iPhone mini 或後繼無機？｜B&O首款帶柄式True Wireless Beoplay EX｜Netflix擬推平Plan搶客｜廣東話【Price Weekly #111 2022年4月】

另一樣要介紹就係TCL 50" 量子點 4K Android電視，佢採用咗QLED面板，透過量子點層，能夠產生10億種顏色變化，配合埋Dolby Vision，更提高至 100% 色域同亮度，加上4K解像度和HDR10+，可呈現鮮豔嘅色彩、清晰銳利的畫質。音效方面搭載了 ONKYO音響系統，並配備Dolby Atmos全景聲效果，可以帶比你影院級聽覺體驗，另外支援免提語音控制2.0和Google Assistant，操作相當方便，Price網購現在只賣緊$5,580，連免運費，仲送TCL 2.1 聲道 Soundbar。而喺4月23號夜晚8點起，TCL仲會推出限量Promo code，有10個名額可以得到500蚊折扣優惠，先到先得千祈唔好錯過喇！

每年9月Apple都會發佈新一代iPhone，而距離推出日子愈近，網上流傳的消息就愈多。最近就有疑似iPhone 14嘅金屬模具相片流出，尺寸分別係6.1吋同埋6.7吋，兩款尺寸都設有雙鏡頭同三鏡頭版本，估計會係iPhone14，14Pro和14Pro Max。至於舊有的5.4吋iPhone 13 mini就可能再無後繼機喇。除此之外亦有傳iPhone 14 Pro嘅機背鏡頭比起13 Pro 大5％。不過 按而家流出嘅相嚟睇。似乎就未肯定到呢一點。

為咗避免數據因斷電而受損，最近有電腦配件廠商DockCase，推出一款SSD硬碟盒DOCKCASE 10s。官方聲稱硬碟盒配備咗一粒超級電容。可以喺斷電之後，提供到大約10秒嘅電力，讓SSD有足夠時間寫入10GB數據，並完成Mapping Table更新，避免悲劇發生。DOCKCASE 10s仲有一塊1.33吋LCD屏幕，可以顯示SSD嘅使用狀態以及其他資訊，另外支援USB 3.1 Gen2，寫入速度高達1,050MB/s，並可支援最高2TB嘅M.2 SSD，有USB-A 同 USB-C Port口，售價大約是$855港紙。

Bang & Olufsen 剛發表旗下第一款帶柄式真無線耳機Beoplay EX。官方話呢個設計可以令佩戴感更加穩固，特別適合做運動嘅時候用。譬如跑步或者跳起都唔會好容易跌出嚟，而且支援IP57防塵防水，喺戶外使用都冇問題。另外，耳機採用全新人體工學設計，戴落會更加舒服。機身有黑色、藍黑以及金色可以揀。規格方面呢款耳機採用9.2mm驅動單元，尺寸是現有B&O的真無線耳機中最大，而柄上設有6組收音咪，並支援主動式降噪和藍牙5.2；續航力方面一次叉電可以用到8小時，連埋充電盒就可以用到20小時，並且支援Qi無線。其中碳藍色即日起發售，售價 HK$3,678 包括2年保養。

最近天氣開始熱返，係時侯準備定風扇，又或者掛頸冷氣機。Sony日前就推出第3代的REON POCKET 隨身冷氣機，今次香港終於都有行貨買喇。佢嘅運作原理好簡單，首先會喺機身入面製冷或製熱，再透過一塊貼喺頸部嘅不銹鋼片傳遞溫度。官方話佢最多可以為用家的皮膚溫度降低攝氏13度或增加8.3度；另外亦設有Fan mode。而今代最主要就係增強了冷氣模式，喺App入面 有1 ~ 4 級可以揀。如果直接透過 USB 供電更加可以去到 4+ 級。除咗冷氣 亦都有暖氣，一樣都係有4個唔同嘅級數，冬天都可以用。另外新機亦加入了Auto Start/Auto Stop功能，一戴上頸就會自動開機，亦識得智能調溫，因應用家嘅體溫自動調整風力，當感應到你靜止唔郁和體溫下降的話就會自動熄機。而續航力就達到2至4.5小時，售價為HK$1,499，而家已經可以預訂。

Netflix 發表最新的財政佈告指出上季流失咗將接近20萬用戶，係過去10年首次錄得嘅負增長。佢哋預計情況將會持續，下季甚至有機會流失200萬用戶。Netflix指用戶數下跌由多個內外因素所致。包括Disney+、Amazon Prime Video嘅競爭。以及最近撤出俄羅斯市場嘅決定。而其中一個原因就係因為太多人share帳戶。為了打擊串流寄生族，Netflix指未來一至兩年內將會推出一個月費再平啲，但有廣告嘅訂閱方案，唔知大家又會唔會subscribe喇？

講起串流平台，FIFA日前都宣佈推出串流服務FIFA+，免費為一眾球迷帶嚟超過4萬場足球賽事直播，同埋以現役球星與退休名宿為主角嘅原創節目，FIFA表示4萬場直播包括旗下100個會員國的歐洲頂級聯賽賽事以及一啲以往無直播嘅男、女子或青年賽事；另外仲收錄咗過往世界盃嘅賽事片段，暫時會有英語、法語、德語、葡語和西班牙語可以揀，而其他語言亦會喺今年6月陸續加入。

跟住介紹一款電競Soundbar，係Razer的 Leviathan V2，最大特點係機底加入Chroma RGB LED燈，會將燈光效果投射至檯面，而且燈效可以跟其他Razer電競產品同步，唔會出現各有各閃嘅情況。音效方面配備了兩組2x4"全音域單元，兩組0.75"高音單元同埋1組5.5吋重低音喇叭，尺寸比上代稍為升級，另外亦加入了SPATIAL AUDIO 7.1環迴立體聲技術，相信臨場感會更出色，喺打槍Game嘅時候就可更容易知道敵人嘅位置，而且亦都升級至藍牙5.2，連線會更加穩定，售價大約是$1,960港元，暫時未知幾時喺香港推出。

為咗幫助一啲因為健康問題，而要忍口食得清淡啲嘅朋友，最近一位日本的大學教授就聯同飲品公司麒麟一齊研發出一款可以提升鹹味嘅「增味筷子」，等佢哋可以食得開心啲。呢對筷子的原理是利用微弱嘅電流，將食物入面嘅納離子直接經筷子傳入個口，令人喺唔吸收過量鹽份嘅情況下食到更濃的味道。有臨床實驗就顯示佢可以令鹹味提升 1.5 倍。麒麟表示將會改良呢對筷子有望在2023 年推出市面。