29/4《圍爐取戀》ToNick來了！玩物喪偶真男人

東方昇，專家Dickson，Kneta：大家好！
東方昇：嘩！今日我哋有ToNick呀！（熱烈歡迎）好重仔啊我哋！咁多男人，咁我哋咁多男仔係唔係講女人呢？又唔係喎！
眾人：哈哈哈
東方昇：因為你哋有首新歌係叫做《玩物喪偶》，就講玩具嘅吓話？男人儲玩具，喂，你哋作得呢首歌一定本身係有好多經歷啦，一定係儲好多玩具跟住比另一半詐型嗰啲啦！
小龜：我嗰啲朋友
東方昇：哦，唔係你？
晨曦：好多故事
恆仔：我哋將身邊睇到嘅故事⋯⋯紀錄低啫
東方昇：代人抒發嗰個情感，就唔係你哋自己，明白嘅，咁講吓你哋朋友儲野嘅經歷
Kenta：朋友嘅經歷
東方昇：最勁係儲咩呢？儲結他嗰啲啦定係儲音響嗰啲呀？
Kenta：唔係儲女呀嘛？
恆仔：所以呢，我哋拍完呢個MV之後發現呢，如果你想名正言順、光明正大咁樣儲玩具呢，有個答案係好好嘅，開公司！
東方昇：哦～
恆仔：你明唔明呀？即係我哋音樂係職業嚟㗎嘛！
東方昇，Kneta：哦！！！
專家Dickson：係賣嘢嘅
恆仔：所以我哋儲結他，唔係玩玩具
東方昇：即係事業嚟嘅
恆仔：事業呀，事業心重㗎嘛
晨曦：同嗰啲裝修師傅好多個鑽頭一樣囉
眾人：哈哈哈哈
東方昇：係呀，其實佢唔係儲鑽頭
晨曦：佢梗係唔係啦
恆仔：廚師都好多刀囉
東方昇：音樂就解決咗啦，就唔會詐型啦，其他有冇啲係⋯⋯
專家Dickson：即係唔係音樂類嘅，譬如可能話模型玩具之類呀

【晨曦玩物：紋身】
晨曦：我先啦！咁我就好多年前就⋯⋯突然間心血來潮去紋身，第一次就已經紋晒成隻手喇
東方昇：咁快？炸晒佢喇
晨曦：咁我就儲紋身囉叫做
晨曦：我係紋之前呢，就扮唔覺意咁同老婆⋯⋯
東方昇：點講呢你？點講呢？
晨曦：啊，我想呢，Er⋯⋯
東方昇：紋你個名！
晨曦：唔係，我好想做啲⋯⋯
東方昇：又唔係喎，你又唔係喎
晨曦：首先呢，要同佢講啲禁忌先啦，即係紋身，你唔可以紋啲生存嘅人嘅樣呀
東方昇：哦⋯⋯
Kenta：唔得嘅？
專家Dickson：所以你就唔可以紋到你個樣喇
晨曦：係，咁如果紋個字嘅話呢，嗰陣時好似都仲未結婚，咁跟住就好多根據事實嘅統計呢，多數都係唔好嘅收場嘅，咁所以⋯⋯
東方昇：又唔老黎喇！
晨曦：呢啲破壞唔到我哋嘅愛情嘅！但係有呢啲咁嘅刺喺度都係唔好啦
東方昇：哦，咁紋咩呢？拎隻手出嚟睇吓你最尾紋咗啲咩嘢！
晨曦：咁所以就紋咗啲音樂類型嘅嘢
東方昇：哦⋯⋯都係事業啦！
晨曦：咁我就同佢講：「嗱」「因為我哋嘅結合啦」「同埋我自己嘅人生嘅態度就係比較隨意嘅」「Life is Random!」「咁所以呢，蒲公英呢」「呢個係蒲公英嘅花」「咁佢就係代表一個隨意，隨性嘅一樣嘢」「咁亦都代表咗我同你」
東方昇：嘩！咁都得呀？
Kenta：你同佢好隨性咁樣
東方昇：咁之後你全身都係，佢有冇詐型？定係都冇乜所謂嘅？
晨曦：每一個都係紋完先至⋯⋯俾佢突然間發現㗎囉
東方昇：嘩⋯⋯即係平時就熄燈，多數都熄燈嘅
Kenta：即係詐睇唔到
東方昇：跟住無啦啦開燈，「咦？咁樣嘅？」
晨曦：明明勁熱都著到成身衫
東方昇：咁樣嘅。但係你好吖，你唔使厊位呀嘛
晨曦：用咗螢光
專家Dickson：都唔係㗎，厊佢身體嘅位吖嘛
東方昇：咁都好啲嘅。唔係，如果想再紋多啲咪⋯⋯肥啲，又可以紋多啲。你哋呢？你哋三位呢？儲咗啲咩呢？

