哦～

東方昇：咁我哋就逐樣講吓先啦！
專家Dickson：譬如你啱啱講佢會講好多大話啦，咁你聽過最誇張果次係咩呢？
阿肥：我諗係某一年佢生日之前呢，就同佢發生咗小爭執嘅～咁原本佢講咗話想去某一間酒店staycation嘅，咁OK啦，去book啦。咁去到正日嗰日，佢就講到自己好唔開心啦，咁就唔想我陪佢過生日，想自己喺屋企陪屋企人過咁樣啦。咁就OK啦，咁我尊重你啦。直到之後呢，佢自己同我講話其實嗰一日呢，佢同咗第二個男仔去過一間酒店。
群：吓？ ！
Kneta ：佢同你講？
東方昇：佢仲要同你講？
Kneta ：咩事，係激將法定係點㗎 ？
阿肥：佢同我講㗎，我諗佢係激我嘅。
東方昇：咁佢有冇再講detail啲嗰日……
專家Dickson：發生咗啲咩時候下話？
東方昇：唔係唔係唔係。
專家Dickson：人哋俾個傷口你，你銳落去！

東方昇：因為我想了解吓，咁佢係部署左嗰日其實就同第二個男仔一齊，定係因為可能真係話同你有小爭執，跟住佢嬲得滯，就走去約第二個男仔出嚟？定係嗰個其實已經一直都係第三者嚟嘅呢？
專家Dickson：定係嗰個純粹係報復式語言呀？有冇可能呀？
阿肥：部署嘅，係真係有呢件事。影晒相嘅，睇晒所有相嘅。
洪嘉豪：吓？有咩相影呀？
阿肥：咁佢同個男仔上到酒店……
Kneta：唔着衫嗰啲下話？
東方昇：唔係唔係，着衫嘅？
阿肥：係着衫嘅。
洪嘉豪：但係你發現嘅？定係佢主動俾你睇呀？
阿肥：我自己睇嘅。
洪嘉豪：哦……
東方昇：即係你自己搵到？
阿肥：我搵到嘅。

洪嘉豪：我哋想問嗰個部處嘅意思係呢……即係佢生日之前同你講一次爭執其實係冇必要嘅爭執嚟嘅？
阿肥：就某一日，咁佢去我屋企過夜啦，跟住就送咗佢返工啦，咁我自己去剪頭髮啦。剪完頭髮之後呢，就咁啱有個朋友喺附近喎，咁就想約我食飯，咁我就同佢講啦，點知佢就發癲話咩：『點解我剪完頭髮唔係應該……』
東方昇：唔係返去洗頭！
Kneta ：哈哈哈哈
阿肥：唔係應該打俾佢問佢得唔得閒，放工有咩做先，然後先去約個朋友食飯。
東方昇：咦，佢咁大反應，因為嗰個朋友係異性嚟嘅？
阿肥：唔係，男仔嚟㗎。
東方昇：即係其實佢要你擺佢係第一位，總之你一有時間應該徵詢咗佢先。佢唔得閒啦，就寫個批文放你出去同第二個人見面。
阿肥：都可以咁講嘅。
東方昇：咁就因為呢件事鬧交？
阿肥：係啦係啦。

東方昇：而佢就可以同異性去爆房啦！即係咁樣？
阿肥：唔係咁簡單嘅。咁就嘈得好勁嘅，咁佢直頭打電話同我講我以後嘅生活除咗佢同埋返工之外咩都唔可以做。係呀，佢直頭係講到明呀。
專家Dickson：即係返屋企探親嗰啲都唔得㗎啦喎。
阿肥：攞批文囉，心情好咪批下你囉，心情唔好咪唔批囉。批完你之後又會嬲嗰啲囉。
洪嘉豪：係呀，將批文廢㗎！
Kneta ：（模仿）『我而家又唔鍾意喇』
洪嘉豪：總之男仔唔使申請批文㗎喇～唔係呀，唔好申請呀，真係冇用㗎個批文係。
阿肥：佢講完之後，我話唔得咁㗎喎，即係我本身自己好鍾意踢波嘅，我就問佢：『咁踢波得唔得呀？』佢話連踢波都唔得呀，我話如果踢波都唔得嘅話， 喂，監犯呀，都有兩粒鐘時間俾佢睇吓波啦！
東方昇：係呀，都有得去操場嗰度行吓，打下籃球。
洪嘉豪：喂，其實你講得出呢啲嘢，其實你係知㗎喎 ！
東方昇：你好清楚自己做乜㗎喎，就係做監犯囉！
Kneta ：哈哈哈哈

阿肥：我話你要限制我朋友嘅OK，你唔鍾意我咪少啲搵囉，咁但係你話踢波同埋運動呢啲，我直接同佢講：『踢波呢樣運動係我唯一』、『係減低對住你嘅壓力嚟㗎』
東方昇：你係咪咁樣講先？
洪嘉豪：你係咪真係咁叻先？
阿肥：我直頭咁樣講呀！我話對住你好多壓力呀其實，唯一簡單嘅嘢你都唔俾我做，我會爆㗎喎！咁樣真係行唔到落去，我咪同佢講分手囉。
洪嘉豪：終於聽到啲似樣啲嘅嘢喇！
阿肥：都冷戰咗一兩日嘅。
東方昇：都係唔踢波喇。（模仿）『對唔住頭先語氣重咗少少！』
阿肥：冇可能唔踢波㗎 ！死㗎真係。

