13/5《圍爐取戀》深度訪問！中年單身即地獄？

毛記電視 | 娛樂類 | May 17, 2022

此影片謄本由自來也＆Sa＆happilyeverafter製作

★非作商業用途，本檔案版權歸版權持有人獨有★

東方昇: Dickson咁樣單身，我就好理解呀，點解你哋咁靚仔靚女都仲係單身呢？
阿Man: 我有一段拍過十年嘅，去到佢想結婚嗰陣，我就忽然間醒覺。
東方昇: 咁你哋有冇試過用交友app呢樣嘢呢？
Kenton，阿Man: 有啊！
阿Man: 咁佢話佢自己分咗手年半，信佢，但冇expect到佢會呃人。個男仔打畀我，「X你個街吖！」「*^&%#@^&#」
東方昇: 嘩！！！

（片頭音樂）
東方昇: 大家好呀！我哋圍爐取暖上一集，我哋見到YouTube下面呢就議論紛紛呀。
Kneta: 係呀，好多comment。
東方昇: 好多謝大家咁投入個節目入面喇，咁而我都想借呢個機會去講少少。咁上一集個男仔同佢女朋友拍咗拖兩個月，咁點知個女仔嘅前度呢就搵返佢，會唔會一齊返？跟住個女仔呢就心大心細，咁好多網民都好激動，因為覺得個女仔好似一腳踏兩船，猶豫不決好似唔啱咁喎。咁其實我哋都非常之理解嘅，但係點解我哋冇去鬧佢個女朋友呢？
Kneta: 前任

下載檔案

所有資料非作商業用途，若有內容侵權，請即通知我們移除。

東方昇: 其實因為個男士打上嚟，都想我哋俾啲建設性嘅意見佢啦，即係冇理由佢打上嚟，我就係咁…
Kneta: 冇啦分手啦！
東方昇: 去屌佢女朋友老母㗎嘛，如果係咁嘅話呢，咁佢就唔使打上嚟啦，打上黎叫我哋一齊屌佢啦。佢打上嚟係因為，其實睇得出佢仲愛個女事主…
專家Dickson: 所以想搵挽救嘅方法。
東方昇: 如果我一味鬧佢女朋友呢，其實係無補於事，只會增加一個仇恨。其實好多時愛情嘅問題呢，就唔係啱同錯。

(字幕: 愛情沒有絕對的對錯)
東方昇: 我哋聽過咁多集，邊有啱同錯嘅啫？雖然我哋好期望，我哋就係啲愛情判官，拉！拖去斬！但係其實實質係唔係咁，其實只有愛同唔愛。如果你仲係愛佢嘅，咁你就諗方法點樣去解決問題，去維持落去囉。
Kneta, 專家Dickson: 係呀。
東方昇: 不過我哋好高興大家都熱烈討論，其實好事嚟㗎。好嘞，今集我哋都有啲特別，我哋搵到兩位嘉賓嚟…
專家Dickson: 探討一啲新嘅問題。
東方昇: 好，我哋即刻嚟睇吓先。

東方昇: 喺我哋身邊有一位靚仔同靚女喺度嘅，分別係Kenton同阿Man喇。點解要搵你地上嚟呢？事緣係咁樣嘅，因為我哋而家禮拜二禮拜四，就搞嗰啲圍爐Speed dating喇，咁我哋就會有好多位參賽者喇。不過我哋發現有兩位呢，個年齡就同我或者Dickson呢差唔多…
Kneta: 比較成熟啲…
東方昇: 比較有經歷嘅！Kenton 介唔介意講吓你年齡係幾多呢？
Kenton: 40。
東方昇: 40歲，你個樣直情係勁靚仔。
Kneta: 30頭喎似。
東方昇: 阿Man呢？
阿Man: 35。
東方昇: 就係真係睇唔出，有冇人話你個樣好後生呢? 似26歲咁喎。
Kneta: 26,7囉。
東方昇: 真係呀！
Kneta: 同我差唔多咋感覺上。

