大失所望！雷聲大雨點小？簡評《奇異博士2：失控多元宇宙》Doctor Strange in the Multiverse of Madness（完全劇透）【𠝹櫈電影學會】

其實佢根本就唔需要用殺人嘅方式都可以得到呢個所謂佢想要嘅家庭。因為佢喺WandaVision入面就表現過佢有呢種能力，咁樣就令到「想成為媽媽」嘅呢一樣嘢，只不過成為咗佢殺人同破壞其他嘢嘅藉口，而唔係從本身Wanda角色成長之後嘅思維出發去諗。可惜嘅係，明明喺WandaVision入面，Olsen就已經好成功咁拿捏到點樣立體咁呈現Wanda呢個角色，而喺呢套戲入面就好似一個大退步咁樣。再加上Wanda喺呢套戲嘅故事入面就好似無辦法控制到自己嘅脾氣同埋能力咁樣，呢樣嘢係完全同當時拍Captain Marvel同Black Widow嘅中心思想完全相反，因為呢個係典型認為女性係情緒化所以會發癲嘅描寫嚟。我唔係批評Marvel無呢啲進步思潮嘅諗法，而係奇怪明明之前Marvel都好著重呢啲對女性情感嘅描寫，對呢啲進步思潮嘅重視，咁點解到咗呢套奇異博士2嘅時候，又會用一啲咁Stereotype嘅描寫方式去塑造Wanda呢個角色，我就真係諗唔明喇。

而最好笑嘅就係，你到頭來係會發現主角同反派嘅目標根本無任何合理性衝突，姐係Doctor Strange喺呢套戲入面嘅目標就係為咗尋找開心嘅意義，而Wanda嘅目標就係想做一個老母，呢兩樣嘢喺本質上係無任何衝突嘅。簡單啲嚟講嘅就係主角同反派嘅目標有衝突，有衝突先至會有矛盾，有矛盾先至會有張力。以Marvel嘅角色為例，Thanos想撻手指，主角唔認同，咁先會打起上嚟。但喺呢套戲入面嘅主角同埋反派呢?Wanda有無唔畀Doctor Strange Happy?無。Doctor Strange有無阻止Wanda喺Westview玩煮飯仔?無。所以結果係無任何直接衝突，而基本上如果無America Chavez呢個角色既話，成套戲可以唔使做落去。然後你就會發現，如果Doctor Strange想Happy，Wanda想要個仔，咁有一個更加完美嘅解決方法就係Doctor Strange同Wanda生一個咪得囉。咁Doctor Strange咪Happy，Wanda咪有個仔囉。

係嘅，我知道你哋會話：「喂米迦你睇Marvel就唔好要求會有有深度嘅角色塑造啦」我明白，Marvel電影本身因為種種條件所限，例如一定要合家歡呢啲規矩令到Marvel嘅角色喺目前嘅電影系列入面係好難做到一啲相對比較深入同深層次嘅角色塑造，而只能依靠相對上創作自由啲嘅電視系列去達至更加深入嘅角色描寫。但係呢套奇異博士2對於角色嘅描繪未免真係過分平板喇啩?比起平時嘅Marvel電影重更加平板，例如平板咁描述Wanda有幾咁壓抑，平板咁表現Strange有幾咁中意Christine但又唔敢講，平板咁講出咗喺青春期嘅America係點樣唔確定自己係咪真係擁有足夠能力之類，無一樣嘢係合理嘅。更加唔使講嘅就係角色成長曲線之薄弱，係令到演員根本無辦法表演出佢哋本身眾所周知嘅精湛演技，令到演員都無辦法唔一齊沉淪埋一份，可以話係有一種Captain Marvel嘅既視感。

除此之外呢套戲重有一大堆敘述事件同埋設定嘅對白，不停咁灌啲設定畀觀眾食，好似玩緊TRPG咁。而呢套戲入面其中兩個MacGuffins，麥高芬，就係嗰兩本書，所以到最後你發現其實呢兩本書係無乜意義，真係純粹用嚟推動劇情，特別係The Book of the Vishanti，無錯，以一套鬼片嚟講，有呢啲MacGuffins當然係無問題啦，但以一套所有設定都要好謹慎，任何嘢都會Trigger到Fans有唔同嘅理論嘅Marvel電影作品嚟講，呢啲MacGuffins就會成為咗另一種期望落差。

