#米紙｜24歲男生熱愛音樂 收藏各類經典黑膠金曲 至愛鄧麗君葛蘭 大學時期加入老歌歌迷會 跟60年代當紅歌手夏丹成忘年之交 仍不忘追捧Mirror 林家謙 #儲物紙

—
背景：播黑膠碟音樂前奏
Sybil:有啲似去咗迪士尼......唔知點解......我好期待佢唱歌。
背景：黑膠碟音樂開始唱歌
Sybil: 哇，咁多嘅有。
Michael: 濱城豔，係50年代嘅一首好出名嘅粵語歌。
Sybil: 係咪馬來亞春色......
Michael：係呀，係呀，係啊繼續啊，係吖、係吖。
Sybil: （驚訝）真係哩首啊！馬來亞春色綠野景緻豔雅......
Michael：哇，你都識啊？
Sybil：我只識唱這句......
Sybil：Michael佢屋企收藏咗差唔多有1000張嘅唱片，當中包括有唔同嘅年代。
頭先未錄影之前呢，Michael好興奮，想不斷講比我聽呀，但我話你等陣先，等陣先講我聽，好啦，而家可以了，可以介紹畀我聽。
Michael：嗱，我今日就攞咗啲五、六十年代香港嘅國語黑膠碟俾大家睇啦。
Sybil：係......
Michael: 首先呢啲就係當時嘅78轉留聲機唱片，你望下，係好墜手......噉呢啲就係80年代嘅產物啦，就係呀，王菲嘅第一隻唱片。
Sybil：哇。
Michael: 呢個就呀，羅文簽俾馮偉棠嘅碟啦（羅文 仲夏夜EP 1981年推出），呢個就係老豆以前92年喺樓下買嘅卅幾蚊（鄧麗君 難忘的 1981年推出），這是鄧麗君最後一隻黑膠新歌碟，咁而家就係價值不菲的，呢隻係鄧麗君嘅第一隻黑膠碟（鄧麗君 鳳陽花鼓 1967年推出）
Sybil：最儲得多係五、六十年代。
Michael:因為呢個都係我嘅主要嘅興趣。
Sybil：其實你由幾多歲開始聽？
Michael: 小五、小六到啦。
Sybil：小五、小六......
—
Sybil：你最鍾意邊一隻碟？
Michael：哇好難揀喎，因為唔同年代冇得比較喎，真係......
攝影師：好，10秒內揀，十、九、八、七......
Michael：這隻吧。
Michael：呢個就係啊，葛蘭姐嘅黑膠大碟，1958年的，呢啲係當時最出名嘅歌，哩首愛你的愛呢，係而家係仲hit架。
攝影師：依家仲hit？
Michael：（唱歌）我要 我要你的
Michael：一唱每個人都認識。

背景：播歌（葛蘭 空中小姐）我~我~我要......我要你的愛......