東方昇: Dickson咁樣單身我就好理解呀，點解你哋咁靚仔靚女都仲係單身呢？
(字幕：本集主題中年單身即地獄）
Kenton: 其實我之前呢，啱啱對上一個其實都有諗過結婚嘅。
東方昇: 哦！
Kenton: 我哋有做啲婚前輔導咁樣。
東方昇: 哦！咁你係拍咗拖幾耐呢？
Kenton: 3年，咁跟住就發覺大家嘅相處同溝通都有問題，結果都搞唔掂。
東方昇: 因為呢個都好典型嘅，我身邊都有人都係臨結婚，臨門一腳，反而分開咗，因為真係要諗你嘅承諾，之後一世㗎啦。跟住大家就考慮多啲，發覺啲問題呢，就更加明顯化。

專家Dickson: 開始重新檢討吓，究竟有冇一啲嘢我真係成世都忍唔到㗎呢？
東方昇: 係喇，係咪都係呢個情況呢？
Kenton: 類似咁嘅情況囉，可能我哋發覺呢個情況都搞唔掂，譬如淨係講溝通呀，可能溝通上面大家都好多估下估下咁。我最記得就係問親佢食乜嘢，通常就會答「冇所謂呀」「你鍾意喇」，但係當你提出一啲意見之後呢，就呢樣又唔好啊，個樣又唔好啊咁，講咗四五六個都搞唔掂。
專家Dickson: 有冇試過傾傾吓就炒大鑊咁呀？
Kenton: 佢就住得遠，咁我都要間唔中去佢屋企食飯，咁但係呢好多時我都同佢講話，住好遠返去又好攰呀，可能好多負面嘅情緒大家累積咗，咁變咗傾親都係…有啲晦氣嘅，結果咪大家都察覺到，再行落去都好辛苦。

東方昇: 我覺得對我哋呢啲成熟嘅，係更加會著跡嘅。因為我哋年紀大咗呢，我哋呀，我哋啫，我哋有時可能會自我中心左。細個嗰時拍拖嗰啲，女朋友話乜都得㗎啦，兩個人好容易就好開心。但係當我哋開始了解自己，就會覺得我知自己要做乜，咁變咗我要就你呢，我又未必想喎。
（字幕：東方昇認為…愈了解自己需求愈會在關係中計較）
東方昇: 問題就要為對方放棄少少嘢，有時就會我又唔係好肯。

Kneta: 我覺得呢，會唔會係年紀成長咗啦，成熟咗…
（字幕： Kneta認為…成年人傾向追求契合多於即時慾望）
Kneta: 我覺得係咪真係要搵一個完全係心靈上契合，多過滿足大家慾望啊，或者係要去達成某一樣嘢。
Kenton: 呢個都係好好嘅點，因為有一個最難搞嘅位，就係我哋唔同步，即係我哋嘅目標係結婚㗎嘛，但係其實佢當時覺得結婚對佢嚟講，係一個好大嘅壓力。咁來自啲咩呢？係源於佢原生家庭裏面，屋企人俾佢嘅一啲壓力啦，即係可能細個打佢啊，佢對嗰個未來冇憧憬。咁我呢就好有盼望㗎嘛，即係諗住結婚，三年咪差唔多啦，又做埋婚前輔導，呢個位咪大家唔同步囉。
東方昇: 所以環觀返自己細個咁多段拍拖經歷呢，細個時初戀嗰啲拍拖係開心呀，因為乜都唔使諗呀嘛！

東方昇: 咁呀Man呢？你又係咩原因呢？
阿Man: 工作太忙。
東方昇: 工作太忙…即係事業型女性喎，掛住做嘢。
專家Dickson: 對方覺得你冇陪佢？
阿Man: 我唔想做嘢，但係公司要逼我做嘢。咁對上嗰個分手前兩個月，都係晚晚都做到12點呀，完全好似冇相處時間。
東方昇: 但係佢接唔接受你係一個工作型嘅人？
阿Man: 佢知㗎，佢識我嗰陣知。
東方昇: 但係當佢諗如果我結咗婚之後，行落去都係咁嘅話，佢又覺得又唔得喎，係咪有少少咁嘅問題呢？
阿Man: 都係嘅，當相處拍拖就會發現啲時間好難夾，因為佢唔係放星期六日呀，可能閒日先放，咁咪好難夾到時間去玩呀，休息呀嗰啲囉。有時佢做起嘢上嚟，又係成十個鐘唔覆機，咁我都係咁樣嘅，完全錯開晒咁，冇辦法。