【恆仔玩物：漫畫】
恆仔：我先啦～我漫畫
東方昇：哦～
恆仔：係呀，漫畫。咁有一次就係屋企裝修，咁裝修你就要Pack好啲漫畫喇，咁Pack好晒啦，咁就去咗個親戚屋企度住，咁然之後呢，裝修好晒啦，攞晒返嚟啦，咁我已經特登間房呢我就整咗個好大嘅書架，我要見到啲漫畫嘅！咁我就同我媽咪講，我話：「嗱，我而家出去做嘢」「咁呢三個紅白藍膠袋」「就係我啲漫畫嚟嘅」「唔好搞！」「等我返嚟，就按返次序擺返上個書架度」
專家Dickson：因為一郁咗，冇咗本就唔知點搞
恆仔：係喇！你要順返個期㗎嘛
東方昇：跟住呢！跟住呢！
恆仔：咁跟住我出去做嘢，夜晚返嚟呢，唔見咗喎，嗰三個紅白藍膠袋！咁而我又聽過有啲朋友就係⋯⋯會趁你裝修或者唔知咩嘅時候會掉㗎嘛，跟住我即刻差啲流眼淚，然之後就吵醒我阿媽，「我啲漫畫呢！！！！」
眾人：哈哈哈哈
專家Dickson：話咗唔好郁㗎嘛，係咪先
恆仔：佢話：「因為厊訂，要執嘢」
東方昇：就掉咗喇？
眾人：哈哈哈哈
恆仔：佢就好好咁樣幫我，擺咗喺張床下面有個地檯，擺晒落去
東方昇：差啲漫畫冇咗，就脫離咗母子關係
恆仔：係，哈哈哈

小龜：我都有儲嘅，以前我有本漫畫啦，然後唔知我阿妹倒咗杯咖啡落去呢，係⋯我記得係《I’S》，嗰陣時我攞咗返Band房擺嘅
Ryan：攞咗返房呀嘛
小龜：嘅⋯第十期定唔知第十一期
東方昇：咁都記得？！第幾頁？
小龜：咁好傷心㗎嘛！係唔係呀？咁傷心咁我就千方百計我都要買返一本乾淨嘅
Ryan：希望儲返齊一套
小龜：係喇

【本集主題：玩物喪志真男人！】
東方昇：嗱，你哋就儲紋身，漫畫都好典型吖。我哋今日有個case呢，佢就係儲呢個超人，鹹蛋超人。咁就上嚟分享吓睇吓大家有冇共鳴啦，好，我哋接佢入嚟先！
東方昇：喂，豪仔你好！
【圍爐buddy：豪仔（化名）聲音經過特別處理】
豪仔：係
東方昇：你係唔係上嚟分享你啲儲嘢嘅經歷呀
豪仔：係呀
東方昇：你儲乜嘢呀你？你好邊範先？
豪仔：超人囉
東方昇：超人？邊一範超人呀？
豪仔：鹹蛋同幪面都Okay嘅
東方昇：咁你儲玩具有幾誇張呢你？
豪仔：而家買買埋埋都好似有五，六箱

【豪仔珍藏：六箱玩具】
東方昇：有五，六箱？
專家Dickson：嗱，你個箱有幾大先？
Kenta：普通IKEA膠箱？
小龜：貨櫃碼頭五，六箱啊
豪仔：普通大膠箱嗰啲囉
小龜：但係你喺屋企唔會擺出嚟㗎？即係你擺喺個箱入面咁樣收藏？
東方昇：係囉
豪仔：擺咗少少出嚟咋，冇位呀
東方昇：係咪另一半逼你，話你唔准擺出嚟呀
豪仔：唔係呀，冇位呀真係
東方昇：哦⋯⋯
Kenta：明嘅！明嘅！
東方昇：攞把刀航住佢，摙住佢啲嘢嘅。有五，六箱吖，咁你係有幾瘋狂呀？即係你成日買嘅？
豪仔：Er，係呀
晨曦：你夠唔夠膽話俾另一半聽，你買咗幾多錢㗎
豪仔：報細數係基本㗎啦

