6/5《圍爐取戀》女友翻撻佢個Ex

Kneta：真係約咗，係呀係呀。

東方昇：出嚟食飯，跟住仲send咗張合照俾我哋。【圖：Jeffrey & Kerry】嘩，突然間我覺得我哋唔係玩玩下，我哋真係幫到人呀，好有社會責任。

Kneta：好似善事咁呀，好開心。

東方昇：本來我哋三個就落地獄嘅，而家……上天堂啊。（三人笑）

Kneta：多謝你哋俾個機會我哋做吓善事。

東方昇：係呀。吧，原來我哋幫到人真係好開心，以生命影響生命！

Kneta：我哋幾時可以……幫Dickson呀！

Dickson：嘩，呢樣嘢好重要㗎。對人來講，有另一半……不過唔係嘅，佢都係出嚟食飯啫。

東方昇：我哋起碼識個朋友，跟住相處下，就算最尾冇一齊，起碼練習吓點同異性溝通先。都好重要啊。

Kneta：係呀，好緊要，對A0嚟講。

東方昇：咁我哋今集個題目係點呢？

幕後：今日個題目就係男事主話佢女朋友想搵返佢前度。

Dickson：即係直接同佢講搵返前度？

幕後：係呀，好慘呀。悲情嘅故事嚟㗎呢個。

Kneta：悲情故事（笑）

東方昇：好啊，我哋同佢傾吓，安慰下佢啦。你好，阿星（花名），你好似有一個唔係咁開心嘅故事想同我哋分享喎。

阿星：Errr，係呀。咁我就同女朋友喺埋一齊就兩個月嘅，咁時間聽落就唔係好長，但係其實一開頭冇耐已經一齊住埋㗎啦，咁我哋都覺得對方係可以結婚嘅對象嘅。我哋年紀唔係十八廿二，細細個。我女朋友都廿尾，我就三字中囉。

三人：嗯～

阿星：咁兩個月一直以來都開心嘅，無論生活細節啊，日常習慣，就算性生活都好，都好夾嘅。咁你朋友之前有個拍咗拖八年（男朋友），咁就分咗手。佢個Ex就上個星期搵返佢，就話想同返佢一齊。