專家Dickson: 咁你就覺得成個過程好似唔係拍拖咁吓嘛？
東方昇: 冇時間畀對方囉。
Kneta: 但其實出咗社會呢，真係好身不由己㗎。
東方昇: 係呀！
Kneta: 真係冇辦法啊，你返工嘅時候，你冇理由同老細講話我拍拖，我唔得閒咁樣。所以而家呢，嗰個結婚嗰年齡一路退後，就係首先本身工作有壓力，第二就係大家都想進步呀，嗰個要求對自己有唔同。
東方昇: 喺香港冇辦法，你唔搵錢咁點啊？

（字幕：戀愛的最大敵人 - 搵食）
Kneta: 係呀，所以咪就係冇辦法㗎。冇錢冇樓冇車，要結婚邊個夠膽呀？
東方昇: 所以問題就係，多數人解決就會同居。
Kneta: 但係你諗吓同居仲慘喎，譬如阿Man十二點返到屋企，但男朋友兩點返到屋企，佢又瞓咗，咁晚晚就對住佢瞓覺囉。東方昇: 起碼唔使有交通時間，仲要搭一個鐘頭車去見面呀嘛。
Kneta: 我嗰陣拍咗兩三個月，唔會咁快同居喇。
東方昇: 哦，因為太快…

KNETA︰但係你諗下同居仲慘喎，即係譬如啊MAN十二點返到屋企，佢男朋友兩點返到屋企，咁佢瞓咗，咁晚晚就對住佢瞓覺囉。

東︰起碼唔使有交通時間，仲要搭一個鐘頭車去見面呀嘛。

MAN︰我嗰陣拍咗兩三個月，唔會咁快同居啦。

東︰哦因為太快...

KNETA︰咁我好奇你之前有冇曾經有一啲係，覺得可以發展做婚姻嘅對象？

MAN︰我有一段拍過十年嘅。去到佢想結婚嗰陣，我就忽然間醒覺，係我衰嘅，忽然間醒覺我唔想再同呢個人再行落去。

東︰唔係衰唔衰，而係你再認真諗下啫，一結婚就有壓力就會諗未來。

MAN︰咁你其實相處嗰陣都有問題㗎啦，佢屋企呀、我自己屋企呀、工作呀好多問題。但係冇諗過會想分開嗰一步，可能搵D嘢去解決啦。但係佢想結婚，又忽然間醒覺「係咪以後都要再同呢個人一齊呢」

東︰咁你你嗰下你同佢講都幾難講㗎喎。

MAN︰都唔係喎，反而講咗出嚟鬆咗一啖氣囉。

DICKSON︰佢都冇挽留冇盛啦？

MAN︰梗係有啦，咁佢有感情㗎嘛。

東︰大家都擺咗咁多時間。

MAN︰咁但係佢幾個月之後識咗佢依家個老婆喎，係咪祝福佢先？

東︰祝福佢啊，都係好事呀。咁你有冇覺得自己晒咗咁多時間？會唔會覺得嗰時如果我早啲搵出個問題，分開咗咁我可以試好多個？

MAN︰咁又唔會，因為太細個同佢一齊，嗰陣係冇諗到咁遙遠。但係你一路落去發現真係面對唔到啦，同埋你個年紀過咗十年之後，你嘅擇偶條件都應該轉變㗎啦，咁佢唔係你嗰個時刻想要嘅嘢。

東︰因為都好常見嘅就係，開頭諗住梗係緣份嚟就拍住拖先啦，但係拍住跟住就喺度拖啦。因為你明知可能未必係㗎，但係又唔敢分手。

KNETA︰同埋覺得仲有時間，諗住慢慢嚟呀，點知拖拖下就...