Sybil：除咗儲唱片之外，Michael都會經常留意唔同明星出席嘅活動，曬啲相俾佢哋去簽名。
Michael：有時我見到啲明星，我就會曬幾張相畀佢地簽名㗎啦，陳美玲咯，跟住呢個就Brian Hyland，佢係60年代嘅美國歌手。
Sybil：點解你會搵到佢簽名㗎？
Michael：就Email比佢可唔可以寄啲嘢俾你簽？咁佢應承咁咪佢喺美國寄返嚟咯。
Sybil：哇。
Michael：這是家燕姐，以前家燕姐咁嗰樣㗎，家燕姐都好surprise話，點解我會去搵佢簽名，咁樣傾咗一輪？
Sybil：其實Michael每一次如數家珍，咁樣話俾我聽啲歌手名同埋歌名嘅時候呢，我都要上網搜尋一下，不過呢，打開Michael收藏嘅時候，我竟然意外發現咗呢啲嘢。
Sybil：你真係鍾意Mirror。
Michael：哩啲雜誌我買嚟儲呀。
Sybil：佢連Anson Lo都有喎。
Michael：好多囉，跟住買下買下就好多，之後就擺曬喺度。
Sybil：我已經知啦佢鍾意呢，Ian、林家謙啦......姜濤喎......你究竟鍾意幾多明星幾多歌手呀？
Michael：冇呀，我係鍾意就鍾意㗎啦，有啲唔鍾意嘅就唔會留意囉。如果講最中意呢？即係唔好計年代咧？
Michael：嗯......
Michael：最鍾意嘅話？
Sybil：係。
Michael：鄧麗君、李香蘭，因為始終我聽鄧麗君大㗎嘛，噉到而家我都係聽鄧麗君嘅。
Sybil：Michael之所以咁中意聽舊歌，都係因為細個時受到爸爸嘅影響。
爸爸：有啲歌佢一播就訓覺啦，好似啲咩——張德蘭嗰啲啦，一聽就會好安靜㗎。
媽媽：我記得佢讀緊小學。
Sybil：那時候你記不記得他開始聽什麼？小學。
媽媽：唔記得啦。也是舊歌，不認識的舊歌，正常人唔會聽嘅。
爸爸：我記得有啲就舊到好離譜嘅，即係我都奇怪，點會識呢啲歌呢？
媽媽：半夜三更聽着黑膠，噉啊，（唱歌）我等著你回來~
爸爸：好奇怪，你咁另類嘅，點解你聽啲歌，同埋驚佢點樣同人哋相處啊？啫係活喺自己嘅世界噉樣囉。
Michael：唔係喎，好好喎，而家好多啲黑friend都會聽呢啲㗎喎，啲後生過我嗰啲喎。
Sybil：有沒有擔心佢沉迷到識唔到女朋友？
爸爸：有啊有啊，有擔心過㗎，不過後尾搵到女朋友囉居然。
Michael：咩居然，都已經好多年，幾年都有啦。
爸爸：咁每個人都有自己嘅興趣嘅，都唔係咩壞事囉，啫係我寧願佢聽歌就好過打機咯。

---

Michael：房內主要放了平時我睇嘅書噉，同埋如果係我最中意嗰啲就擺喺間房。
Sybil：Mirror簽名你都有喎。
Michael：係啊噉嗰陣時喺哀求個Auntie讓俾我嘅。
Sybil：哀求Auntie讓比你。
Michael：係啊，跟我媽媽年紀差不多大的姨姨。
Sybil：但係你都幾新舊交融，我見到呢度又有葛蘭啦，跟住有Mirror啦、鄧麗君啦、My Little Airport啦。
Michael：MC囉嗰個，呢個就陳慧嫻嘅巴士。
Sybil：見你好多書都係關於啲歌曲類型......
Michael：平時有時呢啲書係買嚟比自己研究同埋寫嘢會做參考。噉可能我鍾意一樣嘢，我咪想發掘佢咯。
Sybil：喺兩年前，Michael更加開設一個IG嘅Account介紹唔同年代嘅歌曲。
Michael：依幾年啦，去到新嘅90年代都有提㗎，都係班friend去鼓勵我去成立。佢哋都話哩啲係好重要嘅文化，如果我唔寫嘅話，就冇乜人會寫，咁所以我就做囉，一做就做到而家啦，都好多後生會follow呀，同埋有contact、inbox我噉樣囉。
Sybil：即係你個IG係寫啲咩㗎？
Michael：乜都介紹，介紹舊嘅歌曲呀明星呀，跟住背後會係滲一啲我諗嘅嘢呀，或者其他我知道嘅背景資料。
Sybil：我見你其實你成個生活都係圍繞住歌，其實你生活有幾多時間係聽緊歌？
Michael：冇計過，冇留意囉自己。係呀，一個人可能係做運動散步，個陣時冇嘢做噉咪聽歌囉。
Sybil：平日呢，Michael一得閑就會上網，睇下有冇人放碟，佢話有時人地放出嚟嘅碟，可能係百年難得一遇㗎，錯過咗呢就冇㗎啦，所以呢，佢食飯嗰陣時又睇，搭車嗰陣時又睇，以買到心頭好。拿拿拿，話口未完又有速遞送過嚟啦......

