22/4《圍爐取戀》煮嘢食都畀男友鬧？

Dickson：咁佢就send咗個message話俾我哋聽個狀況係點啦。咁就係呢，佢話：「冇喇……攤咗牌。而事實上都真係有好多人追緊佢，我只係佢其中一隻兵姐。係我白癡咗，認真咗。By the way，我打算喺間公司做夠一年會辭職㗎啦，我已經唔想再見到佢。」
東方昇：嗯……一個好sad嘅答案啦。
Kneta：結局呀⋯⋯
東方昇：但係……唉～其實我覺得即係佢女上司可能就係咁樣講啦，我覺得都不能盡信嘅。因為可能其實女上司都係唔想傷豪仔，令到佢決絕啲，離開呢段關係。

【東方昇認為……女上司的決絕只為迫使豪仔離開】

Dickson：同埋有可能係因為之前受咗傷，而當你無端端想挽回嘅時候，我唔畀你。
東方昇：係呀。
Dickson：因為我唔想你再嚟多次啦，我知你真係介意。
東方昇：咁寧願決絕啲啦。其實個答案即係話俾你聽，佢哋呢段關係係行唔到落去。咁其實有時冇辦法，愛情就係呢啲Timing唔啱啊，呢個exactly就係Timing唔啱。其實唔好淨係諗個結果，個經歷係美麗、浪漫嘅。

【過程比結果重要！】
東方昇：咁豪仔咪當人生有一個咁浪漫嘅經歷。
Kneta：上一課（笑）
Dickson：真係唔容易㗎大佬。
東方昇：係呀，唔係個個人有㗎。
Kneta：唔係個個人有林明禎女上司。
東方昇：希望豪仔快啲振作起嚟，繼續下一段愛情啦。咁我哋今集嘅case係咩呢？
幕後：今日嘅女事主打上嚟就話，佢男朋友唔想佢繼續煮嘢食。

【本集主題：男友不滿我煮嘢食！】
三人：吓？？
東方昇：男朋友唔想佢繼續煮嘢食…… ？
Dickson：煮嘢食都唔畀？
東方昇：好，咁就聽吓係點解先。Amy你好。

【圍爐buddy：Amy（化名）聲音經過特別處理】

Amy：係，你好你好。
東方昇：你嘅case我聽係……你男朋友唔鍾意你煮嘢食，係唔係呀？
Amy：係。
東方昇：係點解呢？
Amy：咁我而家同我男朋友就……拍咗兩年拖到啦，咁其實我都同佢一齊住嘅，基本上好多嘢都磨合晒，生活上係冇問題嘅。咁但係唯獨是我一直都覺得佢唔係好尊重我鍾意煮嘢食呢樣嘢啦，佢係食嘢零要求嗰啲人嚟嘅。

【男友對食物要求不高】
Amy：即係餐餐可以食老麥呀、茶記嗰啲快靚正，填飽個肚佢就OK 㗎喇。咁我就係啲好鍾意煮嘢食呀，好鍾意研究唔同新食譜，同埋整吓甜品嗰啲人嚟嘅。

【事主熱愛下廚】
Dickson：嗱，但係我又好奇，我想問吓你做過最複雜嘅嘢係點樣㗎 ？

【Dickson提問：煮過最複雜的一道菜式？】
Amy：我有時可能會自己整pizza，即係可能係連個皮都係自己搓。
東方昇：等陣先……即係喺度拋，喺度拋【做拋的動作】
Kneta：義大利式嗰啲呀嘛？
東方昇：跟住屋企就有義大利嗰啲烘爐，跟住就隊入去，跟住就攞返出嚟嗰隻呀？
Amy：唔係～普通焗爐姐，但係成個都係自己整咁樣囉。
東方昇：咁啲料係咩先？啲料好誇張嘅？
Dickson：即係唔係上乘食材？
Amy：咁一定嘅，都係啲芝士呀，跟住海鮮啦，咁樣囉。
東方昇：喂，好合理呀！
Dickson：好合理同正常呀。
東方昇：落唔落菠蘿先？
眾：哈哈哈哈

【義大利傳統披薩捍衛者】
Dickson：（笑）又關咩事呢？
Amy：冇⋯⋯冇落菠蘿。
東方昇：哎！佢真係尊重食材，真係識食嘅。咁好合理姐，冇乜特別呀。我以為你話嗰隻好複雜啊，好鍾意煮嘢食嗰隻係……錦繡多味魚呀⋯⋯