東︰但係同時你又會諗緊，呀我都晒咗咁多時間啦喎，定係我搵個新嘅呢？但係搵一個新又未必有呢個咁好喎。

DICKSON︰咁我想問下呢，而家要識一個新嘅對象係咪好難嘅事情呢？

MAN︰會呀，因為我而家公司就比較少對象嘅。

東︰做邊行呢介唔介意講下。

MAN︰核數嗰啲囉。

東︰哦！即係男人一係就全部結咗婚㗎喇？

MAN︰好嘅結咗婚啦，唔好嗰啲就太細個...

東︰嘩核數嚟講你都幾唔似核數喎，因為我識嗰啲核數真係戴副粗框眼鏡，著西裝，跟住灰色嘅成個人係，好悶呀。你係完全唔係嗰啲人個樣喎。

MAN︰係呀啲同事可能好似就係你咁講。

東︰咁你咪好搶手囉應該

MAN︰咁唔係喎，咁你個個都問...呀...咁..

東︰即係高攀唔起呀？

MAN︰我唔知啦，好似得一個囉。

東︰你會唔會嫌嗰啲核數嘅比較沉悶呢？

KNETA︰直情唔想搵返同行呀？

MAN︰係囉都唔想搵啦，大家一齊12點收工呀？

KNETA︰一齊核數好浪漫呀，你㩒下我部機我又㩒一下你部機。

東︰本身工作就難識異性喇，咁你呢你呢？

KENTON︰我係做NGO嘅，都係做多媒體嘅嘢，但係你話難唔難呀？因為我地公司都少人，咁變咗有好多都結晒婚。

東︰因為呢如果係全部後生呢，就嗰個溝嗰個，嗰個分手之後再溝返嗰個，溝嚟溝去㗎嘛。但係一去到年紀大就其實身邊嘅人都結咗婚，你可以物色嘅對象其實就少咗。就算後生呀好多方法去識異性，都會用呢個交友APP嘅。咁你地有冇試過呢樣嘢呢？點呢感覺如何呢？

KENTON︰ER真係識到朋友嘅多囉，我記得我最早期嗰啲交友APP未盛行嘅時候，已經有啲台灣出嘅，係個網站，都識到啲係香港嘅人。(Penfriend?)係呀，都會做到朋友到而家都係朋友囉。咁但你係話，大家好似冇乜動力咁去再進一步發展喇，So far都係咁。

DICKSON︰有冇試過出過嚟活動呀之類咁？

KENTON︰有有有，咁實有可能頭幾次，有啲就可能冇再見面或者冇再聯絡啦，咁但係有啲都傾到計嘅。我都享受傾計嘅過程，但係就冇發展。

DICKSON︰Penzone咗呀

KNETA︰寫寫下就完咗喇

東︰咁有冇啲不愉快經歷呢？因為我睇啲成日話，有啲叫你買美容產品，好貴㗎！

KENTON︰我自己冇試過。

東︰點解咁叻呀，可唔可以教大家點可以冇試過呢，係咪用張相好窮嘅。即係多數嗰啲名車、喺度影張相名錶咁，你就唔係嘅。

KNETA︰係一隻膠錶仔咁。

KENTON︰因為可能我自己都會寫返No sales嗰啲，咁好多都冇呢啲情況。

MAN︰冇遇過咩經紀嗰啲(狗公！？)狗公就大把啦。咁好開頭玩嗰陣好認真㗎我以為好似相睇咁...

東︰咁蠢呀你以為真係...交心呀？

MAN︰你唔好咁啦...

