🎬 呃LOVE天團 | 影評 | 直接了當不多廢話 從亞洲喜劇看港產喜劇的未來 點解香港愈來愈冇好喜劇？【Now E之選】S2 E4 | Sam先生🎬

而這套《呃love天團》就係走一個老千+愛情+喜劇嘅套路，佢嘅故事係講述女主角Ina被前男友Petch欺騙感情同埋金錢，之後陰差陽錯認識咗一位職業騙子Tower，更決定同Tower合作向前男友展開報復嘅行騙行動。就噉睇電影嘅簡介，其實《呃love天團》嘅故事並唔複雜，佢嘅故事套路更加可以話係有啲老土添，仲有啲八、九十年代嗰種搞笑老千團隊，懷舊港產片嘅感覺。我覺得呢，電影第一個做得好唔錯嘅地方就係佢夠曬直接了當，唔多廢話，一開始好快已經入咗局，頭一場就用上女主角自拍YouTube片，晌交代角色背景嘅同時表現出佢嘅性格，再藉由呢條片去帶出，佢之前被人欺騙感情，人財兩失嘅過去。之后，遇到男主角嘅戲份，亦都合情合理，非常之自然咁發生。《呃love天團》並無好多同類型電影嘅通病，加插一堆同角色、故事完全冇關係，不合情理嘅情節。

而電影主要嘅角色就係海報上面嘅哩幾個（富貴姨姨、偽能大叔、讀唇癲才、偷心鮮肉、精算BB），佢哋都係主角騙子團隊嘅成員，加上嗰位女主角想復仇對象：食拖鞋飯嘅感情騙子。電影裡面嗰位包養感情騙子嘅旅行社老闆娘，更加樣都冇出過添，從以上提到嘅呢啲，你就可以知道呢套電影，係非常之專注晌復仇大計嘅嗰幾場騙局入面，這種輕快嘅節奏，唔多支節嘅故事就可以令到觀眾更加快投入晌電影嘅劇本故事，同埋嗰啲騙局嘅緊張感，同埋一啲編排得好好嘅笑位裡面。另外一個我幾欣賞呢套電影嘅地方，就係佢嘅笑位編排，基本上都係同呢一個故事需要執行嘅騙局啦，同埋角色係有關係架。佢唔係一心只喺想玩低俗、用荒謬嘅橋段去引你笑。就算晌電影裡面有啲笑位未必督中到你嘅笑點都好，你都唔會覺得反感。當然騙子愛上女主角，幫佢向前度復仇嘅呢一個故事套路呢，認真就係無乜新意㗎啦。

而主角所安排嘅騙局，亦都唔算話毫無破綻、精彩絕倫，但係只係以老千電影所營造出嚟嘅緊張感同埋愛情喜劇嗰種慢慢累積起嚟嘅情感嚟評價嘅話。《呃love天團》係一套好值得一睇，想咩都唔諗自己一個人，或者同男女朋友，甚至全家一齊睇嘅輕鬆喜劇嚟㗎。

而在睇完呢套泰國電影《呃love天團》之後，其實唔算話有好多嘢可以詳細評論，因為佢目標非常之清晰，太過直接了當，係一部想娛樂大家之餘又要少少想反映當時人民生活嘅喜劇作品嚟㗎。而呢套電影呢亦都令我諗翻起，之前睇嘅一套韓國電影作品——炸雞特攻隊。我喺睇完呢兩套各自嚟自亞洲唔同地方喜劇嘅時候，腦裏面呢都會同樣浮現出一個問題，就係香港嘅喜劇呀，究竟何去何從呢？而呢個亦都係我同唔少會員，同埋電影愛好者之間，成日都會拎出嚟討論嘅問題。

要數到港產片嘅經典電影，喜劇係其中一個好重要嘅部分，《家有囍事》、《半斤八兩》，《東成西就》、《國產凌凌漆》、《精裝追女仔》、《富貴逼人》等等，都係一啲可以一睇再睇笑完又笑嘅作品。周星馳、許冠文、馮淬帆、吳耀漢、吳孟達、麥加等等，都係一啲非常之好嘅喜劇演員。當然呢，就算係其他類型嘅作品，好似警匪片、愛情片，甚至鬼片都好啦，都好似好自然噉可以將喜劇元素融入晌呢一啲電影裡面，好容易呢，就令到觀眾可以晌電影裡面得到滿滿嘅娛樂同埋放鬆。而去到後期嘅《壢咕壢咕新年財》，《金雞》、《龍咁威》、《少林足球》、《志明與春嬌》、《低俗喜劇》等等，雖然同樣都係一啲好好嘅作品，但整體嘅產量上面都已經不可同日而語，如果你再睇翻近呢五六年嘅港產片嘅話，你會發現「喜劇」呢一個以前隨處可見嘅元素，每年都越嚟越少，甚至乎品質都低咗好多，更加有好多人錯誤地將「無稽」變成「無厘頭」，以為自己同樣都係玩「屎尿屁」，「少少咸多多趣」。講兩句「潮語」，又或者「粗口」就以為自己好好笑。近年，最令到我有呢種感覺嘅，當然就係嗰堆咩《我愛香港開心萬歲》、《恭喜八婆》、《囍事輪迴》系列等等啦。