【電視《食神》片段：周星馳：「真係受咗輻射咁喎」】
東方昇：即係猴子腦。嘩，跟住……
Dickson：滿漢全席
東方昇：跟住熊掌嗰啲，唔係嗰啲呀嘛？
Dickson：即係要食三日先搞得掂嗰啲嚟嘅？
Amy：咁又冇～即係可能普通家常便飯咁樣囉。
東方昇：喂，好合理呀。
Kneta：咁我想問你平時煮俾男朋友食嘅都係普通菜咋嘛？即係唔係話要煮到好貴好貴㗎嗎？
Amy：係呀係呀，我買都係買最平嗰啲㗎咋，同埋我買餸都係用自己錢㗎咋。

【選用價廉物美的食材】
東方昇：嘩～
Kneta：好好喎。你男朋友係咪入世未深呀？
東方昇：點會……點會咁呢？咁我問啦，咁你煮過嘅一樣嘢，你好花心機，但係佢覺得好唔鍾意係乜嘢呢？

【東方昇追問：男友不喜歡的其中一道菜是？】
Amy：早排我煮粟米肉粒飯咁樣，但係佢唔知點解唔鍾意食囉。
Kneta：咁我想問佢嗌外賣會唔會嗌粟米肉粒飯先？定係佢純粹唔鍾意你住先？因為佢話佢都會嗌外賣㗎嘛，咁都係茶記嘅啫。
Amy：少嗌嘅我諗。但我都唔明，即係佢都係鍾意食肉姐，咁肉粒都係肉啊。
東方昇：如果唔鍾意食，佢會表達不滿呢？
Amy：咁佢又唔會唔食嘅，咁但係佢可能食少啲，或者唔會食晒咁樣囉。
東方昇：嗱，佢會唔會有啲發脾氣呀，或者俾啲面色你睇？
Dickson：或者俾啲說話你聽？
Kneta：返Chow會唔會？ （笑）
Amy：佢會話嘥錢囉，因為有時整完啲嘢食，咁可能佢未必啱食，譬如我整甜品嗰啲，咁可能有時會送俾其他人食啊，或者同其他人交換啲甜品咁樣啦。

【喜歡與朋友分享料理】
Amy：咁前牌可能我經常性做呢樣嘢，咁佢會唔開心，佢會嬲。佢會覺得我用晒啲錢去整嘢食咁樣囉。

【男友不滿她浪費金錢】
Amy：我同佢為咗其他事嗌交嘅時候，佢會拎埋出嚟講。
眾：（吃驚、笑）嘩⋯⋯咁正？咁好笑？
東方昇：即係講緊個廁所板唔闔，「你自己都煮甜品啦！！」，即係咁樣啊？
Amy：即係累積加埋加埋，佢又會講埋呢樣嘢囉。
東方昇：好難嗱，我要問過中心問題啦，你煮嘢食係唔係好難食？

【關鍵問題： Amy煮餸好難食？】
眾：（笑）
Dickson：邪惡嘅料理（笑）
東方昇：因為佢……因為佢唔滿意有兩個原因，一係你煮嘢食好難食，一係你次次煮完九大簋之後佢洗碗，係唔係咁樣呢？
Amy：佢自願性洗碗嘅，我有幫手，但係好多時都係佢會洗嘅。
東方昇：咁就冇問題啦。咁即係你煮嘢食好難食啦喎！
Amy：唔係囉！！基本上而家一日三餐都係我煮俾佢，第二日飯盒我都係煮俾佢嘅。跟住我平時都會整啲甜品俾我啲同事但係佢哋成日都叫我整比佢哋食囉。
東方昇：所以我哋問咗咁多呢，其實應該Amy佢係冇嘢嘅。
Dickson, Kneta：係
東方昇：驗證咗Amy係冇嘢嘅。
Kneta：係啦，個問題係佢男朋友
東方昇：應該係你男朋友……唔尊重你呢個興趣啦⋯⋯

【東方昇認為……事主興趣不被男友尊重】
東方昇：咁我會問啦，你除咗呢個烹飪興趣之外，你仲有冇其他興趣其實佢都係唔尊重嘅呢？
Amy：就係冇囉，佢好錫我嘅，有時佢都會送係咪俾我呀，其他嘢完全冇問題嘅，但係唯獨是喺嘢食方面呢，可能我有陣時send啲嘢食相俾佢啦，但佢會自動skip 㗎喎。

【男友無視有關食物的訊息】
Amy：但我可能講其他嘢，佢又會覆我。
東方昇：咁你覺得係點解啦？
Amy：即係我會問佢「點解我頭先send嗰啲嘢食相俾你，你唔覆我呀？」跟住佢會話：「我好忙啊，睇唔到啊」。
東方昇：咁的確佢對嘢食冇興趣呀嘛，你send啲大波妹俾佢即刻……即刻咩啦。
Kneta：話「正呀正呀」咁樣⋯⋯或者係Amy從頭到尾冇同佢男朋友講過，煮嘢食係佢嘅超級興趣，同埋可以解壓o既一樣嘢囉。