KNETA︰啲人講嘢好叻，你唔識分㗎

MAN︰咁佢話佢自己分咗手半年喇嗰啲呢...(東︰就好同情嗰啲喇) (DICKSON︰就講到好慘嘅) 冇喇點同情呀，信佢係冇expect佢呃人喇。佢話半年啦，跟住下次又話分咗手一年喇，一下次又話半年喇。總之人講大話一定有跡可循。咁講到最尾佢話「我媽好鍾意佢，唔分得手」

KNETA︰哦即係原來係有嘅，但係佢釣咗你上嚟，之後等你沉咗船就會想一齊喇。

DICKSON︰咁佢就話有另一半

MAN︰佢講完咁樣啦，其實嗰下已經想斷喇。佢又以為自己... 佢同我謂話冇facebook啊冇IG嗰啲咁嘅嘢。(傻仔嚟㗎)(吓唔係呀?) Kai㗎佢！！

東︰佢幾多歲呢？十幾歲我信佢冇facebook(30零囉)得抖音咋嘛。

MAN︰之後我求其喺facebook打佢個名已經search到佢個facebook喇。佢雖然冇Tag佢女朋友喇，咁你個男仔隔離嗰個，成班group埋一齊嘅一定係佢條女啦係咪呀。幾張相嘅，咁我搵到佢女朋友。佢同我講佢女朋友啲衰嘢咪送俾個女仔睇囉。

！！！！

東︰到最後個女仔點呢？有冇回應你啊

MAN︰有！兩個禮拜後先回。因為個女仔應該可能遇過好多單呢啲嘢，即係佢private晒所有嘢，我淨係send到message啦，佢要兩個禮拜後先睇。點知呢，個男仔打電話畀我「X你個街呀！你係咪玩嘢呀！」

東︰你幾犀利喎你，因為多數呢會怕事，唉~算啦~就等嗰個衰人就逍遙法外，你咁樣又幾好。(儆惡懲奸呀)(還擊呀)

MAN︰個心好重㗎，即係我信得你，但係你就預咗做壞事。畀我知道..(你係咪天蠍座㗎)我唔係我獅子座。

DICKSON︰唔係呀，因為任何俾人呃嘅人，你都想一定係打返佢一拳先。

MAN︰係啦冇錯。個女仔覆我仲話「祝福你哋呀！」嗰啲咁嘅嘢。我話「呢條仔，執到喊3聲喇！」

東︰咦咁我想問其實有冇啲work嘅例子呢，即係交友APP，都有啲係得嘅？

MAN︰有呀，我對上一個男朋友。佢係好認真嘅人，不過真係相處耐咗就唔夾啫。佢係個好人嚟嘅。

KENTON︰對上都有一個，但係真係好好嘅朋友囉。但係因為佢本身工作又好忙...

東︰係咪就係佢嚟㗎(MAN)

KENTON︰未見過佢嘅

東︰大家都係度假想認唔到對方吓話？

KENTON︰佢都係做finance嗰啲嘢嚟嘅

東︰咪就係會計囉(指

KENTON︰即係我唔知係咪特別忙呀，咁呀所以有段時間好忙，咁變咗見嘅時間都好似要擠啲時間先見到面咁。

東︰哦~即係都有啲用嘅其實，交友APP都可以擴闊社交圈子嘅。

Kenton:即係我唔知係咪特別忙呀?咁呀,所以有段時間好忙,咁變咗見嘅時間都好似要擠啲時間先見到面咁。

東方昇:哦!都有啲用嘅其實,交友app都可以擴闊社交圈子嘅。咁又問你喇,咁你隨住個人成熟咗喇,咁你哋嘅擇偶條件係咪一路有變化㗎呢?即係我十年前都係外表一定要我係嗰的啦,十年前梗係要身材正樣靚呀!跟住係咪會隨住年紀(要求)係咪都要一路下降呢?嗱!Dickson就無嘅!一路 keep住嗰個要求。

專家Dickson:我都差唔多㗎咋係呀。

東方昇:咁你哋點樣呢?

阿Man:反而之前鐘意嗰個人就一齊,冇諗其他野,而家反而就標準高咗囉!

東方昇:哦~~ 因為保護自己喇係咪呀?

阿Man:係啦,反正係咪遇到衰人,不如揀個靚仔啲。

東方昇:哦!都係!

