【#點解問點解】點解鑽石山會叫鑽石山？鑽石山係咪真係有鑽石？鑽石山又點解會有一個荷里活？— Google Map 不會告訴你的事 EPISODE NO.6

【#點解問點解】點解鑽石山會叫鑽石山？鑽石山係咪真係有鑽石？鑽石山又點解會有一個荷里活？— Google Map 不會告訴你的事 EPISODE NO.6


「知唔知道鑽石山點解叫做鑽石山呢？」「應該係喺山上面有鑽石卦？」「喔 唔知道喎」「唔知啊 我要返工啊」鑽石山Diamond hill一聽到個名就會令人充滿好奇心嘅地方。我諗每個人對鑽石山第一個諗法都係︰呢個地方係咪真係有鑽石。

近年嚟，鑽石山嘅價值仲勁過有鑽石。一嚟佢被唔少網民形容為全香港最好住嘅地方之一，二嚟佢亦都成為咗香港一個好重要嘅交通樞紐，三嚟佢亦都鄰近之前所講嘅新興文化區︰新蒲崗，即係代表佢亦都鄰近埋啟德新發展區。可以話鑽石山就好似目前香港最中心點一樣，好食好住交通又方便。

不過唔知大家又知唔知，既然係冇鑽石嘅話，咁鑽石山點解叫鑽石山呢？究竟鑽石山以前又係點，係咪真係一座山呢？

Hello大家好，我係阿肥，歡迎收睇《google map不會告訴你的事》之《點解問點解》。今日我就嚟到鑽石山呢度，就同大家研究下鑽石山究竟點解叫做鑽石山啦。不過喺研究之前，等我問下附近嘅街坊，睇下佢哋又知唔知道鑽石山呢個名嘅由來係點樣吖。

你係咪喺附近住咗好耐㗎啦？「誒係啊」「係啊」「大概一年啦」「廿九年」「誒好多年㗎啦都...十幾廿年」

知唔知道鑽石山點解叫做鑽石山呢？「唔知」「誒好似係礦場定咩呀？」「真係唔知」「唔知」

覺得以前嘅鑽石山同而家嘅鑽石山，最大嘅分別喺邊度呢？「未有呢啲廣場㗎嗰時」「而家就係...熱鬧啲囉呢度」「多咗好多新嘢啦，多咗可能食嘢呀，或者買嘢嗰方面都會多咗喇」

啱啱就問咗唔同嘅街坊，唔同嘅街坊都有唔同嘅諗法。但係其實實情又係點嘅呢？等我一路行一路話畀大家聽啦。

就好似當年某一個廣告咁，好多人聽到鑽石山呢個名，可能都會以為有一座山咁大嘅鑽石，又或者係一定有鑽石礦，所以先將呢個地方命名為鑽石山diamond Hill。不過實情當然就冇咁美好，鑽石山之所以叫鑽石山，坊間流傳過好多唔同嘅解釋。

有人話，當年鑽石山附近嘅花崗岩石礦場所出產嘅礦晶閃令令，就好似鑽石咁，所以就叫做鑽石山。亦都有人話，當年鑽石山山峰形狀好似鑽石咁樣樣，所以鑽石山就係指嗰種好似鑽石咁樣嘅山。不過最多人相信嘅嗰個解釋就係話，鑽石山其實唔係指有鑽石嘅山，而係有人喺度鑽啲石嘅山，即係話鑽石其實唔係指嗰種價值連城嘅石頭，而係一個動作嚟。

而事實上，喺宜家鑽石山附近一帶真係有一個開採咗幾十年嘅石礦場，而香港三條過海隧道嘅其中之一，東區海底隧道就係靠呢個石礦場開出嚟嘅石而起嘅。而呢個礦場嘅原址有一部份早喺1982年就發展成而家嘅鳳德邨，另外一部份呢就係90年代初期發展成而家嘅慈雲山學校區，最後礦場嘅底層就變成而家嘅大老山隧道入口處。

我相信大家講起鑽石山都會諗起我身後面個荷里活廣場㗎喇，但係大家有冇諗過一個問題，就係點解鑽石山會有個荷里活廣場呢？而荷里活同鑽石山又有啲咩關係嘅呢？其實答案就好簡單啫，喺前面，跟我過嚟啦！

我而家帶緊大家去嘅地方係一個地盤嚟，而呢個地盤嘅前身就係大磡村。而荷里活廣場之所以叫荷里活廣場嘅答案，就係因為大磡村。咁不如我又學下米迦咁，等我由頭開始講起啊。

相傳大磡村原本係一條客家村落，村入面嘅人都係姓朱，而呢班姓朱嘅原居民本身就係祖籍廣東長樂縣。而喺乾隆年間，當時有個叫朱居元嘅人就帶埋佢老婆同埋八個仔嚟到當時嘅新安縣，其後朱居元嘅第八個仔朱仁鳳，就向清廷買咗而家鑽石山以南嘅田地立村建祠、養豬種田。而呢個就係大磡村嘅由來。

而就好似之前講過嘅新蒲崗一樣，喺香港日治時期嗰陣，日軍為咗擴建啟德機場而清拆咗附近嘅村落，大磡村全村連同朱氏宗祠都被夷為平地。同時佢哋都將啟德機場嘅皇家空軍飛機庫拆毀，移到鑽石山重建，就喺大磡村附近嘅位置。再加上佢哋亦都喺附近建造咗一個半圓頂篷遮蓋嘅地下機槍堡，作為當時飛機庫全體機員以及技術人員嘅防空洞。而呢個就成為後來嘅「大磡村三寶」其中兩寶，前皇家空軍飛機庫同埋機槍堡。