講到底，我哋都會諗嘅係，究竟係咪真係編劇能力問題呢?姐係Michael Waldron係咪唔具備寫出好劇本嘅能力呢?咁就當然唔係啦，要知道嘅係，而家MCU入面最好嘅電視劇集系列Loki就正正係出自Waldron筆下嘅作品，有睇過Loki嘅大家都會知道Loki係幾咁突破同埋有深度。但係去到呢套奇異博士2，Waldron就好似由一個建築工程師變成咗一個地盤散仔咁樣，好機械性咁將唔同嘅角色連埋一齊就算，而唔係好似佢喺Loki嗰度咁，用唔同嘅方法去呈現角色嘅諗法、欲望同埋恐懼，令到觀眾會好想探索唔同嘅Loki究竟遇過啲乜嘢事，唔同嘅Loki心目中嘅Glorious Purpose係啲乜嘢。而由Tom Hiddleston所飾演嘅Loki又係點樣透過了解唔同嘅Loki，從而了解到真實嘅自己。但結果而家Waldron就炒哂車喇。

不過其實我哋應該要預咗係咁，原因就係之前有報道亦都有指出Waldron喺Raimi拍緊嗰陣都重改緊劇本，而Raimi亦都唔係一開始就接手呢個Project，而係原來嘅導演，奇異博士第一集嘅導演Scott Derrickson，話因為同Marvel創作概念不合而唔拍，所以Sam Raimi先至接手，而亦都令到呢套電影到最後要延期到而家先上到。所以喺咁嘅情況之下我哋都唔難理解點解呢套奇異博士睇落好似唔知點咁。因為可能呢套戲就好似科學怪人咁樣，將唔同情況之下諗嘅構思畀人強行連埋一齊，結果就成就咗呢一套令到好多人都有期望落差嘅奇異博士2喇。而之所以會出現咁嘅期望落差，某程度上都係嚟自Marvel嘅作繭自縛。

我相信大家都會同意，由Marvel Studio所創造出嚟嘅Marvel Cinematic Universe漫威電影宇宙係有幾咁宏偉，喺短短嘅十幾年之間，就已經超越咗屹立數十年嘅Star Wars Universe。而家嘅MCU就好似喺人類歷史上面都從來無出現過嘅嗰一個同咁多電影電視作品相關嘅虛擬世界，亦都為大家帶來咗好多好出色嘅電影同埋電視劇集，呢個無疑係Marvel Studio嘅成功之處，問題係智者千慮，必有一失，更何況係要去規劃一個如此龐大嘅世界觀。就算盡可能避免有犯駁位又或者Bug位都好，佢哋都無辦法避免嘅就係，喺唔同嘅階段入面，會有作品係不如平常水準。喺Thanos時代嗰陣，我哋有悶到抽筋嘅《雷神奇俠2：黑暗世界》，亦都有睇完都會好似女主角咁人如其名，成日都好似嚟M咁乸埋口面嘅《驚奇隊長》，呢啲都係Marvel嘅一啲相對上無咁出色嘅作品。不過喺後Thanos時代，Marvel電影都經歷咗啲大風大浪，例如有人話永恆族太悶，話黑寡婦說教意味太濃，亦都唔接受尚氣嘅成個Set up。但事實上Marvel Studio係曾經掌握到如何喺爆谷片同埋劇情片之間嘅平衡，亦都唔使講佢哋旗下曾經有一套提名奧斯卡最佳電影嘅黑豹Black Panther。