【豪仔玩物心得#1:買玩具報細數是基本】
眾人：哈哈哈哈
小龜：嗱，你最貴嗰個買咗幾多錢先？
豪仔：最貴⋯⋯我嗰啲唔係好貴㗎咋噃，八百零九百蚊到㗎咋喎
東方昇 ：Okay喎
小龜：咁但係你會通常報細幾多，因為我，我⋯⋯
東方昇 ：你你你
小龜：我啲朋友呢！我啲朋友通常就報細一半以上嘅，即係可能八百蚊就話三百蚊咁樣嗰啲呢
豪仔：差唔多啦
小龜：差唔多～
東方昇：咁你買之前係會主動話俾女朋友聽嘅？
豪仔：睇之前有冇訂囉，之前訂咗可以夾咗幾時拎都得㗎嘛
東方昇：哦，咁即係點呀？收埋住？

【豪仔玩物心得#2: 小心翼翼偷運模型】
豪仔：等佢唔喺屋企先攞囉，再唔係咪收埋先囉
東方昇：哦，收埋
Kenta：收床下底
東方昇：收埋喺邊度呢？
豪仔：有陣時出街咪收埋落背囊度囉
東方昇：咁你返到屋企點樣呀，你都會攞出嚟𠺝
豪仔：等佢見唔到先攞返出嚟囉，一唔對路咪塞返喺第二個位囉
眾人：哈哈哈哈
東方昇：喂，我想問四位，你哋係咪普遍都係會收埋先？
小龜：我哋啲朋友係嘅
東方昇：你啲朋友都係嘅？
小龜：係呀，我哋啲朋友係嘅
Ryan：同埋我哋公司買，可以擺公司吖嘛
東方昇：哦⋯⋯
小龜：我以前啲氣槍呀，漫畫呀，你問吓佢哋就知呀喇，波鞋呀，全部都係夾band用品嚟
恆仔：即係對於音樂，有一排佢好鍾意玩氣槍，咁嗰啲掛結他嗰啲架就全部掛晒啲氣槍。因為我哋有個Band房呢
東方昇: 就好啲？
恆仔：成日有啲興趣就可以⋯⋯
東方昇：啲違禁品就擺晒落去啦
Kenta：私竇呀

【集齊一套才心滿意足】
東方昇：嗱，因為我係比較冇儲嘢嘅，豪仔可唔可以講俾我聽，其實你儲野有咩快感呢其實？
豪仔：你睇完套戲有陣時咪好想買齊人咁樣囉
小龜：係呀，呢個都真呀
豪仔：即係一村人買咗幾隻，差幾隻又想買埋佢
Ryan：嗯⋯⋯
專家Dickson：即係你硬係覺得差咁啲嘢嘅，如果嗰樣嘢有七隻，但係你冇咗一隻，你硬係覺得你要擁有埋嗰隻先係嘅，先係算圓滿呀

【佛洛依德心理學：與肛門期有關？】
東方昇：嗯～明白，因為呢，我讀心理學啦，其實有講過⋯⋯
Kenta：咁都有心理學嘅？
東方昇：佛洛依德講過呢，點解啲人會儲嘢呢，係因為肛門期呀！肛門期發展⋯⋯
眾人：？？？？？？
專家Dickson：話人哋肛門⋯⋯
東方昇：唔係唔係，真係，嗱，佛洛依德講㗎，唔係我講㗎！就話呢，肛門期就係我哋人生第一次儲野，儲屎呀，喺條腸嗰度，咁就係嗰個時期呢，就開始有儲野
小龜：有快感！
東方昇：真係呀
小龜：唔怪得知啦
東方昇：真係呀！
小龜：我每朝早都⋯⋯ High High哋

小龜：有冇鬧過交呀因為呢樣嘢？即係例如我啲朋友可能未結婚嘅就會話：「你唔儲錢結婚啦」，如果結咗婚嘅就話：「喂你遲啲有小朋友，你宜家咁多，一屋都係嘢噉點算呢？」然後個老公就話：「噉你成張牀都係公仔啦，噉又點計呀！」
東方昇：又或者話：「你啲衫又你噉樣儲啦！化妝品呀，袋呀！」有冇噉樣鬧過交呢？
豪仔：噉又冇喎，佢最多係噉吟話「又買嘢」嗰啲囉。
東方昇：噉你又幾幸福喎。
Kneta: 我哋女仔覺得寧願你買玩具，買漫畫，唔係儲女人吖嘛。
All: 係喇啱呀。
東方昇：的確男人喺度儲呢可以反擊，就話：「噉我心入面淨係你一個吖嘛，我又唔係搵其他女人，噉我都要搵啲興趣，咪就係儲玩具囉」呢個係必殺㗎。
Kneta: 係呀，所以我覺得冇所謂㗎。
恆仔：呢個唔係反擊嚟㗎喎。
All: 係係係，呢個係真㗎，道理嚟嘅，真理嚟嘅~

