張進翹mansonvibes從本我認識超我　新歌《QUEST?ONS》MV原來充滿哲學難題？　收集逾4小時民間影像　最難忘的一個鏡頭是⋯⋯　訪問足本版｜無名・事｜ACOO

我哋收集到差唔多超過四個鐘嘅民間影像。咁我當全部睇過嘅時候，我係有一種好莫大嘅感動嘅，因為我好似係四個鐘入面睇咗好多、好多唔同人嘅人生，咁而呢啲人生係有一種相似係度嘅，啫係大家都可能係旅程當中，但係個感覺我同所有人嘅感覺好近。咁..有收到啲咩影像呢？收到er好多唔同國家嘅搭火車啊、或者搭船啊、搭飛機嘅過程啦；又有係熱氣球上面見到好多熱氣球嘅影像啦；甚至係收到嗰個錄影者嘅仔仔啱啱出世第一下嘅喊聲嘅影像。

咁跟住我就即刻我又嘗試吓拎返部機出嚟，拎返自己過往嘅影像睇下有啲咩可以貢獻出嚟啦。咁係呢個過程啊我又發現「𠵱，原來我以前真係拍低咗好多嘢㗎喎」，啫係以前可能冇意識，亦都冇諗到有一日會有一個咁樣嘅作品係可以用返呢啲影像嘅。但當時淨係覺得「哇！好靚，好想紀錄低。呢刻好有感覺，我好想拍低佢啊。」咁就好似我哋原來er..一路以嚟我哋做咗好多唔同嘅嘢啦，啫係每個階段之前都累積咗好多，而呢啲種種嘅累積可能我哋當時係冇諗過之後會有一樣咁樣嘅作品出到嚟。

MV入面其中一個我覺得好震懾自己嘅心靈嘅一個畫面就係一隻野犬嘅一個鏡頭。咁呢隻野犬呢佢係度，佢係個地下度er擔緊嚿骨頭，咁我就將佢拍低咗啦。我e...Zoom到好近嘅，我就見到佢嘅表情係，好...即係好複雜嘅，佢佢有無助啦，佢亦都有痛苦啦，有好多..好多好多唔同嘅情緒係裡面啦。我就當刻我就諗：「其實我哋可以飽腹同埋我哋要承受饑餓，其實我哋係咪真係有得揀嘅呢？」啫係可能有陣時其實係有主宰㗎呢樣嘢，我哋可能有得揀嘅都係個局限裡面揀。而我有緣遇到呢隻野犬，我拍底佢，我就選擇er紀錄低，係冇選擇之下做選擇。希望我可以將呢個相遇、呢個生命去發展到更大嘅一個藝術，即係將佢transform（轉化）去一個藝術嘅形式咁樣去表達佢。

你會睇到好多唔同零碎嘅片段啦，咁有好多都會以為「咁嗰個係咪你嚟㗎？呢個係咪你細個嚟㗎呢？」其實有一樣嘢想表達就係「是他，也是你和我」。我哋嘅人生裡面會遇到好多嘢，會遇到質疑啦，會遇到好興奮嘅時刻啦，會遇到er去外國別離嘅時刻啦，會有出生，會有死亡，會去到上天下海。呢啲全部都係我，我亦都即係等於你。即係每個生命嘅中心，嗰個主角。而除咗係人之外呢，佢亦都可以係動物，呢個地球除咗人類之外係有其他生命。所有嘅生命都值得被尊重，即係譬如：MV入面有個鏡頭就係er鯊魚啦，海入面嘅鯊魚，然之後接落去係另外一個係水裡面嘅人，然之後有好似一個心形嘅島，其實就係愛係度令到呢個世界一路運行囉。咁我哋需要愛自己、愛人類、亦都要愛呢個環境同埋愛所有嘅生命。

透過呢個MV就想探討呢樣嘢，係一個我好想知道答案好耐嘅一個topic，就係關於「自我」、「本我」同埋「超我」。呢三個「我」到底係咩嚟㗎呢？即係譬如Oscar嘅舞步啦，佢係一個破繭而出嘅過程嚟嘅，即係一開始就會有一種好...好er制肘住自己嘅一種舞步，唔俾自己出嚟，即係好想去表現，但係佢亦都好抑壓自己，就好似「超我」咁樣。即係「超我」佢係用一種道德去壓制住自己，然之後唔俾自己去釋放任何慾望嘅一個...一個狀態，一個精神狀態。

而佢去到之後遇到咗另外一個「我」啦，咁然之後佢哋兩個融為一體，啫係（MV）中間咪有段pause（暫停）咗嘅部分嘅？就係想呈現一個叫「合一」嘅概念，就係唔同嘅「我」，唔同時間嘅我。當唔再流戀過去，或者唔再judge（判斷）過去自己啱唔啱，而係承認嗰樣嘢發生咗嘅我。去到呢一刻，好啦，我哋一齊翻翻去現在，咁我哋就可以融合、合一，變成返一個完整嘅我去完全活於當下。咁嗰個亦都係一個搵到端倪嘅過程囉。咁當（MV角色們）佢哋一齊向太陽伸手，之後就其實象徵佢哋合一咗。咁所以之後無論係Oscar或者兩個我飾演嘅角色都係有種新嘅狀態，就係得到咗自由啦，得到咗...放下咗自己嘅框架啦。即使可能Oscar跌到落去泥濘，佢成身都係泥濘，但係佢會擁抱呢個係泥濘嘅自己，佢會可以自由咁樣繼續向着未知奔跑。

因為其實對於我嚟講，一路都好似有啲嘢勒住自己咁，啫係過去，啫係成日都會好驚一啲未知啊，或者好多恐懼，咁我就發現因為我對自己嘅認識唔夠多啊。咁李小龍講過話：「所有嘅知識其實最終都係等於對自己嘅認識」。咁，咁就er...其實我發現原來透過呢個作品我認識咗自己多好多，啫係有個機會俾我學到原來一路想知嘅「自我」、「本我」、「超我」係咩呢。冇咗以前個種成日想勒住、框住自己啊，唔俾自己開心啊，或者質疑自己啊，乜都質疑一餐啊，冇咗個種pattern（習慣）。咁就好似MV最後終於可以勇於奔往未知啦。