【#香港重有冇】香港重有冇港英時期遺留落嚟嘅橢圓柱形郵筒？圓柱形郵筒上面嘅圖案係乜嘢意思？— Google Map 不會告訴你的事 EPISODE NO.4

《Google Map 不會告訴你的事》
Hello大家好，我係阿肥，歡迎嚟到Google Map不會告訴你的事之香港重有冇。一講起香港嘅郵筒，後生嘅可能就會諗起方形嘅郵筒，而老一輩嘅香港人可能就會諗起圓柱形嘅嗰一款。方形郵筒大家就見得多，圓柱形郵筒而家就越嚟越少見喇。但係有一款橢圓柱形郵筒大家又見過未呢?不如就等我問吓附近嘅人，睇下佢哋見過呢一隻郵筒未呀。

阿肥：你好啊，介唔介意我問你幾個問題啊?好快架咋。
受訪者：唔好啦，唔好啦，多謝。

(另一位受訪者)
阿肥：你好啊，介唔介意幫我做個訪問啊?
受訪者: (沉默離開)
阿肥：唔該你。

(過咗一段時間後，有一名男性願意受訪，女同行者猶疑要不要入鏡)
阿肥：可以一齊㗎喎，可以一齊㗎喎，黎啦。
(同行者願意入鏡接受訪問)
阿肥：我想問呢，你地而家重會唔會用郵筒嚟寄信?
受訪者與女同行者:會啊。
(被問及郵筒嘅顏色及形狀)
受訪者：綠色囉，圓筒形囉。
女同行者: 綠色，但係方形。
(被問有冇見過橢圓柱嘅郵筒)
受訪者：冇。

(另一位女性受訪者及女性同行者)
受訪者:會啊
同行者:唔洗㗎喎…公司可以直接幫手寄埋。
(被問及有冇見過圓柱形嘅郵筒)
同行者：係唔係以前有一隻紅色圓柱形㗎?係咪嗰隻呀?
阿肥：嗯，你有冇見過?
受訪者：好似有

(另一位受訪者，男性)
受訪者:唔會…好少可，都係用EMail或者Message多
(被問及郵筒嘅顏色及形狀)
受訪者：嗰啲紅色好似消防嗰啲水管嗰啲色，不過主要而家都係綠色方形為主。
阿肥:有冇見過一款圓柱形嘅郵筒呀?
受訪者：我見喺香港嘅話，啲人話好似英國時期嗰隻舊款，但係我自己冇睇過，相就有見過。

(另一位受訪者，女小學生)
阿肥：你覺得郵筒係啲咩顏色或者咩形狀啊?
受訪者：綠色，跟住一個長方形但係上面係圓嘅。
(被問有冇見過橢圓柱嘅郵筒)
受訪者：冇。

(另一位受訪者，男性)
阿肥：咁有一款橢圓柱形嘅郵筒你見過未呢?
受訪者：橢圓柱?無乜印象。

(多人被問被問有冇見過橢圓柱嘅郵筒，都回答冇。)

《訪問完畢》
問咗唔同嘅人之後，佢哋嘅意見都幾符合我嘅想像。但係其實我一早就知道全香港唯一一個橢圓柱形郵筒喺邊，位置都唔係好難搵嘅啫，就係喺我而家身處嘅中環喇。

中環，我相信大家都唔會覺得陌生㗎喇。而遮打道呢一度更加可以話係中環嘅標誌性地帶添。IQ題都有問啦，星期日邊度最多菲律賓人啊? 我諗，除咗菲律賓之外，最多菲律賓人嘅地方應該就係呢度喇。而除咗呢樣嘢之外，遮打道上面重有好多標誌性嘅建築物，例如皇后像廣場、和平紀念碑、終審法院大樓同埋遮打花園。

「遮打」呢個名大家就聽得多啊，唔知大家又知唔知「遮打」係邊一個呢?其實遮打爵士就係一位活躍喺十九世紀末至到二十世紀初期嘅亞美尼亞裔香港商人。佢曾經出任過立法局同埋行政局非官守議員，亦都創辦咗九倉同埋置地，並協助蘇格蘭籍醫生白文遜爵士成立牛奶公司，同時亦都係香港賽馬會嘅創會成員之一，由1892年開始擔任馬會主席直到佢逝世。就係因為遮打爵士喺19世紀末至20世紀初喺香港政商界都極具影響力，所以香港就有好多嘢都以佢個名嚟命名，而遮打道就係其中之一喇。

