【#香港尋奇】太平山上有一個叫做「仙橋霧鎖」嘅隱藏景色？傳說中嘅「香港八景」又有邊八景？— Google Map 不會告訴你的事 EPISODE NO.5

Google Map不會告訴你的事
大家好，我係小雲歡！迎大家收睇Google Map不會告訴你的事之香港尋奇。太平山山頂作為遊客嚟到香港嘅指定打卡景點之一， 以往都有成千上萬嘅遊客慕名而嚟，就係為咗俯瞰香港嘅全貌。不過唔知大家又知唔知喺太平山呢度有一個所謂嘅「香港八景」呢？究竟乜嘢係「香港八景」呢？太平山嗰個又喺邊嘅呢？不如等我問吓附近嘅人，睇吓佢哋知唔知先！
小雲：我想問吓你哋今日上嚟太平山係做啲咩㗎 ？
遊客A: 行吓
遊客B:我今日嚟觀光㗎
遊客C：行山
遊客D: 行山
遊客E: 第一次上嚟行吓咁囉
遊客F:我行完山上到嚟呢度
遊客G: 旅遊
遊客H: 遊玩囉，跟住行盧吉道嗰邊
遊客I: 嚟行山嘅
遊客J:行山

小雲：如果呢要你喺附近搵個位打卡影相，你會揀邊個位啊？
遊客A：都係凌霄閣上面呢啲，一個維多利亞港嘅地方囉
遊客B： Circle 入邊有個維多利亞景嗰個，影到尖沙咀西九嗰度
遊客C：其實我哋想上西高山嘅，呢度囉或者係電車站囉
遊客D：我諗可能影嗰邊嗰個全景囉，維多利亞即係望返尖沙咀嗰邊
遊客E：西高山，嗰度全部望到晒
遊客F：最主要搵呢度上到嚟同埋纜車囉，有啊！去到西高山個頂咪影下囉
遊客G：睇到俯瞰到維港嗰啲地方囉
遊客H：頭先有個好開揚嘅，睇到海景嘅嗰個位囉

小雲：你知唔知太平山有個叫香港八景嘅地方啊？
遊客A：呢個唔係好清楚喎
遊客B：香港八景啊……
遊客C：唔知喎
遊客D：唔知喎
遊客E：即係香港八大景點？
遊客F：唔知喎
遊客H：唔知喎

問咗咁多人，睇嚟大部份人都唔係好知「香港八景」到底係咩嚟，不如就等我講吓乜嘢叫做「香港八景」先啦！

香港尋奇
喺上世紀30年代嗰陣，有一位考古學家兼武術家就叫做陳公哲，即係精武體育會嘅創辦人之一。冇錯，就係李小龍電影《精武門》嘅嗰個精武體育會。相傳佢就揀咗香港島嘅八個美景出嚟，仿效「新安八景」，將呢八景合稱為「香港八景」。分別係旗山星火、仙橋霧鎖、鯉門夜月、鵝澗榕陰、鴨洲帆影、扶林飛瀑、赤柱朝㬢、浪灣海浴。每一個景嘅名都充滿詩意，好似一見到個名就會大概幻想到個地方會係點咁。不過時至今日，由於城市規劃同埋唔同嘅變遷，亦都令到唔少景象都已經同以前唔同，甚至消失咗。而今日我哋嚟到太平山山頂，就係要搵呢個「仙橋霧鎖」，而呢個「仙橋霧鎖」就係喺太平山山頂嘅盧吉道啦。而家我就喺盧吉道嘅入口，準備帶大家行吓盧吉道。今次我就揀咗喺凌霄閣西邊港島徑嘅入口出發，盧吉棧道其實都係港島徑嘅一部份嚟嘅。喺2020年，港島徑成為咗lonely planet 全球十大步行徑之一，係亞洲區唯一入選嘅步行徑，其他入選嘅步行徑仲有英國嘅泰晤士河步道、德國嘅柏林圍牆徑等等。係咪估唔到香港嘅步行徑都可以入選呢？不過行落去你就知點解㗎啦。

我哋從起點出發，行多幾步就會見到一座英式嘅白色屋仔，呢座白屋仔就係山頂纜車辦公室嚟嘅。唔好睇佢好似好流咁，佢假假地都係二級歷史建築嚟㗎。再行落去，你就會見到有維多利亞式設計嘅行人欄杆同埋懷舊嘅街燈，同時亦都見到萬綠樹影，因為盧吉道都係一條樹木研習徑嚟嘅，附近都有好多唔同嘅花草樹木，你行過呢度就好似穿過左一個森林咁樣，沿路左面係一啲佈滿苔蘚嘅岩石同埋蕨類，右面就係唔同嘅大樹。而之所以呢度會係樹木研習徑，除咗係因為夠綠之外，亦都因為呢度大部份嘅植物都係香港本地嘅植物物種。例如香港大沙葉、香港茶、梭羅樹、白木等等……再加上呢度條路又平坦，喺呢度行成個感覺都會令人心曠神怡㗎。再行多幾步，我哋就會望到一個每次睇到都令我難以忘懷嘅景色，就係香港嘅全景啦。而太平山山上面經常出現嘅霧氣會蓋住山頂，相傳如果你喺霧中行呢條棧道，就算你睇唔到呢個景都好，都會因為周邊泛起嘅橙黃色街燈令人好似置身喺仙境一樣。而呢條棧道亦都因為似一座天橋，遠睇嘅時候，條天橋就好似困左喺霧入面咁若隱若現，所以呢個景就叫做「仙橋霧鎖」喇！