Dickson: 嗱我又問一個問題啦豪仔，你嘅女朋友係同你一齊住吖，還是你哋係分開住㗎？
豪仔：一齊住囉。
Dickson: 但係同居都可以收得咁埋，完全唔知道，咁犀利㗎咩？
豪仔：我永遠都係嗰六個箱吖嘛。
Dickson: 你有冇試過多到要買多一個箱嘅情況出現呀？
豪仔：試過呀。
Dickson: 噉點算呀？噉你突然之間多咗個箱點解釋呀？
豪仔：冇……冇呀。
All: Laugh die
晨曦：（7隻手指）123456囉！
小龜：但以我所知你玩呢啲呢，通常會join啲Whatsapp group 呀，啲巴打分享會，影晒相噉樣。
豪仔：Err 都有呀，少少囉。
小龜：嗱噉你join嗰啲分享會通常啲巴打又會send啲相，又話佢啲收藏品點，噉你都總有一次係可能趁你女朋友唔喺屋企，就攞晒出嚟，即係戰利品噉樣，舖喺個地下影張相，你有冇做過呢件事先？
豪仔：噉…噉呢啲，梗…梗係有啦。
All: haahaha
小龜：噉如果你影相嘅時候，你女朋友突然之間返嚟，你覺得佢見到你買咁多會有咩反應呢？
東方昇：我想知道佢（豪仔）有咩反應先，佢咁淆底。
豪仔：冇嘢呀，好耐之前買落㗎咋嘛呢啲，攞翻出嚟影下相姐。
東方昇：姐係你女朋友都幾扮蠢。
小龜：最緊要無賴呀我覺得。
Kneta: 呢個好緊要呀，面皮夠厚呀。
小龜：因為我有個朋友都鍾意儲啲figure嘅，佢鍾意儲Bearbrick，噉你都知道佢由100%到1000% (size) 都有啦，跟住佢有一次想買隻1000%，你都知好難收藏啦，咁大隻成個人咁高，跟住嗰一晚佢就帶咗佢老婆去睇演唱會，然後叫個兄弟幫佢攞上佢屋企。
All: wa….
晨曦：跟住返到屋企多咗個人嘅！
小龜：就換咗佢本身屋企嗰隻1000%，原先嗰隻就擺咗喺個迷你倉。
All: 哦……
小龜：噉因為佢有新，梗係想喺屋企威吓、影吓相噉㗎嘛…
Ryan: 噉佢老婆返到去：「嗰個唔同咗色嘅？」
小龜：跟住佢就好似佢(豪仔)無賴噉樣：「哦，我幫佢黐咗幾張貼紙啫。」姐係啲外觀嘢嚟嘅。
All: 高招 hahahaha
小龜：佢話冇發現，但其實我覺得啲女人知嘅。
東方昇：其實另一半全部知嘅，某程度上佢容許你或者扮傻其實都係接受咗你，係愛嘅表現嘅一種嚟嘅。噉豪仔你有冇為咗你另一半去忍手呢？
豪仔：少少啦。
東方昇：點樣呢？
晨曦：唔買1:1囉。
豪仔：唔買啲咁貴嘅嘢啦，太貴嘅唔敢訂。
東方昇：噉或者你買一樣新嘢嘅時候，你有冇買翻份禮物畀你女朋友噉樣㗎？
豪仔：又好似冇喎，如果佢知道咗嘅話咪買囉。
Dickson: 你有冇試過有一次你好想買一隻模型，但係因為你好驚你女朋友唔鍾意而有心靈嘅交戰呀？
豪仔：又唔會，想要咪買囉。
All: 嘩…真男人！
Kneta: 係唔係呀？！