【女友前度要求復合……】

東方昇：咁你女朋友又點打算呢？

阿星：佢有諗過話俾多次機會佢哋⋯⋯

東方星：哦～

Dickson：係，嗱，咁我首先想問一樣嘢喎。咁其實你知唔知你女朋友同佢前度點解無端端分手嘅？

阿星：佢就話嗰陣時，因為佢個Ex未ready結婚，咁所以就分手嘅。

【雙方因結婚問題而分手】

阿星：咁而家搵返佢，就話已經ready好囉。

Kneta：但係你哋而家嗰個狀況係咪分開嘅？即係女朋友都仲係身邊嘅？

阿星：本來咪一齊住嘅，咁但係而家就搬走晒啲嘢㗎啦，但係我哋仲有見面嘅。（三人驚訝）

東方昇：咁佢嗰邊開始咗未呢又？

阿星：應該……兩邊都一齊緊掛。

Kneta：吓？ （三人驚訝）

Dickson：咁佢而家同你仲有冇一啲情侶之間嘅親密行為咁樣㗎？

阿星：同我有啊。

東方昇：咦，咁嗰邊呢？嗰邊嘅情況你了唔了解呢？

阿星：佢就同我講，冇呃我嘅，佢同佢嗰邊就冇囉。

東方昇：哦，咁佢哋就純粹係食吓飯咁樣？定係都冇見面，淨係WhatsApp咁樣呢？

阿星：有見面。

東方昇：嘩……你都幾辛苦喎，係呢個角色上而家。

Dickson：咦你係仲要聽佢係講另一邊發生嘅事情喎，係唔係？即係佢會好主動同你講嘅？

阿星：因為我會問佢，我都想睇佢有咩意思咁樣囉。

Kneta：我都想知一樣嘢就係，你女朋友一收到EX嘅呢個邀請啦，係你發現啦？定係佢主動同你講㗎先？

阿星：佢主動同我講嘅。

Kneta：但係佢講完之後就已經即刻執好嘢，定係佢講完俾你聽，你feel到佢係有一個諗緊嘅時間嘅，咁之後先搬走。定還是佢諗完啦，佢先決定搬走，話你聽就走咗啦？

阿星：佢第二日朝頭早約咗個Ex見面嘅，咁講完之後第二日佢至搬囉。

東方昇：即係其實佢都唔係同你討論，純粹已經決定咗啦。

阿星：都係呀。

東方星：咁你講吓有冇做啲咩去挽留，或者表達你自己嘅諗法呢？

【東方昇提問：當刻有挽留女友嗎？】

阿星：我嗰陣時冇呀，因為我嗰陣時諗嘅就係，佢哋拍咗八年拖，咁我都相信佢哋嘅感情好心，所以我就冇阻止，就諗起大方咁樣俾佢走囉。

東方昇：哦～咁佢離開到而家隔咗幾耐呢？

阿星：一個星期到囉

東方昇：嗯～咁呢刻點諗呢？

阿星：我依家就唔想佢走囉。

【事主明確表示……想挽留女友】

東方昇：即係你好明確地就唔想佢走啦。

阿星：係呀。

Dickson：而佢……而佢其實而家都仲有同你有聯絡有聲㗎嘛，咁你有冇打算真係將呢個想法好直接咁話俾佢聽，話「喂，其實我真係好唔捨得你啊」，「我唔想你走」，「不如你唔好返去啦」咁樣？

阿星：我有同佢講過。

東方昇：佢點呢？佢點樣回應你呢？

阿星：佢就話佢而家就係掙扎緊係兩邊之間。

【女友處於兩難的局面】

阿星：因為佢話同嗰個Ex拍咗八年拖，即係除咗有啲唔甘心之外，就係佢哋嗰陣時話因為未ready結婚，所以就分手。而家佢就嚟冇咗佢嗰個缺口，因為話已經ready晒，仲講咗好多其他嘅將來計劃嗰啲囉。

Dickson：咁你所知啦，而家佢個Ex有冇對你女朋友進行一啲所謂嘅攻勢咁樣嘅嘢呢？

阿星：以我所知佢淨係食飯囉，我冇聽過佢講其他囉。佢有同我講過其實佢話佢呢刻就鍾意我多啲嘅，只係唔甘心嗰段感情嗰陣時斷囉。

東方昇：咁佢有冇話如果佢事，覺得唔啱，佢會翻返嚟你身邊呢？

阿星：佢有咁講過啊，但係我就覺得如果佢再返嚟，其實我同佢有感覺已經唔同咗囉。我會接受嘅，但係會有條刺喺度，點解佢當初要咁樣決定囉。

Kneta：嗱，阿星我覺得好奇怪嘅地方就係，如果佢鍾意你多啲，佢唔需要話即刻第二日就搬晒所有嘢，之後就去見佢個前度啦，咁我想佢同佢前度其實係嗰陣時感情放低，而唔係因為一個婚姻。

【Kneta認為……女友放不低上一段感情】

Kneta：因為如果你話婚姻嘅話，咁其實你比到佢，咁佢會唔會留低先？佢話佢唔夾先返嚟搵返你，咁但係其實點會無啦啦唔夾呢？佢哋一齊咗八年啦，正常唔會唔夾㗎，除非係佢嗰邊又反悔唔同佢結婚啫。咁所以其實正常佢呢個講法只不過係說服你，令你好過啲，之後佢自己又走得冇咁似一個罪人囉。

Dickson：嗱，我或者咁問，你覺得你女朋友平時算唔算係一個猶豫不決嘅人？

阿星：猶豫不決啊…… ？都係㗎。

Dickson：啦，咁因為頭先呢，譬如你（指Kneta）嗰個講法呢就好理性。係呀，就係佢好果斷嘅，即係佢先會喺面對呢個狀況，其實佢可能都係令到你好過啲。但係原來佢係一個猶豫不決嘅人嘅時候呢，就會有呢個可能性啦。

Kneta：但係佢點樣好猶豫不決地果斷決定⋯⋯

東方昇：因為佢都揀緊呀嘛

Dickson：佢都唔知點算

東方昇：佢都唔知點算，嗱，如果阿叔你女朋友係冇呃你啦，佢的確係猶豫不決啦。因為佢同前男朋友分手係因為結婚問題，咁宜家無啦啦搵返佢喎。

【東方昇認為……事主女友處於迷惘階段】

東方昇：咁佢個處理就係，好似兩面都揀唔到，就驚兩面都得失，跟住佢咪嘗試企返喺個中間位。而佢都好老實呀，如果佢講真嘅話就係佢同你繼續有親密關係，但係佢同嗰邊就仔食飯啫。其實我覺得佢呢個做法都……