介紹完遮打道之後，當然就要講返正題喇。不如就等我介紹吓我身邊嘅呢個郵筒。呢個就係全香港唯一一個僅存嘅橢圓柱形郵筒，郵筒編號係239號。不過大家有冇發現呢個郵筒同大家想像之中港英時期遺留落嚟嘅郵筒有啲唔同呢?最大嘅分別就係佢下面嘅呢個皇冠喇。呢個239號郵筒係雙口雙袋設計，同你哋喺香港見到嘅圓柱形郵筒有啲唔同。不過呢種橢圓形郵筒喺倫敦街頭其實係十分之常見嘅。但係如果細心留意嘅話，你哋會發現喺倫敦街頭嘅嗰一款對比起香港呢一個，除咗顏色唔同之外，倫敦嘅嗰一款上面有啲字重有皇冠都係唔同嘅，但係香港呢個係冇架喎。其實係香港呢一個郵筒係來自蘇格蘭格拉斯哥鑄造嘅，而筒身上面嘅皇冠就係蘇格蘭皇冠嚟。(註：而係顏色上，香港嘅239號郵筒係綠色，而喺倫敦嘅係紅色。)

之所以會用上蘇格蘭皇冠，亦都係因為避免蘇格蘭境內對英國皇室嘅反感，就好似1952年後嘅幾年之間，有好多伊利莎白二世皇朝徽號嘅郵筒被塗污以及用土製炸彈炸毀。咁所以由嗰陣時開始蘇格蘭呢個地方所使用嘅郵筒就變哂做蘇格蘭皇冠。呢個就係點解你喺倫敦街頭嘅郵筒上面會見到唔同嘅字同埋唔同嘅皇冠，原因就係嗰啲字係伊利莎白二世皇朝徽號，啫係「ER II」，代表住呢個郵筒係伊利沙伯二世時期鑄造嘅，上面嘅皇冠就係英格蘭皇冠。而香港呢一個就係蘇格蘭皇冠喇。

咁姐係話，其實239號郵筒係因為機緣巧合之下喺七十年代由蘇格蘭運送過嚟香港嘅。而同行嘅重有238號郵筒，同樣地都係由蘇格蘭格拉斯哥鑄造嘅橢圓柱形郵筒嚟。238號郵筒原本就豎立喺過兩條街，中環嘅皇后大道中萬邦行出面嘅啫。不過好可惜嘅喺238號郵筒喺1997年6月5日就正式被移除，換成嘅就係呢個玻璃纖維製嘅方箱型郵筒。就係咁，239號郵筒就成為咗全香港唯一一個橢圓柱形郵筒喇。

其實而係全香港大約有1150個街道郵筒，當中大部分都係方箱形嘅玻璃纖維郵筒，只係得返少部分嘅生鐵鑄造嘅古郵筒，大約係有59個。亦都只係得返極少數港英時期遺留返落嚟嘅紅色古郵筒仍然服緊役。現時一共有五個古郵筒作為展示用途，郵政總局郵展廊以及香港歷史博物館就各佔兩個，而淨返嗰一個就放咗喺赤柱郵政局嘅外牆。不過我諗大家都知道嘅係，隨住主旋律之下去殖民化嘅行動，好多具有港英色彩嘅公共設施慢慢消失喺香港嘅城市面貌之中。究竟呢一個係代表反殖民嘅進步行動，定係一個代表重塑歷史，掌控歷史話語權嘅行動呢?呢個就要留返俾各位看倌自行判斷喇。

無論係郵筒定係郵政局，或者我哋無辦法煞停呢個碾壓一切嘅時代巨輪，但係只要我哋明白身邊嘅所有事物其實都有一種存在嘅意義，咁就可以喇。而就好似呢個郵筒咁，除咗寄信呢種功能性用途之外，其實佢都記錄住時代嘅變遷，係你同我身處喺呢一個城市嘅一種歷史見證。唔知喺呢啲隨年月消逝嘅事物上面，你又會記得啲咩呢?今集Google Map不會告訴你的事之香港重有無就嚟到呢度先，我係阿肥，我哋下次再見喇，Byebye。