東方昇：係囉，你有冇同佢講呢？
Amy：我有呀，其實呢樣嘢我都講過好幾次o架喇！跟住佢好似明白又唔明白咁樣囉！
東方昇：咁我問喇！你男朋友有冇啲咩興趣呢？
Amy：有呀！佢鍾意踢波，踩單車咁樣囉！
東方昇：咁佢有冇又買啲波砵呀？
Kneta：有冇買單車？
東方昇： 碳纖o既單車呀？
Dickson：波衫？
Amy：會呀！
東方昇：咪係囉！
Amy：跟住佢會share畀我睇啦！跟住我就覆佢，啊！幾靚呀，幾好呀。甚至我前兩年生日禮物我送咗對波砵畀佢tim。
東方昇：所以我覺得反而你有冇諗個方法說服佢呢？例如話，咁你又鍾意踢波吖，我又畀你踢波，買埋波砵畀你，支持埋你吖！咁點解我煮嘢食你又唔支持我呢？你有冇同佢反擊呢樣嘢呢？

Amy：有呀！但係佢就話：「我唔係唔支持你，咁但係我冇乜興趣吖嘛」咁樣囉。
Dickson：即係譬如當你想同佢分享，呢個興趣o既時候，佢就漠視咗，但又未去到話，「你唔准咁做，唔准咁做」咁樣o既？
Amy：其實又冇話唔畀我咁做o既，但係我知道佢可能真係唔識呢樣嘢，或者冇興趣，但係我淨係可能想佢食完之後講少少好唔好味呀，或者覺得點呀，即係覆一兩句都好囉，而唔係完全無視咗我，或者食完就算，完全唔理咁樣囉。
Dickson：Amy o既感受我大概理解咗，嗱，者係呢，因為嗰個男人而家就係佢煮咗一日三餐畀佢，佢就好似當阿媽煮飯咁樣。阿媽煮飯係點呢，就算佢幾好食呀，或者今日味餸幾好呀，你食完之後你都係就咁入返房咋嘛。
東方昇：係呀。
Dickson：咁你唔會講多謝o架嘛。
東方昇：唔會跪喺度，「阿媽多謝你」，「Arigatou Gozaimasu」

Dickson：但係而家Amy其實心裡面都覺得，喂，我咁辛苦喺個廚房入面，又整糖水，又整乜嘢畀你食，我整埋你食你連講句「好味」你都冇喎。
東方昇：係囉。
Dickson：然後你好似好冇興趣咁樣行開咗喎，所以我唔高興，唔like，係唔係？
Amy：係。
東、D、K: 哦.......
Dickson：嗱，其實Amy佢咁樣提出呢，我忽然間覺得佢好合理喎，因為我哋其實有時候呢，都冇咗嗰個感恩o既習慣。
東方昇：係。
Dickson：即係嗱，譬如好簡單啦，可能呢個同我哋成日出去食餐廳有關，你就算食咗嗰味餸幾正都好呢。
東方昇：俾錢咪得囉。
Dickson：你唔會入去多謝個廚師o架嘛。同埋譬如可能屋企人煮飯畀你，你又係唔會去多謝人。
東方昇：係呀。因為真係會多謝個廚師呢，一係外國就會，叫個廚師出嚟，同佢嗲兩句。
間場「菜還滿意嗎？主廚來了。」「真的很美味」
東方昇：或者係omakase，跟住個廚師喺你面前，咁樣多謝佢吖嘛。
間場「那就麻煩你了」「樂意之至」
東方昇：我哋香港人係冇呢個習慣。
Dickson：係呀，所以其實呢個習慣係應該要有o架喎。因為可能Amy係當送禮物咁送畀男朋友。
東方昇：係，Amy咁你覺得係唔係呢個情況先？
Amy：係呀。
東方昇：哎！咁得喇！我覺得呢啲就係因為....... 你男朋友唔識感恩吖嘛，嗱，多數得兩個方法o架啫，第一個就係激將法，就係你將啲好好味o既嘢今次特登畀啲男仔食。
Dickson：然後佢哋讚你吓話。
東方昇：係呀，佢哋仲要同你講......