而喺日本無條件投降之後，由於全村被毀，朱氏亦都未能夠喺原址重建家園。雖然朱氏族人冇辦法喺大磡村重建佢哋原本嘅村落，但大磡村就吸引咗好多人喺呢度做嘢，甚至喺附近住。而呢個就係同香港早期嘅電影業片場有關喇。

全盛時期嘅大磡村附近最少有五個嘅大型片場，分別係大觀片場、堅成片場，斧山道嗰邊呢就有永華片場、電懋片場同埋嘉禾片場。唔少嘅明星都係呢度發蹟，例如鼎鼎大名嘅香港國際巨星李小龍先生就喺呢度嘅嘉禾片場打響名堂。據聞佢以前仲成日揸住架紅色benz進出嘉禾片場㖭。

除此之外，由於大磡村同影星開工嘅地方相近，佢哋嘅生活亦都離唔開呢個地方。例如狄娜、蕭芳芳、仲有許氏三兄弟許冠文許冠傑許冠英，就最鍾意幫襯附近嘅擔擔麵舖。同時正因為有唔少嘅大明星經常出入大磡村，亦都令到大磡村成為當年嘅追星場地。所以大磡村，甚至係鑽石山就成為咗香港呢個東方荷里活嘅主要片場。而荷里活廣場呢個名，就係為咗紀念呢件事而嚟。

而為咗方便拍戲，當年有唔少嘅電影人都住喺附近。例如有大導演李翰祥、影星王萊、賀賓、鮑方，以及係大磡三寶嘅最後一寶「大觀園四號石屋」住過嘅著名影星喬宏。當年上海商人楊守仁就喺附近嘅大磡村買地，以鑽石山石礦場所出產嘅花崗岩石，建造咗22間兩層樓高嘅石屋連花園去畀啲有錢人居住，並命名為「大觀園」。大觀園呢個名如果大家係心水清嘅呢，應該係知道係嚟自文學名著《紅樓夢》。所以楊守仁就希望除咗係借大觀片場呢個名之外，亦都希望將呢個地方比喻為紅樓夢入面嘅大觀園。

當然大磡村除咗有「豪宅」之外，同時亦都有寮屋區。當時因為係大逃港時期，數以十萬計嘅難民從中國大陸走難落嚟香港。嗰陣時嘅港英政府一時之間冇能力安置呢批難民，所以就容許佢哋搭建寮屋居住。而鑽石山嘅大磡村就係其中一個寮屋集中地。

大磡村寮屋區大部份嘅建築都係一到兩層樓高嘅木屋、寮屋或者鐵皮屋。當中亦都有專賣車仔麵嘅店舖，亦都有賣奶茶嘅咖啡檔，同埋一間古舊嘅米舖。大磡村甚至有獨立嘅消防隊伍同埋童軍組織，就好似一個自給自足嘅社區咁。

而同一時期，隨著香港50年代工業興起，當時嘅大磡村都有唔少嘅小型工廠，而鄰近嘅新蒲崗亦都係當年嘅工業重鎮之一。隨著7、80年代香港經濟起飛，嗰時由新蒲崗嚟到鑽石山地鐵站呢度就必經大磡村，所以當時嘅大磡村可以話係人頭湧湧，場面十分之墟冚。

不過去到後來，為咗配合港英政府喺70年代尾興建嘅地下鐵路修正早期系統，大磡村有一部份嘅木屋就俾政府拆咗。之後嘅80年代，港英政府為咗延長龍翔道，就將大磡村一分為二。再加上北面範圍嘅尚餘部份木屋喺1981年嘅一場大火入面被完全焚毀，所以港英政府就決定要全面拆卸龍翔道以北嘅大磡村木屋區。

先係興建公共房屋，即係而家嘅龍蟠苑。另外就將上元嶺村拆卸，而賣出嘅地皮就畀九龍倉同埋會德豐發展私人屋苑星河明居同埋荷里活廣場。一條龍翔道之隔，大磡村同星河明居，一舊一新一貧一富嘅強烈對比，亦都成為咗香港導演陳果嘅電影《香港有個荷里活》嘅題材。

直到一九九八年，房屋署宣佈清拆大磡村寮屋區。經過一年幾嘅工程，喺2000年年底大磡村被正式夷為平地，成為歷史嘅痕跡。而而家大磡村嘅原址，將會發展成鑽石山大磡村綜合發展區，將會喺2023年完工。而大磡村淨返落嚟嘅，淨係得返大磡三寶，亦都將會喺大磡村重建之後搬到發展區西面嘅活水公園。

咁喺好略略同大家解釋咗鑽石山個名嘅由來，同埋大磡村嘅歷史之後，其實鑽石山都仲有好多個地方都好值得大家去嘅。就好似係釜山公園、志蓮淨苑、南蓮園池，呢啲地方都好有特色㗎。不過今日時間就差唔多啦，睇下將來有冇機會帶大家嚟到鑽石山呢度，睇下經過咗時間巨輪洗禮之後嘅鑽石山又會變成點樣啊。

今集google map不會告訴你的事 之 點解問點解，就嚟到呢度先。我係阿肥，我哋下次再見啦，拜拜。