我覺得港產片裏面喜劇嘅呢個元素不斷咁沒落，其實同香港嘅整個電影工業有着莫大嘅關係，喜劇呢其實係一樣，由「發送」同埋「接收」兩樣嘢組合而成嘅藝術嚟㗎，即係當表演者掉咗一個，我哋俗稱為笑點、幽默嘅位，要決定呢一個位成唔成功就好睇「接收者」，即係我哋觀眾能唔能夠明白、感受、聯想到戲劇表演者嘅心思、設計，而笑點嘅效果，亦都同接收者嘅文化背景、知識修養、個人性格等等有關係。所以，你可以話喜劇係一門好難嘅藝術，但係呢，我認為佢亦都可以係一門好簡單嘅藝術。喜劇有無數咁多嘅表現形式，好似《少林足球》裡面嘅肢體，《龍咁威》裏面嘅對白說話、《低俗喜劇》當中嘅情節、《東成西就》裏面嘅狀態等等。當喜劇呢一個元素可以晌無數咁多嘅地方展現出嚟，我哋就可以去思考一下，點解「喜劇」會晌近年嘅港產片裡面消失得無影無蹤，但同時你會發現其他國家嘅電影都能夠，以一啲通俗到全亞洲甚或至係全世界，都能夠明白同埋理解嘅喜劇去征服觀眾，同埋斬獲票房，但係點解偏偏香港嘅喜劇就越嚟越難笑呢？

我哋頭先提到啦，喜劇好唔好笑，其實基本上好睇表現出嚟嘅人，同接收呢一啲笑點設計嘅觀眾，能唔能夠達成連結，而港產片嘅喜劇之所以越嚟越唔好笑，好大程度係因為表演呢啲喜劇嘅人，都仲保留住上一個世代嘅心態啦，同埋思維。就好似呢一啲不合時宜嘅笑位設計，第一次聽「吳準笑」就會覺得好好笑，但係到咗2022年，仲聽到一啲角色名諧音嘅笑位，我諗你呢，真係會好想打爆個Mon，又或者將網上一啲抄返嚟嘅爛gag、潮語、金句啦，搵一個完全唔明呢一句嘢啱唔啱嘅人去講出嚟。這些演出錯配，又或者同觀眾Synchronize唔到嘅表現方法，就係近年喜劇質素愈見低下嘅主要原因，一部喜劇其實只需要一啲好嘅笑點，好嘅橋段設計，再加上一班充分理解呢一個年代觀眾嘅表演者，整體出到嚟已經唔會太差，喜劇呢亦都唔需要好似警匪片、犯罪片噉，投資咁大，老實講呀，其實喜劇係好有可能成為港產片其中一個未來嘅方向，可惜嘅係香港電影工業仲係停留緊晌舊思維，唔敢再去做一啲新嘅嘗試，我睇完《呃love天團》呢一套簡簡單單、笑位貼地嘅泰國電影之後，我就更加希望未來可以有更多出色嘅港產喜劇。

好啦，嚟到最後同大家介紹下，今個月晌Now E上面有啲咩必睇嘅「重點推介」啦！導演濱口龍介可以話係日本電影最炙手可熱嘅名字，除咗拿到奧斯卡最佳外語電影的《Drive my Car》之外，另外一套呢，就係《偶然與想象》，電影由三個短故事所組成，以《偶然》同《想像》晌再日常不過嘅生活里面，拼湊出三個充滿意外、與別不同、編排得非常之精彩嘅故事。我好鍾意呢套電影嘅劇情同埋角色都游走晌一種錯摸同埋不確定性裏面。但同時又具有一種思考人生路向、再次認識自己嘅力量。而濱口龍介另一套代表作品《Drive My Car》亦都晌Now E Video Express 上可以租啦！仲唔快啲一次過感受濱口龍介嘅電影魅力？

另一套想推介畀大家嘅就係大熱韓劇《Again My Life》，佢嘅劇情係講述由李準基飾演嘅檢察官金熙宇，晌某一次調查貪腐政客嘅時候遇害，然而死神畀咗佢一次重生嘅機會，佢帶住記憶返到去15年前展開第二次嘅人生，誓要將壞人繩之於法，我覺得係計《少年法庭》之後，另外一套比較吸引嘅韓國劇集。

其實我一開始喺晌《呃love天團》，同埋呢一套《Worth 911算命律師》之間揀一套嚟做今集嘅主題。上年年尾晌戲院睇到呢一套《Worth》嘅Trailer已經幾有趣㗎啦。同樣係一套後911嘅電影作品，以911遇難者嘅賠償爭議作為故事背景，「究竟人命值幾多錢呢」、「唔同階級、唔同收入嘅人喺理賠上面，又會唔會有分別？」故事以探討這些問題，去令觀眾感受到遇難者家屬嘅處境，思考悲劇過後嘅遺憾。Michael Keaton同埋 Stanley Tucci 兩個嘅演出亦都非常之有吸引力。如果鍾意這類反映社會人性電影嘅朋友就記得唔好錯過啦。