Kneta：好好味呀！
東方昇：好！好！味！呀！咁樣，好誇張o既，跟住佢知道咗咪覺得，吓？原來其他男仔識欣賞，我唔識欣賞，會唔會你鍾意咗第二個男仔呢？跟住佢就會開始珍惜你喇。
Amy：嗯！
東方昇：或者借啲易，呢排好機會啦，可能你中吓Omicron咁樣啦。
Dickson：嘩，你話人哋生病。
東方昇：唔係，你扮病，跟住你叫佢煮個白粥畀你，咁要佢親身體驗吓，其實煮嘢食係幾咁辛苦。
Amy：係~
東方昇：唔係，真係呢兩個方法你要令佢，識得感恩呀。
Amy：嗯~
東方昇：我覺得一係呢就係Amy可能你要調整你o既心態，即係其實同而家啲人一樣咋嘛，我post張相喺IG，梗係呃link啦！咁而家Amy就係呃唔到like, 冇人like呢，就有啲唔開心。咁其實你要知道，烹飪係你o既興趣嚟o架嘛，目的係好enjoy個過程，頭先你話減壓吖嘛，其實佢鍾唔鍾意食呢，唔係你o既目的嚟o既，其實你應該為自己而做嘢，因為你變咗為佢而做呢，咁佢一唔鍾意，唔畀分你，你就覺得，哎呀，好失敗，就崩潰喇。我覺得你要為自己呀，好老土，要錫自己嗰啲呀。唉，好老土，我講完都....... lur lur lur lur 出嚟。但係呢個就係一個例子就係你為自己做囉。

Dickson：要平衡o架嘛。嗰個關係要平衡o架嘛，即係你唔能夠做晒佢鍾意o既嘢，但係你自己o既嘢，你就想放棄咁樣，佢唔鍾意咁樣。
東方昇：我諗到個方法，令到Amy對自己o既烹飪有返啲信心，同埋有返個存在價值喺度。嗱，Amy，陣間完咗之後呢，你就send 你啲食物相過嚟。
Dickson：係。
東方昇：我哋畀啲觀眾睇吓，大家大力去讚佢啲嘢。
Dickson：唔係嗱，我問清楚先，係唔係好似嗰啲咩蒸蛋上面有幾條魚插住嗰啲嚟o架嘛。
東方昇：唔樣衰o架嘛？
Dickson：唔係嗰啲嚟o架嘛？
Amy：Errrr，多數都唔樣衰。
東方昇：Okay！真係，你send 幾張嚟，send幾張相嚟，我哋叫我哋啲男觀眾大力去讚佢，不斷話好好好味，嘩！好靚呀！好想鍾意你呀！
Kneta：啪啪聲讚到。
Dickson：再叫佢哋喺你樓下排隊。
東方昇：係呀，真係咁樣。首先你就有自信啦，咁你男朋友又開始緊張啦，咁就解決晒喇。
Amy：嗯，好~
東方昇：真係！好！搞掂！一於咁話！
Amy：好！
東方昇：感謝你！
Dickson：Thank you Thank you
東方昇：快啲send 過嚟啦！拜拜~
Amy：拜拜~

(睇相中......)
東方昇：嘩，嘩！
Kneta：超靚囉，有冇搞錯呀。
東方昇：嘩，呢個最犀利。
Kneta：雕花呀。
Dickson：呢個雕花真係，世界級喎呢個真係。
東方昇：即係雕花選手呀呢個真係。
Kneta：我覺得真係唔得喎佢男朋友，你係點樣講一句都好吖，真係可以攞出去賣o架喇喎。
東方昇：因為未睇相之前，我都仲覺得粟米肉粒......係咪係真係成條粟米，同埋一個手指尾咁o既肉粒，粟米芯都喺度。原來唔係，係真係勁o既。
Kneta：真係好靚呀。
東方昇：甚至乎勁到我覺得係咪......
Dickson：喂，大廚級嚟o既呢啲。
東方昇：所以我理解到點解Amy嬲o既，因為真係好畀心機......
Dickson：其實任何人都好，其實應該要尊重人哋o既興趣o既，咁你知道興趣o既嘢係一定要放好多時間同埋心力落去先會搞成咁樣o架嘛。係咪先？

東方昇：同埋同時呢，我哋想人哋尊重我哋鍾意o既興趣之餘，我哋都要知道其實對方未必又真係咁鍾意o既.......
Kneta：攞個balance 位囉。
Dickson：係囉，即係又唔好不停係咁send send send囉。
東方昇：所以自己enjoy件事咪得囉。我直情想叫Amy送個蛋糕畀我哋呀，我哋幫佢解決咗問題，係唔係呀？唔係唔送呢個雕花畀我哋呀？
Dickson：最多我哋喺樓下又留言話「好好味」咁樣。
東方昇：同埋我哋畀返錢佢！係！
Kneta：我讚返佢好食！
東方昇：咪係囉！
Kneta：我話佢好雕得！
Dickson：今日呢個Case幾好，因為佢好生活化，即係有一種人人都會面對呢個事情o既感覺。
東方昇：同埋因為成日我哋啲case太誇張，啲人話假呀，點作呀大佬？！黐線啦！咁生活化點作吖，所以梗係唔會假o架啦！
Dickson：咪係囉！
東方昇：所以大家記住交你o既問題，即係大問題又得，小問題都得o既，好！拜拜！