Kneta：好唔公平囉對嗰邊。

東方昇：唔係呀，我覺得好啊，因為梗係公平啦。

Kneta：點解呀？因為偏向自己多啲？（笑）

東方昇：因為佢真係揀咗阿星先㗎嘛，所以佢係個情況上我同你有親密關係行為，但係我嗰邊係一個遠距離嘅觀察嗰度先。

Dickson唔好啦，咁我哋又要問吓先啦喎。佢離開喺你嗰度執嘢走嘅時候，佢有冇同你講過一啲類似話「我哋分手啦」咁樣嘅嘢呢？

【Dickson提問：女友有提出分手嗎？】

阿星：佢講咗呢件事俾我聽，就係佢想返屋企再諗清楚邊一個啱佢多啲。

Dickson：即係佢迷惘期囉，而佢好老實咁話俾你聽，而家個天秤鋥呢，就你鋥高啲，但係嗰邊有八年嘅感情，所以我想返去同佢傾偈食吓飯，睇吓發生咩事。

東方昇：呢個都好常見就係糾纏係Ex呀之間呢，始終佢係八年呢，其實嗰個佢未必係愛唔愛，而係習慣咗嗰個相處模式呀，所以佢一路都決定唔到。我覺得如果你唔諗住同你而家女朋友分開嘅話，首先你就唔好嬲佢先。如果你只係嬲，你冇諒解嘅話呢，就算你結咗婚，你都永遠有條刺，你都會開始疑神疑鬼，會唔會之後又無啦啦覺得我唔好就去返佢嗰度呢。

D：因為女仔喺迷惘期嘅時候呢，如果你愈去逼佢話你要揀我，你要揀我，點解你又去見佢，你明明話鐘意我架咁樣，咁佢就會變得更加受傷害，同埋更加迷惘，亦都更唔想再接近你。因為你畀咗個唔好嘅experience佢，咁所以你氹返佢之餘，但係你唔好逼佢去作出選擇囉。

星：係~~

東：同埋因為相信佢真係揀緊啦，我覺得呢個時候你要......

D：做嘢囉。

東：做啲嘢話畀你女朋友聽，你係好過佢前度。

D：同埋你要強烈表示你想留低佢喎，而唔係有一種「唉，我兩個月都唔夠人地八年鬥架喇。」

東：係呀，唔好咁諗呀。你要KEEP住做嘢呀，畀佢睇到你係佢嘅未來。

星：我有呀，我有同佢講話其實我都會PLAN定同佢結婚，因為我由同佢兩三個星期開始，我就覺得呢個人好啱，好適合結婚，想同佢計劃將來。

D：咁你介唔介意係度講下你將來嘅計劃係點樣呀？

星：我嘅計劃就係同佢結婚生小朋友。嗱，我又唔係好有錢，但係物質上我都已經有晒我自己需要嘅野，樓同車都有我都搞掂左架喇。所以其實之後想結婚生仔我都計劃晒。

東：冇呀，要困架喇。

D：都係，你當要重新追過啦。即係而家又有另一個對手，而嗰個對手都幾勁嘅，有啲POWER嘅，但係你唔可以縮嘅。

東：阿星你有冇啲信心，你覺得你自己嬴面大唔大呢？

星：其實我都唔知喎。

東：你知唔知佢同佢嗰邊關係點樣架？

星：佢都同我講係五十五十咁樣囉。

東：(拍手)有嬴面﹗﹗喂，咁你要有啲信心喇﹗

D：唔係，因為我覺得你首先需要提升左你既信心先。首先兩個月唔一定輸畀八年嘅，呢個從來都唔係時間性嘅問題。

東：同埋如果你輸硬嘅話，我覺得你女朋友就著一聲就走，佢唔好意思面對你呀。因為佢覺得辜負左你呢，佢就會「哎，唔好再搵我」，直接捐返去舊嗰度。但係我覺得佢依然企喺個中間位呢，其實你係有嬴面架。所以你唔好放棄呀，你女朋友唔係嗰啲衰人就係特登講畀你聽，跟住希望你.....「搶我呀，搶我呀」。佢唔係咁嘅人黎架嘛？

星：佢唔會，佢好乖架。

東：係囉，所以你女朋友迷惘緊架咋。

D：係呀，乖乖女仔通常都係好容易迷惘。

東：你有冇諗到啲咩方法去表達你係畀到幸福佢呢？有冇啲動作你已經諗到呢其實？

星：我而家就煮飯畀佢食囉。我會接佢過黎一齊食囉。

東：咁佢都感動嘅？

星：應該係啩，我唔知呀。

東：你覺得你食餐飯時嗰個相處係點樣呢？

K：佢開唔開心呀？

星：開心架，我地乜都可以傾，好開心架。

東：咁OK嘅。因為如果佢心不在焉呢，個心係度呢..