香港尋奇
盧吉道呢度除咗喺香港唯一一條棧道之外，亦都因為佢起嗰陣講緊係成百幾年前，又要依出而建，可想而知嘅係佢有幾咁難起得到。不過雖然呢條棧道叫盧吉道，但係盧吉道嘅出現基本上除咗個名之外同盧吉完全無關㗎喎，咁究竟點解要起呢條棧道呢？要解釋呢樣嘢，首先我哋就要知道「盧吉」係咩來歷啦。盧吉—其實即係香港港英時代第14任港督盧吉勳爵，咁盧吉道顧名思義就係以盧吉個名嚟命名㗎喇。喺佢在位期間，即係1907年7月至1912年3月呢段時期，佢任內為香港規劃咗唔少標誌性嘅建設。例如九廣鐵路英段、高等法院、郵政總局，而最重要嘅莫過於係香港大學。盧吉嚟到香港嗰陣，香港就只有50萬人，但佢就認為香港距離成為一個大城市就係差一間大學，佢呢個諗法得到好多人嘅支持，包括印籍商人麼地同埋本地商人何啟，而麼地更加願意捐15萬出嚟作為大學嘅經費。因此去到1910年，香港大學就正式成立。就係因為佢對香港嘅貢獻，令到好多當時嘅香港市民都十分愛戴呢個港督，所以喺1912年佢離任嗰陣，仲有大批市民專程為佢送行添。

香港尋奇
喺略略咁講過同盧吉勳爵有關嘅事之後，我哋會知道佢喺1912年就已經離任，但係盧吉道係1913年先落實興建，而係1922年先正式落成，咁即係話起盧吉道其實係同盧吉完全無關㗎喎，咁點解當時嘅政府要起盧吉道嘅呢？個答案就係同我身後呢樣嘢有關喇。盧吉道喺1922年落成，而早喺1913年，政府就已經落實咗會起呢條棧道，不過當時嘅盧吉道就唔係叫做盧吉道，而係叫「The road from Victoria gap to high west gap」。政府當時講到明喺呢條路嘅目的就係為咗俾山頂嘅居民觀賞風景。去到1914年立法局通過撥款，以一萬蚊起呢條路，當時嘅港督梅含理爵士先至宣布呢條路將會叫做「盧吉道」。1915年就正式刊憲，工程分為兩期。第一期工程路段長1448尺，同年就起好喇。第二期路段長3402尺，係隔咗四年之後先動工， 1919年開始起，三年之後1922年，盧吉道就正式起好咗喇。

香港尋奇
其實係盧吉道未起好之前，當時嘅山頂已經有唔少嘅英國富豪名流紳士喺度聚居。例如有麥當勞爵士係1867年嘅時候已經喺度設立咗避暑別墅。喺1873年又有山頂酒店嘅落成，及後山頂纜車亦都係1888年正式通車，為喺山頂住嘅居民提供方便又快捷嘅交通服務。不過自1888年起，港英政府就以唔同嘅條例限制華人喺山頂居住。例如有1888年嘅《歐洲人區域保留條例》， 1904年嘅《山頂區保留條例》，以及1918年嘅《山頂區（住所）條例》，呢啲條例喺20世紀初都對香港社會影響深遠。雖然冇幾耐之後《歐洲人區域保留條例》， 同埋《山頂區保留條例》都陸續被廢除，不過要去到1946年政府廢除埋當時僅存嘅《山頂區（住所）條例》之後，呢啲充滿着殖民主義色彩嘅條例先至完全消失。咁即係話喺1922年至1946年呢24年入面，盧吉道可以話係外國富豪名流嘅專享道路。而成個盧吉道建造工程，總共就用咗$145,000。以嗰陣嘅物價指數來講，一程小輪普通位收費都係三仙，一般人月薪就大約係$30左右，對比起而家起個音樂噴泉都要5000萬，喺條天橋都要17億嘅香港，呢條棧道係貴定平就真係見仁見智喇。

香港尋奇
無論貴定平都好，最緊要都係有用嘅啫，就好似以往盧吉道作為港英殖民地嘅印記，對於以前嘅華人來講可能冇咩用，但係經過時代嘅洗禮之後，依家嘅盧吉道已經成為咗香港市民可以享受嘅郊遊徑喇。喺呢條既充滿人民情懷又有靚景睇嘅盧吉棧道，無論遇唔遇到「仙橋霧鎖」呢一刻都好，都可以嚟到呢度盡覽香港嘅獨特城市面貌，唔知你哋見到呢個獨一無二嘅風景又會諗起啲咩呢？

今集Google Map不會告訴你的事之香港尋奇就講到呢度先。我係小雲，我哋下集再見，拜拜。