東方昇：阿豪，我覺得你係我哋現場入面最勁嗰個，係完全控制晒嗰個狀況，Everything under control，可唔可以教吓大家點樣可以做到你咁灑脫呢？
豪仔：冇㗎喎，噉你知啲嘢，你唔買轉頭就俾人買晒，你又買唔翻㗎嘛。
All: 係喎又好似啱喎。
Dickson: 係呀啱㗎，其實點解要儲嘢？因為嗰啲嘢會絕版㗎嘛。
小龜：如果佢絕版，你炒價囉咪。
Dickson: 唔係呀，同埋你發覺，點解我當時冇買？我明明見到㗎喎，然後佢宜家冇咗，我先發覺原來佢係最好㗎。
Ryan: 噉你可以同你女朋友講，呢件事係保值吖嘛，呢個都係投資嚟㗎係唔係先？
東方昇：嗱好老套呀，如果你女朋友同你啲玩具跌落水，你會救邊個喇？
豪仔：好地地唔會跌落水㗎喎。
東方昇：唔係要你諗呀，你只可以揀一樣！
Dickson: 佢掙扎呀！掙扎！
晨曦：宜家個case就係，你老婆真係好嬲呀！攬住啲玩具一齊跳落海！
豪仔：吓？梗係玩具啦係咪先？
All: hahaha 玩具呀！
豪仔：儲咗太多年喇因為。
小龜：係呀，我明呀，姐係心血嗰啲嘢，有感情呀。
豪仔：姐係由細睇到大，由細個阿媽唔肯買，到大個自己買到。
小龜：我諗都係男人呢樣嘢。
恆仔：呢個我明呀。
東方昇：即係細個嗰陣時嘅童年回憶。
晨曦：噉我贊成呀，我贊成佢救啲玩具。
All: hahaha

Kneta: 但我想知呢，豪仔，如果你女朋友趁你有一日唔喺屋企賣晒你啲玩具，逐少少，逐啲逐啲賣。
豪仔：應該……點都會嘈㗎喎呢啲。
東方昇：分唔分手先？
豪仔：唔知㗎，噉我賣返你啲袋得唔得吖？
All: 嘩………
Kneta: 明喇明喇，其實係個女仔都有儲開袋。
東方昇：係呀……即係女朋友都有儲開袋，啲袋仲要唔止六箱啦，就幾萬蚊個啦，係咪呀？
豪仔：佢好似唔係儲好多喎。
東方昇：一個頂六箱㗎喇。

小龜：我想問多個問題，係幫我哋女觀眾問嘅，你都會覺得因為玩玩具，你冇拈花惹草，即係你特別專一㗎嘛？
豪仔：都係㗎。
東方昇：噉…噉…嗱嗱嗱，如果有個第三者，同你同一興趣，佢好鍾意超人，情投意合喎，叫你上佢屋企玩佢嗰十箱玩具。
Kneta: 玩佢嗰十箱超人！
小龜：玩佢嗰個……玩具~
東方昇：超人，震嘅，噉你會唔會拋棄你宜家女朋友，搵新嗰個呢？
豪仔：有冇咁啱呀？
All: waaaaaaaa
Dickson: 佢唔係話冇呀！佢係問有冇咁啱，有嘅話我都制呀！
東方昇：有嘅話佢都制嘅。喂唔得，我哋要同你收線，我要保護你嘅生命危險呀。好喇，拜拜！小心呀，小心生命知唔知！
豪仔：(Cut 線)
恆仔：佢心諗，你班友陰我？

恆仔：頭先我問佢可唔可以解釋吓，點解你揀玩具，唔揀女朋友，我係諗住佢答：「噉我女朋友識游水吖嘛」，即係嗰啲都……但係佢唔係呀，佢話：「儲咗好多年㗎嘛！」
Dickson: 佢理直氣壯。
晨曦：真心嘅，其實佢真係好真心嘅。
東方昇：我懷疑佢女朋友咁鍾意佢就係因為佢咁老實。
Kneta: 純情，好率真。
東方昇：係呀，喂噉我覺得你哋嗰首歌其實同豪仔個case有冇相似嘅地方呢？
小龜：即係愛與和平呀其實係，呢首歌其實都唔係去詆毀嗰啲伴侶啦，係想大家喺玩玩具嘅同時都同屋企人溝通好啲，等屋企人知道，哦原來我真係玩玩具嘅，我鍾意呢樣嘢，我真心愛嘅，經過溝通呢就世界更美好喇，就和平啦。
東方昇：即係理解男仔嘅心理。
小龜：係喇。
東方昇：哦~ 噉你好偉大喎，你幫男人發聲喎。
小龜：係呀。
東方昇：因為我哋出IG post 問人有冇儲玩具呢個習慣呢，其實好多女仔都有㗎。
恆仔：我哋首歌下面啲留言都有好多女仔話自己儲得仲誇張過男朋友嘅。
東方昇：哦~ 所以宜家都好好嘅，大家都好諒解嘅。
恆仔：宜家自從呢首歌出現咗之後，成個社會都變咗呀。
東方昇：係呀！感覺到呀！
Kneta: 好和平呀！好有愛呀！
東方昇：噉大家就聽一聽啦，如果仲面對呢個威脅嘅話呢，就俾女朋友聽吓，一齊聽，噉大家就和平好多喇。
ToNick: 冇錯喇。
東方昇：好！噉多謝你哋分享咁多嘢啦，大家記住聽呀！好！拜拜！