—

爸爸：你係唔係日日都有包裹收？
Michael：唔係，係有時候。這是當時國語時代曲，是歐西版，目標聽眾是外國人。你睇下全部英文㗎係。
Sybil：哦~
Michael：就係葡萄牙買翻嚟嘅。
Sybil：哩個買咗幾多錢啊？
Michael：如果喺香港嘅話，開價開兩千五冇得減，但係如果鬼佬嘅話，喺600零蚊咋，運埋過嚟先700幾，噉呢個就係吳鶯音啦、姚莉、林黛、李香蘭，李麗華、葛蘭、潘秀瓊，呢啲都係50年代尾香港國語嘅一線歌手囉。
Michael：我哋陣間約咗夏丹姐做個訪問，噉我而家就係執同佢有關嘅唱片囉，噉同埋呢啲係人地嘅唱片啦，但係佢有份做作詞，噉佢都叫我帶埋去囉。

—

Michael：夏丹姐，你好，你好。
Michael哥：（指著音響）1964年、1975年，哩個1857年。
Michael：呢位就係阿Michael哥，就係老歌歌迷會資深會員啦。
Michael哥：我叫佢細Michael啦。
Michael：呢個就係夏丹姐姐，噉就係，佢係五、六十年代香港嘅國語歌手。
Sybil：Michael喺20歲嘅時候，就參加老歌歌迷會而認識到60年代當紅歌手夏丹姐，同埋歌迷朋友Michael哥。有「歌仙三姊妹」之稱嘅夏丹、劉韻、華娃一直係唔少人心目中嘅經典歌后，夏丹姐喺70年代引退之后嘅生活一直低調，甚少公開露面，今次訪問佢都希望保持低調唔出樣。
背景：播音樂（我要你忘了我 夏丹）
Michael哥：以前哩啲歌星都是現場演出，不能出錯，一出錯成個Team要重新嚟過，佢哋就噉樣養成咗live唱歌嗰個實力。
夏丹（60年代當紅歌手）：第一次見佢呀，我就好驚奇。點解咁後生啊？攞住我個唱片叫我幫佢簽名，嗰陣時你20歲都未有。
Michael：有~有啦、有啦，21啊，21歲。
夏丹：我覺得好奇怪喎，乜你鍾意呢個舊歌咩？佢話係啊，我鍾意，我覺得又開心又驚喜，呢個後生仔呢，真係......識貨。
背景：香港老歌歌迷會五十週年晚會 2019年
Michael哥：老歌歌迷會是點樣？我地即係聚會吓囉，同埋啲前輩歌星一齊，食下飯啊，傾下計啦。
Michael：噉就係午餐，一圍圍中式嘅食。一枱歌星啦，就係坐中心主家席啦，後面就有20多枱啲會員上去唱歌啦。有時可能係撞啱邊個生日就慶生囉。
Sybil：佢係咪你最後生嗰個歌迷呀？
夏丹：最細就係佢，我們知道的就是佢。
Michael：唔出奇㗎，可能呢個節目出咗之後多啲人聽呢啲歌㗎。
Sybil：你會唔會覺得以前的歌曲同宜家嘅歌曲有冇啲咩唔同啊？
Michael哥：我自己覺得呀，歌詞表達方式唔同啦。
Michael：其實年代唔同無得去夾硬比較嘅，而家嘅詞係講翻，而家香港人嘅生活喺諗啲咩，佢哋嘅思想呀，或者係價值係點？譬如以前係可能係啲人保守啲嘅，同埋啲文學根底係好好嘅作啲詞，噉其實透過歌詞就可以反映出嚟啦。
攝影師：其實嗰個老歌嘅老，有冇一個實質咩年份呢？
Michael哥：哦，我講先下，呢樣嘢，我自己分界下，鄧麗君早期啲歌呢，我哋都當老歌，不過呢，鄧麗君85年之后嗰啲歌咧，我哋就唔當老歌啦，（指著Michael）你對老歌個概念係點啊？
Michael：其實哩啲問題好主觀嘅，即係嗱，我的年代啦，即係，可能我啲friend覺得老歌係咩呢？陳慧琳、容祖兒，咪老歌囉。因為我哋Generation喺聽咩Mirror Error Jace 林家謙、或者係周興哲啊，或者呢啲噉我哋個輩係，噉但係你話我個人興趣嘅話咧，即係我唔當一樣嘢係會老囉，其實經典囉。好歌留到而家咪經典囉，即係歷久常新嘅，反而你話佢係老，我覺得會喺即係搞到佢好似有啲Negative嘅意思囉，所以我就唔會形容佢係老歌，係經典金曲。