Kneta:就算畀佢呃都呃得開心啲。

阿Man:開心啲睇住個樣冇咁嬲囉。

專家Dickson:但係通常個個猶豫係諗緊啲啲乜嘢呢?

阿Man:諗對方對你個態度先囉,即係可能有啲覆得好 hea㗎,呢啲唔洗喇!我反而想睇對方係咪將你每件小事記係心或者係......

東方昇:認真對待。

阿Man:認真對待!係喇!其他條件 ……

東方昇:反而唔重要呀。

阿Man:唔係太重要囉。

東方昇:你又事業型喇,經濟個啲又唔使喇!

阿Man:係喇!

專家Dickson:兜返轉就係嗰個問題就係......

東方昇:易咗喎其實。

專家Dickson:你搵一個你自己鐘意嘅人,定係佢愛你比你愛佢更加多嘅人?

阿Man:搵個對方愛我更加多嘅人。

All:嗯......

Kneta:係咪女仔都係prefer要對方愛自己多啲?

阿Man:會想可能畀人錫吓咁。

All:係係係!

Kneta:咁男仔譬如問吓Kenton,男仔係咪覺得如果搵一個對象,其實佢同我性格Ok,咁我愛佢多啲都冇所謂?

Kenton:咁如果佢真係值得你去愛嘅,咁擺多的心機時間我覺得係值得嘅。咁但係你話有無改變搵對象嘅要求呢?我覺得唔係高咗,係多咗好多附帶條件,而家可能就會搵一個顏值我覺得都要交夾嘅,因為我試過真係真係有一個情況,對方因為外表而感到壓力嘅。譬如佢覺得冇喎......佢就會覺得有少少自卑,有少少啫。

東方昇:都係嘅都係嘅。

Kenton:但係而家著重係心靈上嘅交流,可以傾到好深入呀,大家真係真誠可以傾到計嘅,我覺得呢個先係最重要。

東方昇:咁我問一個好現實嘅問題,咁因為你哋搵返年齡可能差唔多嘅對象呢,可能難免離過婚喇,跟住可能會有小朋友啦,咁你哋對呢樣嘢點睇呢?係咪其實都唔介意呀?都無呀,大家都有經歷。

阿Man:我唔介意呀,對方生埋仲好,我唔使生。

東方昇:正呀!唔使生呀嘛?

Kneta:純粹幫你照顧就ok!

阿Man:仲要大個咗唔使湊喇!唔使換片幾好呀。

東方昇:你呢?

Kenton:我自己多少有啲介意嘅,因為可能我都會同嗰個女朋友有共識呢,就會生小朋友嘅。咁所以如果你本身有小朋友呢,咁可能我自己會有少少介意。

東方昇:所以其實年紀大呢,考慮嘅嘢其實多咗呀。咁又問喇,身邊嘅人有冇畀啲壓力你哋呢?

Kenton:我無呀。

阿Man:我無呀,逼唔到㗎嘛,咁大個人。仲逼到㗎咩?

東方昇:咁幾好喎。

專家Dickson:唔係㗎!因為得間我都會食兩句,就話阿邊個邊個又結咗婚喇,有小朋友喇,咁咪即係幸福喇。你哋屋企人唔會講呢啲㗎嘛?

阿Man:你問下佢,「肯定!?? 肯定幸福 ??」

Kenton:你問下佢係咪一齊住㗎?你又知人哋咁多嘢?

All:哈哈哈!!

東方昇:學到幾個招數去教訓返啲長輩呀。

Kneta:袋住先呀Dickson!

阿Man:講多兩句佢唔問㗎喇。

東方昇:犀利喎!

Kneta:因為呢我身邊有啲朋友係無拍拖,咁我阿媽知道咗呢,都會畀說話我聽㗎喎。

東方昇:吓?畀你聽?

Kneta:係呀!因為佢想借我把口話畀佢聽,佢就會話:「是但搵個正正常常咪算囉!」「做咩咁高要求呀!」「時間大限將至喇」「快啲結婚咪算囉!」你屋企人會唔會有啲好難聽嘅說話?