K：叫你唔好搞咁多嘢啦。

D：甚至乎可能見你煮咁多，煮九大簋，如果佢面有難色咁就慘喇。

東：或者你有冇鍚下佢嗰啲呀？佢有冇抗拒呀？

星：佢冇呀。

東：我覺得有信心呀﹗

K：可奪金。

D：你應該唔止五成嘅我覺得。

東：係呀，你七成架喇。

星：有冇啲咩可以再增加多啲個勝算呀？

K：我覺得你可以以細心作為一個攻勢囉。即係女仔無論係我呢啲啦，定係溫柔啲、乖啲啦，都鐘意另一半係細心呵住佢架嘛，真係手中寶架嘛。

D：即係好似你老公咁呀嘛？

K：係呀。

東：因為冇辦法，都係真誠。因為如果你用計謀，跟住佢之後知道左你用計謀，佢就會後悔呀。

K：「唉呀，你個奸狗﹗」

東：如果唔係呢，佢揀左你之後跟住過幾個月，發覺原來係畀人呃左過黎，佢又會去返嗰邊。

D：同埋我成日覺得呢，愛情用計謀都係弄巧反拙嘅。

東：如果你本身已經打定輸數嘅話，佢就覺得你唔吸引呀。
K：同埋佢覺得你係唔係唔想爭喇，咁算啦。

東：係呀。

D：你話大家夾架嘛，咁某程度上佢都會揀你架，你要相信呢樣野。

東：因為我好合理咁講，一個拍左拖八年嘅人，同一個兩個月嘅人，有咩問題呢就係，八年嗰個你咪就係知道佢咁樣囉，佢要改就改鬼左啦，佢已經緊局左咁樣架喇。但你係有無限可能嘅，你可以改變任何嘢。

K：你創造出黎。

東：係呀，你可以畀啲遠景佢，你會點樣畀幸福佢，呢個係你嘅優勢黎。

星：佢之前同我講過呢，話驚佢同我呢一兩個月嘅開心幸福呢，淨係熱戀期先有。

東：可能係架。所以就你要話畀佢聽唔係囉。可能同佢PLAN啲遠啲嘅野囉。阿星畀到佢，佢話佢有車有樓

眾人：哈哈哈哈哈

東：得架喇，嬴左一大截喇。 比左個遠景佢架喇。

D：咁又係。

東：你咪同佢講下，第日間屋點樣呀，即係呢啲咪就係個遠景嘅承諾黎架囉。

K：加個......將來有你個名呀

東：即刻畀佢簽名呀？

K：有你個名架﹗

東：但係我覺得你講呢啲已經足夠架喇。

D：係囉。

東：畀啲信心你自己丫，你輸信心咋真係。

星：明白，好。

東：好唔好呀？畀啲信心自己﹗

D：嗱，你覺得自己掂唔掂先，阿星？

星：掂﹗

東：大聲啲﹗大聲啲﹗

星：掂﹗

眾人：OKAY﹗掂呀﹗﹗

K：加油﹗等你好消息﹗

眾人：BYE BYE﹗

星：多謝，拜拜﹗

東：其實頭先個CASE呢，我哋都唔知幫到啲咩，其實我地唯一可以做到就係令到阿星有信心。你諗下你回想返，佢啱啱打入黎嗰陣時呢，佢自己都講到好似「嘩，輸緊咁樣」。

K：我以為完咗呀。

東：係呀，要我地安慰佢，其實根本講下講下，根本佔上風。

K：仲要故事嘅後續。

東：佢根本佔上風，其實佢就係信心問題呀。

D：所以我去到好後都聽下聽下，唔係好對路喎，我以為同佢分左手，但點解聽下聽下唔係嘅。

東：唔係呀，根本佢自己羸緊。其實溝女就係講信心咋嘛。Dickson你睇下你，我相信你都係因為信心問題。

D：所以溝唔到女。嗱，我係好老實嘅，我信心係不足嘅，而我好多時候出現呢個情況就係有對手呢，我就走架喇。

東：哦.....就未應戰已經輸左喇。

D：甚至乎最初會覺得啲對手未必夠我嘅，但慢慢人地一進攻呢，我就覺得「唉，死喇」，佢就咁多野我諗個女仔都係鐘意佢架喇，我都係算啦。

K：就走喇。

D：唔好搞咁多野喇，唔好逼人咁樣。

東：所以唔得呀，你要吸收教訓呀，你要揀啲冇畀人追嘅女仔呀。

K：冇人追，咩冇人追呀，哈哈。

D：嗱，我都有呢個想法，但係我從來都未遇過呢個狀況架。任何，基本上...

東：可能個情況係......

K：我想....

東：唔係﹗可能個情況係啲人見到，吓，Dickson都追個女仔，我點解唔追呀？﹗跟住咁樣你就...你明唔明呀？點解我唔出手呀

D：呢個就係我近期經常有嘅想法呀，就係如果我同左個女仔一齊，人地會唔會覺得Dickson都可以追到佢

東：咪爭囉。

D：好容易就可以攞走。

東：所以你要暗追。每次追都要暗暗地。

K：地下情嗰啲。

東：唔可以畀人知道

D：係

東：咁就殺佢一個措手不及，咁樣偷隻雞咁呀嘛。

D：希望我有咁嘅一日啦。

東：喂﹗快啲呀，等你呀。

K：我睇你破釜沉舟呀。

東：好喇，今日講到呢度啦。好，拜拜﹗下集見。