---

Sybil：曲風、唱腔可能每個年代都會有啲唔同，但相同嘅係，每個年代都會有啲歌陪住我哋成長，歌曲之所以流行係因為可以引起大眾嘅共鳴，一首首經典歌就係因為噉樣俾人唱下唱下就留芳百世。
Michael哥：冇可能首首歌作出嚟都係經典金曲㗎嘛，一定係一啲有經歷過一啲嘢嘅。一首歌可能可以投射到時代嘅背景都唔出奇，佢地個年代一啲歌，一啲係代表佢哋嘅，我哋個年代啲歌代表我哋嘅。當時一定作好多好多歌嘅，唔係首首歌都係流行嘅，一定係。今時今日都係一樣㗎。以前好多嗰啲國語歌呢，譬如話我第一次聽是鄧麗君的一見你就笑（1970年推出 作詞：劉而其（夏丹）作曲：冼華），我以為台灣歌嚟㗎嘛。後尾先知道，原來香港人自己做、香港人自己唱嘅，作詞嘅，仲係我哋眼前嘅。我覺得香港好了不起囉呢個地方，以前出咁多，咁多好嘢，我覺得......
Michael：係呀，嗰陣文化輸出呀嘛，即係我頭先俾你睇嗰啲美國版呀，歐西版嗰啲碟係全部印英文㗎嘛，噉咪就係即係輸出我哋嘅國語歌文化，即係以前係真係咁蓬勃囉，我地國語歌真係。

—

背景：2021年度叱吒樂壇流行榜頒獎典禮片
姜濤：我就喺呢個地方，我可以好有信心哋講我哋，一定會係亞洲第一。
Sybil：有人會話呢一番說話係豪言，但曾幾何時，香港嘅歌係流行到去日本、韓國甚至係歐美。香港嘅國語歌可以通行全球，係需要經歷唔少時間嘅洗禮，廣東歌相信都係噉樣。
Michael哥：音樂啊......音樂好似食嘢囉，不過唔係食落去嘅，聽落去，係精神上嘅食糧。
夏丹：音樂對我嚟講呢，有陣時我唔開心，我就叫我個囡開音樂呀，如果你唔開心嗰時你聽下音樂就會覺得開心啲。
Michael：佢帶比咗我好多嘢，包括係首先啦，生活嘅調劑品，譬如話唱片哩啲，我聽歌係好輕鬆嘅，其次係社交生活囉，我因為音樂識咗好多一啲聽歌嘅朋友，或者係圈內人都好喇，同埋音樂都畀咗一啲機會，我去寫一啲嘢去published，譬如話文啊文章呀，咁樣囉，所以其實我而家嘅生活狀態係我興趣帶比我嘅。即係如果我冇哩個興趣嘅話，我係唔會有依家嘅社交圈囉。
Michael：我覺得當自己係，你當係文化承傳嘅人囉，我覺得係，即係，如果我哋呢一輩唔做，噉咪幾時做呀？而家唔做嘅話，即係好多前輩，佢哋係仲在世，真係生勾勾出嚟食飯嗰喎，噉你而家唔去做，承傳去了解多啲，噉唔通等幾十年之後？

你心目中的經典金曲是哪一首？