東方昇：但都係妥協咗嘅？都俾你踢波？
阿肥：踢波嘅。
東方昇： OK OK OK。跟住佢話：『唉，好啦！俾你踢波啦！』、『咁我哋一齊返啦』咁樣？
阿肥：呀，唔係。跟住之後某一日我喺Instagram見到我個EX養咗隻狗啦，咁就反正我自己有養狗，咁就想落去散下心，咁問佢：『有冇時間出嚟幫吓手呀？』、『有少少嘢想問吓你呀』、『想知道下其實你哋啲女仔係咪都係咁癲嘅？』即係話『乜都限制住……』嗰啲呢。『有咩辦法可以解決呀？』咁樣。咁我其實冇諗其他嘢嘅，純粹都係落去行個圈，屙篤尿。
東方昇：屙篤尿？
群：哈哈哈哈
Kneta ：隻狗屙篤尿定係你屙篤尿先！
專家Dickson：但係你都幾大膽㗎喎！你女朋友係連你搵啲男性朋友都唔得，而你走去搵個EX。
阿肥：嗰下其實光明正大，咩都冇做，咪真係放狗咋嘛！
洪嘉豪：但係你踢波都踢唔到喎……
專家Dickson：你踢波仲光明正大啲喎。

阿肥：最後冇去到嘅。最後佢約我放狗嗰個時間呢我就走去book嗰間酒店，我都算啦，唔去啦都係。
東方昇：所以佢係心癢癢想去，但最終佢係冇去到嘅。咁佢又點解知呢，你嗰陣時嘅現任。
阿肥：我唔知佢點樣可以睇到我Instagram嘅嘢。
東方昇：所以係咪因為佢知道咗呢樣嘢，所以佢先約另外一個男仔去staycation呀？
阿肥：哦，係呀！
群：……
東方昇：嗱嗱嗱，我想總結下先。即係其實佢就出軌啦，但係其實你自己都心癢癢，又試圖同EX放狗嗰啲，跟住佢就知道咗啦。嗱，好簡單，咁你又講到佢脾氣差呀，有好多唔好呀，咁咪分手囉。
Kneta：但係我都有聽你講話求婚喎？
東方昇：係囉，咁點解會去到求婚呢？
阿肥：我都係認住佢仲細嘅， 24、五、六啦咁樣。我覺得我自己有能力順服佢呀，或者感動佢呀。
洪嘉豪：英雄主義上身呀！
阿肥：男人係咁㗎啦，或者佢某一日會諗痛呢咁樣。
東方昇：跟住就求婚喇？
阿肥：佢想嘅，我知佢想嘅。我都同佢講到明㗎啦：『你而家咁癲，我真係冇辦法喎，唔係呢個時候喎，起碼等你識諗少少先啦！』佢都話：『我會乖㗎喇。』即係講到自己好識諗呀，佢話：『我會俾返你踢波㗎』
群：哈哈哈哈
東方昇：係係，最緊要

阿肥：咁我就OK啦，我話我求婚嘅話你真係要定性啲喎。
東方昇：跟住都去到談婚論嫁呀，幾好呀，咁跟住呢？
阿肥：之後？之後咪又係得個吉囉，求完婚都係咁。嘩！我真係成世仔最後悔就係做呢一樣嘢。
東方昇：以我所知你今日打嚟呢就係最尾你就分咗手嘅，跟住你有新戀情啦，跟住你又唔捨得呢個喎！我哋聽你嘅經歷啦，就睇得出佢真係對你好差吖！
Kneta ：阿肥係一個有少少被虐狂。
洪嘉豪：斯德哥爾摩症候群
東方昇： M底！
Kneta ：即係難聽啲講句，真係好賤㗎咁樣。因為個女仔對你咁衰，之後你又求晒婚，之後都仲係出軌。好啦，你哋分開咗，之後你搵咗個好好嘅女朋友，咁你話係咪賤呀？
東方昇：即係仲記住佢。
阿肥：我有諗過話其實點解自己咁賤呢？即係拍到自己都冇乜尊嚴呀，簡直都唔係男人嚟嘅。
洪嘉豪：你知㗎喎！
阿肥：我知㗎，所以我咪每一刻都會同自己大交囉。左腦：『哎呀！你之前嗰個咁賤，而家個個咁好』之後右腦：『唔係喎，之前嗰個發癲嘅時候佢先會咁姐，唔癲嗰陣，你地兩個又好開心㗎喎！周圍去影相㗎喎 ！』不停咁打交囉。

東方昇：以我所知，你而家係有新嘅戀情㗎嘛？
阿肥：係呀。
東方昇：咁理論上，如果你真係鍾意宜家呢個呀，其實你會忘記舊嗰個啦！或者其實而家嗰個係咪只不過係水泡嚟嘅咋？
阿肥：嗱，我唔會咁承認嘅。如果係水泡嘅話，哎呀，算啦，不如直接同佢分手，再試吓追番我之前嗰個。其實我就唔想嘅，其實佢真係好嘅。
東方昇：咁喂，如果佢係好……
Kneta ：你不如同佢講：『你唔好對我咁好啦』
東方昇：你咪全心全意鍾意新嗰個，忘記舊嗰個囉。
阿肥：即係可能同新嗰個住得有啲距離啦，唔係成日見到先啦，同埋放工返工又好難約啦，我覺得有拍拖好似等於冇拍拖咁。同埋佢比較少講嘢呀，我又鍾意過多講嘢。
東方昇：嗱，首先我唔理舊嗰個先啦，我覺得你而家同你新嗰個一齊……
洪嘉豪尊重囉！
東方昇：你唔鍾意佢就分咗手先喎。
Kneta ：我覺得新嗰個未必啱你囉。即係你想要嘅嘢喺佢身上得唔到嘅時候你就會諗返以前，但係以前唔係好㗎嘛，咁就代表其實兩段感情都未必適合你。
洪嘉豪：你覺得你需唔需要分手先？