#MM｜90後前MK妹化妝師會考2分 為移民英國轉行做水電技工 月薪$20,000起 為考英國電牌重新讀書 由毅進讀到高級文憑：滿足感在證明自己可以做到｜#700萬種生活 #4K

(由細個開始, Nijoles就做左好多爸爸叫佢唔好做既事，但要講到最反對既事呢，就係佢決定轉行做水電。一家五口，有三個都係做水電，爸爸同哥哥仲係做左好多年既大師傅，所以好清楚做水電既危險。)

第一間公司係上Facebook搵既，首先要入裝修group，跟住就自己再開post話想搵工。我有同爸爸講我去做水電學徒既，其實佢話「下 你去做? 你點解唔跟我學」佢有咁樣講過，但係我話「我做咩要跟你吖? 你都唔請我」，我知道如果我同佢一齊做嘢就一定會火星撞地球。

(NIJOLES去買料
NIJOLES︰早晨~20膠喉一紮，25喉一紮，膠布一餅，係咁多
源哥︰好，知道，汁貨

源哥 - 電氣材料店老闆
(係咪買開買熟架啦已經?)
源哥︰我識左佢好多年囉，好特別吖 哈哈…通識男仔做架嘛呢啲係)

頭先去買完嘢啦，跟住依家就去地盤既，黎緊呢個地盤係一個住家，一般通常一日留係一個地盤既。

我身形係嬌滴滴既，但係就因為身形成日比人睇小啦，我依家既收入呢，依家一個月大概就有20,000至25,000左右既收入。咁啱啱入行既時候就我地俗稱白紙，係乜都唔識既，咁開頭師傅做既嘢，你睇到佢做，需要啲乜野工具咁就記一記，知道佢要咩工具就要醒水啦。咁我就開始自己問佢地點樣屈 (喉)吖? 可唔可以教我吖? 可唔可以比我試下? 其實有好多人都keep住情願做靚仔，我搵呢一舊紙夠我生活就夠架啦，我唔需要學更加多既嘢，但係我自己就唔甘心一句做靚仔比人指點。

靚仔同中工既分別就係，一定要識獨立工作咁先至為之一個中工，咁同埋一定要識睇圖，同埋要諗埋啲線路點樣走，你見到一個插蘇好似好簡單，要識睇圖識得點樣分啲線路。

(你有冇跟埋阿哥一齊做嘢?)
我有陣時都跟阿哥一齊做嘢既。
(我頭先一上黎個陣就見到你，一黎就做左個屎渠先，點解唔留返屎渠比你阿妹做呢?)
Ricky - Nijoles哥哥/22年水電經驗
Ricky︰咁都比你發現到個屎渠，因為頭先我係好急尿，大家都要用既見到有時間就做左先啦，我係會掂到啲污糟水同埋一啲乾左既正野
Nijoles︰我係避免，可免則免，通常都係逃避唔想掂落個到既
Ricky︰大家咁話
(就留比阿哥做啦?)
Nijoles︰冇錯，就係比阿哥做或者比其他師傅做既，佢地通常都係唔戴手套既

(Nijoles依家自己開左間公司，有時會搵爸爸同哥哥一齊做Freelance，水電可以話係裝修既先鋒隊，例如一個家居裝修就要經過呢7種技工上場︰1.)清拆工 2.)水電工 3.)泥水工 4.)木工 5.)油漆工 6.)冷氣工 7.)清潔工。Nijoles呢一類水電工就係拆場之後最先上場既技工，負責鋪水喉電喉煤氣喉等等。好似如果唔係頭先阿哥駁好條屎渠，其他人就連廁所都冇得去啦。)

Nijoles︰你唔係「彈墨」咩?
Ricky︰唔怪得之我唔見左我腳架啦
Nijoles︰下 你個腳架係我屋企好耐啦
Ricky︰係咩
Nijoles︰係吖，我以為你留比我

(*彈墨︰拉「師傅線」比其他師傅做高度標準)

Nijoles︰你企埋去先，咁我依家地下去到一米係呢個位，但係鋪左磚之後地下就會厚左，咁到時就會升高左，咁呢一條就係基準線，呢個係假設你係企係磚上面個高度，一米就係到

Nijoles︰加膠布
(係咪廢事導電吖?)
Nijoles︰係吖
(好穩陣喎 仲熄埋個電製)
Nijoles︰我驚死
(但係你有冇試過比電電過?)
Nijoles︰我有試過比電電過，有啲電線上一手包得唔好就吉住左我，我一掂落條線到就電親
(有咩感覺?)
Nijoles︰比電電親咩感覺有啲爽既 哈哈
(你叫Sam一陣試下)
Nijoles︰電死佢阿

(你搞咩咁大陣仗吖?)
Nijoles︰因為成身都係塵囉，如果吾係皮膚會好乾架
(你黎緊要做啲咩阿?)
Nijoles︰要𠝹牆，同埋會好嘈，我係比較誇張啲既，通常師傅都冇好似我咁樣既
(點解你會咁誇張?)
Nijoles︰因為好嘈囉等陣個部機

(*鋪電喉步驟一︰𠝹坑 指係牆身𠝹出要鋪電喉既位置)

我阿爸比我用呢其實佢都有擔心既，佢見到我隻手唔定，開頭都會幫下我既，但係見到我開始熟練啦佢都會夠膽放心比我去做。

一掂到啲塵我其實有皮膚敏感既，同埋好易痕癢，有師傅曾經問過我「哇 洗唔洗包到咁吖?」，我就話「我唔會好似你咁架，你睇你皮膚乾到爛曬龜裂曬咁樣」，佢就會知道我係女仔要做保養