或者有人會問，Marvel Studio嘅電影係咪唔適合一啲好有個性嘅導演嚟執導呢?無錯嘅，雖然Sam Raimi今次拍奇異博士的確去唔到佢之前拍蜘蛛俠嗰陣嘅層次，而趙婷嘅永恆族畀人嘅感覺亦都係炒炒哋車，但事實上Marvel嘅電影亦都有不乏有超級鮮明個性嘅導演。例如James Gunn同埋Taika Waititi咁，佢哋做出嚟嘅效果唔單止係好咁簡單，佢哋係直程改變咗本身個系列嘅可能發展空間。咁所以我唔認為MCU係承受唔到有個性嘅導演，但只不過係今次真係唔太成功咁解嘅姐。

而就算講返係同呢套戲有關嘅電視劇集都好，其實Marvel喺創作WandaVision嗰陣係突破緊某啲位。至少喺第一季嘅前半部分，我哋會見到Marvel係點樣玩起唔同年代嘅處境劇，呢樣嘢係突破咗喺現代嘅傳統超級英雄故事起源嘅方式，而證明到呢啲超級英雄起源故事係可以Fit in到唔同嘅Genre，體裁。呢個係大家，又或者至少對於我嚟講，對Marvel第四階段嘅期望。我期望嘅係，Marvel係會有更加特別同更加配合返唔同嘅Genre嘅超級英雄故事敘事手法。例如喺The Falcon and the Winter Soldier入面，我哋就會見到政治題材同埋講退役軍人題材呢啲意味深遠嘅敘事方式，甚至去探討後Infinity War時代，The Snap對世界嘅影響。唔只係單純從Avengers電影所呈現嘅英雄式嘅美好，而係對平民百姓實質上嘅影響係有幾咁深遠。但去到WandaVision嘅最尾，其實都係落入返要緊扣MCU發展嘅劇情。例如第一季片尾嗰個位，呢個都係無辦法嘅，因為之所以我哋可以將超級英雄故事嘅多樣性推展到呢個位，亦都有賴於MCU本身嘅環環相扣，先會有一個如此龐大，就好似可以好容易就令人置身其中嘅電影宇宙。呢個我相信亦都成為咗好多人對於呢套奇異博士2嘅期待，就係既然拍WandaVision都可以去到呢個程度嘅話，我哋就會深信當拍電影嘅時候Marvel就可以再上一層樓。

可惜嘅係奇異博士出嚟嘅結果就真係令人一言難盡喇。原因好大機會都係因為我哋本身對Marvel Studio嘅期望太高，所以先會出現期望落差。就係因為佢哋以往用咗唔同嘅作品去證明佢哋嘅前瞻性視野，所以去到佢哋降落返人間水平嗰陣，我哋就會覺得失望。而呢種失望唔係嚟自套戲真係差到飛起，而係以往有啲戲真係水準太高，稍一不慎都會Keep唔到個水準，大家就會覺得失望。可能Marvel Studio喺不停探索有啲乜嘢漫畫系列、事件又或者係角色可以搬上大銀幕嘅同時，我哋都必須接受佢哋自己亦都越嚟越似一本長篇連載嘅漫畫咁樣，無辦法做到每一期都高潮迭起。

總括嚟講，今次呢套奇異博士2：失控多元宇宙Doctor Strange in the Multiverse of Madness可以話係我自Captain Marvel之後睇過嘅Marvel電影入面最普通嘅一套。最主要嘅原因係作為一套電影嚟講，其實佢嘅劇情真係好薄弱，就好似啲動畫嘅一啲用嚟補充設定嘅普通番外篇咁樣。如果你唔係Marvel嘅Fans，追得唔係好貼嘅話，唔好講話你會覺得唔好睇，可能你入場睇都唔會睇得明，因為你入場之前係需要做好功課先有機會睇得明呢套電影。而作為一套Marvel發明嘅電影連續劇嚟講，係嘅，無論幾唔好睇，其實你都被逼要硬食呢個捆綁式銷售㗎喇，因為咁你先又會睇得明之後嗰啲MCU作品㗎嘛。咁所以除非你真係好想入場睇呢套戲啦，如果唔係嘅話，我會建議大家有Disney+嘅，不如都係留返喺Disney+度睇算喇。

今次《𠝹櫈電影學會》就講住咁多先，我係米迦，我哋下一集𠝹櫈電影學會再見!