阿Man:無。

東方昇:幾好喎。

Kneta:係囉!我媽呢啲……唔關我事,我結咗婚你都係到煩我,「唉你啲friend邊個未结婚呀」

東方昇:睇唔順眼。

Kneta:我話「未呀」「拍拖呢!?」「未呀!!」「唔好咁高要求啦!」

東方昇:上世做月老㗎可能佢。

Kneta:真係好煩㗎!

東方昇:仲要係要一定一對對先舒服㗎。

Kneta:係囉!

東方昇:好喇咁最後就問你哋,對你而家嚟講喇,愛情係乜嘢呢?

阿Man:我覺得係加分囉。咁如果你而家個生活係有80分既話呢,我希望個愛情係可以加1分。

東方昇:可能減分㗎喎但係,多數都係減分㗎喎。

阿Man:減分就唔要喇,减分就唔要喇。

專家Dickson:要快樂呀嘛最緊要係。

東方昇:現狀已經好好啦

專家Dickson:因為佢唔係一件必要嘅事,但係佢係一件你有咗之後你人生有少少美滿同幸福嘅事呀嘛。

東方昇:開心咗梗係唔介意要喇,你呢?

Kenton:我覺得好似達到一個好似完美咁嘅心態,因為拍拖 ……好似係為咗結婚,呢個只係一個終極嘅答案囉,但係其實我覺得婚姻都令到大家進步架,家暴就唔講喇,墮落嗰啲......吸毒呀......一齊劈友咁樣......唔係喇,係因為你係想完滿啲㗎嘛,愛情就係連結兩個人喺埋一齊開㗎嘛,所以我都盼望係到呢個階段。

東方昇:因為其實結婚都係兩個人上咗年紀大的可以互相照顧,到80歲嗰時......一齊互相扶持,推吓輪椅,咁你有無幻想過80歲?

專家Dickson:我有諗過㗎呢啲問題......

東方昇:你會點呢?

專家Dickson:所以我識多啲朋友囉,識多啲後生嘅朋友。

Kneta:即係我會照顧你喇。

專家Dickson:我通常同啲細我十年嘅人講,如果第日我郁唔到呢,唔該得閒嚟探我。

東方昇:同埋呢你以前追過嗰啲,比情敵搶走咗個啲呢,搏佢個老公死咗,咁你就可以 70歳先再翻追佢。你呢會唔會諗過呢?

阿Man:有呀......如果行唔到點算呀第時......都驚呢樣嘢嘅,一係就儲多啲錢搵人照顧你喇。

專家Dickson:請個工人 ……

Kenton:都有架,可能最近......我媽媽嘅身體出現咗狀況,咁變咗我要照顧佢呀。因為我都係單親家庭,尤其是得我一個仔㗎,咁你呢就去到嗰將來八十歲,萬一我自己有咩事都好,咁都希望有個人去照顧吓自己囉。

東方昇:不過到時先算啦,咁耐嘅嘢唔諗咁多啦。

專家Dickson:呢個太恐怖喇真係,我諗到都打個冷震呀,唔係講笑。

東方昇:最後喇我會問下阿Man,咁你隔籬有兩位單身嘅男士㗎喇......

Kneta:點解你要咁殘忍呀?

東方昇:你有無興趣先?

專家Dickson:你又做嗰啲小學雞嘢喇。

Kneta:一齊一齊!!

東方昇:唔係!嗱嗱嗱真係!識個朋友,我覺得可以溝通下囉。

阿Man:出面個啲(工作人員)得唔得㗎?

東方昇:都得!!!

專家Dickson:幾百萬人㗎。

東方昇:真心你哋兩個係條件非常之好嘅,希望最尾都搵到你哋幸福嘅另一半喇。

Kneta:感謝你哋。

東方昇:幫咗我哋了解咗好多呀。因為其實愛情就係,後生有一個諗法,到大咗又有一個諗法。

專家Dickson:好難得係有經歷之後仲有期盼。

All:係呀!

東方昇:好喇!我哋下集見!

All:拜拜!!!