(*鋪電喉步驟二︰鑿窿 用黎收埋啲喉)

你會見到呢啲炮係完全吾會比我掂既，你整傷左賠唔返個女比人，可能你𠝹一𠝹見骨咁樣。

(原來平時嘈住大家訓覺既聲就係咁樣黎架啦)

(呢一支係咩吖?)
Nijoles︰呢一支叫炮
(你啱啱揸住支炮打埋個牆個陣其實係咪要好大力架?)
Nijoles︰係因為我用隻腳借力，我試過比石擦傷，所以我先包到咁密

我第一次做既時候係「打瓦仔」，即係打啲磚，因為磚碎左都幾鋒利，佢啲碎就飛落塊面到刮損左。

呢一個窿等陣係做一個插蘇位。

(我見到你隻手指都有gel甲啦，你啱啱講你用個啲工具咁重型，會唔會震爆指甲?)
Nijoles︰撞崩個啲都會有既，女仔整指甲係為左自己開心，返學其他人睇唔到我隻手既

(鋪電喉步驟三︰駛電喉電線)
咁可能爸爸成日睇死我既關係，我就唔可以衰比佢睇，我一定要做到為止。

盛哥-Nijoles爸爸/40年水電經驗
(點解會反對佢個陣?)
盛哥︰覺得佢女仔阿嘛，又後生，吾好咁快做咁粗重既工，個陣時諗住佢做啲文職，但係大左之後佢做左呢行，見佢做得有板有眼就差唔多啦

(但係到一齊做既時候有冇開心?)
盛哥︰開心架，可以挽咁做野囉，可以一齊食飯，大家嘻嘻哈哈差唔多夠鐘又去挽，食完飯返黎又再拚過

(佢做起野上黎個陣，會唔會嗲下你? 因為父女既關係就唔計較做多小小)
盛哥︰都會有，唔多唔少見到都會辛苦做多少少，係佢做多少少，我唔會做多少少架，因為經驗係比佢吸收架嘛，我做埋咪攞左佢經驗，佢學唔到野架啦

(佢以前做化妝啦，你有冇話鐘意佢邊份工多啲呢?)
盛哥︰我鐘意佢做化妝多啲，因為佢細個鐘意畫畫好叻架

(大家冇睇錯，真係首飾箱都變工具箱，Nijoles曾經係24歲個陣去澳洲working holiday左3年，靠特技同婚宴化妝為生，返到香港就決定唔揸眉筆變揸磨機同埋電炮。)

呢啲就係我以前做化妝搵食既工具。

(其實你依家揸個啲野同以前揸個啲野既份量都差好遠喎)
我攞支掃可能幾隻手指就得啦，試過有一次朋友結婚我要化左妝先，佢話「原來係阿妹黎架，同平時咁大分別既，呃到人喎咁樣」

(由化妝轉行做水電其實都係為左移民生活出路，Nijoles體驗過外國生活之後覺得好難返轉頭，好多國家都將水電技工列為人手短缺既行業，好似上年澳洲技術移民配額最多既10大職業當中，電工就排第四有過8,000個配額，仲要普遍人工都唔錯架。英國既電工平均年薪有大約36萬港紙。)

唔去working hollidayl由是可，返到黎香港個種生活係比以前我覺得更加難受，因為一路以黎都覺得香港既生活好急促，覺得好唔舒服呢有種無形既壓力，可能星期六日你叫我出去我都唔好啦，我不如帶隻狗去狗公園，同佢周圍去食好過。

(於是Nijoles用盡方法想移民，有BNO既Nijoles最平既移民方法就係去英國，但係因為英國唔承認香港既電牌，所以去到英國就要再讀書考牌，而係去英國之前，Nijoles既讀書之路已經好崎嶇啦。)

一開始畫圖係真係要記好多野，因為每一個符號都代表啲唔同既野，同埋佢地最主要用英文為主，咁我就要上網不斷查個啲名同埋要記佢地點樣串法。我英文其實好差，會考係0分，呢一份係我會考既成績，其實我都唔知自己係0分定係2分。

(加埋幾多分呢?)
Nijoles︰該係0分

(你覺得以前返學讀書難啲定係水電難?)
Nijoles︰讀書返學學既野難啲，因為我讀文科我唔鐘意背野，雖然學呢啲圖都要記得，例如用咩保險絲，可能10M/M保險絲就要用1.5線，到左20M/M保險絲就要用2.5線或者係4M/M線，即係要死記囉呢啲野。

咁跟住做工程既時候係逼住要進修，但我想讀個個高級文憑就一定要有中六畢業，咁我就去左讀毅進文憑跟住再讀高級文憑。

(學水電除左令Nijoles由會考得2分，變到有移民生活既可能，仲比左咩意義Nijoles呢?)

盛哥︰係屋企就有時斯文有時發脾氣，係做野既時候都脾氣發既

(你地兩個感情好唔好架?)
盛哥︰感情好唔好，你睇咁樣算唔算感情好呢? (搭博頭) 佢唔似我個女做野既時候

(你知唔知佢想移民?)
盛哥︰我知道，見面少左，佢有佢自己既理想

Nijoles︰做水電既滿足感就係人地覺得你唔得既野，竟然做得到，佢地會讚你，都係有種自豪感啦，同埋因為我太細粒啦，佢地真係好睇我唔起既。

之後我估都會為呢個職業係終身架。